Ramchhung / In thahna rinhlelhawm 1,528

Sipai leh venhimna hna thawk te’n an rinhlelh zawng ni a an sawi te an kahhlum mai chu court roreltu te’n an chhui thiang a, sipai leh venhimna thawk te chu an fihlim ngawt thei lo tiin nikum khan Supreme Court chuan thutlukna a lo siam tawh a. He thutlukna hi Manipur-a mi 1,528 lai mai, hel an nih leh nih loh leh eng pawi nge an khawih chiah finfiahna awm si lova kahhlum an ni tawh tih puhna awm vanga irh chhuak a ni a. Sorkar laipui chuan SC thutlukna hi a ngaimawh hle a, Supreme Court Judge panga thut na bench ah sut a dil a, hetiang rorelna vang hian sipai leh venhimna hna thawk te chu an hnual phah nasa hle tiin a sawi a. Mahse, SC bench lian zawk chuan April thla tawp lam khan sorkar dilna chu a hnawl a. Hemi hlimchhawn hian The Indian Express-ah Manipur a journalist lar tak, Imphal Free Press editor Pradip Phanjoubam chuan May ni 2 khan heti hian a ngaihdan a ziak.

Supreme Court-a judge 5 thutna bench chuan Manipur a a lema sipai leh hel inbeihnaa kahhlum 1,528 awm chungchanga he India court sang bera bench te zawk thutlukna sorkar laipuiin a khin letna chu a hnawl a, hei hian court thutlukna pawimawh tak a chhawp chhuak a. Helho beihna chungchanga hun lo awm zel turah awmzia a neih ngei beisei a ni.

He Court thutlukna hi sorkar hian a tha zawnga a kalpui phawt chuan sipai anga training tha leh ralthuam tha keng special force din duhna a piang thei a, hel dotu atana chher bik special force te hi nunau laka nunphung pangngai a nung leh tualchhung rorelna court thu a awm an ni tur a ni ang. Hetiang ang hel bei tur bik din chungchang hi sorkarin court bench lian zawka a thu thlenah leh court bench lian zawk thutlukna-ah pawh hian a lang viai viai.

Sorkar hian he thil hi hmanhmawh thlak a tih thu a sawi lan rualin tualchhung police te’n thil thlen dan an chhui chian zel dawn chuan venghimtu sipaite rilru hi a hnual hle dawn a ni tiin an ziak a. Sipaite hi zalenna zau zawk pek a, indona ang boruaka an awm lai hi chuan sipaite hi court-in a umzui zel tura dah loh ni se tiin sorkar lam chuan court hi an nawr a ni.

Court chuan “indona ang boruak” a nih avanga sipaite an duh thala an chet phalsak hi a remtih loh thu a sawi a, hetianga khua leh tuite sorkar hmelma an nih rinhlelh avang ngawta an thah phalsak a nih phawt chuan mipui rorelna (democracy) dinhmun a derthawng hle dawn a ni, court chuan a ti. Sipaite’n tharum an hman nat luat avanga thihna a thlenin hel dova che chhuakte hi court-a thiamloh chantirna laka an fihlim zel chu court chuan dik a ti thei lova. “Indona ang boruak” tih tawngkam hian khel a hlawh hle a, hetianga sawi hian sipaite hman tangkai a kawk a, indona hmuna an chet dan tur anga chet phalsakna atana uar taka hman a ni a. He tawngkam hian India ram dinhmun khirh zia pawh a tarlang awm e.

Kashmir leh Hmarchhak biala helna boruak hi indona ang thaw thanga sawi a ni thin a, dan lam thu-a indona boruak anga an sawi laiin sorkar chuan heng buainate hi ‘law and order’ thil ni mai-ah a chhuah a, ram chhung buaina, dan hmanga chinfel tur niin an sawi lang leh lawi a. A khirh lai ber chu ‘indo’ tia sawi a nih chuan ram pahnih indona a ngaih theih a ni dawn a, chu chu hel khawitu state te chuan an pumpelh duh ber a ni lawi si a. Engpawh nise, indona a nih tak meuh chuan indona chungchanga dan ding lai, entirna’n Geneva Convention thuthlung leh Hague Convention thuthlungte kha zui a ngai dawn a, chu chu sorkar lamin a duh leh hauh lovang. Sorkar thlirna atang chuan helna hi indona chu a nilo chiang mai a, mahse ‘indona ang boruak’ tiin peh hel thiam takin an sawi thung a. Chuti a nih si chuan indona hmun anga tharum na taka hman chu a rem tihna em ni dawn?

Supreme Court chuan hei hi ‘Aih’ tiin a chhang a, hetianga inhnamhnawih zawng zawngte chu an harsatna chinfela remna tluantling thlen tura a duh thu a tarlang a ni.

Ram leh ram indona ni si lova thil fello thleng thei tibo tur hian khawvel pum huapa dan siam tum a lo ni tawh thin a, Geneva Conventions Protocol II chu kum 1977 khan duan a ni a. Ram leh ram indona ni lova tharum thawhna-ah khawvel pum huapa dan awm sa mihring laka zahngaihna lantirna dan hnuaia dah ve chu he Protocol tum hi a ni a. Ram tinin an thuneihna leh lalna tidal theia an ngaih avangin ramchhung buai nei ram tlemte chauhvin an pawmpui a. Geneva Conventions 1949 pawmpuia hming ziah hnantu India pawh hian he protocol hi chu a hming a ziah hnan duh lo. Helna hi indona a ni nge mihring nunphung tibuaitu (law and order problem) satliah tih hi hriat hran a har fu a ni awm e.

Armed Forces Special Powers Act (AFSPA) dan hmanga nunau buaina sipai hmanga tukdaih tum a ni pawh hi sawi ti tam tak a ni. He thil sawi chian harsa tak avang hian helho do tur bik, sipai ang taka tha a thuam, mahse nunau enkawlna dan hmanga an chungthu rel theih din thu hi a lo lian ta viau a.

A nihna takah chuan inbeihna lema mi 1,528 thihna a awmna chhanah hian Manipur Police Commando te hi mawhphurtu ber pakhat an ni a, chutiang a nih lai chuan helho bei tur bik deuhva din an ni a. AFSPA dan hi hmang velo mahse, Manipur a hleihluak taka sipai chetna hi a rei tawh avangin AFSPA hnuaia duh duh a nunau laka chet an ching hle a ni.

Kum 2009 July thlaa Tehelka Magazine-in hel pawla tel thin Chongkham Sanjit man a nih a chhun pachanga thah a nih dan thlalak a rawn tarlan hma tawh khan Imphal a nitin chanchinbu chhuak enkawltute chuan nitin hian sorkar sipai, a bikin Police Commando te’n an thah ruang chhiar tur hi a awm reng a, hel nia rinhlelh niin sorkar lam chuan a sawi si a ni.

Kha’ng hunlai kha chuan commando te khan chanchinbu pisa te kha phone a bia-in hel nena inkahna-a hel zingami thi a hmuna rawn hmu tura chanchinbumi tir turin an ko thin a. A chang chuan chanchinbumite kha an thleng hma lutuk a, inkahna pawh a thlen hma-in a hmun an thleng hman pek a, chutiang hunah chuan police te chuan an mi rinhlelhte chu kaphlum hman lovin a manin an man ta zawk thin a ni. Kha’ng hunlai kha sorkar sipaite’n huaisen chawimawina an dawn tam ber hunlai a ni a.

Sanjit-a thah a nih dan puan mualpho a nih takah leh court lamin an chhui chian tak hnu khan boruak a reh ta thut a. Hel nena inkah a awm ta mang lova, huaisen chawimawina dawng chu khawvar lam arsi an pharh an lo ni ta a, mak tak maiin hel pawl chetna pawh a lo tlahniam ta thut a ni.

Police te hi sipaite angin an hrohrang a na ve thei a, sipai ai mah pawhin an che na thei tih hi rinhlelh rual a ni lova. A danglamna erawh chu an kutthak tuartute nen khan dan khat hnuaia leng an nih avangin an kutthlak tuarte khan awlsam takin chhantu nei thei in an inhria a. Thil thleng pakhat chauh pawh hian duh thala sipai chetna hi a khap bet theih tih chu Sanjit-a thih dan puanzar a ni hian a ti lang a. Thununna tha tak hnuaia special police force siam a nih chuan helho do tura sipai hman hi a reh thei ngei ang. Mawhphurhna neihloh rah chhuah chu inkahna lema mi 1,548 thihna rapthlak lutuk tak mai hian a ti lang chiang hle a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s