Falkawn, doctor te service mumal lo leh Mizoram puma indaih lohna

State Referral Hospital-ah thawk an tam ang hu in damlo an tlem thung a, damlo an pun theih nan a hmalak aiin a hip bo thei tu tih changtlun a ni a, thingtlang leh district-a awm hreh lo doctor an awm changin an aia thil tithei zawk te ni a lang in an chuhpui chuan sawn chhuah leh an ni a, tin, hotute zingah doctor senior zawk a ngaih te chu an posting-ah an junior leh zawk tlat bawk si thin. A bul berah  chuan Health Department hnuaia hnathawkte enkawl dan kalhmang ah chiangkuang lo a tam a ni ber a. Service kalphung khawih chiah chuang lovin thingtlang awm chungchangah erawh chuan tunhnai tê khan ziaawm lam panna hmel tlem a lo dak ve tawk tawk tan chauh dawnin a lang

IMG_20170501_142109_HDR

 

Chawhma lam a ni a, State Referral Hospital, Falkawnah chuan Out Patient Department hrang hrang te lun ve lai tak ni mahsela, doctor engemawzat tan chuan damlo pan tu an neih miau loh avangin buai leh tul em em chhan tur a awm lem lo.

Department tlemte, a bikin Medicine leh engemaw chenah Pediatrics chauhin inentir tur, doctor pindan pawn a thu tlar dul khawp an chhawn avangin doctor tam zawk chu an awm awl a ni deuh ber a. An zinga pakhat chuan Falkawn chhehvela tlang hring dup, mihring chenna in khat pharh a inzar duai thlir chung chuan thil awmdan sawisel ngawt a theih loh laiin a nih ang anga pawm a harsat thu a sawi.

“Damlo kan neih zat ngaihtuah chuan thawktu chu kan indaih lutuk a, damlo kan en theih zat tur pawh kan en pha lo viau a. Mahse, sorkar in Medical College din turin hma a la a, chumi inbuatsaih nan chuan damlo tlem vangin doctor ten kan thawh tur zat thawk pha lo mah ila, helaiah thawktu kan tam lawk erawh a ngai si a. Medical College chu Mizoramin tun dinhmunah kan mamawh ber thil a ni em tih kan sawi phak a ni lo a, mahse kan hotute’n mamawh min ti a nih chuan kan pawm mai,” tiin a sawi.

Champhai MZP in Champhai District Hospital-a thawktu indaih lo dah belh ngiata sorkar an kar chungchangah Mizorama doctor te sorkarin a chhawr dan zau zawk nen inkaihhnawihna a neih ringin The Frontier Despatch (TFD) chuan tualchhunga damdawi in hrang hranga doctor engemawzat a rawn a, anni chuan an indaih loh piah lamah sorkar in a sem rual ngam loh vanga indaihlohna a zual ni-a an hmuh thu an sawi.

 

State Referral Hospital-a damlo tam zawk chu Falkawn chhehvel ami, hmun dang atangin pan tu an tlem

“Damlo kan nei tam lo a, Aizawl atanga inentir tura rawn kal vang vang an tam lo hle a, helai chhehvel khua ami te an ni deuh ber a, Department hrang hrangin ni khatah OPD ah damlo 100 en tlin tum te, tlin loh tum te kan nei a, tuna a lan dan hi chuan thawktu chu kan tam, mahse, sorkar in Medical College din turin hma a la a, chumi atan chuan damdawi in tih changtlun a ngaih avangin tunah chuan kan indaih angin a lang rih,” tiin doctor pakhat chuan a sawi a, “Emergency phei chu pantu an tam lo,” a ti bawk.

TFD in State Referral Hospital a tlawh tum hian Medicine OPD tih loh chuan damlo an ngah vak lo a, chuti chung chuan Ward ah chuan damlo an awm ve nual a, Ward thenkhat erawh a khah loh laiin Ward thenkhat chu a khat a, a hmunhma hrim hrim erawh damlo te tan chuan Aizawl khawpui tawt lutuk leh boruak bengchheng lutuk ai chuan a nuam zawk nia sawi an awm bawk.

 

ACH tih changtlun zel anih chuan Falkawn a lun tak tak rinawm lo

Doctor te chuan State Referral Hospital, Falkawn a Medical College din tura hmalak chuan tualchhunga doctor awm zat a duhkhawp awm lo sa chu a ti duhkhawp awm lo lehzual niin an sawi a. Chutih rualin, Falkawn-a hospital tih changtlun chu an sel lem lova, mahse, damlo tam zawkin Falkawn an pan a doctor awm te hman tangkai an nih theihnan hmalak a nih lem loh laiin Aizawl Civil Hospital tih changtlun ani leh zel zawk si chuan awmzia a nei meuh lova an hriat thu an sawi.

“Falkawn upgrade an sawi reng a, hmanni lawk ah Aizawl Civil Hospital-ah cabin thar an hawng leh bawk si a, a buaithlak deuh a ni,” tiin doctor pakhat chuan tunhnaia Health Minister-in Aizawl Civil Hospital Block F building-a Cabin thar leh hmanraw thar te a hawn chungchangah ngaihdan a sawi a. Hemi tum hian Health Minister chuan cabin thar paruk, hmanraw thar chi hrang hrang, Emergency Pool Van, Digital X-Ray leh Ultrasound machine, State Medical Library, Geriatic khum pali leh Catherization Laboratory te a hawng a ni.

Doctor dang pakhat chuan Falkawn chu a awmna a fal deuh avangin damlo tam zawkin an pan lova. Mahse, damdawiin lian leh thar pan tur a ngaih Aizawl leh a chhehvela mipui te hip a pawt peng tur ni awm ziazangin Aizawl Civil Hospital tih changtlun zel a ni si a, chu chuan awmzia a nei lo hle niin a ngai.

“Falkawn-ah hospital lian tak din turin sorkarin hma a la a, chutih lai chuan Aizawl Civil Hospital an ti changtlung zel a. Falkawn a hla si a, tuman an pan duh reng nang. District Hospital anih vet ho chuan Civil hi tih tet tur ania, tih tet anih hnu ah doctor tam zawk Falkawn ah sawn ni mahse a bang zawng te chu district dangah leh thingtlangah te sawn kual ni se indaihlohna a ziaawm tur ania,”tiin doctor pakhat chuan a ngaihdan a sawi a.

A ni lah tak bawk a: kimchanga hriat theih thar ber ah chuan kumin March thla khan Aizawl Civil Hospital-ah damlo 1,298 admit leh OPD leh casualty a damlo mi 33,789 en an nih laiin State Referral Hospital, Falkawn ah chuan damlo 462 admit an ni a, OPD leh casualty ah 2,854 an in entir thung a. Hemi awmzia chu, March thla chhung khan Falkawna doctor te’n Aizawl Civil Hospital a damlo inentir zawng zawng za zela sawm an en pha meuh lo angah a ngaih theih a ni.

Doctor table

 

Doctor-te service danah kalphung mumal a awm lo, thingtlang a awm hreh phah

Amaherawhchu, Mizoram pum ngaihtuaha doctor indaihlo ngaihtuah tel chuan Aizawl Civil Hospital leh State Referral Hospital, Falkawn a damlo inthlauh zia chu tehfung awm chhun a ni thei chuang lo tih doctor tam tak chuan an hai lem lo.

“Kan service kan kalpui dan hi alawm,” tiin doctor pakhat chuan damlo a en pahin a sawi mawlh mawlh a. “Keini doctor ho thiamloh a ni bawk a, sorkar thiamloh a ni bawk,” a ti. Chu doctor sawi dan chuan a thawhpuite tam ber tan chuan Aizawla thawh aia thlakhlelhawm a awm lo. A chhan chu Aizawlah mipui leh damlo inentir tur an tam ber avangin Aizawla hnathawh chu a hlawk bik a. Sorkar damdawiina an thawh bakah anmahni private clinic ah te en tur an tam a, chu chuan sum leh pai thawhchhuah lamah a pui nasa hle a.

Hetih rual hian sorkar hnuaia thawk doctor tamtak tan chuan thil dang a awm niin an sawi a, chu chu Health Department hnuaia transfer leh posting mumal lo fo a ni an ti. “Service dang te ngaihtuah chuan kan hnathawh dan hi a fuh lo em a ni. Entirnan, engineer emaw, MCS emaw, MPS te chu thingtlangah awm mahsela, kum thum kum li a ral meuh chuan hmun dangah an awm hnai tawh tiin an sawi ngam a, an sawi ang ngei chuan transfer an ni thin reng bawk a. Mahse keini doctor te chu chutianga sawi ngam thei dinhmun ah kan awm ve tlat lo. Miin doctor te chu Aizawl pawnah an awm duhlo an ti thin a, a dik pawh a dik tho. Chutih rual chuan, thingtlangah kan awmin kan awm hun tur ang chhung te chiang sela, awm hrehin awm loh dan phet kan ngaihtuah kher bik ka ring lo,” tiin doctor pakhat chuan a sawi.

Hetiang thil lo tawng tawh doctor pakhat chuan, “Ka awmna District Hospital-a rilru pe taka thawh ka tum lai takin kan thawhpuite zing ami tu emaw ka awmna khawpuia awm a duh ve avangin kei chu District khawpui dangah min sawn a, hetiang hian a ti thei deuh te chu awm rei tum lemlo mahse, an duhna hmunah an awm chat chat thei a, a ti thei ve lo te chu kan per leh nawlh mai thin a ni,” a ti.

Doctor senior zawk te pawhin transfer chungchangah mai pawh nilo in an service fel lohna tamtak a awm tih an sawi ve bawk a, junior zawk thin te an senior tak zawk tlat chang te pawh an awm fo tih leh eng kalphung ber nge hemi kawngah hian Health Department-in a zawm an hriat bik loh thu sawi tur an nei leh zel a ni.

 

Thingtlanga awm duhlo doctor te’n cheng nuai 15 atanga cheng nuai 50 an chawi ngai dawn

Hetih rual hian doctor te chuan thingtlanga awm an hreh avanga thingtlang lama doctor an indaih loh nasa zual bik chu sorkar in tih ziaawm tumin hma a la ve zel bawk a.

Mizoram sorkar sponsor emaw state quota-a zir te chu tunhnai atang khan sorkar in bond a sign tir a, Health Secretariat atanga thu dawn danin, hetia sorkar in bond a sign tir chhan hi mamawh huna sokar in a hman ve theihna atana tih a ni a. MBBS zir tur te chu state/sorkar quota ni mahse, allotment pe tute chu Higher & Technical Education Department lam an ni daih avangin tun hma lam khan bond hi sign tir an ni ngai lo a, tun hnai mai khan Health Secretariat lam chuan Mizoram quota-a zir te chu chhinchhiah vek a, hetia intiamkamna hi ziah tir ni se an tih angin an ziah tir niin an sawi a, sorkar in dan khauh deuh duh thin mahse tlin loh chang an nei ve thin niin an sawi.

He bond agreement zulzui chuan sorkar quota hmanga Bachelor of Medicine, surgery, dental surgery, pharmacy leh nursing zirchhuak te chuan an zir zawh ah kum hnih chu ngei ngeiin thingtlangah hna an thawk tur tih a ni a, an thawk lo a nih chuan sorkar atanga an stipend te, book grant te leh sum sen chi hrang hrang chu kum khat chhangin an rul vek ang a, chu bakah chuan cheng nuai 15 sorkarah an pe bawk dawn a ni.

Chutiang bawkin RIMS, Imphal-a sponsored seat hnuaia PG zir te chu an pass chhuah hnu in Mizoram sorkarin awm tura a tihna hmun apiangah an thawh a ngai bawk a, hei hian kum thum chhung thingtlanga awm a huam bawk a. Hetianga an tih loh chuan Mizoram sorkarah cheng nuai 50 an chawi tur tiin bond agreement ah chuan a inziak bawk.

/////

Doctor indaihloh siamrem tumnaa Health Minister thuchhuak thenkhat te

Kan indaih loh ang ang hian doctor leh thawktu dangte hmun kilkhawr leh thlaler deuhahte kan inzar pharh a ngai a. Khawpui leh hmun nuam zawka inawm chhâwkin transfer & posting tih ?hin a ni dawn a, order-in a rawn den hunah che u rawngbawlna rilru pua khawiah pawh tlawmngaih chhuaha kal zel turin ka ngen che u a ni

– April 24, 2014 (source: Vanglaini)

 

Rualkhai zawkin doctor posting siam a ni ang a, hard posting bika doctor-te awm rei chhung pawh awmze neia siam a ni ang

– Oct 22, 2014 (source-Vanglaini)

 

National Health Mission hnuaiah doctor tam tak lak tur an awm laiin, doctor-ten mahni in lum atanga hna an thawh duh zawk avangin kan hmu zo thin lo a ni… Sum harsatna avangin a nghet turin duh ang tawk kan la theilo bawk a… khawi district-ah mah an mamawh leh phu ang sawrkarin doctor kan post theilo a ni

– April 24, 2017 (source: DIPR)

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s