Asia/ China-in Silk Road a sial thar leh, khawvelin ropui ti si, awm nuam chiah si lovin a thlir

Kashmir tlang chhip chung phairuamah chuan Pakistan sipai venna hnuaiah Chinese engineer te chuan ruahmanna an siam mek a, an ruahman ber chu Karakoram kawngpui tihchangtlun a ni a, hei hian India leh China inlaichinna-ah neuh neuh a siam nasa hle.

China hian ‘Silk Road’ ruahmanna an tih mai hmangin lawngchawlh hmun, rel kawng leh lirthei kawngpui siam hna ruahmanna lianpui a nei a, hei pawh hi chu’ng zinga pakhat chu niin Asia, Africa leh Europe khawmualpui ram hrang hranga an sumdawnna zauhna atana hmalakna pakhat a ni a. Asian Development Bank (ADB) chuan khawvel mihring za zela 60 zet chenna ram bial hian kum 2030 khi chuan sum leh pai leh ei leh bara hmasawnna atan dollar trillion 26 vel sen a ngai dawn niin a sawi. (Trillion hi Mizo chhiar danah a awm lova, JF Laldailova Dictionary-ah chuan ‘maktaduai vawi thuma inpuntir chhawng’ tih a ni a. Tluklehdingawn let hnih a ni mai thei).

He huang zauh tumna hi China tan chuan tih awm tak a ni a, khawvela sumdawnna lian ber kengtute an ni miauva. Mahse, Washington atanga Moscow atanga New Delhi sorkarte chuan an thiltihtheihna nuai bova mahni hmasial taka politics lama hma zauh tumah Beijing hi ngaiin an rilru a nuam vaklo.

Mi tam tak chuan China hian mihring zalenna rahbeh bakah ram retheite boruak thianghlim tih chhiat pawh pawisa lovin leiba thangah a awh tir ang tih an hlau tel bawk.

India hi chuan China nena an ram inchuh Pakistan-awp Kashmir chhunga China sorkar company-te’n hna an thawk mup mup hi a lawm hranpa lo hrim hrim a. Pakistan ram chhung anga China-in a pawm sakna angah India chuan a ngai bawk a ni.

India Finance leh Defense Minister Arun Jaitley chuan,”Ram leh ram inkar chungchang a ni a, kan ngaihdan a nilo khawp mai,” tiin Japan rama Yokohama khawpui a hmanni-a ADB inkhawmpui-ah a sawi chhuak a. China erawh chuan January thla daih tawh khan he an thiltih hi ramdang tihbuai tumna a nilo tiin India hi thlem lungawi a lo tum tawh.

US President thung chuan an ram chhung chauh a luh chilh rih mek avang leh khawvel boruak a hap vak rihloh avangin China-in ‘Silk Road’ ruahmanna a siam hi a kal chak pui viau a. Washington a American sorkar hotute chuan China-in hmasawnna ruhrel din a tum kawngah thawhpui an duh thu an sawi a. Ram palai thenkhat leh politics zirmite erawh chuan China thiltum ber chu an ram beh chhana inzar pharh a, helai bial atanga US nawr chhuah a, helai biala dan leh hrai leh venhimna kalphung thlak hi a nih an ring a ni.

London School of Economics-a khawvel ram hrang hrang inlaichinna chungchang mithiam William A. Callahan chuan, “Helai bial vela politics ruangam vir vel hi China hian thlaka tihdanglam vek a tum a ni,” a ti a. A theih dawn leh dawn loh chu a la hriat ang chu.

Ram 12-te’n an din Trans-Pacific Partnership (TPP) atanga US President Trump-a’n inhnuk dawk tura thutlukna a siam atang khan a thenawm rama China thununna lo do let theih beiseina kha a hniam ta hle niin kumin January thla hma zawnga Beijing-a US Ambassador ni thin Max Baucus chuan a sawi a. Trump a thutlukna hi thil tihsual pawi tak a la ni dawn a ni a ti.

Baucus-a’n Associated Press a hrilh dan chuan, “Southeast Asia ramte hian China leh US a inbuktawkna atan TPP hi an duh thu min hrilh a. US hi in awm siloh chuan hmun ruak awm chu China hian a luah hmiah mai dawn a ni an ti,” tiin.

Bial khat kawngpui pakhat tih thupui hmanga he ruahmanna hi kalpui a ni a, hmakhawsang atanga inkalpawhna lo awm tawh thin, India Tuifinriat leh Asia khawmuapui laili inpawhna tur ruahmanna hi China President Xi Jinping-a kut chhuak liau liau a ni.

Sum leh pai thawhtu tur tih ang chi thil kimchang tak chu chiang taka tarlan a ni lem lova. Mahse, kum 2013-a Xi-a’n a puan hnu khan Beijing hian ruahmanna lian tham tam tham fe chu a bul an tan tawh a, Tajikistan, Thailand leh Kenya pawh tur rel kawng te, Vietnam leh Kyrgyzstan a kawlphetha siam chhuahna project te hi a lian pawl niin China sum puk hmang deuh veka thawh a ni a. Pakistan leh Afghanistan ramte ang chuan retheihna atanga khaichhuahna, an NLUP ve-ah ngaiin an lo lawm hle a. India, Indonesia leh ram dang thenkhat pawhin sum hman tur chu an duh ve tho na chungin China chet dan hian an ngaih a titha lova, a bik takin sumdawnna kawng lun em em South China tuifinriat a hauh natzia lanna atana Beijing-in thliarkar engemawzat a siamchawp hnu hian an rinhlelhna a zual a ni.

Indonesia rama politics lam ngaihventute chuan helai biala China-in ram dang a chaldelh leh huhang a ngah lutuk tur hi an hlau hle niin Jakarta khawpuia Center for Strategic and International Studies-a research lam hotu Christine Tjhin chuan a sawi a.

A awp hlui lo ni thin Uzbekistan leh ram dang dangte sum leh pai lama chungnung zawk China-in a thunun ta riau nia lang chu Moscow lamin a vei hle bawk.

Nikum June thla khan Russian President Vladimir Putin chuan ‘Great Eurasia Project’ a tih mai ruahmanna chu a rawt a, helai bialah hian sumdawn tawnna lamah Beijing-in hma hruai sela Moscow chuan politics leh venhimna lam bitum se tiin a rawt a ni.

Ram thenkhat ngaihthat loh rukna tihnep theih beiseiin tun Pathianni khan China chuan “Hmasawnna chhawr tlan theih tur chungchang duh duh sawina hun” inkhawm a ko va, Russia President Putin tiamin ram 28 hruaitu an tel a, khawthlang ram lian hruaitu erawh pakhat mah an tello thung.

Sum leh pai, ei leh bar lama hma a sawn changchawi-in China hian kum 10 chuang kal ta atang khan khawvel ngam tumna atana hmalakna pawimawh berah “Bial khat, inkalpawhna hmun khat” tih thupui hi a lo kalpui tawh a. Kum 2004 atang khan he Communist sorkar hian Asia, Europe leh America khawmualpui-ah te Chinese tawng leh an hnam ziarang zirna turin Confucius Institute engemawzat leh University engemawzat a lo din tawh a. Kum 2008-a khawvel pum huap sum harsatna thlen hnu khan US leh Europe ramin an lo awp reng thin World Bank leh International Monetary Fund ah thuneihna tam zawk nei turin a lo intat lut ta bawk a ni.

Engpawhnise, China hian a chheh vel ram leh bial zau tak hi tharum hmang ni lovin sum leh pai hmanga hneh chhuh a a thuneihna ram tih zauh tum hian a bei nasa tih hi chu tlang hriat a ni a. Ram rethei zawk hnena ‘hmasawnna’ chhuanlama pawisa a puktir hi engtin nge ni zel ang tih hi tam takin an lungkham chu a ni a.

Sri Lanka President hlui pawh kha inthlanna-a kum 2015-a chakloh chhan nia an sawi chu a khingpuipa khan a sorkar laia China laka leiba dollar tluklehdingawn 5 zet a neih kha a sawi tam vang niin an sawi a.

China sorkarin ram rethei zawk hnena sum tam tak a puktir hian Chinese company tam tak chu ramah chuan an luh phah si a, hei hi hlauthawng an lo awm a nih pawhin a mawh love.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s