Doctor awmsa te’n doctor lak belh ringawt lovin khawl tha an mamawh, an mamawhna phuhruk thuai a beiseiawm

18121080_1510222899028419_640169557402170859.jpg
Health Minister Lal Thanzara’n Aizawl Civil Hospital-ah cabin thar leh hmanraw chi hrang hrang a hawng (Thlalatu: ALFRED VANCHHAWNG) (26/04/2017)

Champhaia doctor dah belh ngiat avanga buaina chhuak chungchangah hmun hrang hranga awm sorkar doctor te pawh anmahni zingah an titi ve nasa hle a, anni chuan doctor ngiat kalpui danah a tlangpuiin thil kim fumfe lo a awm niin an hria a, doctor dah belh ringawt ni lovin doctor te’n an mamawh khawl te leh anmahni pui tur hnathawk te dah belh ngiat a nih si loh chuan awmze thui tak a nei lo thin niin an sawi a.
Hmun hrang hrangah hetiang hi harsatna a lo ni fo tawh thin reng a ni.

District hospital pakhat ah chuan mi zai thiam (surgeon) awm mahsela, hnimhlun doctor (anaesthetist) a awm miau loh avangin surgeon chuan mi a zai thei ngawt si lova, a awmna ah chuan damlohna tenau deuh te chauh enkawl theiin a khawsa a, aman a enkawl theih ngei ngei damlo te pawh hnimhlum pe tur a awm loh avangin hmun dangah a refer mai zel a ngai thin.

“Hman deuh kha chuan surgeon te hian damlo chu hnimhlum an pe mai thin a. Mahse, khawvel a lo changkang zel a, mipui an lo fing ve zel bawk si a. Tunlai chuan surgeon-in hnimhlum chu pe thei in pe thiam mahsela, tih chi a ni tawh lo. Engemaw kal sual palh a awmin a mawhphurhna a sang dawn em vang a ni,” tiin doctor pakhat chuan The Frontier Despatch (TFD) a hrilh.

District Hospital pakhata sorkar doctor TFD in a biak chuan doctor te khawl mamawh te leh damlo enkawlna-a puitu tur midang an awm miau loh chuan mistiri, tuboh leh perek tel lova hnathawh tir tum ang vel a ni a ti a, hmun thenkhatah chuan ruh zai thiam doctor (orthopaedic surgeon) te’n hmanrua an neih miau loh avangin ruh tliak tuam ngawt bak chu eng an ti thei chuang lo niin a sawi bawk.

“Doctor kan ni a, professional kan ni a, kan thiamna te kan hman tangkai theih lohna hmunah chuan awm reng a manhla lo ve bawk a. Keimahni thiamna zawngah damlo enkawl tur an awm loh emaw, enkawl thei lo-a kan awm chuan hun rei vak lo ah kan thiamna te a bil ve thei a,” tiin doctor pakhat chu a vui a.

Doctor-in hmun khata hna tha taka a thawh dawn chuan a mamawh hmanrua leina tur atan motor tha tawk tak man hu tal chu sorkarin a sen a ngai a, chu ai pawh chuan sen ngai a tam daih maithei a ti.

Mahse, sorkar tum dan a kal tluang a nih chuan tun atanga hun rei lo te ah hetiang khawl hrang hrang te chu District Hospital leh Falkawn-a Referral Hospital-ah bun a ni dawn hnai niin a lang.

Kumin February thla khan Health Department chuan short tender notice pahnih a chhuah a. A hmasa zawk chu February 10 khan tih chhuah a ni a, hei hi District Hospital hrang hrangaa Hospital Instruments NEDP hnuaia leina tur a ni a.

He tender hian district hospital pariata dah tur hmanrua chi hrang hrang – X-ray machine, colposcope, endoscope leh Ultrasound khawl atanga doctor in damlo te awm an enna stethoscope leh syringe hman hnu paihna tur thlengin a huam.

Tender atanga a lan dan chuan Champhai atan khawl leh hmanrua chi hrang 48, Mamit atan 47, Siaha atan 45, Serchhip atan 29, Aizawl leh Kolasib atan 22 ve ve leh Lunglei atan 13 a ni a. Khawl leh hmanraw lian deuh te chu pahnih khat ang zela lei tur a nih laiin a te tham te chu engemawzat, a then phei chu za tel te lei tura ruahman a ni thung.
Tender chhuah hnuhnung zawk hi February 28-a tih chhuah niin hei hi NEDP hnuaia Referral Hospital, Falkawna hmanrua leh bungraw hrang hrang dang leina tur a ni a, tender-a a lan dan chuan department 21 tan hmanrua chi hrang 300 chuang lei tum a ni.
TFD thu dawn dan chuan March thla khan hetiang khawl leh hmanrua chi hrang hrang te lei dan turah Health Department hotute Chief Secretary hovin an thu khawm a, tender chhanna chi hrang hrang te chu sawiho niin a hmangtu tur doctor te pawh an khawl duhzawng thlang tura tih an ni nghe nghe a.

Heng meeting-a tel ve pakhat chuan hetiang hi thil thleng ngai vak lo a ni a, doctor te’n an duh ang an sawi te man to deuh mahsela chhinchhiah zel an ni a ti a. Mahse, heng khawl leh hmanrua te hi lei an ni tawh em tih erawh hriat theih a la ni lo a, hospital hrang hrang hotute chuan an la dawng lem lo tiin TFD an hrilh.

Hetianga khawl leh hmanrua engemaw zat lei a nih dawn lai leh Champhai lamah Health Department hmingchhiatna a thlen hnu lawk hian Health Minister Lal Thanzara chuan Aizawl Civil Hospital ah khawl, hmanrua leh damlo enkawlna hmun tur chi hrang hrang April 26 khan a hawng a. A khawl hawn te erawh hi chu pawl leh mimal in hospital an pek te an ni hlawm tih sorkar thu chhuahin a tarlang a.

He hawnna inkhawm ah hian Health Minister chuan “Mipuite hrilselna tur leh damlote enkawlna kawnga hmanraw pawimawh leh thawktu te bakah doctor te Mizoram chhunga damdawi in leh Health Centre ah te dah tum a nih laiin kawng thenkhatah harsatna a awm leh thin avangin duh angin hmalak chak a harsat phah a. Heng sukiang tur hian sorkar chuan hmasawn turin hma a la reng a, tunah pawh mamawhna a nasat avanga doctor engemaw zah lak belh vat tur a ni,” a ti niin thu chhuah chuan a sawi bawk a.

February thla-a tender chhuah te hi tih puitling a nih hunah chuan hmanraw pawimawh chi hrang hrang hawn belh tur a awm nual dawn niin a lang.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s