Mi Zo Leh Vai Chanchin Lekhabu/ Sawrkar tang-kai zia

Mizoram a chanchinbu chhuak hmasa ber pawl, Mi Zo Leh Vai Chanchin Lekhabu ami thu kan han chhuah chhawng e. He chanchinbu hi khatih lai a Lushai Hills Superintendent in thlatin a tihchhuah, Sylhet a chhut thin ani. He thu hi a ngai ngai a chhuah chhawn ani.


M&V

Mizo rama Sawrkar an awm hi, mi thenkhat chuan “min ti-rethei tur reng reng atan an lo kal a, min ti-rethei ngei reng a” kan ti a. “Puak te min phur tir a, hna-tlang te min thaw tir a, lamlian te min laih tir a,… nasha tak takin min … a, lei man te min chawi tir a, engkim an khawn … a” kan ti a. Mizo rama Sawrkar an lo awm hi Mizo mi ti rethei tur reng reng a lo awm ni in kan ring a. Tin, a dik tak chu Mizo in kan ngaih ang hi a ni love. “Mizo hi tha shela, indo tawh lo shela” ti ani awm e. Hmanlai in Mizo kan indo va, mi te nasha tak tak an in that a, hre awm tak in kan awm thin a, ral hlau reng reng te in kan awm a, a hreawm em em ani. Tin, tuna hian Sawrkar an lo awm a, thu tha takin an rawn ti rem a, kan in that ta lova a nuam hle zawk ani. Tin, Mizo chuan Sipaite, Sapte, babu-hote leh mi-man ho te hi an awm mai mai a, an tangkai lo hle in kan hmu a, nimah-shela an tangkai em em ani. Sipai ho hi leh mi-man ho hi awm shuh shela Mizo hian Sapte leh babute hi kan ti-duh-dah ang a, kan hnawt chhuak ang a; tin, Sapte leh babute an awm loh chuan Mizo ho hi mani thu thu a awm kan tum ang a, kan indo leh ang a a tha lo vang, roreltu an awm loh chuan. Tin, mi mantute hi awm shuh shela mi zawng zawng in thil kan ti sual fo ang a a tha lovang. Sawrkar in a nasha taka min hrem chung pawh in mi thenkhat chuan englo ruk leh thil ti sual kan la shim lo cheu ani. Tin, Sawrkar hian Mizo ho that-na tur an zawng a, an phe an phe ani. Tin, Mizo thenkhat chuan lei man hi Mizote hnen chauh a emaw an khawn thin, kan ti a, an mani khua a pawh an khawn fo ani zawk e. Tin, Sawrkar in Mizo that-na tur heti ang hi an shiam ani:-

Lekha zir in:- Ram tina an shiam a, mi zawng zawng lekha hrilh an duh a, tin, keini chuan chutichung pawh in lekha zir a min ti te hi min ti nawmnah a kan ruat a, min ti that an tum ani. Kei mani thatna tur a lekha mi hril atan skul cheng tam tak ti-ral in an sha a, tangka tam tak zirtir man a te an tiral shi a, kei ni ho eraw-chuan “Kan that-na tur an shiam” ti in engma lawm na lam kam khat pawh shawi zawk lovin, hna min thawh tir lam leh “Min ti rethei e” ti in kan la shawi zawk thin. Lekha zir a engkim hriat-theih-na te leh thatna tur hi ti zawk ila a tha ani. Tin, damdawi in te an shiam a, mi damlo te tidam-na tur in tangka tam tak te an sheng hi an ngil nei em em ani. Tin, Sawrkar in a lei man an khawn hi a lal ber lu a nei mai thin emaw tiin kan ring a, a ni lo, vantlangin an nei a, tin, hna-thawk tu te an hlawh tir zel a ni. Tin, Mizo hi ti-rethei min tum chuan lal te hi an ti-tlawm vek ang a, kan khawlai leng te hi min vel fo ang a, puak te min phur tir ang a, hna te min thawh tir ang a, hlawh min pe lo vang ang a, min vel fo ang a, chu lo liama in ti rethei a awm hek lo, min ti rethei an tum ani chuan chuti-chuan min ti anga, min ti rethei an tum lova, tha tak in min ti zawk a, hna min thawh tir leh hlawh tha tak in min pe a. Sawrkar awm zia hi chu kei ka rin chuan, tuma ti-rethei an tum in in ngei lo an tum lova, khawvel a mi zawng zawng hi indo lovin fel tak leh rual takin awm ila, mi lian leh mi te tuma in hmu-sit lovin awm an duh ni in ka ring a. Tin, Sawrkar in tupawh thil ti sual chu nasha tak in an hrem a, chu chu Mizo chuan min ti-duh-dah a kan ngai a, min ti-duh-dah a ni chuang lo, an mani pawh Sawrkar mi tam tak pawh thil an ti sual chuan an in hrem nasha thin bawk ani. Sawrkar awmzia hi a chhe lam apiang an hrem a, a tha lam apiang ah ti tha a, chu chu rual tak leh tuma in ti lungawi lovin awm lo an duh ni in ka ring a. Mi tha takin an zilh a, “Chu chu ti shuh, chu chu ti la a tha zawk e,” an ti zawk thin a, mi an zilh thin ani.

“Sawrkar in min ti-duh-dah” ti lovin, “Sawrkar in min ti that an tum” i ti zawk ang u, chu chu a dik zawk ange.

Leta Khiangte Khupchhung, Zir-tir-tu, Lungleh

He thu hi Lekha V, April 1904, phek 12 – 15 ami a ni


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s