Khawvel / Mi nuai khat thihnaa mawhphurtu a puh, zawn hmuh zawh tak loh a chu

Africa khawmualpui laili-a mi nuai khat aia tlemlo thihna a mawhphurtu leh maktaduai tam tak tawrhna thlentu, misual langsar Joseph Kony chu US leh Africa khawmualpui-a an thawhpui sorkar te chuan zawn zui zel an tum ta rih lo.

Kony luman hi dollar maktaduai 5 zet a ni a, Lord’s Resistance Army (LRA) hruaitu a ni a. Mahni mihring puite chung a nunrawn em avangin The Hague a hmunpui nei International Criminal Court (ICC) chuan a chungthu hi a rel tawh a. Kum 10 chhung thelh chu Central African Republic (CAR), Democratic Republic of the Congo (DRC) leh South Sudan ramah te tawmin US special force 150 rual leh Uganda sipai 1,500 zet te chuan an lo zawng chiam tawh a, an la man theilo.

He pa kum 56 a upa hi ama laka rinawm em em ralthuam keng 20 atanga 30 vel, a nupui engemawzat, a fate 2 leh amah zuitu hrim hrim mi za tel te nen an kal kual reng a. A chanchin zirmite chuan Sudan rama South Dafur biala leilung hausakna hmun Kafia Kingi velah a biru niin an ring a, a fate’n dan kalha thil tawlhruk chu an sum hmuhna ber a ni.

Uganda sipaite hian CAR ram hi an chhuahsan mek a, Kony-a a that emaw a nungchunga man tur emaw-a tirh US sipai special force te pawh an inhnukdawk mek. Hetianga an inhnuhdawh chhan hi Uganda leh US sipaite hian LRA hi mipui mimir tan an hlauhawm tawh lovah an ngaih vang niin an sawi a. Uganda sipai hotute chuan, “Che thei lova LRA siam tura beihpui thlak chu a hlawhtling ta,” tiin thuchhuah an siam.

Kum 10 chuang kalta-ah kha chuan Kony-a pawl LRA hian misual rual sang tam an nei a, Africa khawmualpui laihawl chu an rikrap hneh hle thin a, tunah chuan an che thei ta vaklo ni-ah an ngai a. Anmahni pawl chhungkaw buaina avangte, bansan an tam tak avang te-in tunhma angin an che thei tawh lo niin an sawi.

Hetihlai hian he pawl mite hi an nunrawn em avang leh nunau laka an chet bawraw vanglaia mi rukbo chiam chiam, hmeichhe pawngsual chiam chiam, mi thah mai mai leh nghaisak ching an nih avangin tunah pawh hian an la er chhuak leh thei niin mi thenkhat chuan an ngai.

Uganda hmar lam Gulu district-a chairman hlui leh tuna eptu party hruaitu Norbert Mao chuan hetianga sipai an inlak chhuah chuan LRA ho hi muang lei-in an inpumkhat tha leh mai ang tih a hlauh thu a sawi a.

“Tuna Uganda sorkarin LRA te zawn chhuah hna a bansan hnu hian rawlrala an chet chhuah leh a hlauhawm ta hle a ni,” Mao chuan a ti.

Hetianga sipaite’n amah zawn hna an chawlhsan takah hi chuan Kony hi ICC hma-ah a inlan dawn talo a ang hle a, mahse a hnuaia mi pawimawh tak Dominic Ongwen erawh chu kumin kum tir atang khan a chungchang rel tan mek a ni.

Ongwen an puhnate chu tualthat, tualthah tum, mi nghaisak, pawngsual, hur sualna thila mi hren beh, naupang kum 15 hnuai lam hel pawla lakluh tih bakah tih luihna a hmeichhe rai tir leh inneih luih tir te a ni a.

LRA pawl hi mi nuai khat thahna-a inhnamhnawiha puh a nih bakah naupang 60,000 ru bova puh a ni a. Thingtlang khaw thenkhat sipai-in an ven phak loh atangin hnathawk tur leh silai chelek tur an ru bo thin a, an zinga tam tak chu kum tlinglo an ni a. Mipate chu silai an ken tir laiin hmeichhiate chu sal ang rengah an hruai a, an tisa chakna hrikthlakna atan leh inchhunga chhiahhlawha chhawr an ni hlawm.

LRA hovin tunhma a an lo rukbo tawhte sawi dan chuan an thiante, thenawmte leh chhungte that a nghaisa turin an tilui thin a, a rapthlak thei ang bera khawsa a an mi thahte thisen dawt luih tirte pawh an awm a. Ongwen ngei pawh hi a tleirawl laia LRA hovin an rukbo a ni.

Onguwn-a an puhna zawng zawng deuhthaw hi kum 2002 leh 2005 inkar a raltlanho dahkhawmna an beih nena inhnamhnawih deuh vek a ni a. A rapthlak ber erawh chu kum 2009 December thla a DRC hmar chhak lama raltlante awmna hmun an beih kha a ni a, khami tum khan nunau 350 an that a, naupang 80 tiamin mi 250 an rubo a ni.

Uganda hmar lama Gulu district huam chhunga Limu khaw mi Brenda Atim (28) chuan an khua hian LRA te kutthak hnawih kum tam an tawrh tawh lai in dikna an hmu dawn ta lo nia a ngaih thu a sawi a.

“LRA ho kuta namen lova tuartu chhungkuate tan chuan a rilru nat thlak ngawt mai. An lo rin dan chuan Kony hi man a ni ang a, ICC hma-ah a mihring puite laka pawi nasa tak a khawihte avangin a phu tawk hremna a hmu dawn a. Anmahni tiretheitu laka dikna hlen chhuaha a awm turah an lo ngaih vei nen,” tiin a sawi.

Uganda ram hmar lama hnam tlemte Acholi hnam atanga lo chawr chhuak in, Kony hi Gulu biala Odek khua a kum 1961 ah a lo piang a. Kum 30 a tlin hma-in ralthuam a lek tan a, a hnung a zui ber hi nawhchizuar thin, an chhung hnai nia hriat Alice Auma Lakwena a ni a. President Yoweri Museveni laka an Ancholi hnam humhim tura ralthuam chelek ta niin a insawi a. A sawi dan chuan Thlarau Thianghlimin sipai chet dan leh mimal hriselna thlengin a kutah engkim dahin thu a pe a, Uganda ram chu Bible-a Thupek Sawm tlawhchhana rorelna rama siam chu a thil tum niin a sawi bawk.

Sorkar a chet nat em avangin President Museveni lakah mipui an thinrim hle chungin Kony-a’n mi tam tak a rukbo avangin tualchhung mite thlawp a hlawh lo thuai a, tunhma angin a che thei ta vaklo.

Kum 1990 chho khan Uganda sorkar hian Sudan chhimlama helho zalenna sualtute a puih avangin Sudan sorkar chuan LRA tanpui-in helai biala indona hi thenawm ramah a taidarh ta a.

Kum 2005-a Sudan sorkarin hel pawl nena inremna a siam takah khan LRA chuan tanpuitu a nei ta lova, Uganda sipaite chuan an thenawm DRC ramah an um lut a, hemi hnu hian Kony chuan sorkar nena inbiakna neih a remti ta a, mahse an inbiakna chu a tawp rang hle. Barack Obama kaihhruai US sorkar chuan kum 2010 atang khan Kony-a man emaw that emaw tur hian US special force tirh a remti ta a. Kum 2013 khan luman an neih tir ta bawk.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s