Rambuai Thu leh Hla/ “President, Mizo Govt” fimkhur taka a biruk a tul thu

Rambuai tirh atangin kum zabi chanve lai a lo liam ta. Khatih hunlai a thil thleng thenkhat te lehkhathawn chi hrang hrang hmangin kan han thlirlet e.


 

To

The President

Mizo Govt.

 

Tunlai India Sorkar chetdan ah that phah nan a hman zawk theih nan in awm dan ah sawi tur awm in ka hria.

In awm na hmun hi mi tam tak in an hre tawh a, India C.I.D. (Spy) te pawh in camp ah an lo lut nge lut lo in hre chiang thei bawk in ka hre si lova. Chuvang in in sawn na hmun remchang in hmuh theih chuan in sawn ngei ngei a rang lam in a tha ang. Sairang lam a ka awm lai atang tawh in in awm na hi an hre viau tawh mai a, tin, chu bak ah sawrkar lo nghel nghet zawk tawh ram chin an hriat zia leh an kal na te kan lo experience tawh nual a, chuvangin fimkhur angai hle a ni. Nangni an hual hlauh zawng in Ar thum a pui Mu in a tham sak ang mai kan ni dawn a, pawimawh naran pawh in ni lo tih in in hriat a tha ang. Tin, in awm na hi lo hual or chung lam atang in lo tum ta sela Sairang ah nghel nghet tak in an ngai hle dawn a ni. Ramhnuai hual thut thut an ching tan hle mai, kei ni lam kan chho lok thei mang hrih si lo. Tuahzawl ah thlan mual a Huapliana leh midang panga an man a sawi a ni, Huapliana chu a chiang hle. Tin, Durtlang, Pukpui an hual dan te, Sairang kiang vel an hawl dan te kan en in fimkhur ngai tak a ni.

Helai Silchar tlangdung ah hian awm ka tum deuh a, ka theih tawp in information and records collect ka tum ang. Tin, in tan pawh a hlauhawm tak tak leh tak tak loh chu report zel ka han tum ang. Vawiin khan thlawhna chuan in awmna chu thla a la zing hle.

Khawthlang lam ah chuan sipai ho an hnawksak ngei mai. Mamit-ah Sub. Quarter an din a, thlawhna in supply an thlak nghal. Tuahzawl ah an awm bawk. Khawthlang lama khua an hal tawh chu – Ailawng, Rulpuihlim, Pukzing, Kanghmun, Chungtlang, Ropuichhip, Tlangkhang, Sabual, Vawngawn. Tin, Darlak kiang vel ah khu (mei khu) an hmu leh a, a dik chiah kan rawn hre hman lo.

In awm na chu in in sawn lo a nih pawh in India sawrkar bum a, awm hmun sawn ang a awm tal chu tha in ka hria, C/O chungchang ah te pawh sawn a tha. Tin, in fimkhur kim lohna chu nangmah hmu turin mi an kal mai mai tur a ni lo I aiawh camp pawn ah (khaw hranah) an awm ang a pawimawh tak tak loh theih loh a mi pawimawhte chauh in I hnen rawn thleng sela a tha ang.

 

Rinawmin.

Sd/- S. Lalhmuaka

(S. LALHMUAKA)

GHQ. Staff Intelligent, Govt. of Mizo Ram.

7:00 p.m., 5.5.66, Sontlang.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s