Ramchhung/ “A tawrhna hi kan tawrhna a ni tur a ni”

Delhi-a nawhchizuarte awmna hmun GB Road kawngpuia a sorkar motor chhunga chuang mek Swati Maliwal chuan, “Helai hmun ka car-in a thlen hi chuan an lo hre hlawm tawh ang,” a ti a.

Henglai dawr inchhawng tlarah hian kawng-an chu insakna bungrua leh khawl ilo zawrhna dawr a ni a, chhawng chunglama tukverh inkhar thim thip thiap erawh chu nawrchizawrhna hmunpui a ni thung.

“Nawhchizuarte anmahni dawrtu tur zawn saktu (Pimp) ho chuan an chang a, an auh leh hlawm tawh saw,” tiin kawngkama thingpui dawr leh nepnawi dawr tenau lam chu a kawk a. Tlai lam Delhi khawpuia kawngpui a lun lai a ni a, tumah in eng car mah an en chik bik pawhin a lang lova, mahse Maliwal-i erawh chuan a hmelmate hmu thei tur khawpin kum khat vel chu helai hmun hi a lo zir chiang tawh niin The Guardian chuan a sawi.

Hmeichhe tana khawvela khawpui hlauhawm ber pawla an sawi Delhi-a Commissioner for Women la naupang ber hian a hmelmate hming a tlar thui hle.

Delhi Commission for Women (DCW) chairperson ni tura an ruat tirh chuan a phu zawk niin a sawi a. Kum 32 mi lek a nih bakah, “He dinhmun hian thuneihna a keng tel tak taklo niin ka hria a,” tiin a sawi.

Sorkarin hnam tlem zawk, hnam chekhnawk leh hnufual zawkte enkawl tura a dahte hi ha neilo leh thilti theilo an ni tlangpui a. DCW phei hi chu politician te’n an duhsak zawng an dah mai mai thinna nia sawi a ni thin.

Mahse, tunhma a hetiang lam kawnga pawn lam atanga theihtawp lo chhuah tawh thin activist Maliwal-i chuan kum tam tak kal tawha DCW thuneihna danin a pek a’n chhiar nawn leh chuan a phu nawn zawk mai niin a sawi a. He thuneihna hi kenkawh ni ngailo mahse, Commission hian rawtna siam leh thilthleng mipui hmaa puanzar piah lamah thuneihna a lo nei teh meuh mai a. Sorkar department te chu thil awmdan hriattir turin thu a pe thei a, tupawh a duh apiang a ko thei a, chu’ng zingah chuan Delhi-a Police hotu lal ber ber pawh an tel. An thupek zawmlo chu man tura thupek (warrant) an siam thei niin Maliwal-i chuan a sawi.

DCW-in thuneihna sang tak a neih thu a hmuh chhuah atanga thla 18 hnu-ah chuan he Commission hi a taka beitu a lo ni ta a, a pisa hlui tawh tak kawta intlar thin hmeichhe ho zinga 12,000 te chu buaipui-in Police leh sorkar department sangte chu India ram khawpui bera hmeichhiate him leh him loh chungchang chiang taka thailang a hriattir thin turin a nawr thin a.

A zawhna hmasa ber chu Delhi khawpui chhunga hmeichhe laka hleilenna thubuai awm zat atanga thiam loh chan tir zat a ni a. “He thil hi thla ruk zet chu Police te’n min hrilh duhlo,” tiin a sawi a. “Hriattirna kan pe a, hmeichhe laka pawikhawihna thlen dan chungchang kimchang min pek chhuah chuan mipui nunphung pangngai vawnhim kawngah harsatna a awm an hlauhthawn thu an sawi a. Keini lah chu tawlh duh bik lovin Police Commissioner kan ko ta a. Chumi hnu-ah chuan min pe ta chauh a ni,” a ti.

Kum 2014 atanga kum 2 chhung khan hmeichhe laka pawikhawihna thleng vawi 31,000 chuang a awm a, pawikhawihtu a puh zinga 146, za zela point bial panga (0.5%) pawh tlinglo chu thiamloh chantir an ni.

Harsatna lian tak dang leh pakhat chu DNA sample 7,500 zet mai Delhi khawpui a forensic laboratory hrang hranga enfiahna report awm lova an dah nghuk mai chu a ni a, kum tam lutuk tak mai enfiah lohva a awm tawh avanga enfiah tlak loh khawpa chhe tawh DNA sample 1,500 vel a awm bawk niin Maliwal-i chuan a sawi a. “Delhi khawpui a hmeichhe laka pawikhawihtute hi thiamloh chan tir an nih miau loh chuan misualte hian an hlau lo reng ang chu. Eng ang pawhin che la I talpit thei thovang tih ngaihdan nghet tak a awm miau a lawm,” a ti a.

A ngaihdanah chuan khawvel khawi ramah pawh mipa leh hmeichhe inthliarna a awm a, hmeichhe laka hleilenna hi khawi hmunah pawh a awm bawk a, mahse, Delhi khawpui-a hmeichhe chunga pawikhawihna thleng tam lutuk hi chu a rapthlakin a mak a ni.

Kumin February thla a Delhi Police-in an chhinchhuah dan chuan a hun inangah pawngsual leh hursualna kawnga hmeichhe khawih thubuai zat a tlahniam a, hmeichhe laka pawikhawihna hrim hrim hi za zela 10 in a tla hniam a. Mahse, kum 5 dawn kal ta a Delhi a cheng, Nirbhaya ti a hriatlar tak, bus chhunga pawngsuala thah a nih hnu khan thil inthlakthleng danglam a thleng chuang meuh lo. Hmeichhe chunga hleilenna a pawikhawihtu a puh thiam loh chantir zat hi a tlem telh telh a. Hmeichhe pawngsual bik ngaihtuah hmanhmawh thei tur Fast Track Court siam a nih hnu, hmeichhe tana mahni inveng thei tura class hawn a nih hnu, police te’n hemi kawnga kaih harh leh zualna atana ruahmanna siam hnu leh thil tisualtute na zawka hrem an nih hnu-ah pawh Delhi khawpui-ah hian darkar 4 danah pawngsual report a awm reng a, hursualna a hmeichhe khawih phei chu darkar 2 danah a thleng reng tho a ni.

Nikum kum tawp lam phei kha chu a rapthlak teh a sin. September thla khan nausen thla 11 leka upa chu pawngsual a nih hnu-ah Delhi khawthlang lama hnim buk hnuaiah a ruang paih a ni a, a hnu thla khat lekah Delhi hmar lamah chuan hmeichhe naupang kum 4 a upa chu pawngsual hnu-ah rel kawng sirah thi tura hnutchhiah a ni a, a tukah chuan kum thum mi lek chu hursualna hmanga khawih hnu-ah reh hlum a ni.

Maliwal-i hian heng thil thlenga a tuartu chhungkaw 3 te hi a tlawh chhuak vek a, chu chu a theih chin china tih ngei a tum thin a ni.

“He nausen thla 11 mi hi kawmawl-in an tuam phui vek a, a nu chuan ‘a hmel hi hmuh tir che ka duh a ni’ a ti fo na a, ka hnial tlat a. Ka hmuh vaih chuan a mit chu ka dam chhungin ka mitthla-ah ka hmuh ka hlauva. Hlauh ka neih hmasak ber a ni a, a mita en ka hlau a nih chu,” a ti.

Thla 18 kalta chhung khan nu, nula leh hmeichhe naupang engzat nge damdawi-in a an khum bula a thut chilh zat a hre seng tawh lova, za tel chu a tlin a ring.

“Thinrim a chawk thova, I thinlung a chawmawlh a, lungngaihna a cham reng a, chu chu min nawr kaltu ber niin ka hria. A natna tawrh kha a takin kan tuarpui ve tur a ni,” a ti.

Nikum July thla khan pawngsual hnu-a acid an in luih tir tleirawl kum 14 mi chu a dawm hlum a. He tleirawl hun hnuhnung rapthlakzia hi Twitter hmangin a puang chhuak a. A hnu-ah chuan Delhi khawpui chhunga acid lei mai a awlsam zia a puangzar leh bawk.

Maliwal-i hi engineer trained chhuak ngat a nih avangin thil kalphung fel a duh a, Delhi khawpui dinhmun diktak hi pho chhuah ngei a tum a. Delhi khawpui a chhungkaw pangngai taka lo pianga seilianin Maliwal-i hian economics a zir a, a tum ber chu Multinational Company-a ramdanga hnathawh a ni a.

A graduate hnu-a school chenbeh tak pakhata a thawh chhin ve zuai hnu chuan a thil tum leh a khaw hawi a thlak ta a. Delhi-a khawtlang tana thawktu Santosh Koli leh tuna Delhi Chief Minister ni ta Arvind Kejriwal te nena an thawh ho kual zak zak a, Right to Information Act hmanga India rama eirukna a phawrh mualpho hnu, kum 8 a lo ral chuan a hna bansanin rulin a vun a lip ang maiin ram chhung hmun hrang hrang a fang a, mipui mimir tana hna thawh a tum ruh ta hle a ni.

“Khawpuia mirethei chenna vengah leh thingtlangah te ka khawsa a, India ram hmelhmang dik tak ka hmu a, hlau hauh lova zawhna siam ka zir chhuak ta a ni,” tiin a sawi a. Hetianga a lo kaltlang hrep tawh avang hian politics kalphung pawh a hre thiam a.

The Guardian-in an hmuh hma ni 2-ah hian Maliwal-i hi diklo taka hnathawktu tur la-a puh a nihna thubuai-ah bail a chhuah a ni a. Amah hektu chu sorkar hmasa-in a dah, a mi ruat tharin a lan tak kha a ni a. ACB lamin a office hi vawi hnih zet an dap a; ani erawh chuan politics a intih hmingchhiat tumna tiin a uksak duh vak lo.

Kum 2015-a he hna atana ruat a nih pawh khan a lo zui thin Kejriwal leh rampum huap sorkar Prime Minister Narendra Modi inkara harsatna awm avangin a tirah chuan hnawl tituai a ni a. Hlawh lakloh pawh an nei fo thin.

A hnathawh lang sar tak pakhat chu naupang kum tlinglo nawhchi zawrh luih tir an nih leh Asia khawmualpui chhimlam atanga hmeichhia an tawlh ruk thin avanga GB Road-a nawhchizawrhna hmunpui a khar kha a ni a; a hun kum 5 chhunga a chona hmachhawn lian ber a ni awm e.

“He’ng nawhchizawrhna hmun neitute hi chhui kan tum a. Delhi Police, Municipal thuneitute, tui semtu Board leh Electricity department hotute zawng zawngin an hrelo der vek a. A neitute an hriat loh thu an sawi tlat a ni,” a ti.

Tunah hian nawhchizawrhna hmuna pindan hrang an siam thin a hmuh chhuah chu chhu chhe turin thuneitute a nawr mek a. A sawi dan chuan he’ng pindante hi Police leh thuneitu dangin an dap laia an hmeichhe leite thuhrukna atana an hman thin a ni.

“Hemi avang hian beih kan tawk nasa hle a. Min beitute hi an inhlawm khawm tha hle niin ka hre bawk. Kum khat chhungin Delhi Police hnenah hriattirna 3,500 chuang kan pe a, chu chu duhlotu an tam a. Sorkar Department hrang hrangah hriattirna kan pe reng bawk a, officer thenkhatin hei hi an duh lova, chumi piahlamah hmeichhe chunga hleilen kawnga inhnamhnawihte an awm ve bawk,” tiin a sawi a ni.

A hmelmate chu intlar thui zelin an thubuai tam tak tihkhawtlai-in awm mahse Maliwal-i chuan a dinhmun chu a nghet thawkhatin a hria a. “Hetianga thil danglam hi Delhi hian a duh a. Nitin pawngsual 6 tal an awm ziah ang a ni a. Tu-emaw tal chuan a aw a chhuah a ngai a ni,” a ti.

“Engmah thup leh zep tur ka nei lova. Hloh tur lah ka nei heklo. Thawmhnaw bawm ka nei lova. Kum 10 chhung khawtlang tan hna ka thawk a, mimal hausakna thil engmah ka nei loh bakah ka Bank account-ah cheng sang vel bak a awm lova, nitin a tlachawpin ka nungin ka khawsa mai a ni. Hei hi ka duhthlan nun chu a ni a. Nangmah I fihlim var a nih loh chuan kan ram angah hi chuan midang I bei thei lovang, an um ang che’nga an that mai ang che’nga, i thuruk pawh a lo inphawrh mualpho mai ang,” tiin a sawi.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s