Khawvel/ Macron chakna thuruk: vanneihna, thiamna leh France-a hun thim liam tawh

French President inthlanna chuan an ram politics a thlawh khum a. Hnam bil chungchang leh khawvel pum huap politics a intawk sir a. Inhawn duhna leh inkharkhip duhna indona a ni.

Mahse, Pathianni zana chiang taka hnehna a chan takah khan, sorkara mipui thlan nihna la chelh ngai reng renglo Emmanuel Macron hian hnehna a chan chhan chu French chanchin leh nunphung mak tak vang a ni a, mipui hian thil inthlakthleng an duh a, mahse, Britain leh United States a mipui thinrim leh thil inletling thawk ang kha chu an duh ber lo.

A khingpui Marine Le Pen-i chu za zela 40 hnuai lam hmu pha chauhvin a awm a ni. Le Pen-i kha chu tling vaih sela chuan European Union chu buaina chhumpui karah a liluh pui ngei dawn tih a lan chian avangin Macron-a chakna hian Europe khawmualpui-ah hlimna khuang a ben tir a. Kum 39 chauhva upa, investment Bank hotu ni thin leh inthlan campaign laia thusawi nunglo zet hian hnehna a chang ta a. Hnehna a chan theihna chhan hi a vanneih vang a nih bakah rinai taka politics khelh a thiamzia a tihlan tak avang leh Le Pen-i leh a party National Front in chakna an chang mai tak tak ang tia French mipui tam zawkin an hlauhna chu a hmang tangkai thiam a ni.

Kum liam ta chhung mai khan khawthlang lam politics kalphung laka mipui beidawnna hian khawvel puma mipui mimir chetphung a her danglam em tih hi zawhna lian tak a ni a. Britain mipui-in European Union chhuahsan an duh thu vote hmanga an lan tir hnu-a Donald J. Trump-a United States President atana thlan tlin a nih leh takah khan boruak fawn vel hi a awmin a hriat a. Chutih lai chuan French ho chanchin hi khawthlang ramdang mite chanchin nen a inang lova, Le Pen-i chona hmachhawn pawh a danglam a. National Front hotu bera kum 6 a tan chhung khan an party hmai mawkna hrang hrang tihreh tum chu a hnapui ber a ni a, chu’ngte chu Communist duhlohna ngaihdan firfiak, ramdang atanga pem lutte huatna lian tak leh Juda ho huatna lian lutukte a ni. A pa, an party-in hotu pa bera an neih thin khan pawmlo ngial mahse Indopui II-na hunlaia ramhuai party ang hiala ngaitu an tam em avangin French mipui tam ber hian chu’ng ramhuai ho lokir leh chu an duh lo a ni.

Pathianni inthlanna-a vote thlak zo hlim hlawt, restaurant tereuhte neitu Natine Nurit (52) chuan,”Duhthlan tur dang a awm lo. Le Pen-i hi ka vote theilo, Firfiak vote ngawt thu a awmlo,” a ti hmiah mai. April ni 23-a an inthlan thawh khatna-ah khan Communist lam hawi Jean-Luc Melenchon kha a vote ngei a, inthlan thawh hnihna a ‘sumdawng rilru pu’ Macron-a a vote tak avangin lawmna tur erawh a hre hranpa lem lova. “Le Pen-i a tlak theihna atana vote thlak ka ni ber e,” tiin a sawi.

A tawpkhawkah chuan Le Pen-i hian ramhuai anga an hmehbelna chu a hlip zo ta miau lova, inthlan rusum thlak vanglai-in a che fuh lova, a thin tertek chhuak avangin an party chu mi in an hmuh ramhuai thar leh phah zawk niin French television a ngaihdan sawitu tam tak chuan an sawi niin The New York Times chuan a ziak. Macron-a nena mipui hma a an inchaltauhna-ah hian Le Pen-i hi a tawngkam a hlawk hle a, European Union atanga inhnuhdawh an duh thu a sawi hian mipui ngaihdan hi anmahni dodal zawngin a kaiher chiang lehzual ta a ni.

Hemi hma lam thla 4 kalta velah kha chuan Macron-a hi hla fe-ah pathumna a ni a, mi tam ber chuan chaklo sa turah riak ngai-in political party hruaitu pawh ni manglo, hmabak ko tak nei mahse a tan zangkhua a bungbut an la ringlo a ni. Mipui hma a a thusawi te lah kha a nung lovin, a ropui loh bakah a ninawm a, a tho lovin thlarau nun a chawm mawlh lo.

Hetiang a nih lai hian President ni thei awm ber tura hmahruai Francois Fillon chu sum eiruk thubuai-ah a mualpho ta tlat mai a, hei hian Macron-a hi a vawrh sangin April thla a inthlan-ah khan a invawrh chho ta a. Thawh hnihna-a Le Pen-i nen an inmalbeih takah kha chuan Fillon vote tu tam tak khan hreh ang reng takin Macron hi an vote a. Palina ni ta Melenchon kha thawh hnihna a a lan phak tak si lovah chuan French mipui-in pawm harsa an tih Le Pen-i kha awlsam te-in a hneh ta mai a ni.

Engemaw zawng tak chuan a tirte atang khan Macron hi a che zei ang reng phian a. Socialist lam awn mipui duh vak tawhloh an President Francois Hollande kha a tlansan hma a, Economy Minister atana ruat a nih khan a bang thuai a. Socialist Party chhungkua-in January thla a President candidate ruat tura inkhawmpui an koh khan a tel ve duhlova, a rin ang ngeiin an party mite chuan Communist lam awn an thlang chhuak ngei ang a, chu chu Melenchon chuan a hliahkhuh ngei dawn niin a hre lawk a, a lo thleng dik ta chiah a ni.

French mipui hian Communist awn lutuk emaw Capitalist awn lutuk emaw hi an ngaihsan loh chhan chu France rama harsatna tam ber ching fel theitu-ah an hmu lo ve ve a. Macron hi chu a lai takah a ding a, veilam leh dinglam (Communist leh Capitalist) a awmte a hip ve ve a. Hna hmulo tam lutuk tihtlem leh tharchhuah tihpun lam a sawi pawlh thiam tlat a ni. Sumdawnna lam hawia a ngaihdan hian dodaltu a ngah ang reng a. Melenchon phei chuan Macron leh Le Pen-i te pahnih hi sual dan inang reng niin a ngaih thu a sawi chhuak a – hei hian Communist awn lam mi thenkhat vote a hloh tir a. Inthlan thawh khatna-ah khan sum leh pai thlah zalen (free market) leh capitalism duhlo lam chanve zet chuan communist lam hawi an vote a. Pathianni-a Macron-a vote leh tute pawh khan Le Pen-i laka an ram chhan na’n liau liau phur vak lovin vote an thlak a ni.

Macron hi pa taptawm a nih bakah lehkha thiam zingami, kawr suit dum ha chi, tunhma atanga puanzar hnung atanga langsar lem lova France ram lo hruai thin zinga ngaih a nih avangin ngainat a hlawh teh chiamlo bawk.

“Rilru hmin zana ka vote chi a ni lo,” tiin inthlan thawh khatna-a Socialist candidate Benoit Hamon vote a, Pathianni-a Macron-a vote leh tu Paris-a architecture company-a thawk kum 26 mi Thomas Goldschmidt chuan a sawi a. “Zawhna tam tak a zawt a. A hmathlir hi a sumdawng lam hawi lutuk. Hetiang ngaihdan hi chuan kan hnathawh dan phung hi a tichiang kuanglo zo vek a. Mi zawng zawng hi mahni ke-a dinga mahni kutkawiha thawh chhuak thei kan ni vek lo. Chutiangin eng khawtlang nun mah hi din a nilo,” a ti a ni.

Macron-a hian vote tam tak hmu-a a chakna hi mipui tam takin an duh viau vang a nilo tih a hrethiam pha a ni mai awm mang e. “France ram harsatna hi ka chingfel theilo emaw, chingfel tura awmze nei taka bul ka tan theilo a nih ngat chuan kum nga hnu-ah chuan tun ai hian thil a khirh ang,” tiin Mediapart website a hrilh a. Heng hi a tih hlawhtlin loh phawt chuan National Front lam chu tui nena chawm ang maiin an thangduang ngei dawn niin a sawi.

Political party behchhan leh thlawptu mumal nei ta lo Macron-a hma a chona awm hmasa ber tur chu June thla-a France Parliament inthlan lo awm tur hi a ni ang. Parliament bial 577-ah candidate din tir vek a tum thu a sawi na-in a tih theih tur leh tur loh a chiang lova, a thiltumte hi amah zuitu engzatin nge pawm ang tih lah a la hriat hek lo. Politics thlirmite chuan Parliament inthlan lo awm turah hian bial 100 vel zetah chakna an chang thei niin an ngai a, chuvangin eptu party huphurhawm pha tak an ni thei.

Pathianni-a inthlanna-ah chaklo mahse Le Pen-i hi a la rawn lawr leh thuai thei a, Parliament inthlan hi a thlir phawt a, chumi piaha hun lo la awm tur chu a thlir bawk a ni. He nu bakah hian amah dodal kawnga rawn pawng thei tak tur chu Melenchon-a a ni a, ani hian France ram khawpui lian ber ber Marseille, Toulouse leh Lille lamah bu a khuar thuk hle a. Amah vote tute hian Le Pen-i leh Macron-a hi chuti takin an ring lem lo. Macron-a hian mipui hmaa a thusawi-ah mi tam tak a lam tanga siam tura tan a lak a ngaih thu hi a hria tih a tilang a. “Kan hma a hmabak ko tak awm hneh thei tur hian mi zawng zawng tanrual a pawimawh dawn a, kan hnam min thenhrang theitute beilet a do tur hian theihtawp ka chhuah dawn a ni,” tiin a sawi a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s