Dam-loh-dawi

Mizoramah damdawi lem, damdawi a nih tur ni pha lo leh damdawi thi tawh hralh leh sem tam tak hmuhchhuah a ni

 

Sorkar laipui hnuaia damdawi zirchiang tute chuan Mizorama sumdawngte’n damdawi an zawrh leh state sorkarin a sem chhuah zingah a lem chi khat leh a nih tur ang ni pha lo chi 20 lai an hmuchhuak a, zawrh leh sem zingah pawh damdawi thi tawh (expired) chi hnih a awm.

Ministry of Health & Family Welfare hnuaia National Institute of Biologicals (NIB)-in kum 2014-16 inkara ramchhunga damdawi a zirchianna-a a lan dan chuan damdawi zuarte’n an hralh ang chi ah bik Mizoram hi state zawng zawngah damdawi a nih tur ni phak lo (Not of Standard Quality, NSQ) tam berna dawttu a ni a. Mizoram ai hian state te zinga chhiar ve tho, Lakshadweep-ah chauh damdawi a nih tur ni phak lo hi zawrh nasat zawk a ni.

Sorkar damdawi sem chhuah ah pawh Mizoram hian dinhmun ropui a luah lem lo. Mizoram sorkarin a semchhuah damdawi za zela 14 dawn (13.8%) chuan an nih tur an pha lova, Mizoram aia sorkar sem damdawi-a a nih tur ni pha lo tamna state te chu Meghalaya (17.4%) leh Sikkim (33.3%) chauh an ni.

 

Damdawi lem

Kumin March thla-a tih chhuah “Survey of Extent of Problems of Spurious and Not of Standard Quality Drugs in the Country,” National Drugs Survey (NDS) tia hriat bawk in Mizorama damdawi a endik zawng zawng 182 zinga 80 chu sorkar supply a ni a, heng zingah hian pakhat chu a lem a ni a, he damdawi hi Chloro 250 a ni.

He report huam chhungah hian hmarchhak bial atanga damdawi an endik zingah Mizoramah chauh damdawi lem an hmu a. State danga damdawi lem an hmuhna te chu Gujarat, Haryana, Himachal Pradesh, Karnataka, Madhya Pradesh, Odisha, Punjab, Rajasthan, Tamil Nadu leh Uttar Pradesh te an ni a, Punjab leh Uttar Pradesh ah te hian damdawi lem pahnih ve ve an hmu a, a bak zawng ah hian pakhat theuh an hmu.

 

Damdawi a nih tur ni pha lo

Heng bakah hian Mizorama damdawi chi 20, a nih tur ang ni lo ti-a NDS report in a tih te zingah hian The Frontier Despatch (TFD) chuan pariat a hre thei a.

He report hian hetiang damdawi te hi an hming leh hmuhchhuah an nihna hmun a tarlan loh avangin a dang 12 te chu hriat theih mai an ni lo thung.

Damdawi a nih tur ni pha lo chi 20 zinga 11 chu sorkar damdawi semna hmun ami te an ni a, a dang zawng te hi damdawi zawrhna dawr ami an ni.

 

Damdawi thi

India ram pumah damdawi thi la zawrh/sem chhuah panga chauh hmuh a ni a, chung zinga pahnih chu Mizorama hmuh an ni a, an pahnih hian Mamit District chhung a mi ve ve an ni bawk.

Cefalexin capsule (Ceff 500), Mamit District damdawi dawr pakhat atanga endik tura April 16, 2015-a NDS hnuai thawk te’n an lak chu thla hnih lai a lo thi (expire) tawh a. Tin, Misoprostol tablet (Misoclear), Mamit District tho-a sorkar damdawi pekchhuahna hmun atanga endik tura hemi ni tho-a lak chu thla thum lai a lo thi tawh bawk.

Damdawi thi tawh la zawrh dang te hi Himachal Pradesh leh West Bengal ami te an ni a, damdawi thi sorkar semchhuah erawh chu Chhatisgarh ah hmuhchhuah a ni bawk a, Chhattisgarh ami hi ORS a ni.

 

Ram pum dinhmun

NDS hi sorkar laipuiin a ngai pawimawh hle a, hetiang survey kalpui a nih thu hi Press Information Bureau (PIB) kaltlangin February 22 khan a lo puangzar tawh a, sorkar laipui thu chhuah hian damdawi sample 47,954 a zir chian thu te, State leh Union Territory 36-a district 654 ami sample te hi lak an nih thu te pawh a tarlang a. Heng zawng zawng zingah hian sample 13 chu damdawi lem an ni tih hmuhchhuah a nih bakah sample 1,850 chu an nih tur ni phak lo an nih thu a sawi bawk. PIB chuan he zirchianna hi khawvela zirchianna awh zau ber niin a sawi.

 

Damdawi lem Mizoram sorkarin a lei dan

Khawsikpui damdawi  ni a ngaih Chloro 250 hi damdawi hlauhawm tak niin Mizorama Drugs Controller te chuan kum 2015 khan an lo finfiah tawh a, he damdawi hi sorkar in a enkawl damdawi in ah a lo sem hman nghe nghe.

Hetianga damdawi lem sorkar damdawi semna hmunpui atanga pekchhuah a nih mai nachhan chu Mizoram sorkar-in a enkawl damdawi ina hman atan khawsikpui damdawi, “Chloramphenicol” supply turin kum 2015 tir lam khan tender a chhuah a, tender chhangtute zingah Zedidia Enterprise chu thlan a ni a, anni hian Himachal Pradesh-a AIMS International siam damdawi, “Chlorophenicol” an chah thleng ta daih a.

Damdawi hi a dik loh avangin Health Department-a Vigilance Committee pawhin a pawm lo a, mahse, a siamtu AIMS International chuan Chlorophenicol hi Chloramphenicol nen a inang chiah ni-a an sawi avangin Committee pawhin sem chhuah atan Zemabawka Central Medical Store-ah capsule 1,86,000 a dah lut ta a ni.

Mahse, Chlorophenicol hi sawiselna a awm chhunzawm tak avangin Drugs Controller-te chuan an enfiah a, kum 2015 September thla khan Zemabawka Central Medical Store atsangin damdawi hi an man a, endik atan Guwahati-a Regional Drugs Testing Laboratory-ah an thawn a, laboratory chuan Chlorophenicol, Chloro 250 tia hriat bawk hi a lem a nih avangin damdawi hlauhawm tak niin an sawi a, a vaia ti chhe turin an rawn hriattir a ni.

Hetih lai hian, Himachal Pradesh sorkarin an state-ah AIMS International tih hming pu damdawi siamtu company a awm loh thu a rawn sawi ta bawk a, ram chhungah hetiang damdawi siam company an awm loh thute Drugs Controller chuan an hre leh zel a, Central Medical Store-a Chlorophenicol la awm zawng zawngte chu an man ta vek a ni.

He damdawi supply-tu, Zedidia Enterprise hian damdawi an supply-na man an dawn tawhte pawh sorkar-ah an pe kir leh vek a, he damdawi an lakna, Himachal Pradesh-a AIMS International aiawh erawh chu he damdawi hi a lem tih hriat chhuah a nih atangin biak pawh theih lohin an awm nghal a ni.

 

Mizorama damdawi zawrh leh sem, an nih tur ni pha lo te chu

TFD in Mizorama damdawi nih tur ni pha lo a hriat theih chin te chu Ampicillin 250 mg, Primaquine 15 mg, Primaquine 7.5 mg, Ampicillin 500 mg, VMOX500 (Amoxycillin 500 mg), Larkin (Paracetamol 500 mg), Gardenal 30 (Phenobarbitone 30 mg), Iron & Folic Acid Tablets te an ni a.

Mizorama damdawi rawn lût zingah a lem leh a nih tur ang ni pha lo a awm tih TFD chuan a lo ziak tawh thin a, Iron & Folic Acid Tabs phei hi chu sikul naupang hmeichhia te hnena a thlawna sem tura tih a ni a, 100 mg tura tih ni mahse, 109.06 mg a ni daih a.

Tin, Larkin hi a kawrah chuan 500 mg tih a ni a, endik a nih chuan 514.3 mg lai a lo ni a, pum chhungah a zawp thei lo niin endiktute chuan an sawi bawk.

Ampicillin, a kawra 250 mg tih chu 201.86 mg chauh a ni a, Primaquine 15 mg pawh 9.58 mg a ni a, Primaquine 7.5 mg chu 3.22 mg chauh a ni bawk a, VMOX500 (Amoxycillin 500 mg) chu 158.1 mg chauh a ni bawk a, Gardenal 30 (Phenobarbitone 30 mg) pawh 27 mg chauh a ni bawk.

NDS-in damdawi a nih tur ang ni pha lo a tih 20 zinga TFD in a hriat chian theih ah chuan Ampicillin 250 mg, VMOX500 (Amoxycillin 500 mg), Gardenal 30 (Phenobarbitone 30 mg) te chu sorkar in a hnuaia damdawi in leh a enkawl CHC, PHC leh Sub-Centre-a a sem tura a tih te an ni a, a bak te chu damdawi dawra zawrh te an ni.

 

 


One thought on “Dam-loh-dawi

  1. Damdawi diklo/ nih tur ang phalo zawng zawng chu hriat vek theih a va chakawm ve, mipui ah a darhzau thei ang ber a puanzar ni bawk se.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s