“Hmanhmawh”-a doctor 26 lak tur June thla laihawl aia hma a lak fel beisei awm loh: MPSC Chairman

Champhaia buaina a chhuah avangin sorkar chuan “hmanhmawh” takin doctor 26 lâk a remti a, tun kar hian Secretariat in an buaipui nghal chuk chuk a. Mahse, Health Department hnuaia thawk te chuan “hmanhmawh”-a doctor lâk tur tih te hi post ruak awm sa hnawh khahna tur a ni tiin, nikum lam atanga hnawhkhat tura an lo buaipui sa tawh hrim hrim a nih thu an sawi

 

IMG-20170421-WA0007
Champhai Vengsangah police leh mipui, doctor dah belh ngiat an in ep (Thlalatu: JACOB KHAWLHRING)

 

Champhai MZP hmalakna-a an District Hospital-a doctor dah belh ngiata lungawi lohna lantir a nih vangin leh buaina a chhuah tak avangin sorkar chuan doctor lâk thar turte chu a rang thei ang bera lâk an nih theih nan hma a la a, hmanhmawh viau mahse, doctor lâk an nih meuh chuan thla khat emaw a liam hman rin a ni.

Hemi chungchangah hian MPSC Chairman PC Lawmkunga chuan sorkar in doctor hi la tura MPSC a tih angin MPSC chuan a la dawn a ni tih The Frontier Despatch (TFD)  a hrilh a. Sorkar atanga hriattirna an dawn hunah chanchinbu ah doctor post ruak dil theih thu an chhuah nghal dawn niin a sawi a.

“Sorkar atanga hriattirna kan dawn hunah chanchinbu ah hriattirna kan chhuah nghal ang a, a dil duh tan ni 15 atanga 20 inkar dil theih hun kan hawng ang a, chumi hnu ah a dil te dilna endik a, kan dân neihte nen a inmil em tih kan endik leh hnu ah a tak taka lâk theih hun chu June thla laihawl vel a ni thei chauh ka ring,” a ti.

Kar hmasa kar tawpa Champhaia doctor dah belh phût vanga boruak a so san lai khan Aizawlah Home Minister leh Health Minister hovin department hrang hrang hotute an thu khawm a, “Doctor 26 lâk tur te hi a rang thei ang bera lâk ni rawh se, heng doctor lâk tur te hi a hmanhmawh thlâk avangin interview-a lâk mai ni rawh se, karleh chhung hian tih tur tul te department concern-te’n lo tifel vek se, MPSC ah a rangthei ang bera pêk ni rawh se, heng doctor lâk tur te hi a tul dan a zirin mamawh zualna hospital – Champhai, Mamit, Kolasib, Siaha, Lawngtlai, Chawngte, Tlabung leh a dang te – ah dah ni rawh se,” tih te a rel a.

Thutlukna siam a nih hma lawk hian Champhaia doctor dah belh ngiatna-a hmalatu ber MZP chu hetiang ang hian sorkarin thu a lo tiam bawk a, mahse, “Doctor lâk thar tur 26 zingah naupang doctor an awm a nih chuan Champhaiah dah a ni ang a, dil an awm loh chuan hmun dang ami Champhai ah sawn a ni ang,” tih chu lungawi thlakah ngai lovin pungkhawm thinrim thenkhat te chuan Circuit House an suasam a, hetah hian YMA-in ban a phar hnu ah boruak a dai zui a nih kha.

Sorkarin hmanhmawh thilthu-a doctor an lâk thar turah paediatrician (naupang doctor) an awm loh pawha district danga thawk lai Champhaia sawn an nih mai tur thu a sawi chu Joint Action Committee, chawpchilh taka din chawp, Champhaia pawl hrang hrang telna meeting chuan a hnawl bawk a, “Transfer Order hi nep kan ti, Champhai in doctor kan mamawh zat hi karleh chhungin Champhai an rawn thleng ngei tur a ni. Zirlai naupang hliam tuarte hi sorkar in zangnadawmna pe rawh se,” tiin resolution ah an ziak a.

Mizoram sorkar hnuaiah tunah hian Specialist post pakhat, MO post 23 leh Public Health ah post thum (a vaiin post 27) a ruak a, tunah hian sorkar chuan MO post 23 leh Public Health post thum ruak hnawhkhat turin hma a la mek a.

Hemi chungchangah hian Health Secretariat atanga TFD thu dawn danin, tunah hian buaipui ngaite buaipui mek a ni a, tunkar chhungin heng post ruak 26 hnawhkhat tur hian MPSC ah ah pek hman turin tan an la niin an sawi.

Hetih lai hian Health Department-a thawkte chuan heng post ruak hnawhkhat tumna hi nikum lam atanga kal tawh a nih thu an sawi a. Thawktu thenkhat chuan hetianga post hnawhkhah a nih ringawt vang hian doctor an tam belh dawn chuang lo an ti a, doctor lâk te chu contract-a thawk lai mek an nih an rinawm tiin, post hnawhkhah a nih avang hian an hnathawh kawngah an zia phah dawn mai an ti a.

“Thlirlawk thiam dan a harsa,” tiin, doctor, a ngheta lâk thar te hian contract doctor te ai chuan district leh thingtlanga posting chu zawm an hreh loh phah deuh a nih pawhin, chu chu chiang taka sawi theih a ni chiah chuang lo an ti bawk.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s