Doctor indaih loh vangin hmun hrang hrangah lungawi lohna, chhiatna thleng fo tawh thin

IMG-20161012-WA0003
Hnahthial khatlangin October 2016-a Dr Lalrengpuii Ralte an sawn tur kal phal lovin an dang

 

Nikum October thla chawhma lam khan Hnahthial khaw mipui thahnem tak chu sorkar doctor chenna in bulah an pungkhawm a, doctor chungchanga lungawilohna lantir ah chuan a danglam pawl ani awm e.

Hnahthial khaw mipuite chuan khatih laia Hnahthial CHC-a doctor thawklai, Dr Lalrengpuii Ralte Tlabunga sawn ani tur chu an ngaithiam lo hle a, a hma hun reilote pawhin khawtlang hruaitute – Congress block President tiam in – chu Aizawlah zin in an khaw doctor pathum zinga pakhat hi sawn anih loh nan Health Minister Lal Thanzara an lo ngen tawh nghe nghe a ni.

Khatih hunlaia Hnahthial khawtlang hruaitute sawi dan chuan Dr Lalrengpuii sawn chhuah anih dawn vanga an lungawi lohna chhan pakhat chu an khua-a doctor awm dang pahnih chu sawn chhuah ve tho tura hriat lawk sa an nih vang ani a. Heng doctor pahnih te hi a nghet lova thawk ve ve an nih bakah, pakhat zawk chuan sawn chhuah ani dawn tih a hre tawh a, pakhat zawk erawh chu zirna sang chhunzawm tura inbuatsaih mek ani bawk a.

Chutih rualin, Hnahthial atanga km 150 vel a hla Tlabungah chuan Dr Lalrengpuii transfer order hi khawtlangin an lawmpui hle thung a. Sikserh tamna hmun Tlabungah hian a hma kum engemawzat liam ta atangin doctor duhkhawp an awm lo tawh reng a, doctor panga aia tlem lo chu thlaktu awm lovin sawn chhuah an ni tawh a, khum 30 awmna Tlabung CHC ah chuan doctor pahnih (AYUSH doctor tiamin) chauh hetih lai hian an awm a, doctor thar dah ani tur chu khawtlang lawm chhan pakhat a ni a.

Khawtlang chu sawi loh, Mizoram leh Bangladesh in ri na hung hna thawktu company te pawhin an hnathawkte damlohna in a tlakbuak thin avangin state sorkar Tlabunga doctor dah turin an lo ngiat thin ve tawh bawk a ni.

Nikum kumtir atanga khatianga Dr Lalrengpuii sorkarin Tlabunga a sawn dawn lai thleng khan Tlabungah sirserh natna vei 685 lai hmuchhuah an lo ni tawh a, an zinga pali aia tem lo chu an boral phah tawh bawk a.. A kum hmasa lam (2015) phei kha chuan sikserh vangin mi paruk an boral tawh a, tualchhunga sikserh vanga boral zawng zawng hmun thuma then a hmun khat an luah pha nghe nghe ani.

Hetianga doctor sawn anih tur thu a Hnahthial leh Tlabung khawtlang te rilru inanglo taka an awm hnu, thla hnih la liam hma in Ngopa khawtlang chuan doctor indaihloh chungchangah aw an chhuah ve leh a, an thuchhuah chuan Ngopa CHC ah doctor a awm loh vangin khaw mi paruk (6) aia tlem lo an boral tawh thu an sawi a.

The Frontier Despatch (TFD) in a lo tarlan tawh angin, boral zingah hian Ngopa a sikul zirtirtu Lalremruata nupui, a fa pai lai leh Lalremruata nu te an tel a.

Lalremruata sawi dan chuan nikum April 7 khan a nupui Zorammawii, 33, pum chu a na thut a. CHC pan vat mahsela, doctor awm chhun chu training-in a hmun dangah a kal bo a.

“CHC kan thlen hnu lawk hian ka nupui chu a thi a put chiam a, nurse duty chuan damdawiin hnai berah kal vat turin min hrilh a, Aizawl panin kan chhuak nghal a, mahse, ka nupui chu Dulte leh Keifanga inkarah a boral ta ani, “ tiin Lalremruata chuan a sawi a.

Hetianga a nupui leh an fa la piang lo a chan hnu thla lie maw chauhah Lalremruata te chhungkua chuan chhiat an tawk leh a. Lalremruata nu Lalpari, kum 71 mi chu kum 2015 September thla atang khan khumbetin a lo na ve tawh reng a. CHC ah hian admit ni lo mahse a chhungte’n CHC-a doctor rawn in enkawl dan tura a tih thin angin in lamah an enkawl mai thin a. That lam a pan loh reng hnu in October ni 18, Ngopaa doctor awm chhun sawn chhuah anih hnu kart hum emaw chauh ah a boral ve ta ani.

“Kan khaw CHC ah hian doctor chu awm sela, ka nupui, a nau pai lai leh ka nu te hi a chhan theih ngei chu ka beisei reng ani,” tiin zirtirtu Lalremruata chuan a sawi.

Anni pathum bakah hian kum 38 mi Joseph K Lalramsanga, lung thalo, CHC-a doctor awm loh vanga nurse in oxygen pek bak chu enkawl ngaihna a hriat loh leh Aizawla doctor an biak te’n amah hmu lova damdawi chawh ngawt an ngam si loh, November 18-a boral ta a tel bawk a.

Tin, kum 75-mi Rokhama, a ban leh a ke na a tih em em bakah thawk a harsat hnu a CHC-a an hruai, mahse doctor awm miau loh vanga nurse-in nachhawkna pek bak a a enkawl thiam si loh, CHC-a luh zana boral ta mai te an tel a ni.

Rokhama tupa V Lalthanzama phei chuan, “Kan dam leh kan thih chu Pathian thu thu ani a, mahse CHC-ah hian doctor chu awm sela ka pu hi a boral bik ka ring lo,” a ti hial a, chu chu lusun chhungte dang pawhin an sawi dan tlangpui tho.

Kum chanve em pawh a la liam lo tih ah CHC aia u, District Hospital awmna Champhai ah doctor awm loh vang ni a sawi vangin naupai hmeichhe pakhat a boral leh a, tunhnaia Mizoram khawchhak lama khawpui lian bera doctor dah belh ngiata buaina nasa tak chhuah tak chhan pakhatah sawi tel a ni leh ta bawk a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s