Khawvel / Thih (leh nun) dan tha zawk

Kum 1662 khan London-a puanthuina hmanraw tenau zuartu pakhat chuan thih dan chungchang hi a lo ziak tawh a. John Graunt-a’n khatihlai huna ‘Lal suahsualna’ tia an vuah, lalin a khawih chuan dam thei nia an sawi ngawr natna vei zat te a lo chhinchhiah tawh a ni.

Tunlai damdawi kan hman ang awm hma a thihna lo thlen thut dan leh a hlauhawm dan kha Graunt-a lehkhabu hian min thlir pui zuai a ni ber a. Mi reng reng kha an thi hma a, kum zabi 20-na thlen hma kha chuan mihring hi a tlangpui-in zawng chi khat Chimpanzee dam chen chauh an dam.

Tunlaia a pawimawh ber zawk chu thihna leh damdawi lam thiamna inzawm takna hi a ni. Thihna lo thlen dan, thlen hun leh hmun hi kumzabi khat kalta chhung khan a danglam nasa hle a. Kum 1990 chho te kha chuan mitthi zinga a chanve kha natna khirhkhan, inkai chhawn theih loh chi vei vanga thi an ni a, kum 2015-ah erawh chuan natna khirhkhan, inkaichhawn theih loh vei thi zat hi mitthi zawng zawng atanga hmun thuma then hmun hnih a lo tling ta a.

Ram hausa-ah chuan mitthi hmun thuma then hmun hnihte chu Damdawiinah emaw Nursing home-ah emaw an thi a. Theihtawpa enkawl an nih hnu-ah an thi tlangpui.

American zinga kum 65 aia upa thi zinga hmun thuma then hmun khat chuan an hun tawp thla thum vel chu Intensive Care Unit (ICU)-ah an hmang a. Hmun nga a then hmun khat chuan an thih hma thla khat la awmah zai (surgery) an tawk a ni. Cancer vei damdawiina thite hian an natna ang tho va na, mahse in lama thite aiin na, rilru hahna leh hrehawm an tuar tam zawk a. An chhungkhat lainate pawh doctor-te nen emaw an chhungkhat laina dang nen an inhnial tam zawk bakah rilru hah avanga harsatna leh lungngaihna an tuar rei zawk bawk.

A pawimawh ber chu hetianga damdawiina enkawla thihna hi mi-in an thlan zawk a ni lova. The Economist chanchinbu-in a tarlan dan chuan Kaiser Family Foundation in ram lian tak tak pali-a mipui ngaihdan a lakah chuan mi hrisel tha pangngai tam zawk chuan an hun a lo thlen chuan mahni in luma thih an duh zawk deuh vek. An hun tawp beiseina chungchang han zawh chuan a rei thei ang ber dam an duh thung a. An thih dawnah chuan na tuar lo leh thlamuang takin, an tana phurrit ni lova anmahni hmangaihtute’n an kil taih laia kal kha an thlahlel ber a ni.

Thihna thenkhat hi chu a rapthlakin pumpelh ngawt theih a ni lova. Anton Chekhov-a tihdan angin thihna lo thleng ngei ngei tur Champagne dawm chunga lo nghak thei hi mi zawng zawng an ni hek lo.

Mi an dam that ver vawr laia an duhdan an sawi kha an hun tawp a lo thlen dawnin a inthlak mai thei a. Damdawi lam hmanrua kha Hospital-a a awm si chuan mahni inluma thih kha chuti vakin a chakawm vak chuang lo thei a. Enkawl dan hrehawm tak tura ngaih pawh hi duhthlan tur dang kha thihna a nih chuan pawm zawk a awl viau a.

Damlo thenkhat chuan beiseina zawng zawng a bo hma chu tan fat fat an duh a ni. Damlo tam tak erawh chuan an thih dawna an duhthusam an sawi nasat viau lai in a theih dan ang anga enkawl an tawk leh tho thin a, doctor te zir dan leh hna ber chu theihtawp chhuaha, tih theih zawng zawng tih kha a nih miau avangin an enkawlte duhdan leh an nat dan hrilhfiah chian lam an ngai pawimawh vak thinlo.

American zinga cancer vei hmun thuma then hmun khat chauh chu an hun tawpa an thil duh zawh an ni a – entirna’n, an thih hma-in an tute inneihna a tel ve emaw ang chi te an zawt ngai lova. A chhan chu an thih hma phah theih vang a ni a.

Ram dang tam takah phei chuan an duhdan zawh hi an tlem khawp ang. Cancer lam thiam doctor tam ber, an damlo enkawl tam takin an thih san tawhte hian enkawl dan bak chu biaksawm dan an zir tello tih hi an sawi dan a ni.

The Economist hian doctor-te tanpuina a nunna lak chungchanga dan siam ni se tiin rawtna a lo siam tawh a, rilru la harh si thi ngei ngei tawh tur site’n an duh a an nunna laksak tura tanpui an nih theihna atana rawtna a ni. Thih theihna chanvo pawh hi a nihna taka chuan thih dawn tepa enkawlna tha leh nuam zawk sawina lek fang a ni a. Mi tam zawk chuan he duhthlan theihna neih hi an duh a, chuti chung chuan a tawp khawkah chuan tlemte chauhvin an duhthlanna chu a taka tihpuitlin an thlang kher lovang.

Mi tam takin thih an duh dan hi chu damdawi hmanga awlsam te-a tihhlawhtlin sak theih an ni. Na tuar lo tura enkawl hi ngawih pawimawh a ngai a. Ngaihthah hlawh tak he enkawl dan phung hian na chhawkna a ken tel bakah thi mai tur damlo thinlung lam puahchah tura thusawi a keng tel. Tam tak chuan beiseina a awm tawhloh hnu-ah chuan damdawi pawh hian awmzia a nei tawh lova, thingpui leh khawngaih lantir chauh a tih theih tawh tih ngaihdan hi hman lawk thleng khan an la vuan a. Mahni in luma in dawm hlum lam ngaih pawimawhna rawn intanna Britain-ah ngei pawh hian nachhawkna hmanga inenkawlna hi chu an uar viau lo.

Mahse, tunhnaia zirchianna-ah chuan he thil hi a diklo hle tih hmuhchhuah a ni a. Cancer vei rei tawh enkawlna-ah a tir lam atanga na chhawkna hman uar hian an natna a chhawkin a tihniam mai a ni lova, an nunna a pawhsei sak thei a ni.

Doctor tam ber hi mihring te kan thih ngei ngei dawn thu sawi lova an thih hun tih khawtlai hna thawk tura damdawi lam thiamna zir an ni a. Mahse, an tawng chhuah erawh chu a tul.

Atul Gawande-a’n damlo na zualte biak dan kaihhruaina a siam chu damlo laka hman a nihin an tangkai pui hle a. Biak sawm reng hian an tawrhna a tinep thei tih a hmu chhuak.

Chuvang tak chuan an natna khirh veite an hun hnuhnung lama enkawl dan hi tih danglam a tul hle a. Kal mai tura ngaihte chu damdawiin atanga lak chhuah hma a enkawl a pawimawh hle a. Chumi rual chuan doctor-te leh hospital tana sum buaipui dan kalphung pawh thlak a ngai ang.

Doctor leh damdawiin te hi damlo enkawlna senso an dawn hi sorkar leh insurance company pek sak an ni ber a, natna laka ven leh damlote hlim leh nuam taka awmtir hi an hnapui ber niin an hre lemlo fo.

America rama damlo enkawl dan thar ‘Medicare’ hnuaiah chuan kum 65 aia upate doctor-te’n uluk taka an biak sawmna atan pawisa dah tel a ni ta a, insurance company te pawhin an tih ve thuai a tul ang.

Damlote biak sawm hi ruh tliak enkawlna atana damdawi chawh nen a pawimawh dan a inang reng tawh a. Thih dan tha zawk kan tih chu nun dan tha zawk – thih thlengin tihna a nih chu.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s