Mara ADC ah hneh takin Congress chak; CEM ni lai tling zo lo, CEM leh Chairman thar thlang nghal

May ni 4-a vote thlak Mara Autonomous District Council (MADC) 11-na, vawiin (May 8) a vote chhiar ah chuan state-a rorel lai Indian National Congress (INC) chu bial 17 — bial awm zawng zawng (25) atangin zaa 68 — ah chakin sorkarna a siam leh dawn a. Vawiin vek khan Siaha Tourist Lodge-ah Congress Legislature Party Treasurer Zodintluanga hovin thlan tlin thar te hi an thukhawm nghal a, Chief Executive Member-ah Amobyu bial atanga thlantlin N Zakhai an thlang a, Chairman-ah Siaha West-II bial atanga thlan tlin H Sahlo an thlang bawk.

He inthlanah hian INC in chiang takin hnehna chang mahse, Chief Executive Member ni lai RT Zachono chu Amotlah bialah MNF candidate HC Lalmalsawma Zasai in a hneh.

Mizo National Front leh Mara Democratic Front tangdun chuan bial 7 (MNF 5, MDF 2) an la thung a, Independent-a ding pakhatin bial 1 a la ve bawk.

(Inthlan result kimchang hetah)

Inthlan hmasa zawk nen khaikhin chuan kumin MADC inthlanah hian INC in hma a sawn a, kum 2012 khan bial 15 ah a chak a, kuminah bial 17 ah chakin member pahnihin hma a sawn.

MNF leh MDF tangdun an hnungtawlh thung a, kum 2012 inthlanah bial 8 ah chak mahse, kuminah erawh bial 7 ah hnehna an chang thei tawk a. MDF phei chuan kum 2012 khan bial 5 ah hnehna chang mahse, kuminah erawh bial 2 chauh an la thei a, MNF-in 2012 ah bial 3 an la a, kuminah bial 5 an la pha.

Tun inthlana bial 6 chuh tu BJP erawhin bial pakhatmah an la lo a, Independent-a chuh mi 14 zingah Tokalo biala ding KL Bana chauh a tling a ni.

MADC inthlana hnehna an chan chungchangah Mizoram Pradesh Congress Committee chuan, “MNF leh a thawhpuite under 10 ah,” tih thupui hmangin thu chhuah a siam a, “MADC inthlanah Mizoram Opposition Party lian ber MNF leh Mara rama Party lian ber MDF ten tangrualin nasa taka MPCC an beihrawn laiin [Congress-in] hneh takin sorkarna kan siam thei hi … lawmawm a ti hle a, he inthlana hnehna chang tura thawktute zawng zawng chungah MPCC chuan thinlung takin lawmthu a sawi a ni,” a ti a.

MADC inthlan campaign laia eptu party hotute’n tun inthlan hi 2018 Assembly inthlan enchhinna a ni dawn ti-a an lo sawi lawk tawh angin 2018 Assembly inthlanah Congress-a sorkar leh dawn tih chu he inthlan result hian a entir ni a an ngaih thu Congress thu chhuah hian a sawi a, “ ‘Thil siam zawng zawngte’n Congress sorkar tlak hun nghakhlel takin an thlir a ni’ tiin iak iak mahse, BJP sorkar-a NLUP hektu MNF leh a tanrualpui te chu under 10 ah Mara ram mipuite’n an dah ta a, hei vang hian Congress Bhavan chu a hlimin a lawm takzet a ni,” tiin thu chhuah chuan a sawi bawk.

MADC inthlan result chungchangah hian MNF President Zoramthanga chuan, “[Congress chu] ruling party an ni a, rin ai takin hma kan sawn. Result mak tak a ni lo,” tiin The Frontier Despatch a hrilh a. “Kan result hi kan duhthu sam lo mahse, state ah sorkarna kan lak hunah kan chak ve mai ang. Result ah hian kan tan lawmna tur awm lo mahse, a mak love,” a ti.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s