Lawrkhawm/ May 4 – 10, 2017

Mara ADC ah hneh takin Congress chak; CEM ni lai tling zo lo, CEM leh Chairman thar thlang nghal

MADC INC thlan tlin thar te
MPCC Treasurer Zodintluanga leh MADC-a Congress member thlantlin thar te

Congress chuan a zawn a vawi thum na atan Mara Autonomous District Council inthlan ah chakna an chang a, MADC 11-na a vote tla te chu May 8 khan chhiar a ni a, state-a rorel lai party hian bial 17 – bial awm zawng zawng 25 atangin zaa sawmruk pariat (68%) – la in sorkarna siam thei dinhmun ah a ding.

Vote chhiar a result puan a nih ni vek khan Siaha Tourist Lodge-ah Congress Legislature Party Treasurer Zodintluanga, he inthlana campaign kaihruaitu ber hovin thlan tlin thar te hi an thukhawm nghal a, Chief Executive Member-ah Amobyu bial atanga thlantlin N Zakhai an thlang a, Chairman-ah Siaha West-II bial atanga thlan tlin H Sahlo an thlang bawk.

He thutkhawm na ah hian Zodintluanga chuan, “MADC lama term thum kan sawrkarna hian Mizoram state ah pawh term thum sawrkar theih a ni tih a pholang a, hei hi thil lawmawm tak a ni. Inthlan campaign tantirh khan tling tur chiang saa election hmachhawn kan nih thu ka lo sawi tawh a. Kum 2018 MLA inthlan darthlalang atana hman a nih tlat avangin kan tang tlang hle a ni,” a ti.

MADC inthlanah hian INC in hnehna chang mahse, Chief Executive Member ni lai RT Zachono chu Amotlah bialah MNF candidate HC Lalmalsawma Zasai in a hneh thung.

Inthlana hnehna an chan chungchangah Mizoram Pradesh Congress Committee chuan, “MNF leh a thawhpuite under 10 ah,” tih thupui hmangin thu chhuah a siam a, “MADC inthlanah Mizoram Opposition Party lian ber MNF leh Mara rama Party lian ber MDF ten tangrualin nasa taka MPCC an beihrawn laiin [Congress-in] hneh takin sorkarna kan siam thei… Thil siam zawng zawngte’n Congress sorkar tlak hun nghakhlel takin an thlir a ni’ tiin iak iak mahse, BJP sorkar-a NLUP hektu MNF leh a tanrualpui te chu under 10 ah Mara ram mipuite’n an dah ta…,” tiin thu chhuah chuan a sawi bawk.

Mizo National Front leh Mara Democratic Front tangdun chuan bial pasarih (MNF-in panga, MDF-in pahnih) an la thung a, Independent-a ding pakhatin bial pakhat a la ve bawk.

Inthlan hmasa zawk nen khaikhin chuan kumin MADC inthlanah hian INC in hma a sawn a, kum 2012 khan bial 15 ah a chak a, kuminah bial hnihin a pung.

MNF leh MDF tangdun an hnungtawlh thung a, kum 2012 inthlanah bial riat ah chak mahse, kuminah erawh bial pasarih ah hnehna an chang thei tawk a. MDF phei chuan kum 2012-a bial panga a hnehna an chan laiin kuminah erawh bial pahnih chauh an la thei. MNF ve thung chuan 2012 ah bial pathum an lak laiin kuminah bial panga an la pha.

MADC inthlan result chungchangah hian MNF President Zoramthanga chuan, “[Congress chu] ruling party an ni a, rin ai takin hma kan sawn. Result mak tak a ni lo,” tiin a sawi a. “Kan result hi kan duhthu sam lo mahse, state ah sorkarna kan lak hunah kan chak ve mai ang. Result ah hian kan tan lawmna tur awm lo mahse, a mak love,” a ti.

Tun inthlana bial paruk chuh tu BJP erawhin bial pakhatmah an la lo a, Independent-a chuh mi 14 zingah Tokalo biala ding KL Bana chauh a tling a ni.

MADC inthlan chungchangah BJP state president Prof. JV Hluna chuan, “Mi tam takin MADC inthlan result chungchangah BJP min beisei dan phalo viauin ngai mahse keini chuan kan beisei aiin hmasawn nan kan hmang zawkin kan in hria a. Inthlan hma aiin inthlan zawh hnuah MADC huam chhunga kan party mi leh sate an phur zual zawk a ni,” a ti thung a. Central BJP kaihhruai North East Democratic Alliance-a tel MNF in MADC a seat thenkhat an lak chungchangah Prof. JV Hluna chuan, “MNF hi lawmpui tur nge lawmpui loh tur tih kan hre lo” a ti a. “Keini ai chuan he inthlan-ah hian an chak a ni tih kan pawm a. Amaherawhchu, MNF leh MDF te aiin inthlan zawh hnu hian MADC-ah kan mi leh sa te an phur zawkin, hmalam-ah beiseina an nei sang zawk fe bawk a … Kumthar-ah CADC inthlan a awm dawn a. Chakna kan chan ngei nan tuna tang hian tan la in, theihtawp in hma kan la dawn a ni,” a ti bawk.

 

Thenzawlah cheng vbc 64 man khualzin hip na tur CS -in tlawh

CS thenzawl

Kar hmasa May 5 khan Chief Secretary Lalmalsawma, IAS chuan Tourism Department hnathawh kal lai, Thenzawl Golf Resort hmun a tlawh a, he resort sak mek hi cheng vbc 64.48 hu tura duan a ni.

Thenzawl Golf Resort hi sorkar laipui ruahmanna “‘Integrated Development of New Eco-Tourism Destination under Swadesh Darshan” hnuaia Mizorama project hmasa ber leh lian ber, cheng vbc 94.90 hu  hnuaia hmalakna pakhat a ni a, circuit hnuaiah hian project pakhat niin, Golf resort bak ah hian Thenzawl, South Zote leh Reiek ah te khualzin hipna tur hrang hrang buatsaih mek niin hemi chungchanga sorkar thuchhuah in a tarlang.

Golf Course hi Canada-a Golf Course architect firm design a ni a, a hmunah hian khualzin te riahna tur thing in (Eco Log Huts) sawmthum duan a ni bawk a, heng in sakna atana thingsiam bik Pine Wood chu Russia atanga lakluh niin, Russian mithiamten a hmunah awmchilhin hna an thawk mek tiin thu chhuah chuan a tarlang bawk.

“Hemi bakah hian chaw eina hmun liantham tak Food Court, inhmuhkhawmna hmun (Convention Centre) changtlung tak, Pine wood hmanga sak Clubhouse, chawlh hahdamna leh khawthlirna hmun (Gazebo) te a awm dawn bawk a ni a….March 2018 a hawn hman theih beisei a ni,” a ti.

 

CM-in nizung hmanga kawlphetha 20 MW siam anih theihna’n Union Minister ngen

Chief Minister Lal Thanhawla chuan May 8 khan Delhi-a a pisa ah Union Minister of State for Power leh New and Renewable Energy etc (Independent charge) hmu in nizung hmanga kawlphetha siam a nih theih nan Solar Power Policy Mizoram sorkarin a ruahman tawh tih a hrilh a, JICA tanpuinain Thenzawl ah MW 10 pechhuak thei Solar PV Plant siam anih theih nan project hi Ministry of New & Renewable Energy ah thehluh ani tawh thu a sawi a, project tan vat anih theih nan a tul te chu Ministry lamin JICA ah buaipui sak turin a ngen. Hemi bakah hian MW 10 pechhuak thei Solar Power Plant dang pawh hmun remchanga bun a duh thu sawiin hemi kawngah pawh theihtawp chhuahpui turin a ngen bawk a.

 

School tan lai leh ban laiin kawng kalh

pc lALRINKIMA

Electric Vengchung atanga Hermon Street panna kawng chhuk, tun hnaia taxi-in school naupang a sut hlumna kawng     chu May 8 (Thawhtanni) atang khan school naupang kal lai leh ban laiin kalh tan a ni a. Hei hi vengchhung hruaitute hmalakna ni mahse, Traffic SP chuan hemi thlawp zawng hian thuchhuah a siam ve bawk.

Electric Veng Road Protection Squad-in Pathianni-a thu chhuah an siam ah, “Helai kawng ah hian chetsualna thlengin St. Marys’ School naupang a boral a nih kha, kha vanduaina thleng avang khan Electric Veng Local Council leh RPS te chuan [kawng hi] a khar a. Heti chung hian lirthei khalhtu tam takin ngenna hi zah lovin duty awm lai reng pawhin an bawhchhe duh a. Chuvang chuan … school tan hun leh ban hun tum hnih chhung hian kalh ni se, school naupang te himna tur a nih avangin mipuite hriatthiamna kan ngen nghal a ni,” a ti.

 

Sipai lakah MSU in FIR thehlut

Assam Rifles (46th Bn) Middle School-a lut hmeichhe naupang thenkhat chu AR mi Ajit Kumar chu an zawhawmna tibawrhbang leh zahmawh rawngkaia a khawih anga puh anih vangin Mizo Students’ Union chuan May 8 zan khan Aizawl Police Station-ah FIR an thehlut a, police chuan Ajit Kumar hi an la. MSU thu chhuah tarlan danin Ajit Kumar hian 46 AR middle school-a lut hmeichhe naupang thenkhat chu an hnute a khawihsak thin a, thenkhat chu quarter ah te hruai luih a tum thin a, hei vang hian MSU chuan FIR a thehlut niin a sawi.

 

Doctor ngiat Champhai JAC thiah a ni

Champhai mipuiin doctor an mamawh an nawr nana Joint Action Committee an din chu sorkar in an mamawh a pek dawn avangin May 6 (Inrinni) khan thiah a ni. Champhai JAC puipate chu Inrinni khan an thu khawm a, Champhai District mipui mamawh zinga pakhat naupang doctor chu sorkar ah dil hlawhtlin a nih tak avangin Champhai JAC chu a din chhan thawk zo tawhah inngaiin Office Bearers meeting chuan a thiat ta a ni. Champhai JAC thu chhuah chuan, “Kan mamawh thlen te min ngaihtuah sak avang te, zirlaite case siam sak an ni loh avang te in sorkar chungah CJAC chuan lawmthu kan sawi a ni. Kan mamawh sorkar ah min thlen sak tu leh buaipui tura kan ngen remna palai CYMA chungah lawmthu kan sawi… CJAC-in resolution a siam, Legislator te Champhai District chhung rap lo tura a tih te, sorkar function siam lo tura a tih te chu CJAC chuan a sut fel ta. Naupang doctor dilna-a mipui hmalakna kawngah North leh South Block Congress  leh Champhai Congress VCP thenkhatte’n mipui lungrualpui theih lohna lam hawi thu an chhuah khan Champhai JAC chuan pawi a tiin a rilru a na tak zet a, tun hnu ah hetiang mipui huap issue a lo thleng leh a nih chuan lungrualna tichhe thei zawng chi thu reng reng political party emaw, NGO emaw ang pawhin thu chhuah tawh lo turin CJAC chuan a chah a, tanrual hi chakna a ni tih i hre thar leh ang u,” a ti.

 

Kum li leh tlem ah in 500 chuang leh bungrua cheng vbc 34 man hu dawn kang

Kum 2012 atanga nikum 2016 inkar khan Mizoramah in 493 a kang a, kumin January atanga March thla inkar chauh khan in 21 a kang bawk.

Zalen chanchinbu in Fire & Emergency Service (F&ES) Department chhinchhiah dan a tarlan dan chuan kum 2012 khan in 162 a kang a, hetah hian mi pakua thi in mi 16 an hliam a, hemi kuma kangmei avanga bungraw kangral zat chu cheng vbc 18.6 hu anga chhut a ni.

Kum 2013 khan in 161 kangin mi pathum an thi a, hliam 15 awmin bungraw kangral zat chu cheng vbc 4.17 hu dawn a ni a, kum 2014 khan in 91 kangin mi pariat an kan hlum bakah mi pali an hliam a, bungraw kang ral hlut zawng chu cheng vbc 4.34 hu a chhut a ni.

Kum 2015 khan in 44 kangin mi panga an kan hlum bakah mi 6 an hliam a, cheng vbc 1.24 hu dawn bungrua a kang chhia a, nikum 2016 khan in 35 kangin mi pahnih an kan hlum bakah mi pakhat a hliam a, cheng vbc 5.34 hu dawn bungrua a kang ral bawk a ni.

Tin, kumin January atanga March thla chhunga in kang 21 ah thi leh hliam an awm lo a, bungrua erawh cheng nuai 27 hu dawn a kang chhia.

F&ES Department chhinchhiah dan in kum tin January thla atanga April thla inkar chhungin kangmei avanga chhiatna a tam zual a, In kan chhan tam ber chu electric kal sual – electric hman dik loh, connection load aia sang hman, wiring mumal lo, heater leh thil dang tih hlum theihnhilh – vang a ni.

 

Khawthlang ah thlipui vangin in chhe nasa

May 5 (Zirtawpni) zan dar 11:30 vel khan Mamit District-a thlipui tleh avangin in tam tak a chhia a, electric hrui leh thlai chin tam tak a chhe bawk.

Thlipui hian Kanhmunah luah zui tlak lohin in pahnih a tichhia a, a chung leh bang a tih chhiat in 10 vel a awm bawk.

Luimawi khua ah luah zui tlak lohin in panga a chhia a, a bang leh a chung a lak in 14 vel a awm bawk a, thli bakah rial a thawh tel avangin in chung rangva den pawp a awm nual bawk a, kuhva kung engemawzat a tichhe bawk.

Bungthuam khua ah chuan in pahnih chu luah zui tlak lohin thil hian a len chhia a, in 13 dang chu a chung a phawh bakah a bang te a len chhia a, kuhva kung tlu a awm nual bakah thirban panga a tlu a, transformer pakhat chu thli hian a awmna atangin a chhem tla bawk.

Thli leh rialin in a tih chhiat te hi a tuk inrinni khan Village Council leh YMA member-te’n hnatlangin an sak/thawm that sak leh a, Zawlnuam BDO pawhin a tlawh a, silpaulin a pe bawk.

 

Guwahati Mizoram House pan turin Dy. RC-in zirlai, khualzin te sawm

Guwahati Mizoram House Dy. Resident Commissioner Donny Lalruatsanga chuan state dangah Mizo zirlai te leh khualzin te an him zawk nan Mizoram House pan thin turin a sawm. May 8 (Thawhtanni)-a thu chhuah a siamah Guwahati Mizoram House Dy. RC chuan Mizo zirlai leh khualzinte’n hriat chian loh hotel te pan mai lovin Mizo te inpui Mizoram House chu zanrei ah pawh ni se inthlahrung lova pan turin a sawm a, House gate ah biak mai theih turin venghimtute an awm reng bakah House Reception Counter ah engtik lai pawha biak pawh theih turin telephone a awm a, amah Dy. RC leh Asst. RC te an awm thu sawiin Reception Counter-a phone no. leh amah leh Asst. RC phone no. te a thu chhuah ah chuan a tarlang.

 

Rawlthar pahnih Tlawng ah tla hlum

May 7 (Pathianni) tlai khan Tlawng lui (Reiek kai) ah Tuikual South rawlthar pahnih an tla a, an ruang hi an tlakna thlang deuh ah hmuh leh a ni. Thu dawn danin, Tlawng luia tla te hi Lalremkima (16) s/o C Lalngaihawma leh F Lalchhandama (18) s/o F Lalmalsawma te an ni a, Lalremkima hi chesualin F Lalchhandama hian chhan a tumna lamah a che sual veleh a, an pahnih hian an tla ta a ni.

 

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s