Tualchhung Lawrkhawm/April 20–26, 2017

Champhaiah Addl District and Sessions Judge Court hawng

April 21 khan Champhaiah Additional District & Sessions Judge Court chu Gauhati High Court Chief Justice Justice Ajit Singh leh Law Minister Lalsawta  ten an hawng a, he Court-a thu turin R. Vanlalvena, Addl District & Sessions Judge chu ruatfel tawh a ni.

Hawnna inkhawmah hian Mizoram Portfolio Judge Justice Michael Zothankhuma bakah Champhaia Sessions court awm duh tu tlawmngai pawl hrang hrang hruaitu te an tel ve.

GHC CJ Justice Ajit Singh-a’n Champhai chu kawng hrang hranga district pawimawh tak anih thu leh insumdawn tawnna hmun a nih avangin  ruihhlo tawhlrukna leh sualna hrang hrang a punlun zel nia a lan thu leh dan leh thupek kenkawh kawngah awlsawm zawka Court rorelna neih anih theihna turin Addl District & Sessions Judge Court chu ruahman a nih thu a sawi niin sorkar thuchhuah in a tarlang a.

Law Minister Lalsawta pawhin thu sawiin Sessions Judge Court chu Judiciary leh Executive thuneihna tangdun rahchhuah niin a sawi a, Lalsawta chuan Court chu misual hremna lam chauh ni lovin dikna hailan bakah sual a tlem theihna tura rorelna in pawimawh tak a nih thu a sawi a, Champhai District in tangkai taka a hman ngei a beisei niin sorkar thuchhuah in a tarlang.Thuchhuah chuan Court hi Mizoram Sawrkar in cheng nuai 33.21 senga IIDC Complex Zote ah Building 4 dingsa cheitha a a siam a ni a ti bawk.

 

Aizawlah tui sa intihbuak palh vanga kang  tam ber, thal/thlasik laiin kang vanga damdawiin lut thahnem

District Hospital Aizawl a kum nga chhunga kangmei vanga admit-te zirchianna chuan kum nga chhung hian kangmei vanga na tuar sawmsarih-pariat vel enkawl tawh an awm niin a tarlang a, a tam ber chu thal/thlasik, November leh March inkara kang tuar an ni a, July thla chu kang tuar enkawl ngai an tlem ber thla a ni thung.

He zirchianna hi National Academy of Burns India (NABI) leh Indian Medical Association (Mizoram State Branch) te’n April 21 khan Aijal Club conference centre-ah an sawiho.

Hemi huna doctor kalkhawm te chuan kang tuar te hi damdawiin a hruai a drip khai vat hi thihna pumpelh nan a thil pawimawh ber pakhat a ni an ti a, mahse, drip khai ngaih leh ngaih loh hi formula hmanga chhut thin a ni a, drip khai kher a ngaihloh na pawh a awm ve thei bawk an ti,

Zirchianna hian kum nga kalta chhung khan District Hospital, Aizawl record bika a lan danin kang thlenthei tu chi hrang hrang zingah tuiso-kan (scald burn) 36.4% a tam ber a, mei (Flame burn) 36.4% in a dawt a, electric burn 25.6% leh chemical burn 3.8% anga record a ni bawk niin a tarlang.

 

Lunglei District ah kum hnih chhungin nau piang thi 103

Lunglei District chhung bikah kum 2015-17 inkar khan naupiang 103 aia tlem lo an boral a, chutih rual chuan nau pai laia boral hmeichhia paruk (6) an awm bawk. Hei hi Lunglei Deputy Commissioner Lalzarmawii (IAS) hova Lunglei District Level Joint Reproductive Maternal Newborn Child + Adolescent Health (RMNCH+A) Review Meeting, April 24-a neihah sawichhuah ani. “Pi Lalzarmawii chuan thu sawi in Nu in nau a pai a, a hrin na ah hriselna a bul a tan a pawimawh a, tleirawl atang a nu leh pa ni tur a inpuahchahna ah hriselna a tan kan lak chuan nu leh pa nih hnu ah harsatna a thleng tlem thin a ni a ti,” tiin sorkar thuchhauh in a tarlang.

 

Kum thum chhungin sikserh vangin 61 thi, sikserh vei 57,700 dawn awm

Sorkar laipui hnuaia National Vector Borne Diseases Control Programme (NVBDCP) in kumtin April 25 chu Sikserh Do Ni, World Malaria Day-a a hman thin angin Mizoramah pawh Health Secretary Lalrinliana Fanai hovin I&PR Auditorium hman a ni.

Health Secretary chuan kum 2010 atanga 2015 chhungin ‘Invest in the Future: Defeat Malaria’ tih thupui hmanga beihpui thlak a nih tawh laiin Malaria natna chu mi tam takin an la thihpui cheu avangin he natna hi nuaibo a la ni lo tih a lang a, thihna tih tlem tumin nasa lehzuala tan lâk a ni a, kumin thupui chu ‘End Malaria for Good’ tih a ni a, Malaria case pakhat mah awm tawh lo tura tan lak chu Health Department mawhphurhna a nih thu a sawi.

Sorkar thu chhuah tarlan danin nikum chhung khan Mizoramah t mi 7,583 te chuan sikserh an vei tih hmuh chhuah a ni a, heng zinga mi pakua te chu an thi a ni.

Kum 2015 khan Mizoramah sikserh vei mi 26,400 an awm a, heng zinga 21 te chu an thi a, 2014 khan sikserh vei 23,105 awmin mi 31 an thi a, kumin January atanga March thla chhung khan thisen endik 35,801 atangin mi 582-te’n sikserh an vei tih hmuh chhuah leh a ni bawk.

State Vector Borne Diseases Control Programme tarlan danin sikserh natna thehdarhtu Anopheles thosi chu Mizoramah an tam a, Department chuan he natna tirem tur hian theihtawp a chhuah a ni.

 

The Indian Citizenship (Amendment) Bill, 2016 do loh chi a ni lo: PRISM President Vanlalruata

PRISM President chuan April 24-a an pawl inhmuhkhawmna ah The Indian Citizenship (Amendment) Bill, 2016 chu “loh theih loha kan rama hnam dang tam tak khua leh tui nihna pek ngai dinhmuna min dah thei” a ni tiin dodal a tul niin a sawi a.

Nakum tualchhung inthlanpui chuh ve tum PRISM hotu chuan “Kan sorkar hian kan Ram, kan Hnam leh kan Sakhaw himna tur hi a ngaihtuah lo hle a. Chumai bakah opposition party te pawh hian an ngaihtuah tawk lo a ni,” a ti a.

Vanlalruata sawi dan chuan Afghanistan, Bangladesh leh Pakistan atanga Hindu, Sikh, Budhist, Jain, Parsis leh Christian lo lut te, kum 6 an awm tlin chuan, khua leh tui nihna pek tur an nih thu sawifiahin, “Chhim thlang lama Bangladesh atanga Dan kalha lo pem lut tam tak te hi khua leh tui nihna kan pek a tul anih vaih chuan kan Ram, kan Hnam leh kan Sakhaw tan a pawi khawp ang,” a ti.

Vanlalruata chuan he dan thar hi party hrang hrang te bakah tlawmngai pawl liante leh NGO te do turin a duh thu a sawi tel bawk a, BJP Mizoram Pradesh thlengin a sawm a ni.

 

Salvation Army India Eastern Territory kum 100 tlin lawm tan

Mizorama Chhandamna Sipai Pawl luh kum 100-na chu April 25 (Thawhlehni) zan atang khan Mualpuia R Dengthuama Indoor Stadium ah lawm tan a ni a, khawvela Chhandamna Sipai Pawl hotu lu ber General Andre Cox leh a nupui Commissioner Silvia Cox-te’n an hmanpui.

India Eastern Territory Commander Commissioner Lalngaihawmi’n R Dengthuama Indoor Stadium kawta Centenary Mei chu a det a, lawmna inkhawm hi Larsap Lt. Gen. Nirbhay Sharma-a’n a hmanpui a, he inkhawmah hian mal zai te, a huho-a rimawi tum te, zaipawl te ngaihthlak niin General Andre Cox-a’n Pathian thuchah a sawi. General hian chawhnu ah Salvation Army Officer Training College-a Lt. Col. Kawlkhuma lim din chu a hawng bawk.

April 26 kha Mizorama Chhandamna Sipai Pawl dintu Lt. Colonel Kawlkhuma’n Shimla-a Salvation Army Officer a zir zawh hnua Aizawl a lo luh kum 100 tlinna champhaphak a ni a. Hemi ni hi India Eastern Territory chuan an Territory-a Chhandamna Sipai Pawl lo luh tan ni-ah pawmin kumtin he ni hi Ni Pawimawh ah a dah thin a ni. R Dengthuama Indoor Stadium-ah hian Pathianni thleng Centenary Lawmna inkhawm hi chawhma, chawhnu leh zan ah neih tur a ni.

 

Nikum khan TB vangin Mizoramah mi 29 an thi

Tuberculosis (TB) enkawl chungchanga thlirletna Review Meeting chu April 26 khan DIPR Conference hall ah neih a ni a, he thlirletna ah hian nikum chhungin TB avangin mi 29 an thih thu tarlan a ni.

Revise National TB Control Programme (RNTCP) hnuaia kumin January atanga March thla inkar chhunga hnathawh thlirletna ah hian kum kalta 2016 chhung khan Mizoram TB vei mi 2,149 hmuh chhuah a nih thu tarlan a ni a, TB leh HIV vei kawp mi 204 awmin TB vanga thi hi nikum chhung khan mi 29 a awm a ni.

Thlirletna tarlan danin kumin January leh March thla inkar khan TB vei ni-a rinhlel mi 1,992 endik zingah TB vei mi 459 hmuh chhuah an ni tawh a, an zinga 16 te chu TB leh HIV vei kawp an ni a, TB vei enkawl dam hi za-a 86 ni-a tarlan a ni bawk.

Thlirletna hun hi State TB Officer Dr Vanlalfela’n a kaihruai a, Health Services Director Dr H Lalchungnunga leh District hrang hranga District TB Officer te an tel bawk.

 

MSU in thla khat chhunga Post Matric Tribal Scholarship sem chhuak turin IndusInd Bank a phût

Mizo Students Union (MSU) chuan Post Matric Tribal Scholarship sem chhuah nana IndusInd Bank hman a ni leh chu pawi an tih thu leh thla khat chhunga zirlaite hnena scholarship sem turin IndusInd Bank hi a phût. April 26-a thu chhuah a siamah MSU chuan Post Matric Tribal Scholarship sem nana sorkar in IndusInd Bank a hmang thin tha lo a tih thu leh zirlaite hatsatna tawh thin a thlen in awmzia a nei lo chu pawi a tih thu an sawi a, scholarship chu zirlaite hnena vawiin atanga thla khat ral hma ngeia sem chhuak turin Bank thuneitute chu a phût niin a sawi a, a hun tiam chhunga Bank in zirlaite hnena scholarship a sem chhuak lo a nih chuan harsatna a thleng a nih pawhin Mizoram Scholarship Board mawhphurhna ah a ngai dawn nia sawiin, zirlaite’n buaina leh harsatna an tawh loh nana chak taka hmala turin MSB a phût.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s