Supply Dept thenfai a nih dan

CAG-in ration buhfai leh chini sawngbawl danah eirukna tam tak a haichhuah hnu in Mizoram Assembly hnuaia Public Accounts Committee leh Supply Department te chuan hma an la a, hnathawk engemawzat suspend an ni a, ban hial pawh an awm. Tin, heng hnathawk te hian an sum eiruk cheng vaibelchhe chuang daih chu sorkarah an rul leh ta bawk

Buhfai-2

 

May 2 khan Kolasib District Civil Supplies Officer ban tak Rohmingliana leh Food Civil Supplies and Consumer Affairs (FCS&CA) Department hnuaia LDC ST Lallawmzuala te chu Chief Judicial Magistrate, Kolasib hmaah an inlan a. Court-a an inlan chhan hi Kolasib-a chanchinbumite’n kum 2014 October-a dan lova buhfai an phurh chhuah tir leh hralh ni-a an puhna FIR atanga irhchhuak thubuai kal zel vang a ni.

Kolasib DCSO leh LDC laka FIR thehluh hi tunhnaia FCS&CA Dept hnathawkte’n an hnathawhna lama thil dik lo ni-a lang an lo tih avanga buaina an tawh langsar zual a ni a. Mahse, mipui hriat em em lem loh in tun kum sawm bi intan tirh leh a hma lam hret atang tawh khan hnathawk tamtak te’n buaina an lo tawk tawh a, Supply Dep hi nasa taka thenfai a ni ti ila a sual tam pui awm love.

Hetianga inthen faina hi Comptroller and Auditor General of India (CAG)-in FCS&CA a chhuichianna atangin a intan a. CAG report hi March 29, 2011 khan Mizoram Assembly hmaah pharh a ni a, report-a a lan dan chuan Mizoram pum a Supply hnathawh dan nilovin Aizawl leh Champhai district zirchian bik an ni.

Enga pawh chu ni se, CAG report House a pharh a nih lai vel leh a hma deuh atang hian dept chuan thenfai hna a thawk tan tawh in a lang a, ei ru suspend te pawh an awm tawh.

Assembly hnuaia MLA rual awmna Public Accounts Committee (PAC) chuan kum 2014 atang khan CAG report hi a bawhzui tan a, dept hmalak tawhna te chu en thlithlaiin hmalak zui dan tur te a hrilh zel a, tun thleng hian FCS&CA hnathawk ei ru te chuan an sum eiruk cheng vaibelchhe chuang fê sorkarah an rul tawh a, hnathawk tamtak chu suspend an ni bawk a, ban hial te pawh an awm.

CAG chhuichianna hi PAC chuan tun thlengin a bawhzui reng a. Kum 2014 leh 2016 inkar khan PAC hi Supply Minister hlui K Sangthuama chairman na hnuaia hnathawk thin a ni a, member-ah MLA paruk, RL Pianmawia, S Laldingliana, Lalrobiaka, Lalthanliana, Lalruatkima leh Chalrosanga Ralte te an awm bawk a.

PAC hi kum 2016 khan dan pangaiin din thar a nih hnu ah Lalruatkima chu Chairman ah ruat niin member-ah Nihar Kanti Chakma, T Sangkunga, Lalthanliana, Dr H Ngurdingliana, Dr K Beichhua leh R Vanlalvena te ruat an ni bawk a.

FCS&CA dept chhunga eirukna hrang hrang CAG-in a haichhuah te bawhzui a nih tlangpui chhung hi K Sangthuama chairman lai ni mahse, committee thar pawhin a la bawhzui zel a, kumin Assembly Session, March thla chhunga neih ah khan PAC-in a bawhzui chhunzawm dan report hnuhnung ber chu House hma ah pharh a ni. PAC report hrang hrang leh CAG report-a a lan dan chuan hetiang hi Aizawl leh Champhai district-a Supply hnathawk te eiruk dan tlangpui chu a ni:

 

Charge in hlanin bungrua leh sum fai a bo nasa

CAG-in FCS&CA dept sum hman dan a zirchian hun huamchhung chu sorkar kum 2005 leh 2010 inkar a ni a. Mahse, dept chuan heng thla 60 chhung hian thla 15 – June 2009 atanga September 2010 – ami chauh charge report (centre pakhata hotu ber te an inthlaka charge la thar te’n an centre uap thara bungraw awm dan dinhmun an chhinchhiahna) a phawrh thei a. Thla 45 dang charge report a phawrh theih loh chhan chu sawifiahna pawh a nei lo.

Charge report phawrh theih hun chhung hian audit huam chhung hun za zela sawmhnih panga (25%) chauh huam mahsela, hemi chhung hian Sub-Distribution Centre (SDC) leh Fed Centre (FC) pakua ah ration buhfai quintal 20,902 (suma chan tir chuan cheng vbc 1.94 hu) leh sum fai  cheng nuai 32 chu a kim lo tih CAG chuan a hmuchhuak a. He buhfai bo chungchang CAG-in a audit lai hian dept chuan cheng nuai riat chauh hnathawkte hnen atangin a la hmu lêt.

Chu chauh pawh ni lovin, khatih laia Ngopa SDC-a charge chelh mek tu Sub-Inspector K Rokunga chuan Ngopa ah ration buhfai quintal 5,709 a ei rûk chu sorkar sum a hmansual vawikhatna a ni lova. CAG chuan Khawdungsei FC a enkawl laiin he Sub-Inspector tho hian ration buhfai cheng nuai 20 dawn man a lo ei ru tawh bawk tih a hrechhuak a. A eirûk hmasak ah hian hrem a ni lo nghe nghe a, Ngopa ah sawn a ni ta zawk a. Sawn a nih hnu hian ration buhfai cheng nuai 53 chuang man a lo ei ru leh hman zawk a ni.

Dept chuan centre hrang hrang atanga hetianga ration buhfai leh sum tam tham tak bo hi a pha lova, thil bo te chu dept hnathawk te zinga mawhphurtu te rulh tir mek an nih bakah anni hi suspend an nih thu CAG a hrilh a, an ei ru chung pawha ban an nih loh chhan chu sorkar sum an hmansual te a bo mai aia an rulh theih nan an ti zawk niin dept chuan a sawi bawk.

CAG thil hmuhchhuah te hi PAC chuan a bawhzui a, kum 2014 May thla khan dept chu hetianga official suspend tâwk te hming leh an sum rulh tawh te a zawt a, Ngopa SDC-a Sub-Inspector dinhmun a zawt nghal bawk a.

Dept chuan PAC duh angin SDC/FC hrang hrang atanga ration buhfai leh sum fai ei ru tute hming leh an hnen atanga sum hmuh lêt a nih dan a thehlut ta a, dept thu thehluha a lan dan chuan, kum 2015 kum tir thleng khan heng mite hnen atang hian cheng vbc khat chuang hret hmuh lêt a ni tawh a, chu aia tam hret chu rulh an la hmabak bawk.

Hemi thu ah hian PAC chuan Dept. chu thu zawh belh a nei lem lova, mahse, SI K Rokunga chungchang chu chipchiar takin a zawt thung a, dept-in ani lakah hian Anti-Corruption Bureau (ACB) thubuai a kal mek tih a sawi hnu in PAC chuan chak taka ACB nena thawk dun turin thurawn a pe nghe nghe. ACB atanga The Frontier Despatch (TFD) thu dawn dan chuan F Rokunga thubuai hi Special Prevention of Corruption Act Court in a la ngaihtuah mek a, thutlukna a la siam lo a ni.

Table
Charge hlan laia ration bo rulh tir official te, FCS&CA-in PAC kum 2015 May thlaa a hrilh dan

 

Godown-ah buhfai awmzat chhinchhiah kim lo nasa

CAG chuan Aizawl leh Champhai district-a godown 31-a in-charge te chuan stock awmdan chhinchhiahna fumfe engmah an nei lo tih a hmuchhuak a. Chutiang chhinchhiahna a awm tak loh avang chuan godown in-charge te’n an record neih ang ang an phawrh a, chung leh DCSO te record neih enkawp a nih chuan inang lo a tam hle mai a.

Record mumal a awm loh vang hian dept chuan Aizawl DCSO(E) chhinchhiahna chu a haichhuak a, chutah chuan Sakawrdai, Darlawn, Khawruhlian, N Vervek, Ratu leh Zohmun centre te-a buhfai chhêkkhawl dinhmun bihchian a ni a, ration buhfai bik chu quintal 9,960 chuang zetin a kim lo tih hmuhchhuah a ni ta.

Hei hi PAC chuan a ngai thutak hle a, dept chu chhinchhiahna fumfe engmah siam lo official te hming leh an ei ruk zat theuh te pe turin a hriattir a, hmalak a nih dan leh Aizawl DCSO(W) leh Champhai DCSO hnuaia thil awmdan a zawt nghal a.

Dept chuan Aizawl DSCO(W) leh DCSO Champhai hnuaia stock kim lo an han chhuichiang leh a, chutah pawh chuan tam tham tak buhfai leh chini a bo niin an hmu leh ta bawk a.

Hemi hnu hian official engemawzat chu stock kim lo zat man hu chawi tir an nih bakah a then chu suspend an ni hial a, pakhat phei chu ban a ni nghe nghe ta a ni.

Hemi chungchanga dept-in June 2014-a PAC a hrilh dan chuan Ratu centre-a thuneihna chelhtu Zoramdinthara, SK chu suspend a nih bakah cheng nuai 2.80 chawi tir a ni a, hei bakah hian cheng 38,172 a la bat thu a sawi bawk a.

Tin, Aibawka ration buhfai quintal 3027.69 a bo chungchangah a tam ber – quintal 2,649.81 bo thu a mawhphurtu chu Lalthanzuala, Storekeeper (SK) a nih thu leh ani chu dept-in a ban tâk thu PAC chu hrilh a ni a. Ration buhfai quintal 300 chuang a bo anga lang erawh chu ziah sual vang liau liau a nih thu leh bo tak tak a nih loh thu dept chuan a sawi a. Mahse, quintal 77.88 bo erawh chu chhuichian mek a nih thu PAC a hrilh a ni.

Tin, Lalthanzuala hnuaiah hian Aibawk ah tho hian ration chini quintal 161 a bo tih hmuhchhuah a ni bawk.

Hmuifang ah thung chuan ration buhfai quintal 3,523 a bo a, chu chu cheng nuai 32.77 man anga chhût a ni a. Chutih laia thuneitu chu Thanbanglova, SK a ni a, mahse, a rulhna turin case la tihfel a ni lo thung a niin dept chuan a sawi.

Sialsuk ah chuan ration buhfai 2,404 a bo ve bawk a, mahse, khatih hun laia thuneitu storekeeper chu a lo boral tawh vangin hmalak theih a ni ta lo.

Hetiang tho hian Zohmuna thuneihna chang tu SK chu a boral tawh vangin engtin mah hmalak theih a nih loh thu a sawi bawk.

Sialsuk leh Zohmnun bakah hian hmun dang pasarih,  Dungtlang, Kelkang, Teikhang, Lungpho, Tuipuibari, Diltlang leh Lawngtlai a SK lo ni thin te eirûk chu anmahni an boral tawh avangin sorkar chuan a rulh tir thei ta lova. Hmun khat dang Khuanglenga ration buhfai bo chu dahthatna lama bo a nih avangin dan phal angin ngaihdam theih a ni bawk a.

Heng ration bo zawng zawng, a ei ru tu te rulh tir ngaihna awm ta lo leh ngaihdam theih te hi a vaiin cheng vbc 1.63 chuang man hu a ni a. PAC thurawn angin kum 2015 January khan khatih laia Supply Director R Lalvena (IAS) chuan Finance Department ah nuaibo (write-off) dilna a thlen ta ringawt mai a ni.

 

Buhfai phurh man pe chuang nasa

Kalphung pangai ah chuan retailer te hian centre emaw godown emaw hnai ber atangin an Fair Price Shop theuh thleng buhfai an phur mai thin a, an phurh man chu a hnu ah DCSO hnenah an bill leh mai thin.

Mahse, CAG chuan Aizawl leh Champhaia retailer 42 te’n hetianga bill an thehluh leh DCSO te’n an rulhna lehkha, kum 2006 leh 2010 inkara mi te chu a bihchiang a, heng ah te hian retailer te’n buhfai an phurhna man cheng nuai 25.98 rulh tur a nih laiin a lêt aia tam, cheng nuai 54.47 lai maiin DCSO pathum (Champhai, Aizawl East leh Aizawl West) in retailer-te an rul tih a hmuchhuak a, a vaiin DCSO pathumte hian retailer 42 te hi cheng nuai 28.49 in an rul chuang tihna a ni.

CAG-in an thil hmuhchhuah te an hrilhfiah hnu hian dept chuan hetianga sum rulh chuan nasa tak a awm tih hi a pha lova, centre tin te pawh retailer te hnenah bituk aia tam ration pechhuak tawh lo tura hrilh an ni tiin a chhang a.

PAC chuan he thil hi a zirchiang ve leh a, dept chu zawhna engemawzat a zawt ta a: DCSO te’n sum an rulh chuan tâk retailer te hming, engzah theuh nge rulh chuan an nih, chu sum chuang chu sorkar an pe lêt leh em tih leh a rul chuang tu official te leh hrem an nih leh nih loh te a zawt a.

June 20, 2014 khan dept chuan PAC zawhna te chu a chhang a, insawifiahna chi hrang hrang a nei ta a; dept chuan DCSO Champhai hnuaiah hetianga retailer hnena sum rulh chuan a awm lo a, audit-in a tisual zawk niin PAC a hrilh a. Tin, Aizawl East leh West DCSO te chuan hetianga retailer sum rulh chuan hi an nei ngei a, mahse, mipuiin buhfai an mamawh em avangin ration hi ni dang aia tam pêk chhuah a ni a, retailer te’n ni dang aia tam ration te chu anmahni hek zawngin an phurh duh loh avangin rulh an nihna chuang anga lang chu sorkar pek lêt tir an ni ta lo bawk a. Tin, hetianga tisualtu official-te chuan mi rethei te tanpui nana hma an lâk avangin hrem an nih loh thu dept chuan PAC a hrilh bawk.

Mahse, PAC chuan dept insawifiahna hi a awih lo.

CAG report bawhzuina ah hmaichhana insawifiahna hun a pêk in PAC chuan dept hotute chu heng zawhna ngai chiah te hi a zawt leh a. Chutianga PAC-in zawhna ngai a zawh leh takah chuan dept chuan Champhai DCSO hnuaiah sum rulh chuan a awm lo tiin a chhang leh a. Mahse, Aizawl East leh West DCSO te’n retailer te sum an rulh chuan chungchangah insawifiahna thar a lo piang ta: heng DCSO pahnih te bial chhunga mipui cheng te hi ram lama hnathawk mi, nikhata vawi thum chaw ei mi an nih avangin sorkarin a bituk ration an kham ngai lova, chu vang chuan bituk aia tam pêk an ni a ti a. Tin, ration engemawzat chu Kohhran leh tlawmngai pawl te pêk an ni bawk a, chu vang chuan retailer te hian phurh man dawng hnem mahsela, sorkar ah rul leh tura hriattir an ni lo niin dept chuan a sawi a. Chutih rualin, mi rethei te tanpui nana hmalak ni mahse, ration tih pun chu phal ni tawh suh se tiin Dept-in DCSO te a hriattir tawh niin  PAC a hrilh bawk.

Mahse, he insawifiahna hi PAC chuan awih harsa a la ti cheu a. Ration phurh man reng reng chu retailer ten an phurh zat chiah chiah ah chauh sorkarin a rul tur a ni a, an phurh zat a tam tih finfiahna awm si lo-a an phurh man a tam tih ringawt mai chu PAC chuan a pawm duh lova. Tin, dept-in hun hrang hranga insawifiah dan chi hrang hrang a nei chuan awih a ti harsa lehzual a ti bawk a, thil tisualtu te chu hrem ngei ni rawh se tiin thutlukna a siam chhunzawm leh ta a ni.

Heti a nih hnu hian Supply dept chuan ki dang hretin a chhâng leh ta a: CAG audit hun chhung, kum 2006-2010 kha mautâm lai a nih avangin puitling chu buhfai kg thum theuh pêk an ni a, naupang chu chumi zatve chu pêk an ni thung a. Auditor chuan hetianga chhût lovin puitling chu kg hnih theuh leh naupang chu kg khat theuh pêk an la ni angin a chhût a, chuvang chuan ration phurh man rulhna chu a tam ta viau ang chauhin a lang ta a. Tin, hetianga ration bituk dan hi kum thum emaw kum li emaw thlak danglam lovin dept hnathawk te’n an ring mai zel a, chuvang chuan retailer te rulhna man hi a tam uchuak lem love a ti leh a. Hetianga chhânna dang leh ta ah hian PAC chuan a awih leh awih loh emaw a la sawi lova, thutlukna a la siam leh hrih lo.

 

“Godown chhiat vang” a buhfai kim lo

CAG chuan Darlawn leh Khawruhlian FC hnuaia godown atang te in ration buhfai engemawzat a bo tih an hmuchhuak a. Darlawn storekeeper sawi dan chuan godown a chhiat tawh vang leh a len tlem avangin buhfai te chu departmental godown leh mimal inah te a dahthat a ngai thin a, hetianga hmun danga a dahthatna lamah hian September 2006 leh July 2009 inkar khan buhfai quintal 376 chu a bo ta mai niin a sawi a.

Khawruhlian storekeeper pawhin godown chung, bang leh chhuat ah te tui a pût theih avangin buhfai chu a chhe zo vek niin a sawi a, May 2002 leh May 2009 inkar khan quintal 390.27 lai a chhia niin a sawi bawk.

Hetianga CAG in buhfai tam tham tak a chhia tih a hmuhchhuah hnu hian Darlawn Storekeeper chuan kum 2009 August thla khan dan in a phal angin heng buhfai bo te hi ngaihdam a, ziahbo mai dept ah a dil a. Khawruhlian storekeeper pawh chuan kum 2009 June thla khan ngaihdam leh ziahbo a dil ve tho a, buhfai chhiat nachhan te chu rannung in an tlan bakah an huh zawh vek vang niin a sawi a.

PAC chuan he thu hi a bawhzui leh a, kum 2014-a dept hotute a kawmna ah chuan thu a zawtfiah a, mahse, dept hotute chuan storekeeper te dilna hi ngaihtuah a nih hnu ah belhchian dawl lo ah a ngai a, buhfai bo leh chhia ni-a sawi te hi rul turin a ti ta zawk niin PAC a hrilh.

Kumin March thla Assembly-a PAC in report a thehluha a lan dan chuan dept hian Darlawn storekeeper Zonuntluanga chu thuang hnihin buhfai bo hi a rulh tir a, a vaiin cheng nuai 3.49 a rul a. Tin, Khawruhlian storekeeper Lallianruala pawhin thuang hnih thovin cheng nuai 3.62 a rul ve bawk.

 

Buhfai centre atanga phurh chhuah si, a thlen na hmun tur thleng lo

CAG chuan July 2008 leh February 2010 inkara ration buhfai quintal 1,677.41, Champhai leh Kawlkulh PDC atanga phurtu contractor te phurh chhuah chu an thlenna tur Fed Centre an thlen loh thu a hmuchhuak a.

Heng kawng laka ration buhfai bo ta zingah quintal 1,285.77 chu DCSO Champhai chuan Champhai PDC atanga phurh chhuah a nih hnu hian an thlenna tur Farkawn, Kelkang leh Khuangleng FC chu an thleng ngei a, mahse storekeeper te’n an lo chhinchhiah lo niin a sawi.

Kawlkulh PDC atanga ration buhfai quintal 159.27 chu kawng lakah a buak bo hnem em avangin FC hian dawng angin an ziak lo mai mai niin a sawi bawk a, CAG chuan chuti a nih lai chuan engzah chiah nge baw bo tih hriat tumna a awm loh bakah phurtu contractor chawi zat tur pawh chhût chhuah a ni lo a ti a.

PAC in a bawhzui hnu chuan dept chuan Farkawn, Khuangleng leh Kelkanga ration buhfai thawn tam zawk te chuan an thlen hmun tur an thleng ngei finfiah hnuhnawh a ni a, mahse, Champhai atanga Khuanglenga phurh ni-a inziak, quintal 173.87 (sum a chantir a cheng nuai 1.61 man hu) chu mawhphurtu SK, Rohnuna’n sorkar ah a rul leh a ni tiin a sawi.

Tin, dept in thil dik lo te a chhui hnu ah Kawlkulh leh Hliappui inkara quintal 159.27, a phurtu contractor Hmingdailovi’n a phurh chhuah ngei, baw bo zo ta ni-a sawi chu R Laldawngliana, SK kaltlanga rulh leh a ni a, a rulhna hi cheng nuai 1.48 a tling.

Hetih lai hian, Kawlkhulh leh Hlaippui inkara ration buhfai kawng bo quintal 232.37 pawh chuan Hliappui a thleng ta chuang lo tih hmuhchhuah leh a ni a. DCSO Champhai chuan kum 2015 August thla khan a phurtu contractor Roliana hnenah insawifiah turin thu a pe bawk a, contractor hian lehkha pawimawh a la thehluh loh avangin a phurh man pêk a la ni lo hrim hrim bawk niin dept chuan a sawi. He thil ah hian PAC chuan thutlukna emaw rawtna emaw a la nei leh hrih lo.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s