Rambuai Thu leh Hla / Church delegation leh MNF inbiakna, Khawrihnim, April 11, 1967

abc
Rambuai tirh atangin kum zabi chanve lai a lo liam ta. Khatih hunlai a thil thleng thenkhat te lehkhathawn chi hrang hrang hmangin kan han thlirlet e

 

CHURCH DELEGATION …MIZORAM INBIAKNA

A Hmun: Khawrihnim

A Hun    : April 11, 1967

He inbiakna hmunah hian kohhran aiawhin Rev. Zairema, Rev. Lalngurauva leh Rev. Sawiluaia te anlo kal a. Inbiakna tan nan Rev. Sawiluaia’n tawngtaina a nei hmasa a, thusawina in a chhunzawm nghal a ni. Thusawi tlangpui deuh te chu:-

1.POLITICAL STAND:

Kohhran aiawh ten Pu Laldenga President Mizoram an hmuh tawh na leh an hmuh hnua an inbiakna report kenga phailam India hotute an hmuh thu an sawi a, Commissioner Cachar leh Mizo District leh Governor an zu hmuh na a an thusawi dan te a ngai an sawi leh a. An zinna lam India sawrkar rilru leh tih dan an hmuh atang chuan Mizo tan hian full sovereignty chu a kah a kah chhuah ngawt ngaiin an hria a, full sovereignty chuh hi Mizote tanna anih chhung chuan inbiakna pawh India leh Mizote … meuh lo tih thu an tarlang leh a; chuti taka India sawrkar chu harsa an nih avangin Mizo sawrkar ngaihdan leh politic a an dinhmun chu an zawt zui ta a.

Chu zawhna chu Home Minister in a chhan hma in Pu Laldenga nen an in hmuh tum a an thu ziak ‘this did not necessarily mean secession from Indian union’ tih awm chu President tawngka ngei anih chiah leh an ni pawhin chu tawngka chu record ngei an nih thu a zawtfiah hmasa a, objection pawh a siam nghal a. Church delegation lam atanga chhanna ah chuan Pu Laldenga’n chutiang chiah a asawi chu an lo hriat loh thu an sawi a, mi thenkhat tawngka an lo hriat tawh an rilru alo hneh deuh a, an lo telh palh mai anih an rin thu leh lo telh palh pawh nise thil kal tawh an rilru a lo hneh deuh avangin pawi lutuk ni a an hriat loh thu te an sawi bawk a.  Mizoram dinhmun thu ah chuan Home Minister in tunlai ram buaina te hi vai hote huat vang leh tleirawl te thawh at vang mai a awm anih loh zia thu leh political freedom duhna avanga Mizote rilru puakchhuak ve reng avanga hun danglam tak lo thleng ta anih zia chiang takin a sawi lang a, chumi rilru leh alo puakchhuah dan mumal hrelo hian India sawrkar hian buaina naran leh helna naran ang mai a a ngaih chhung chuan India hian a hriatchhuah hmasak a tul ani tih thu a sawi bawk a. Kum 1947 a Mizo ten India an zawm na leh anmahni duhthlanna ngei a zawm an nih thute sawiin tunah pawh hian Mizote duhtlan lehna chu India hian a zah sak a tul thu te sawiin Home Minister chuan a thusawi a titawp ta rih a.

Mizo te thil tih hi National aspiration ngei ani tih India hian a hriat theih nan chuan kawng dang zawn te pawh a tul thu leh Parliament hial kova an dinhmun tak chu member ten an sawi nawn leh a chu inkhawm chu India mi, social worker entirnan Bhave te angin an chhim theih a rem leh rem loh thu church hote chuan an zawt a, Home Minister pawh in a remlohna a hriatpui lova, inkhawm pawh awm se Mizo te ch

uan full sovereignty chu an thu tawpna chu a ni tho ang tih a hrilh nghal a.

2. INDIA ATROCITY:

Mizoram buaina thu a Kohhran hotu thenkhat ten ramdang kohhran hruaitute hnen a India nunrawngna leh an thiltih sual an thupsak thinna hian engemaw chenah harsatna Mizo sawrkar tan a siam a, tin, mipuite khawngaih theitu thenkhatte pawhin an khawngaih loh phah hial niawma hriatna a awm tak avangin an thil sawi thin chu ngun leh zuala ngaihtuah turin Home Minister in a sawm a. India thiltih sualte thup sak mai lovin khawtin a an thiltih diklo leh nunau te an sawisak vak vak hi tualchhung ngeiin report lut zawk sela an report copy chu Mizo sawrkar hotute pawh pe ve ziah bawk sela tiin a rawt a, kohhran seal chuang ngei in report lut zawk sela an report a copy sawrkar hotute pe ve ziah bawk sela tiin a rawt a. Kohhran hruaitute chuan an rem tihpui thu an ziak ve nghal India diklohna leh suahsualna enfiah zel turin an mahni pawh an inhuam hle awmin an lang a, April 1, 1967 zana Baktawng Grouping Centre a damlo awmpui mi 5 lai vai sipaiin an kahhlum tak te pawh kha enfiah an tum thu an sawi.

3. MIZO UNION:

District Council hotute hnena Home Minister in inbiakna nei tur a sawmna lehkha December 29, 1966 ami leh a hnulam a thuthar President in January 1, 1967 ami leh a hnulam a thuthar President in Home Minister lehkha January 3, 1967 amite Jiggrab … an sawi chhuak a District Council hotute ngaihdan leh khang lehkhate kha hlauva inbiakna chu nei ngam ta lova an insawi dan te an sawi a District Council te ngaihdan chu ngaihdan awm reng anih zia an hriatpui dante an sawi a. Home Minister chuan chung lehkha te chu awm ngei ani tih pha lovin India General Election khan din tum ngei a report a kal vangin alternative dang awm loh hi tia sawrkar in thu tihtluk dan te anih zia leh rin loh ang taka chu election chu ngaihtuah hauh lova thil an lo tih leh takzia ah a lawmthu a sawi a, in hmuh phawt chu tu ve ve tan pawh a la tul reng tih a sawi lang bawk a. Church leader ho te chuan inhmuh theih dan chu ngaihtuah turin an in huam ani tih an sawi hnuah District Council hotute leh Union hotute nena in hmuh ngei chu tha a hriattlan anih avangin a hun leh hmun pawh church hotute chuan lo siam nghal sela sawrkar lam pawhin palai an han intir nghal ang tiin Home Minister chuan a sawi a ni.

4. CHIN NATIONAL FRONT:

Kohhran hruaitute chuan CNF President Pu Kapphunga thah thuah Pu Lalchhunga CEM lungawi loh dante leh a thih dan chu political assasination ngei ani ang tih a rin thute Home Minister an hrilh a; Home Minister chuan Chanchinbu leh AIR atang maia kha thu kha lo hre ve anih thute a hrilh hnu ah Pu Kapphunga thih dan leh thih chhan hi chiang taka zawng chhuak turin sawrkar in theih tawp a chhuah ang tih a sawi a, Pu Lalchhunga hnen ah pawh lehkha thawn tul ngeiin a hriat thu a sawi bawk.

5. CONCENTRATION CAMP:

Grouping Centre a mipui kalkhawmte harsatna leh manganna tamtak sawi tlan anih hnuah India sawrkar hian kumin chhung hian grouping hi chhunzawm zel dawn em tia zawhna a siam chu Church delegation chuan chhunzawm zel anih an rinloh thu an sawi.

6.INHMUH LEH HUN TUR

Kohhran hruaitute chuan Delhi lama zin an tum thu an sawi a, an lo hawn a in hmu tlang leh turin sawrkar an sawm nghal a, chu sawm na chu Home Minister in May 15 hnu lamah nise, chutah chuan Vice President te pawh an lo tel thei ngei tawhin a rin thu a sawi a formal taka inbiakna chu a tawp ta a. Aizawl Town DC hnenah in communicate dan chu dah a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s