Vigilance leh ACB hmalakna vangin  Mizoram state puitling a nih hnu in …

Anti-Corruption Bureau (ACB) chhuichianna avangin kum 1991 atanga 2015 thleng khan Mizoram sorkar hnathawk leh sorkar atanga hamthatna dawngtu mi 71 aia tlem lo chu Vigilance Department-in hrem dan chi hrang hrangin a hrem tawh a, hrem zingah hian clerk atanga Minister of State thlengin an awm.

Aizawl Venglaia khawsa C Laltlanmawia’n RTI dan hmanga Vigilance Department atanga chhanna a dawna a lan dan chuan thiam loh chantir te hi ACB chhuichianna atanga an chunga action lak an ni hlawm a.

He sorkar lehkha-a a lan dan chuan ACB-in hlemhletna kawnga sorkar hnathawk a chhuichian hmasak ber chu kum 1986 khan a ni a, hemi tuma chhui tawk hi kum 1991 khan hrem a ni a, Vigilance hmalakna hnuaia hrem hmasak ber a ni nghe nghe a, mipui sum a eiruk `2,615 chu rulh tir a ni.

Kum kaw hnu, kum 1994 ah chhui tawk an awm leh chauh a, mahse, hemi kum hian sorkar hnathawk mi 13 chhui an ni thung a, an zinga pasarih chu Geology lam hnathawk an ni a.

Hemi kum vek hian Cooperative Societies-a Assistant hnathawk hmeichhe pakhat lakah chuan thubuai puitling pahnih siamsak niin court in lung in tang turin a chungthu a rel nghe nghe a, record-a a lan dan chuan hei hi eiruk thubuaia lung in tang tura hrem hmasak ber a nih hmel.

Hemi hnu hian a kum zawn in eirukna avanga chhui an awm ngar ngar ta a, an zingah hian sorkar hna lian tak tak thawk te pawh an tel a, Addl DC te, ADM te, ADC te bakah PHE Chief Engineer te, Excise Commissioner te leh Minister of State pahnih thlengin an awm a. MoS pahnih te hi kum 1997 khan chhui an ni a, Council of Ministers atanga thlauhthlak an ni nghe nghe.

Kum 2000 khan sorkar hnathawk mi 28 ngawt in eiruk avanga Vigilance/ACB chhui an tawk a, pakhat tih chauh loh chu School Education Department hnuaia hnathawk an ni nghe nghe a, an vai hian engtin emaw tak hrem an ni hlawm a, a tam ber chu zihhau an ni a, an zinga tlem azawng erawh chu pension hren sak an ni bawk a, pahnih chu kum nga chhung kaisang thei lova hrem an ni.

Hemi hnu hian kum 2001 leh 2002 ah chhui tawk pakhat ve ve an awm leh a, warning pek an ni ve ve a, pakhat zawk hi PWD Engineer a ni a, pakhat hi MCS officer a ni.

Kum 2003 leh 2005 inkar khan chhui tawk an awm miah lo thung a, chhui leh hmasak ber chu kum 2006 khan mi pahnih an awm a, anni hi sorkar hnathawk ni lovin Lawngtlaia sorkar hnuaia hamthatna dawngtute zinga mi pahnih an ni a, thubuai puitling siamsak an nih hnu in court in kum 2007 khan ni hnih lung in tang turin an chungthu a rel a, cheng 3,500 a chawi tir ve ve bawk.

Kum 2007 khan chhui tawk a awm leh a, ani hi MCS officer a ni a, MPSC remtihna in kum 2012 khan ban a ni nghe nghe.

Kum 2008 ah chhui an awm lova, kum 2009 ah Minor Irrigation Engineer pakhat chhui a ni a, ani hian stage hniha a hlawh tih hniam sak hremna a tawk a.

A kum leh, kum 2010 ah officer lian chhui a ni leh a, ani hi doctor niin chhuichian a nih lai hian Health Services Director a ni a, kum hnih hnu ah hrem tura thutlukna Vigilance-in a siam a, kum sawm chhung a pension hmun thuma then hmun khat hren sak leh suspend a nih chhung zawng chu hnathawk lova ngaih sak niin hrem a ni.

Hemi kum vek hian Supply Department hnuaia Superintendent pakhat chu chhui a ni bawk a, ani hi a hna chelh tih hniam niin kum hnih chhung heti hian hrem a ni.

Kum 2012 khan Hnahthial SDO(C) hnuaia Assistant hna thawk chuan chhui a tawk a. Kum 2014 khan Police SI (Ministerial) pakhat chhui a ni leh bawk a. Heng sorkar hnathawk pahnih te hi kum 2015 khan hrem an ni ve ve a, an hna chelh aia hniam ah paihthlak an ni ve ve.

RTI chhanna-a a lan dan chuan heng ACB chhuichianna zingah hian court thlenga kalpui thubuai pali an awm a, court chuan heng thubuai awrhtute mi pathum chu thiam loh a chantir vek. Mahse, The Frontier Despatch-in nikum (2016) March thla-a a lo tarlan tawh angin, ACB case dang pariat – kum 2008 atanga nikum kum tir lam thlenga Special Prevention of Corruption (PC) Act Court-in thutlukna a siam tawh ah chuan thiam loh chantir leh lung in tan tir an awm lova.

Nikum chawhnu lam khan eirukna thubuai pakua na, Kau-Tlabung leh Tuipanglui mini-hydel project a eirukna awm ni-a puhna ah pawh thiam loh chantir awm lovin trial awm hma in a titawp a, sorkar chuan Gauhati High Court-ah court hniam zawk thutlukna hi ennawm a dil leh ta a nih kha.

Tun dinhmunah hian ACB/Vigilance hmalakna-a eiruk thubuai engemawzat Special PC Act Court hian ngaihtuah lai a nei bawk.


One thought on “Vigilance leh ACB hmalakna vangin  Mizoram state puitling a nih hnu in …

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s