Asia/ Internet vangin kawlkil lehlam atanga naupang khuaikhemna hluar

Mi-in a kawngkhar an rawn chum lai chu a security camera atang chuan a hmu a. Thenawmte em ni? ‘Nge Police zawk? An zinga hmeichhe pakhat jacket hak hmalamah chuan  thu inziak a awm a, David Timothy Deackins chuan a khum chunga laptop-ah chuan ‘NBI’ chu engtihna nge tih a zawnlaiin Philippines ram thil chhuitu pawl National Bureau of Investigation hote chuan he a chenna leh suahsual bawlna hmun hi an rawn luh chilh mek a ni.

A in pindan pahnih nei chhungah hian naupang kekawrte leh kawrhnuai, naupang pheikhawk, thlalakna, kutkawl, hrui, ruihhlo chi khat (meth) zukna dawt, computer thluak bawm engemawzat leh thlalak dahkhawmna (album) te chu an hmu chhuak a. Bangah chuan tu-emaw hian ‘Anu leh Apa’n min hmangaih’ tih leh thinlung keh chhe lem ziak a awm bawk a. A computer-ah chuan mipa naupang leh hmeichhe naupang te te-in mipat hmeichhiatna an hmanglai video leh thlalak pangngai a tam mai.

Kum 53 mi Deaken-a April ni 20 a man a nih hnu hian internet kil thim laia thil inthup tam tak hailan a ni a, US, Canada, Europe leh Australia a naupang it chi (paedophile) ho hian khawvel letliam lam atangin naupang khawih bawrhban an nih lai video leh a lem hi an lo en thin a lo ni a. He suahsual bawlna la upa vaklo hi ‘webcam sexual tourism’ ti te in an sawi a, a thangchak viau mai a, United Nations chuan hursualna lama naupang khawih dan thar hi a runthlak hle tih a puang tawh. United States a hnuchhuitu lian FBI pawhin a darh zau zel nia sawiin engtik lai pawh hian hetianga naupang khawsa lai en tuma internet luh chilh hi mi 7,50,000 vel an awm reng niin a sawi.

Hetianga naupang thlalak hmanga sumdawnna tam ber hi Philippines atanga lo chhuak a ni deuh vek a. A chhan chu he ram ah hian internet a chak tha a, a pawt an tam a, khawvel puma pawisa thawn kual a awlsam a, rethei bakberh tak tak leh sum hmanga han hruai kawi theih tur naupang an tam bawk.

Tun thal chhung ringawt khan hetiang tih chingte hi karkhatah pathumte an man a. An lo hman thin zinga naupang ber chu nausen thla hnih mi a ni a, an vai mai hian kum 12 hnuailam deuh vek an ni.

Tun hnaia hetiang tih chingho an dapna-ah hian The Associated Press chu a kal ve a, naupang chhanchhuah leh inchhui zuina lian tham chu khawvel letliamah an chhunzawm a ni.

NBI-a mihring hmanga sumdawnna chhuitu hotu ber Janet Francisco-i chuan, “Hetianga tih chingho tan hian vaukhanna a ni tih hre rawh se. Ramdanga kan thawhpuite tanpuina-in kan man dawn a, tan in ah kan khung ang a, tan in ah an thi ang,” a ti.

Deakin-a an man theihna chhan hi a hmalama thil lo thleng fo tawh ang thil a ni a, internet hmanga khawvel ram hrang hranga pawisa thawn kualna buaipuitute chuan America rama internet provider hnenah account pakhat an rinhlelh thu an hriattir a. Hetianga pawisa thawn kual khawihtu Western Union, PayPal leh a dangte pawh hian tunhma pawhin an ngaihthat loh thu hi an sawi fo tawh thin. Deakin-a chenna inah hian pawisa thawn leh dawnna atana hman ATM Card bakah Smart Money leh Payoneer te pawh hmuh chhuah a ni. NBI-in he pa in an dap hun hi zing khawvar hma deuh a ni a, Van pasarih khat tlatah police, thil chhuitu, ukil leh khawtlang tana thawktute chuan Manila khawpui chhuahsanin phaizawl leilet leh lawi rual tlan pelin tunhma a US sipai inbunna hmunpui ni thin khaw pangngai a an leh tak chu an pan a. Mabalacat khua hi nawhchizawrhna hmunpui a ni deuh ber a. Van inzuite’n Fields Avenue (kawtthler/veng) an pelh hnu chuan kawng sirah hian zu inna hmun, nula inphelhruahna club, taksa khawih tirna dawr leh dawr thenkhat Viagra fakna intarna te bakah thawmhnaw themlem tak ha chunga anmahni dawr tur lo hui mektu hmeichhe engemawzat hmuh tur an awm a ni.

Deakin-a chenna pindan an thlen hian tlem a zawng chu a kawngkhar bulah an kal a. A kawngkhar nawr chhia a an luh chilh lai pawh hian “Tor network” hmangin thil bawlhhlawh tak tak hi a la khawih mek a. Police te sawi dan chuan a webpage hawngin a phone a a thil dahte hru fai turin a lo inring hle a. Thil dang an hmuh mai loh avangin a iPhone charge na hrui chuan an han hnungkhirh phawt a, a duh angin a che hman lo. A pindana an luh chilh hnu hian engvangin nge naupang sex hmang lai thlalak leh naupang hren behna chi hrang hrang a kawl tia an zawh chuan, a tirah chuan, “Kei hi chu a leitu ve mai ka ni e,” a ti phawt a. A hnu-a AP in a zawh leh chuan a kutzungtanga a bek kawh pahin, “Mahni awmdan theihnghilh zawnga atna chi khat vei ka nia,” a ti a. A chenna pindan chu mitin mitang chuan luhna nia sawiin veng lehlama Danish tlangvalte pawhin a computer chu an rawn hman sak mai thin niin a sawi.

Thil a sawi a sawi hnu-ah chuan a computer a milem lo awmte chu BitTorrent hmanga thil a download laia lo lut palh a nih a rin thu a sawi a. Mithiamte’n an zirna lama an hman rim tak BitTorrent hi zahmawh lama naupang hmang tangkaitute leh misual dang hian an lo hmang nasa ve khawp mai a – thil tam tak a lakluhin a thawn theih tlat avangin. FBI ho chuan misual chhuina’n BitTorrent hi an bih ngun ngang mai. Hetia an man hnu, rei fe an hnungkhirh takah hian Deakin-a hi a zam chhe ta deuh ni tur a ni, “Hetah hian enge in rawn tih pawh hi ka hre phiangsen love,” tiin a au ta chiam a. Deakin-a hi US-a Illinois state-a Peoria khua a seilian a ni a, a sawi dan takah vaimim hmun a seilian a ni. An chhungkua hi a darh ang reng a, a farnu-in a haw em em a, High School pawh a chhuak lo. Kum 30 bawr chho a lo nihin mi inchung siam hna a thawk thin a, thlasik laiin a awl a; chutiang awllen hun chu computer zirna’n a hmang thin.

Illinois Court thil chhinchhiahna-a a lan dan chuan Ganja vangin man a nih bakah vawi engemawzat chu rui chunga lirthei khalh vanga man a ni a, hei hi kum 1998-a Philippines a tlawh hma a ni. A hnu kum hnihah chuan internet service provider te hnuaiah a thawk a, Blackmagic program thun sak chu a hna deuh ber a ni. A thawhna pisa-a an intihthiamloh avangin Philippines rama a luh dan fello chungchangah hek a tawk a. Hemi tum hian thuneitute hnenah lehkha a thawn a, “An office computer chu zahmawh hlang a ni ringawt” tiin a ziak a. Hemi tum hian Deakin-a laka puhna hi bawhzui a ni lova, Philippines ram chhuahsan tura ngaih a nih lai-in a cham zui a, khawvela a biak pawh mi hrang hrang nen inzawmin computer system a kalpui zui a, website sing tel tak meuh meuh a hmang tangkai bawk niin a sawi. Kum engemaw chhung chu computer system administrator hna thawkin darkar khatah dollar 30 a hlawh niin Deakin hian sawi mahse a inchhung chu thil hmantlakloh a let nual a, a refrigerator a ruak thelh a. Artui dahna bawm hlui chu a chhuar atangin a rawn uai thla nual a, chaw dai ei ban tih hriat reng hi a thuka bel chhungah chuan a awm bawk a. He thil chhuitu pakhatin naupang engemaw zat thlalak a neihte a entir hnu-ah Deakin-a hian a kawngkhar atanga hla vak lovah a unau (cousin) nen an awm mai thei a ni tih a sawi zauhva. A hnu lawkah chuan hmeichhe naupang kum 9 mi leh kum 11 mite chu Police te hian an chhan chhuak ta a ni.

Hetianga naupang hren leh khawih khawlohte hi nunphung pangngai zawh leh thei tur chuan rang tak leh hun rei tak chhung mithiamin an vil an ngai a. Hetiang tuartu pakhat kum 19 a upa Cassie chuan a awmdan chu hetiang hian AP a hrilh: chhungkaw hung ve tak mi 14 awmna rethei bakberh taka an fanu naupang ber a ni a. Pa pakhat an khua a lokal chuan khawpui lamah nun nuam leh hahdam zawk, a chhungte chawm theia awm tura a hruai tur thu a hrilh a. A hralh dawn tih a hrilh pawhin a sawi awmzia a hre thiam lova, “Ka nui ringawt,” tiin a sawi. Chutih lai chuan Cassie hi kum 12 mi lek a ni. A hnu thla engemawzat ral hnu chuan chu pa chuan a vun hang chu a tih ngo sak a, a sam tihngil sakin zing dar 4-ah amah dawrtute a hmu ta thin a. A hna ‘Cybersex model’ chu a thawk tan ta a ni. Chu pa chuan thlalakna hma a hmeichhia a taksa pum langa inlan tur a duh niin a sawi a. Chu chu a lehkha zirna senso aia a hnathawh tur a ni tih a hrilh a. A hnu deuhah chuan hmeichhe naupang 6 dang an lo awm belh a, pakhat chuan nau a pawm a. School a kalna-ah Cassie hi pangngai taka awm a tum nasa hle a, a zirpuite lakah a thuruk a vawng nasa hle. In lamah chuan hlauhna-in a khat a, mahni intihhlum duhna pawh a nei fo. A u in a hriat chhuah takah chuan a tawrhna chu a tawp ta a, Police hnenah an kal ta bawk a ni.

Washington DC-a hmunpui nei tlawmngai pawl International Justice Mission kaltlanga hetianga hmeichhe naupang vanduaite enkawl zui hna thawktu Dolores Rubia chuan nu leh pa leh an chhungkhat laina dangte’n sum awlsam hmuhna’n hetiang hian naupangte hi an nawrlui thin niin a sawi a. Tam tak chuan an ngai thutak lem lova, a chhan chu naupangin inphelh an pawi ti lemlo a an hriat vang a ni a. Mahse, hetianga kalpui thui a nih hian a zual-zawpui-vaihlenhlo a thleng thin a ni.

“Tam tak chuan a diklohna an hre lem lova. Naupangte kha an taksa tuma’n an khawih sak lova, a lo hmutute lah tuifinriat ral leh lam daiha awm an ni bawk a,” tiin an sawi duh niin Rubia chuan a sawi a. Chu chiah chu hetiang lama inhmangte insawi thiamna fo pawh a ni.

Human Rights lama ukil leh Philippines a International Justice Mission hotupa Sam Inocensio chuan, “He thil hi sual anga lang a ni mai lova, sual dik tak a ni,” a ti a. “Internet kaltlanga hetianga mihring hman khawloh hi thil sual berte zing ami a ni,” a ti.

Hetianga naupang hmanga khawvel thiamna hman tangkaia suahsual bawlna ang chu khawvel huap hi kum 2011 khan Philippines ah hian hmuh chhuah a ni a, Smart phone leh wi-fi lo awm ta hian he pawikhawihna hi a ti punlun nasa hle. Kum 2013 atang khan khawvel pum ngaihven a hlawh tan a, a darh chak dan chu nasa tak a ni. Nikum chhung ringawt khan UK-a inbun Internet Watch Foundation chuan naupang mawilo taka chetna lem URL 57,335 an paih.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s