Lawrkhawm/ May 11-17, 2017

A dahna hmun tur ni loa dah gelatine tam tak police-te’n man

20170516_115806.jpg

Mizoram Police chuan May 16 khan Mission Vengthlanga In pakhata gelatine zawrh lai thahnem tak chu a dahna hmun tur ni loa dah a nih avangin an man. Hetiang puakthei thil neitu Trust Well Mizoram inti te hian gelatine an zawrh chu phalna an neih thu sawi mahse, a dahna hmun tura tihah an dah loh avangin police te chuan an man sak a, gelatine zawrh phalna pe tu Aizawl Bawrhsap kutah an hlan. Trust Welll Mizoram te hian gelatine dahna atan hian Thenzawl leh Lengpuiah safety godown an nei niin an sawi a, chung hmuna an dah chuan mamawhtute tan pan a harsa dawn niin sawi mahse, police te chuan tuna an dahna chu a dahna hmun tur a nih loh bakah puak palh ta se Mission Vengthlang khawtlang tan a him dawn lo niin an sawi a, khawtlang hruaitute pawhin an venga gelatine tam tak chhekkhawl a ni chu rem an tih loh thu an sawi hnu ah police te chuan an man sak ta a ni. Trust Well Mizoram in gelatine an kawl police te’n an man sak te hi Neo gel (17 bags), Ordinary Detonator (7 boxes), Detonating Fuse (1 box and 3 coils), safety fuse (6 boxes) leh amonium nitrate (65 bags) an ni.

 

MNF-in Mizo Carbon Products leh State Lottery chhui tura CBI kohluh sak turin CM an ngen

18447580_1313695728737699_7064652626773499201_n

MNF party chuan Chief Minister Lal Thanhawla chu Mizo Carbon Products leh lottery chungchanga thil dik lo tam tak awm te CBI chhui tir turin May 17 khan an ngen. MNF party mite hian CM chu a pisa-a hmuha ngen tum mahse, a zin bo avangin a Private Secretary hnenah kalin Mizo Carbon Products leh lottery chungchang chhui tura CBI kohluh sak tura an ngenna hi an pe a, an lehkha pek ah chuan, “May ni 12, 2017 (Zirtawpni)-a Congress Bhavan-a Political Session-a i thusawite MPCC Media Department ami Lalhruaitluanga Kawlni-in a rawn tarlanah khan i thusawi lawmawm tak mai kan lo hria a. Chutah chuan Zo Carbon leh Mizoram Lottery chungchang thua mipui ten thu hriatchian an duhte chhui chhuak chiang turin ACB emaw, CBI emaw hman ngai a nih chuan rawn sawi sela hma ka lo la vat ang, i tih thu kan lo hria a. Hei hi lawmawm kan ti em em a. Heng thil te chhui chhuak chiang tur hian CBI ngei in hma la se tha in kan hria a. Chuvangin i Chief Secretary hnenah kan lehkha hi mi ‘endorse’ sak la, ani’n Mizoram sorkara thuneitu concern hnenah thu lo pe in heng thilte chhui chiang turin CBI kohna lehkha lo siam sela. Tin, i thu sawi angin an kalpui ngei a ni tih kan lo hriat ve nan chung lehkha copy te pawh chu min pe thei se kan lawm takzet ang,” tiin, an party General Secretary C Lalrammawia hmingin an ziak a, an thehlut a, an lehkha thehluh ah hian MPCC Media PR, May 12, 2017 ami an thil tel.

 

MPF, party te’n  house-to-house campaign remti

Mizoram People Forum (MPF) leh political party hruaitute May 16-a thu khawm chuan MPF in political party te nen thawhhona tur thuthlung an duan te an enho a, inthlan dawna candidate leh party mite’n in tina luta campaign an neih thin, house to house campaign chu remtih ni se an ti.

Party mite chuan in tina luta campaign ah sum sem a nih ngai loh thu te, candidate lar lo te tan in tina luta campaign khap a nih chuan an tan tlin theihna hun remchang a chhiat thu leh MLA ni lai tan tlin leh theihna hun remchang a nih zawk dan te an sawi a, an sawiho hnu ah ‘House to house campaign hi MPF Local Forum te nen phal a ni ang,’ tiin thutlukna an siam siam a ni.

‘Vote thlak tura khawpui atanga mahni khaw lama hawna tur bus leh lirthei dang tum sak te, kalna leh hawna tur sum pek te hi tumahin tih loh ni se,’ tih pawh political party mite chuan tha an ti lo a, sawiho a nih hnu ah, ‘Hetiang thil ah hian local, constituency leh district level MPF te’n nasa lehzualin mipui zirtir se, hetiang tilui leh bawhchhia an awm chuan sorkar dan dinglai anga thla thum lung in tan theihna a ni,’ tiin an thlak bawk.

MPF buatsaiha joint platform neih thin chu tih tawh loh ni se tiin thukhawm hian thu a ti tlu bawk a, state pawn lam atanga campaign tur lo kalte pawhin public meeting an kohin MPF in a kaihruai ang.

 

Food Processing zirna CM in hawng; “Industry din tumte’n subsidy an melh nghal lutuk rilru kalsan a hun tawh,” niin a sawi

img_7765_1494925764

Seling Phaibawkkawna cheng nuai 500 vel senga din, Mizo ram Food Processing Research & Training Centre (MFPRTC) chu May 15 khan Chief Minister Lal Thanhawla’n a hawng. MFPRTC hi Mizorama thei leh thlai thar chhuah te awmze nei taka zirchianna leh sumpai chang thei tura a sawngbawl dan mipuiin an zir theihna hmun atan ruahman a ni a, Ministry of Commerce & Industry hnuaia hmarchhak atana Export Development Fund hmanga din a ni. Commerce & Industries department in an vilin an enkawl dawn a, mahse nitin sorkar in enkawl lo in Centre Director in a enkawl dawn a ni.

Hawnna thusawiin Chief Minister chuan, “Mizote’n ei tur sawngbawlna kan la hriat tawk loh chhan ber pakhat chu thar chhuah a la tam tawk loh vang leh company te mamawh anga tam kan la thar chhuah loh vang a ni a, kan thar chhuah tam thenkhat pawh sawngbawl lohin state pawn lamah kan thawn chhuak mai thin a ni,” a ti.

Sorkar aiin mimal thahnem ngai leh thiamna nei zawkin ei tur sawngbawlna chu tihtak zetin buaipui se a hlawk zawk a rin thu Lal Thanhawla chuan a sawi a, industry din tumte’n subsidy an melh nghal lutuk rilru kalsan a hun tawh a ti bawk.

Hemi chungchangah hian MPC chuan a tuk, May 17 khan thuchhuah siamin, “Seling a Mizoram Food Processing Research & Training Center ( MFPRTC) cheng nuai zanga a din Chief Minister Pu Lalthanhawlan a hawng ta hi MPC party chuan lawmawm kan tih rualin he khawl tangkai taka hmanna tura hmanraw pawimawh ber Electric Power kan neih that leh si loh avangin a hlawhtlinna hmel hmuh a beisei awm dawn lo hleah MPC party chuan kan ngai a, a pawi kan ti takzet a ni,” a ti.

 

Mitdelte’n  PWD hna lak dan duh lo in CM ah zualko

Mizoram PWD hnuaia rualbanlo te tan bika post siamah DP&AR-in gazette a tihchhuah tan chhana PWD hotute’n Section Assistant (SA) post bika mitdel te tana dil theih loh an tih chu enfiaha siamthat a nih theih nan Mizoram Blind Society (MBS) chuan May 12 khan CM Lal Thanhawla hnenah memorandum an thehlut.

Thu chhuah an siamah MBS chuan Mizoram PWD in rualbanlo te tana a bika post 17 (SA paruk leh IVth Grade 11) a lak turah mitdelte’n an dil ve chu PWD thuneitute’n Mizoram Gazette for Persons with Disabilities 2011, DP&AR in a tihchhuah tan chhanin mitdel te tana SA post chu dil theih loh tiin mitdel te dilna lak loh an tum niin an sawi a. Hei hi sorkar laipui dan kalh a nih avangin MBS ngenna leh nawrna avangin SA post diltute dilna lehkha chu PWD thuneitute chuan an lo dawn sak a. Mahse, Mizoram sorkar gazette in a tihchhuah hmangin PWD thuneitute hian SA hna hi an lak tho si chuan mitdel (totally blind) te tan luhna a awm dawn lo niin an sawi.

MBS chuan rualbanlohna nei pha lote’n Disability Certificate an siamchawp tir hmanga rualbanlo te quota an chuhpui ve thin avangin rualbanlo dik tak chauh te sorkar in heng hna ah te hian a lak theih nan a bik taka quota siamah Medical Board interview ngai ngei ngei tura dan duang turin a ngen bawk.

 

Bru te puhna ah CYMA lawm lo

Tripura Relief Camp-a awm Mizoram Bru Displaced People Forum in YMA leh MZP-te’n anmahni tiduhdaha ralthuam lek pawl ang hiala YMA leh MZP an puh chu Central YMA in a lawm loh thu a sawi a, May 16 zana thu chhuah a siamah Central YMA chuan, “Mahni duhthu ngeia Mizoram chhuahsan Bru-te’n Supreme Court ah sorkar laipui, Mizoram sorkar, Tripura sorkar leh Election Comission of India te an khinna lehkha ah YMA leh MZP-te anmahni tiduhdah a, militant ang hiala min puh hi Central YMA chu a lawm lo hle a, Supreme Court in Bru te min puhna chungchanga insawifiah tura min tihna chu Central YMA chuan a tul anga Supreme Court-a ding tur ukil ruai a, min puhna dik lo tak hi sawifiah a, thudik thehluh ngei tha kan ti,” a ti a, May 16-a Central YMA Executive Committee thu khawm chuan he thil hi a tul anga bawhzui ni se a ti a ni. Central YMA chuan Tripura sorkar in Bru te Aadhar Card a siamsak pawh a tul anga chhuizui ni se an ti bawk.

 

Health Worker in badge dum bel

Health Department hnuaia Health Worker te chuan an duh anga Recruitment Rules (RR) tihhlawhtlin a nih theih nan May 15 atang khan an hnathawhna ah badge dum an bel. Mizoram Health Multipurpose Service Association (MHMSA) chuan sorkar-a an thil ngiat chungchanga sorkar vawi engemaw zat an dawr tawh chunga a hlawhtlinna an la hmu loh avangin leh an khawmpuia an lo rel tawh angin badge dum hi an bel ta niin an sawi a.

Tharum thawh leh thinrim zawnga kal tumna a nih loh thu an sawi.

MHMSA chuan RR chu Health Worker atanga Supervisor kaisanna turah seniority za-a 75 (75%) leh limited departmental exam za-a 25 (25%) chu seniority za-a za (100%) an duh niin an sawi a, Supervisor atanga Community Health Officer (CHO) kai turin Seniority za-a 50 (50%) leh Limited Departmental Exam za-a 25 (25%) leh B Sc Nursing za-a 25 (25%) pawh titawpa seniority za-a za (100%) dah an rawtna te chu an thil ngiat a nih bakah kum 2014 atanga an rawtna a nih thu an sawi.

Health Worker te hian badge dum hi May 15 atanga vawiin thleng (May 19) hi bel an tum a, an duh anga sorkarin hma a lak loh chuan May 22 atanga 26 chhung hnathawh loh a nawrh bakah, chumi hnu a an duh anga thil a kal loh zel chuan May 29 atanga 31 mass casual leave la turin an inring niin thuchhuah an siam bawk.

 

MPS officer senior ber IPS ah kaisang

Mizoram Police Service-a senior ber Neihchungnunga, Fire & Emergency Service Director chu tun hnai khan Indian Police Service ah a kaisang. Ministry of Home Affairs chuan tun hnai khan Neihchungnunga, IPS-a a kaisan hriattirna hi a chhuah a, AGMUT cadre pe in kum khat chu probation hun hmang turin a ti bawk. Neihchungnunga hi IPS ah kaisang mahse, Mizoram sorkar chuan Fire & Emergency Service Director hna chelh turin a la ti rih a ni. Neihchungnunga rual hian MPS officer tho Lalbiakzama chu IPS-a kaisang tura tih ni mahse, Lalbiakzama hian a duh lo a, hei vang hian MPS-te tana IPS post khat la ruak chu Aizawl SP Lalhuliana Fanai in a luah thei tura ngaih a ni.

 

YMA branch 141 inelna tur football tournament hawng

Football khela YMA Branch hrang hrang 141 inelna tur Central YMA leh Mizoram Football Association in an huaihawt ‘TT Royte Trophy — Inter Branch YMA Football Tournament 2017’ chu May 15 (Thawhtanni) zan khan Central YMA Hall ah Pet Hawn a ni a, Thawhlehni atang khan Aizawla khelmual pali ah inkhel tan a ni.

Organising Committee Chairman Lalrochuanga Pachuau in a kaihhruai Tournament Pet Hawnna inkhawmah hian Main Sponsor TT Royte Group hotupa Robert Romawia Royte chuan football petin tournament chu a hawng a, Central YMA President Pu Lalbiakzuala chuan YMA Branch 804 zinga Branch 141 in tournament an khel thei tur chu lawmawm a tih thu sawiin, football avanga Zoramin khawvel hriat a hlawh tak chungchangah Football lam hruaitute lawmthu a hrilh bawk a ni.

MFA President Lal Thanzara pawhin Central YMA in ruihhlo dona kawnga mutmu pawh tuah hman lek lova hma an lak dan chu fakawm a tih thu a sawi a, “National level-a kan champion-na pathum – Khelo India, National Sub Junior football leh I-League te bakah, pahnihna kan nihna hrang hrangte chu a chhuanawm a, hetianga hlawhtlinna sang tak kan chan tawh lai hian YMA Branch te football-a inelna chu thianghlim taka kalpui ni se, intihbuaina aia inunauna thlentu ni zawk se ka duh a ni,” a ti.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s