Khawvel/ France President thar hnuaiah party candidate thlan dan dangdai

Indo thlawhna chak chi khalhtu hmeichhia, loneitu, zirtirtu leh hna neilo chenin he hna hi an dil a, an hmu. Hemite hi thla leh a French Parliament inthlan lo awm tura an President Emmanuel Macron-a puanzar hnuaia candidate nih tum 19,000 rual zing amite an ni.

An inthlan campaign thu laimu ber chu political party nena inhnim hnailote leh hun rei tak politics lo khel tawhte inkar a politics kalphung thlakthleng a ni a, chu’ng candidate inchawhchawrawi te zingah chuan amah Macron-a ngei-in a thiah tak kalphung hlui chungchang chu an titi tui ber a ni.

Hmanni khan President Macron-a party din ‘Republic on the Move’ hian France parliament ‘National Assembly’ bial 577 chuh tur candidate tur puangin hming 428 puan phawt a ni a.

Mi chi hrang hrang inchawh pawlh an ni a, a zahve aia tam chu Macron-a ang bawka thlan tlin nihna la chelh ngai reng renglo an ni hlawm a. An thil tum intawm chu Macron-a’n sorkar chak tak a din theihna atana Parliament-a hnehna chan a ni a, chutianga an tih theih chuan ei leh bar, sum leh pai lama France ram hnungtawlh tawh leh khawtlang nun tlahniam khaichhuah an tum a ni.

National Assembly dinglai mekah hi chuan Member te kum chawh rual hi 60 a ni, he’ng candidate te hi chawhrualin kum 46 mi vel an ni thung. A zahve hmeichhia an ni a. An zinga 24 chauh (5%) hi parliament ding meka member ni lai an ni a, Socialist vek an ni.

An party secretary-general Richard Ferrand chuan, “Kan candidate te hian kan ram politics nuna khua leh tuite a taka an inhnamhnawih a an luh chilh leh bakah an cham hlenna tur a lantir a ni,” a ti.

Macron-a’n a bulthut atanga tan a, mahni chakai khawrha politician hlun te huang pawna a lo chawr chhuah theih dan a lan tir hi he’ng candidate rualte chuan entawn an tum ber pawh a ni a. An zinga pakhat French Police tha bik RAID an tih mai Commander Jean Michel Fauvergue kha a langsar pawl a ni awm e.

RAID hian November ni 13, 2015 a Islamic State te’n Paris khawpui a pawi an khawih hnu khan firfiakho hi an tawn darh a, an hotupa Abdelhamid Abaaoud chu an kaphlum bawk.

Candidate zinga pakhat chu Claire Tassadit Houd a ni a, a laizawn Djamila chu IS hovin Paris an beih tuma mi 130 thi zingah khan a tel.

“Republic on the Move” candidate nih tumte hi an party website-ah inziak lut tura hrilh an ni a, an chanchin tlangpui ziaka an thil tumte tarlang tura hrilh an ni a. Mi 19,000 chuangin dilna an thehlut tawh a, thehlut belh an la awm reng bawk.

France ram lai li Creuse huam chhunga bial pakhata ding kum 40 mi Jean Baptiste Moreau chuan a tirte-ah a inziak lut nghal niin a sawi a. Kum 39 a upa Macron-a, French President naupang ber chuan a hip na hle a, chubakah mitin thleng phak politics khel tura an party a inpuahchah dan chu a duhdan chiah a nih thu a sawi a ni. Thlan tlin a nih pawhin dam chhunga politician nih a tumloh thu sawiin term khat emaw term hnih emaw bak chuh a tum loh thu a sawi.

France chhim thlanglam Aude huam chhunga khaw pakhat mihring sangkhat vel chenna a Primary School hotu Mireille Robert chu Socialist Party candidate buk rit zet nen an inkhing dawn a. He khua-ah hian Le Pen-i khan vote 271 a hmu a, Macron-a chuan vote 266 a hmu thung a. Robert-i chuan a zam thu a sawi. Politics-ah mi thar a nih avangin mi tlemte inhmuh khawmnaah an khua leh bial chhung hmasawnna turte an sawiho thin a. Vantlang inkhawm kohva, ziah sa hmanga thusawi ai chuan a duhdan leh tum dan zawk a ni a. An chhungkua hi wine siam lama hriat hlawh an ni ve a, chu chuan a tlinpui theih mai a beisei a ni.

Hmanni-a President thlan thawh hnihna zet kha chuan French politics a kuai khaikhup chiang hle a, kum 5 chhung President Francois Hollande kaihhruiana hnuaia sorkar tawh Socialist tiamin party lian pui puite chu la en chhin ve loh Macron-a chuan a hneh a. Macron-a hi Hollande sorkar hnuaia economy minister hna chelh ve zawk tawh kha a ni a, a hna thawh ber erawh chu ‘investment banker’ a ni.

Party candidate nilo tur langsar zual zingah Prime Minister hlui Manuel Valls chu a tel a, ani hi Socialist Party-in president atana an theh chhuah takin ti a nikum December thla a Prime Minister a nihna atanga bang, mahse an candidate leh tak siloh kha a ni a. Macron-a pawl-in Parliament inthlan a chuhna-ah tel ve a tum na-in an lo hnawl a ni. Valls hi Parliament-ah tum 3 ngawt thlan tlin a ni tawh a, Macron-a party mi a ni lova, chuvang chuan an party candidate a ni theilo a ni.

Ferrand-a chuan,”Kan tehfung kan thlak lovang a, tumah a bikin kan duhsak dawnlo,” a ti hmiah mai. Valls-a khing tur erawh chuan Paris chhim lama Evry district-ah an party chuan candidate an dah dawnlo niin a sawi.

Macrona party hruaitu leh candidate thlangtu zinga tel ve, Parliament member hlui Jean Launay chuan candidate atana an party-in a thlan tak loh engemawzat chu an party-in khin an tum lo niin a sawi a. Candidate list hi vawiin (May ni 19) a thehluh vek tura tih a ni. Launay chuan politics a daihriat neilo rual an candidate chungchanga hlauhthawnawm nia an sawi chu an hlauh veloh thu a sawi a. “Kum 1998-a National Assembly-a ka luh ve hlim pawh khan politics lamah chuan nausen ka la nia lawm, engkim hi a zira ka zir chhoh vek a ni a. An zir ve mai ang,” a ti a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s