Zu vanga a nupui vaw hlum tu Runrothanga dam chhung lung in ah hrehawm takin

Thlam

 

Kum 2014 July ni 10 khan Saihatlangkawn III-a khawsa Ralthiaua chuan Saiha Police Station-ah a farnu C Hniarchiai chu chumi ni vek chawhma lam dar 10 velah Tuitlawk lui kama an thlam ah thi-a hmuh a nih thu leh thah ngei a nih a rin thu a sawi a, a farnu thih chungchang chu chhui turin police a ngen nghal bawk a.

Police chuan hma la in tualthah thubuai an siam nghal a, an chhui chian hnu chuan Hniarchiai pasal Runrothanga lakah chargesheet an thehlut a, court chuan Runrothanga chu July 9, 2014 zana a nupui thatah puhin tualthah thubuai a siamsak ta. Runrothanga erawh chuan puh a nihna te chu a pha a, a thubuai chu ngaihtuah turin ngenna a siam ta zawk a.

Lunglei Additional Sessions Judge chuan thubuai chu a ngaihtuah ta ngei a, mahse, thuhretu pakua leh finfiahna dang chi hrang hrang te a bûk hnu ah Runrothanga chuan a nupui a that ngei a ni tiin thutlukna a siam a, cheng 5,000 chawi tur leh dam chhunga hrehawm taka lung in tang turin a chungthu a rel ta a ni.

Lung in atangin tunhnai khan Runrothanga chuan Gauhati High Court, Aizawl Bench (GHC) chu a hremna tawh tidanglam turin a ngen a, a ngenna thu ah hian Amicus Curiae, Ukil Joseph Mangsuanhau chuan Runrothanga hrem a nih dan tlawhchhan – Indian Penal Code (IPC) 302, tualthah thubuai – chu a dik lo a, tum vang reng ni lova mihring that te hremna dan IPC 304 Part II hnuaiah zawk hrem tur a ni a ti a. Ukil Joseph Mangsuanhau chuan Runrothanga’n a nupui kut a thlak lai hian zu a rui a, rilru fim a pu lova, a nupui thah hi a tum lova, chuvang chuan a nupui kut a thlak hian a thih a ring lo a ni a ti a.  Hemi vang hian tualthat anga hrem a ni ta mai hi a dik lova, tum vang reng ni lova thihna thlen zawk a ni tiin kum 10 emaw lung in tang tura hrem chi zawk a ni a ti a.

Amaherawhchu, sorkar ukil, Additional Public Prosecutor Linda L Fambawl chuan nasa takin hei hi a hnial lêt a. Runrothanga hian a nupui hi tum ran chungin a that a, a nupui taksa-a hliam nasa tak te pawhin a nunna chân thei khawpin beih a tawk tih a tilang chiang hle a, chuvang chuan court hniam zawk thutlukna hi tih danglam nachhan tur a awm lo a ti thung a.

Hetianga hrem a nihna tih danglam ngenna a awm takah chuan GHC judge pahnih, Justice Ujjal Bhuyan leh Justice N Sailo te chuan Lunglei Additional Sessions Judge thutlukna chu a ennawn ta a, hetiang finfiahna te hi a hmu ta a ni.

Hniarchiai thih chungchangah hian FIR thehlut tu chu a nuta Ralthiaua a ni a, ani sawi dan chuan Hniarchiai leh Runrothanga hi kum 10 chuang zet an innei tawh a, fapa pawh an nei a, mahse, an fa chu kum thum a nih laiin a boral a. Hniarchiai thih ni zing dar 9 vel khan Ralthiaua hi an chenna in kawtah a ding a, a phone a lo ri a, Tuitlawk hmuna a hmelhriat pakhatin a farnu thih thu a rawn hrilh a. Chutia zualko aw an hriat takah chuan Ralthiaua chhungte chu lui pan chuan an chhuak nghal a, ani chu a farnu vui dan tur te ngaihtuah a ngaih dawn avangin a tel ve lova, police hnenah a tlan ta vat zawk a. A farnu ruang hmu tu te’n an hrilh leh dan chuan a taksa atangin thisen nasa takin a chhuak a, hmun hrang hrangah hliam a tuar bawk tih an hrilh tiin court hma ah a sawi a.

He tualthahna thubuaia thuhretu pakhat chu khatih laia Saihatlangkawn Mara Thyutlia Py (MTP) Secretary J Khawlai a ni a. Ralthiaua farnu a boral thu an hriat velah a thawhpui te nen Tuitlawk kama an thlam chu an pan nghal niin court a hrilh a, hetih rual hian police te pawh an lo thleng ve deuh mai niin a sawi bawk a. Tin, thlam an luh chuan hmeichhe boral ta ruang chu thlam chhuatah an va hmu a, a taksa chuan hliam tam tak a tuar a, a then chu zaina hnuhma a nih laiin a dang te chu vuakna hliam a nih thu a sawi a, a chal ah leh a awm ah te sahna hliam a hmuh thu a sawi bawk a. J Khawlai sawi zel dan chuan police chuan thlam chu an dap hnu ah feet thuma sei thingtuah tur, thisen kai nasa tak an la a, chu bakah chuan thisen kaina hnu thingtuah tur paruk emaw pasarih emaw an la tel bawk a. Thlam atang vek chuan chemte leh bakcheh an la tel bawk niin a sawi a. Ani chuan thlam hnuai lei ah chuan thisen bua a hmu bawk a, a ngaihdan chuan hei hi thlam chhuat silfai tumna hnuhma niin a ngai a ni.

Thuhretu dang, Saihatlangkawn MTP President Reuben Hlychho pawhin Hniarchiai taksa ah hian hliam nasa tak a hmuh thu a sawi a, ani hian Runrothanga chu engvanga chutia a nupui kutthlak mai nge a nih a zawt niin a insawi bawk a, Runrothanga hian a hma zan khan an nu nen zu an ruih ve ve avangin an insual buai a, kut a thlak ta mai niin a hrilh angin Reuben Hlychho chuan court a hrilh bawk.

Anni bakah hian thuhretu mi pahnih dangin an sawi ang chiah chiah hian court hnenah thu an sawi bawk a ni.

Investigating Officer pawhin hmeichhe boral ta hian a lu hmun hrang hrangah zaina leh vuakna hliam a awm bakah, a chawn, khup, ngal leh ke ah te hliam a tuar a, a hnung, kawng, mal leh hnungzang ruh ah te hliam hmuh tur a awm thu court a hrilh bawk a. Hetiang deuh bawk hian Hniarchiai ruang post-mortem tu Dr Ngurnunzami Sailo pawhin mitthi taksa hmun hrang hrangah zaina hliam leh vuakna hliam engemaw zat hmuh tur a awm bakah, a thih nachhan ber chu a lu-a hliam na tak a tawrh vang niin a sawi nghe nghe.

Runrothanga’n court a hrilh dan ve thung chuan an nu hian July ni 9, 2014 zan khan Siaha atangin local zu um hnih an thlam ah hian a lo hawn a, an nupa in an in dun a. An thenawmpa pawh a lo leng ve ngei a, mahse, leng rei lovin a haw ta a. A hnu ah chuan an nu hian zu bang chu a lo in zawh vek avangin an in hau ta niin a sawi a, an in hauhna lamah thingtuah tur chu a la a, a vaw ta niin a sawi bawk a. An nu chuan a pum nat thu a sawi hnu in nachhawkna ei turin a hrilh a, a mut san niin a sawi a. Mahse, a tûka a thawh chuan an nu chu a taksa chanve chauh khumah a lo awm a, kaihthawh a tum laiin a lo thi reng tih a hrechhuak ta niin court a hrilh.

Hetianga thuhretu te thusawi leh finfiahna hrang hrang te a ennawn hnu ah Justice Ujjal Bhuyan leh Justice N Sailo te chuan mita hmutu awm lo mahse, thil kalhmang chhuina atanga a lan dan ah Runrothanga hian a nupui a that ngei tih a chiang a, Amicus Curiae Ukil Joseph Mangsuanhau-a’n tualthah vanga Runrothanga hrem a tawk chu a dik lo a, tum reng vang ni lova thihna thlen angin hrem ni zawk rawh se ti-a ngenna a siam chu pawm theih chi ziazang a ni lova, chuvang chuan Lunglei Additional Sessions Judge thutlukna chu siamthat chi a ni lo ni-a an ngaih thu an sawi a. GHC judge pahnih te hian Court hniam zawkin hrehawm taka damchhung lung in tang tura Runrothanga a hremna pawh chu kumin April ni 25 khan a nemnghet ta zawk a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s