MADC inthlan ah 84.34% vote tla

Mara Autonomous District Council (MADC) thar atan nimin (May 4) khan mipuite’n vote an thlak a, vote thlak theih hun zing dar 7 atanga tlai dar 5 thleng khan vote tla hi za zela 84.34 a ni.

State Election Commission Secretary Teresy VL Hruaii hnen atanga The Frontier Despatch (TFD) thu dawn danin, vote thlak theih hun chhung hian mipuite’n tluang takin vote an thlak a, buaina leh harsatna lian tham a awm lo a, vote tla te chu Siaha-a strong room siamah tukin dar 4 vel khan dah luh kim a ni a, vote thlak that ngai a awm lo niin a sawi bawk.

Tarlan tawh angin MADC inthlana vote tla te hi May 8 (Thawhtanni) chawhma dar 10 atangin chhiar tan tur a ni a, Election kaihhnawih zawng zawng te chu May 12 (Zirtawpni) ah zawh vek tur niin thlan thar te chu May 15 (Thawhtanni) ah thu khawm hman tura tih a ni.

MADC ah hian bial 25 a awm a, nominated seat pathum a awm a, tun tum inthlanah hian candidate 70 an awm a, Congress party in bial zawng zawng ah candidate an nei a, Mara Democratic Front (MDF) leh Mizo National Front (MNF) an thawk dun a,  MDF in bial 13 leh MNF in bial 12 an chuh a, BJP in bial paruk ah candidate an nei a, independent candidate 14 an awm bawk.

MADC inthlan hnuhnung berah khan Congress party in seat 15 la in sorkarna an siam a, MNF leh MDF tangdunin seat pariat an la a, independent-a tling pahnih an awm bawk.

Tun tum inthlanah hian Polling Station 80 siam a ni a, heng zinga 10 te chu ven uluk ngai bik a ni a, vote nei 37,255 (mipa 17,968 leh hmeichhia 19,287) an awm.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s