Tualchhung Lawrkhawm/ April 27 – May 3, 2017

Sorkar in Champhai-ah CYMA palai tir, JAC-in pisa kai tur dan tum thulh rih

Central YMA in palai hna thawka Champhai JAC te duh leh mamawh sorkara thlena tih hlawhtlin an tiam avangin Champhaia pawl hrang hrang inhlawmkhawm Joint Action Committee chuan District Hospital-a naupang doctor dah phuta May 3 atanga sorkar nawr nana pisa kai tur dan an tum chu a hma ni, May 2 khan an thulh.

Champhai JAC hruaitute hnen atanga The Frontier Despatch (TFD) thu dawn danin sorkar in CYMA chu President Lalbiakzuala hovin mi pakua (CEC member paruk tiamin) chu Champhai JAC hruaitute dawr turin a tir a, hetah hian CYMA hruaitute chuan Champhai JAC te chu sorkar pisa kai tur dan an tum chu thulh rih a, an duh leh mamawh te sorkar-a thlen sak a tih hlawhtlin ngen an tum avangin pisa kai tur dan an tum chu an thulh niin Central YMA hruaitute hmalakna ngaihchang phawt ni se an ti niin an sawi.

CYMA President Lalbiakzuala hnen atanga TFD thu dawn danin Home Minister R Lalzirliana’n May 1 khan CYMA leh Mizoram People Forum hruaitute chu a pisa ah lengah a sawm a, hetah hian Champhai mipuiin sorkar-a lungawi lohna lantir leh an tum chungchangah palai hnathawk tura a beisei thu te sawiin sorkar thu kengin May 2 khan an kal niin a sawi. CYMA President chuan Champhai JAC hruaitute hnenah sorkar thu leh hla te an hrilh hria a, MPSC in doctor 26 a lak tur chu thla khat leh a chanve vel a awh dawn avangin Champhai mipuiin naupang doctor an mamawh chu dah ngheh mai harsa rih mahse, kar tin a inchhawka Champhaia duty tura naupang doctor tirh theih a nih thu te an thlen a, mipuite pawhin sorkara lungawi lohna an lantira buaina chhuakah tumah thubuai siamsak ni lo se an lo tih te pawh sorkar-a thlen an tum thu a sawi a, Champhai mipuite duh dan chu sorkar in a tih hlawhtlin theih an rin thu a sawi a, boruak tha tak hnuaiah dawhkan khat an kil niin a sawi.

 

Palai thawn hma leh thawn laiin CM-in tlawm dawn lo ti

MPCC President Lal Thanhawla’n sorkar laka thil phut neihin nuar lova tha taka indawr a pawimawh a, an sorkar chhungin nuarte thil phut a hlawhtlin a hriat loh thu a sawi.

April 28-a Congress Bhavan-a inkhawmah thusawiin Lal Thanhawla chuan, “Nawrh avanga hlawhtling ta hi kan hotute min kaihhruaina hnuaiah ka la hre mang lo,” a ti a.

Nuar lova tha taka indawr a pawimawh zawk a, tun hnaia mi thenkhat nuarte chet dan hi Mizo an ni ta lo emaw tih mai tur a ni a, chu mai ni lovin ring lo mite pawhin an chin dan thin zinga a chhe ber ang chi an ti duh hi a rapthlak hle a ni a ti bawk a, khang thil titu thenkhat kha ringtu inti leh rawngbawltute pawh anni ve awm si a, a pawi hle a ni a ti.

MPCC President chuan thu taka chen hi a pawimawh ber a, takna a din hi thil tha leh tlo zawk a ni a, hmui themthiamna hi sorkarna a ni ber lo a ti a, MNF party in Congress sorkar ah “chu mi minister chuan a eiru” tih sawi tur hre si lovin buaina leh nawrhna siam apiang zingah an tel a, CSS Hindi teacher-te’n CM chenna gate an nawr chhiat pawh khan MNF thalai hruaitute an tel a ni a ti a, tuna Champhaia buaina ah sorkar lirthei hal tute leh a tha thawhtute chu MZP phenah party dang hruaitute an ni a ti bawk.

Hemi hnu ni nga na, Home Minister hmalaknaa CYMA te palaia tirh an nih a Champhai JAC-in sorkar nawr nana pisa dan an tum an thulh ni chiah hian Chief Minister Lal Thanhawla chuan Siaha district-a a zin laiin Champhai mipuite’n doctor an ngiat thu hi a sawi chhuak a, Vanglaini ziah dan chuan, “An harsatna siam hrim hrim avangin kan sorkar hi a tlawm dawn lo, ‘Sorkarin doctor 26 kan la dawn a, in mamawh an tel hlauh chuan kan pe ang che u,’ kan tih laiin, ringtute’n hetiang thil chhia an ti duh dawn em ni, tih turin motor an hal a, Circuit House an tichhia a ni,” a ti a. CM chuan Mamit, Siaha leh hmun dangte pawhin doctor an mamawh rualin buaina an siam ve lo chu puitling a tih thu a sawi niin a ziak bawk.

 

Sorkar leh HPCD inbiak na chhunzawm a ni, July-ah inbe leh turin inremsiam

Sorkar leh Hmar People’s Convention Democrats (HPCD) inbiakna chu April 28 khan Aizawl-ah chhunzawm leh a ni a, inbiakna kal zel ah HPCD tih hmingpu hel pawl pahnih zinga pakhat, Zosangbera thuhnuai a awm te zawk mi 58 chu ramhnuai atanga an lo chhuah chuan sorkar laipui dan dinglai hnuaiah chhawmdawlna pek an nih theih dan te leh an ram mut pui silai sorkar hnena an thehluh chuan chhawmdawlna hran a awm theih thu te sawi a ni a. Sorkar aiawha inbiakna a tel te chuan hetiang chhawmdawlna pek an nih theihna hi Mizoram sorkarin gazette-a a chhuah hmasak a tul dawn a, chutiang tur pawh chuan hmalak ani dawn niin an sawi a.

Chhawmdawlna bakah hian tuna Sinlung Hills Development Council (SHDC) area a inrelbawlna tih changtlun chungchang te pawh sawi tel a ni a, hei hi inbiakna hmasa lamah pawh chipchiar taka sawi a lo ni tawh a, a thuphung chuan pawm ani tawh nghe nghe. Thudawnna in a sawi dan chuan inrelbawl dan hi India danpui (constitution) hnuaia 6th schedule huamchhung nilovin tuna Lunglei High Powered Committee te leh Manipur-a tlangmite awmna hmun inrelbawl dan entawn a ruahmanna siam tur a ni a, chutianga inrelbawlna ah chuan hruaitute chu mipui thlan an ni tura ruahman a ni bawk. Mahse, hei hi sorkarin ramchhunga dan dinglai te bihchiang in a la vet leh phawt dawn bawk a ni.

Mizoram sorkar aiawh te hi Home Department-a official te an ni a, tun chinah chuan thlantlin hruaitute an la tel lo. HPCD aiawh hian mi paruk an tel a, inbiakna hmasa lama an hruaitu LT Hmar-in a ho. Thudawnna chuan July thla hian inbiakna chhunzawm leh ruahman a ni a, mahse, lehlam lehlam inpeih dan a zir a la ni ang tiin a sawi.

 

7th Pay hmang dawn em tih la sawi theih loh: Lalsawta

Finance Minister Lalsawta’n Mizoram sorkar hnathawkte 7th Pay Commission ruahman anga hlawh pek ve chungchang chu Cabinet-a ngaihtuah tura an dah thu April 28 khan a sawi.

Congress Bhavan-a inkhawmah thusawiin Lalsawta chuan sorkar laipui chuan pawisa a neih zawng zawng atanga za-a pasarih (7%) vel chu a hnathawk hlawh atan a hmang thin a, Mizoram sorkar erawh chuan pawisa a neih zawng zawng atanga za-a sawmthum paruk (36%) vel a hmang thung a ti a.

Finance Minister chuan Cabinet in ngaihtuah turin meeting a la koh loh avangin tun maiah chuan 7th Pay hi Mizoram sorkar in a hmang ve nghal mai dawn em tih sawi mai theih a ni lo niin a sawi a,  mi thenkhat hrechiang lovin an ti thei lo tih te, sorkar laipui ah pawh sum an la dil lo an ti ni-a sawiin khawi state mahin Central Pay Commission hmang turin sum an dil ngai lo a, state in a tlin hun hunah a pe mai thin a, CM hovin a hun takah an la ngaituah ang tih bak chu sawi theih a awm rih lo a ti. A hma deuh hian BJP chuan Mizoram sorkar chuan a harsatna te sorkar laipuia thlen lo ah a puh a ni.

 

MNYF in HSS awm lohna Kawlbem khua ah Minister unaupain cheng nuai 98 man HSS building saah puh

MNF thalaite’n School Education Minister H Rohluna bial Kawlbem khua ah Higher Secondary School (HSS) hawn tum a nih loh laiin Higher Secondary School building tur ti-a school building sak a nih thu leh he building sakna ah hi Minister unaupa in a chhawng kimlovin a sa niin an sawi a.

MNYF-in  an puhna chungchangah hian The Frontier Despatch chuan Education Minister H Rohluna chu state pawna a zinna ah a be pawp a, tunah chuan sawi tur a neih rih loh thu a sawi.

May 2-a Aizawl Press Club-a thuthar la khawmtute an kawmna ah MNYF President K Vanlalvena chuan Kawlbem khua-a HSS building tur ti-a sak chu a hmunah an enfiah tih sawiin, “MNF MLA Dr K Beichhua-a’n Assembly-a a zawhna Education Minister H Rohluna’n a chhan dan chuan Mizoramah HSS 163 a awm a, heng HSS 163 a tarlan zingah hian Kawlbem khua a tel lo chungin he khua ah hian cheng nuai 97.94 sengin HSS building tur an sa chu mak kan ti hle,” a ti a.

MNF thalaite’n Kawlbema an enfiahnaah pawh, VC leh YMA hruaitute’n an khua­ah HSS a awm loh thu an lo hrilh niin a sawi bawk.

MNYF President chuan RTI dan hmanga an zawhna PWD-in an chhan dan chuan Kawlbem HSS sakna atan NLCPR sum atangin cheng nuai 97.94 hmuh a ni a, August 14, 2014-ah tender chhuah niin, work order pek chu Zothantluanga, Luang­mual, Aizawl, second class contractor a ni a. Mahse, Zothantluanga hi a hming putu chauh niin school building sak hna chu Khatih laia Kawlbem VCP Thanglura, Education Minister H Rohluna unaupa a nih thu a sawi.

K Vanlalvena chuan Education Minister-in Assembly House-ah Mizoramah HSS hawn belh tumna a awm loh thu a sawi laia a bial chhunga HSS building tur sak zawh a ni si chu mak an tih thu a sawi a, he khua ah hian HSS hawn tumna a la awm loh avangin thil dik lo, sum insiam tumna a awm ngeia an ngaih thu a sawi.

Zawhna chhangin MNYF President chuan building sak hi zo tawhin a lang a, mahse, com­pletion certificate an la inpe lo niin a sawi a, “RTI chhannaah chuan, kum 2015 tawpa sak zawh tur anga tarlan a ni,” a ti a, MNF thalai hruaitute chuan he building saka a chhawng chunga computer room tura tih, meter 6.3×4.5-a zau chu sak tel tura tih ni mahse, sak tel a ni lo an ti bawk.

 

Aizawl Civil Hospital in quality assurance a hmu

Aizawl Civil Hospital chuan National Quality Assurance Standards atangin Accreditation Certification a hmu thar a, hetiang hi ram chhungah dawng theih pahnih chiah an la awm a, pakhat zawk chu Haryana-a Panchkula Civil Hospital a ni.

ACH Medical Superintendent Dr KL Remsanga hnen atanga thu dawn danin NQAS in a tum ber chu sorkar damdawi in hrang hrang te’n quality tha an neih theih nana hmalak leh quality tha pek chhuah theih reng nana hmalak te a ni a.

Hemi atan hian tehfung leh endikna ki 3,000 chuang hmangin sorkar damdawi in te endik an nih thu a sawi. Endikna hrang hrang hmangin nikum April thla chhung khan ACH chu endik a ni a ti a, mi pathumin uluk leh chipchiar taka an endik hnu ah accreditation an pe ta niin a sawi.

NQAS accreditation certificate hi kum thum chhung atana pek a ni a, lawmmanah hamthatna tur thil hrang hrang bakah khum pakhatah cheng 5,000 zel a keng tel a.

Kum li hnu ah endik leh tur niin accredit chhunzawmn anih dawn chuan hi tuna an point hmuh atanga 5% talin ACH chu a san a ngai dawn a ni.

 

Chakma pawl in chibing inthliarna ti bo turin Chief Minister an ngen

Tun hnaia Chief Minister Lal Thanhawla NITI Aayog meeting-a Delhi-a a kal tumin IANS news in a lo kawmna ah chibing inthliarna a tawrh thin thu a sawi bawhzuiin All India Chakma Social Forum (AICSF) chuan CM hi lehkha a thawn nghal a, Mizorama chibing inthliarna ti tawp vek turin an ngen. AICSF hian Mizoram (Selection of candidates for Higher Technical course) Rules hnuaia ram leilung fa leh ram leilung fa ni lo dah hran a ni chu chi inthliarna ah an puh a, hei hi tih bo phutin CM chu hmala turin an ngen a ni.

 

Joint YMA Duty te’n tum 5 nan ruihhlo hal

New Market chheh vela Branch YMA panga – Electric Veng, Dawrpui, Chhinga Veng, Zarkawt, Saron Veng – Joint Duty-te’n an ruihhlo man cheng nuai 11.04 man chu May 2 khan Electric Veng LC Chairman Zorammawia’n a hal ral. Joint YMA Duty hian nikum September thla atanga vawiin thlengin mihring 1,247 an khawm tawh a, hemi chhung hian ruihhlo cheng nuai 42.85 hu manin an hal ral tawh bawk.

 

Dil ah naupang pahnih tla hlum

April 27 tlai dar 3 vel khan Lawngtlai District-a Bungtlang South khua-a hmeichhe naupang pahnih te chu dila an chenna ah an tla hlum.

Thu dawn danin, naupang panga (mipa pathum leh hmeichhe pahnih) te chu an khaw thenawm Hmunnuam khaw chhunga dilah an cheng a.

Dila chen pah hian changel-a siam pumah an chuang bawk a, an chuanna pum hi dil thuk laiah a let a, inhai chhuak ve thei lo hmeichhe naupang pahnih, Jessica MS Dawngzeli (9),  N Khaichhuaha fanu leh Lalrinliani(10), Malsawma fanu te chu an tla hlum ta a ni.

 

CHAMUL bawnghnute man ba Finance ah dil

Champhaia bawng vulhtute bawnghnute man ba rulhna tur sum chu Finance department ah dil mek a ni tiin Zalen chanchinbu-in a ziak a, AH&Vety Secretary B Lalthanliana chuan December 2015 atanga May 2016 inkara bawng vulhtu chhungkaw 46 te bawnghnute man ba tlingkhawm chu cheng nuai 25.37 a ni a, hei hi department chuan rulh sak a tum mek a, Finance dept-in an remtih chuan hun rei lo te chhungin pek theih beisei niin a ziak bawk.

 

UNDP palaiin NEDP-ah sorkar thawhpui duh

United Nations Development Programme (UNDP)-a India ram a palai Jaco Cilliers chuan April 26 khan CM Lal Thanhawla hnenah UNDP-in Mizoram sorkar program New Economic Development Program (NEDP) ah sawrkar an thawhpui duh thu a sawi niin sorkar thuchhuahin April 28 khan a tarlang.

 

Damdawi man

Central YMA hnuaia SRS  leh Health Dept hnuaia Food & Drugs Administration  chuan April 27 khan |huampuiah khuh damdawi bawm 22 leh a neitu-a puh Lalsangliana, Ramhlun Vengthar inti an man a. Khuh damdawi an man zawng zawng hi bur 3,168 niin cheng nuai  6.33 vel hu a ni.

 

In kang ral

April 26 zing dar 3:30 vel khan Chhingchhip Mualpuia Malsawmtluanga te chhungkaw chenna in Assam type chu bungrua chuh hman lovin a kangral a. In kan lai hian a neitute nupa hi ramah an riak a, an fate pawh mi inah an riak a, in kan chhan hi hriat a ni lo. Chhingchhip Joint YMA chuan in kang hi an sak that sak lehnghal.

 

Maxi-cab chesual

April 26 zing khan Shillong leh Aizawl inkara tlan Mizoram maxi-cab chu Meghalaya Lumshnong bulah tipper nen an insu a, a hmunah J Zabawia (37), Lunglei Ramthar Venga cheng chu a thi a, driver telin chuang dang mi pasarih te pawh an hliam.

 

Tek in deng hlum

April 25 chhun lama ruahsur lai khan Kolasib District Bilkhawthlir khua-a Lalthazawnga’n Chemphaia a leilet enkawl tura a tih Samshul (15) chu leileta an bawng thlun kai tura a kal chu têkin a deng a, a hmunah a thi nghal ni-a thu dawn a ni.

 

Ramsial in mihring si

Lawngtlaia bike nei intelkhawmin April 29-a Bualpui NG khua-a tanpuina pe tura kal zing ami James Vanlalhriatchhunga, Lawngtlai Chanmari Veng chu Lungzarhtum daia an tlan laiin ramsialin a lo si a, a ban ding lamah inchi ruk vela thui in a tai thler.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s