Mizo Carbon Products phen ah company lem nia ngaih theih sang chuang

Sorkar hriatpui a subsidy cheng vbc 46 tling thelh insem tu company 1,070 zet chu sorkarin a hre lawi si lo

Cover-1

Mizo Carbon Products chauh pawh a ni lo, central subsidy pekchhuah a nih dan hrim hrim ah hian  thil felhlel a awm ngei niin a lang.

Central Young Mizo Association hmalakna avangin tunhnai hian Mizo Carbon Products company-in felhlel taka cheng vbc 2.48 dawn Central Transport Subsidy (CTS) leh cheng nuai 93 dawn Central Capital Investment Subsidy (CCIS) an hmuh chungchang a lar hle a, he eirukna lian tak ni ngeia hriat avang hian eptu pawl te’n sorkara thuneitute an bei a, mimal hmalakna avangin Gauhati High Court (Aizawl Bench) ah pawh Public Interest Litigation (PIL) hial a lut bawk a, HC chuan he PIL avang hian Mizo Carbon Products-in subsidy a dawn hmabak te pawh hrek rih turin sorkar thu a pe nghe nghe a ni.

Hetihlai hian, The Frontier Despatch (TFD) chuan Mizorama CTS leh CCIS dawng tawh company chi hrang hrang 1,200 chuang a zirchianna ah thil felhlel nasa tak a awm thei niin a hmu: heng subsidy dawngtu company zawng zawng zinga 1,070 emaw vel (zaa sawmkua – 90% — tling thelh) chu Taxation Department-in an awmna hmun leh a neitu hming takngial pawh a hriat loh an ni hlawm a. Tin, CTS leh CCIS an dilna te enfiah a, sorkar laipuia thlen saktu Industries Department phei chuan heng company 1,200 chuang te hi pakhat mah an hre lo ni-a ngaih theihin TFD zawhna a chhang.

 

Enge CST leh CCIS chu?

CTS hi kum 1971 khan sorkar laipuiin duang in a hmang tan a, ramchhunga tlang ram leh hmun kilkhawra industry dina sumdawng te tanpuina tura tih a ni ber a, CTS scheme hian hmarchhak state pariat te (Sikkim tiam in), Himachal Pradesh, Uttarakhand, Jammu & Kashmir, West Bengal-a Darjeeling district leh Union Territory zingah Andaman & Nicobar leh Lakshadweep thliarkar te a huam a. Hmarchhak, J&K leh UT ah te bik hian industry dina sumdawng te hian an bungraw mamawh leh hralh tur te an phurh luh leh phurh chhuahna man zaa 90 (90%) thleng sorkarah subsidy angin an dil thei a. An dilna te hi state tina State Level Committee (SLC) te’n an endik hnu ah Ministry of Commerce and Industry hnuaia Department of Industrial Policy and Promotion (DIPP) ah an thlen a, DIPP hian a diltute hnenah subsidy hi a pe leh mai thin a ni. Hetiang a nih vang hian mipui nawlpui in subsidy kan hriat dan, tlawm zawka bungraw mamawh lei nen a inang lova, CTS hnuaiah chuan a sumfai in subsidy hi an dawng thin zawk.

CCIS thung chu December 1997-ah sorkar laipuiin a hmang tan a. He scheme hnuaiah hian hmarchhak chhunga industry din thar te chu an industry din nana an sum sen zawng zawng zaa 15 emaw an industry din tawh an tihlen/tihchangtlun (expand) nan a tam berah cheng nuai 30 emaw in a sorkar chuan a pui thei a ni.

 

Industries-in subsidy dawng company te hre lo

Hmarchhak bikah hian DIPP chuan heng subsidy te hi North East Development Financial Corporation (NEDFi) kal tlangin a diltute hnenah a pe thin a. TFD chuan NEDFi-in kum 2000 April thla atanga kum 2016 March thla tawp thlenga CTS leh CCIS a pekchhuah tawh company hrang hrang te leh an dawn zat theuh te chu a zirchiang a, heng company te hi a neitu leh an inbunna hmun theuh bakah an chhiah chawi zat leh chhiah awl an nih leh nih loh thu te dilin Right to Information (RTI) dan hnuaiah Taxation Department ah zawhna a thehlut a. Chutiang bawk chuan heng company in-register dan te, a neitu te, an inbunna hmun te leh heng company te hi an la nung em tih te Commerce & Industries (C&I) Department ah RTI dan hmangin zawhna thehluh leh a ni a. Heng RTI zawhna ah te hian heng company te hi CTS leh CCIS lo dawng tawh thin tu te an ni tih erawh ziah lan a ni lem lo.

C&I Department chuan he RTI zawhna hi kar hnih hnu ah a rawn chhang a, a chhangtu officer chuan tum viau mahse, company hrang hrangte inbunna hmun leh a neitu theuh hming te department-ah hrilhhriat a nih hma loh chuan department-in zawhna te chu a chhang thei lo niin a sawi a, RTI zawhna chu RTI-a zawhna chuang vekin a chhang let a ni. C&I department hi CTS leh CCIS diltu company te dilna enfiah a, pawm a, sorkar laipuia thlentu a ni.

Taxation Department thung chuan chipchiar takin RTI dan hnuaia zawhna hi a chhang a, company 150 bawr vel zet te neitu hming leh a inbunna hmun te chu chhanna ah hian ziak mahse, company 1,070 dang te erawh chu a neitute emaw, an in register dan emaw te a chhang thei lo.

 

Transport subsidy: hman atanga rinhlelh kai tawh

CTS bik hi kum sawmhnih emaw kal tawh atang khan ramchhungah sawiselna a lo tam tawh a, Comptroller and Auditor General of India (CAG) pawhin tum hnih lai a bikin a lo audit tawh a. CAG audit hmasak zawk chu kum 2000 bawr vel khan a ni a, scheme kalpui danah hian thil dik lo tam tak a awm tih hmuhchhuah a ni nghe nghe.

Kum engemaw zat a liam hnu chuan sorkar laipuiin thil felhlel a awm ni ngei in a la hre cheu a, CAG chu CTS kalpui a nih dan audit turin a ti leh a. CAG chuan hemi tum hian state paruk (Mizoram tel lo)-a CTS pekchhuah dan chu zirchiangin, kum 2002 leh kum 2008 inkara subsidy pekchhuah 118 chu a zirchiang ta a. A chian lehzual nan subsidy dil leh pawm a nih theih nan a department hrang hrang te’n an chhinchhiah dan nen a khaikhin zel a, thil dik lo tam tak a hmuchhuak ta reng a ni.

Entirnan, Nagaland ah chuan industry pakua hnenah cheng vbc 5 chuang CTS pekchhuah a ni a. Mahse, Sales Tax Department chuan heng industry te record ah  bungraw phurh luh emaw hralhchhuah emaw a awm reng reng lo niin a chhinchhiah thung a. Meghalaya ah pawh industry pakhat hnenah cheng nuai kua lai chu CTS pek ni mahse, he subsidy dawng tu industry in a dilnaa a ziah zawng zawng zaa sawmriat (80%) chu a lem a ni tih CAG chuan Central Excise Department chhinchhiahna atangin a hmuchhuak a. Tin, Himachal Pradesh ah pawh industry panga in CTS cheng nuai 22 bawr vel an hmu na in, an bungraw phurtute nia an sawi registration number te chu CAG-in Vehicle Licensing Authority ah a endik a, a tam zawk chu two-wheeler leh lirthei te chi, Light Motor Vehicle an ni tih a hmuchhuak bawk.

Hmun hrang hrang an audit-na ah hetianga thil dik lo a awm zel a ni tih a hmu zel a, CAG chuan subsidy dilna te department hrang hrang chhinchhiahna nena en mil a nih hnu in cheng vbc 6.32 chu company lem leh a taka awm lo bakah dilna dik lo vangin sorkarin a hloh niin a chhut chhuak a ni.

 

Taxation hriatpui loh in CTS dil theih loh, Taxation in a dawngtute hre lo nasa si

Hetiang deuh bawk hian Mizoram Taxation Department-in RTI an chhan dan ah hian ngaihdan a siam theih awm e.

Hemi chungchanga chinchang hre tak officer senior tak pakhat chuan TFD hnenah, “Taxation Department hriatpuina a pawimawhna hi chu Central Transport Subsidy tih ni thin, tun hnua Central Freight Subsidy ni ta ah hian a ni a. Entirnan, Mizo Carbon Products chungchangah chuan lungalthei te an lo phur lut ta a, khatah khan lungalhthei phurtute way bill-ah taxation inspector te khan taxation check gate a paltlang a ni tih an lo verify a, an lo certify ve ta a. Khatiang a awm loh kha chuan CTS kha an claim thei ta lova. Chuvang chuan Taxation khan a hriat ngei ngei a ngai tihna a ni, way-bill an neih ngei ngei a ngaih avangin,” tiin a sawi.

TFD-in a zirchianna ah chuan kum 2000 atanga kum 2016 thlenga CTS dawng tawh company 1,200 zingah hian 142 chauh chu Taxation Department-in a neitu leh an inbunna a hriat an ni hlawm a, a dang zawng, company 1,070 emaw lai chu Taxation Department lam hian tu te ta nge a nih leh khawi lai hmunah nge an awm tih a hre lo a, department chhinchhiahna reng reng ah an tel lo hrim hrim a tih theih awm e.

 

Company lem ni awm te’n cheng vbc 46 dawn dawng tawh

TFD-in NEDFi leh Taxation Department chhinchhiahna te a enkawpa a zirchianna ah chuan heng company lem niawma lang company sangkhat chuang, a taka awm lo, CTS dawng tho bawk si te hnenah hian C&I Department hnuaia SLC leh Ministry of Industries hnuaia DIPP te chuan cheng vbc 45.85 emaw lai kum 17 chhungin an pe niin a lang. Hetih lai hian, Taxation Department-in company awm ngei tia a finfiah theih 142 te chuan hemi hun chhunga CTS cheng vbc 65 chuang ah cheng vbc 19 emaw chauh an in sem thung.

Company awm ngei nia Taxation in a chhinchhiah te zingah hian Zonun Mat Ply-in CTS a dawng hnem ber a, cheng vbc 5.26 a dawng a, a neitu thuhmun HP Food Products leh HP Modern Roller Flour Mills te chuan cheng vbc 2.78 bawr vel an dawng bawk a.

Anni bakah hian cheng vaibelchhe dawng tling dang company chu Mizo Carbon Products chauh a ni a, Taxation-in Margeret M Varte, Lower Chanmari, Aizawl ta nia a chhinchhiah company hian CTS cheng vbc 2.47 chuang a dawng a. Heng a sum dawn te hi kum 2012 chhunga a bungraw phurh luhna nia Mizo Carbon Products-in a sawi, SLC-in May 21, 2013-a dilna a ngaihtuaha a pawmpui, DIPP-in NEDFi kaltlanga June 24, 2014-a a pekchhuah tak vek a ni a. Kum 2014-15 chhung hian Mizo Carbon Products tih loh ah chuan company dang pakhat, Zonun Mat Ply chauhin CTS a dawng ve nghe nghe a ni.

 

Mizo Carbon Products ringhleltu tam

Tarlan tawh thin angin, Mizo Carbon Products hi Central YMA te, Aizawla pa hriathlawh rual te leh eptu pawl MNF te’n a hmunhma tlawhin eng hna mah an thawk lo nia an hriat thu an puanzar hnan a ni a, sorkar lehkha pawimawh hrang hranga a lan dan chuan he company sawihlawh tak hi a neitu mi pakhat chauh a ni lova. Assembly-a zawhna chhanna pakhat ah chuan Margaret Varte bakah hian he company neitute hi Silchar-a sumdang lar tak Ravi Gulgulia leh company dang, Yash Infrastructural Engineers Pvt Ltd te an ni.

Central YMA thu chhuah chuan Mizo Carbon Products hian Mizoram ah chuan Aizawl Luangmuala Industrial Growth Centre-ah hmunpui a nei a, a thawhpui company pakhat Central Lime Industry chu Lengpui ah a inbun a ni a ti bawk a. Lungalhthei hi a khur tamna hmun leh hmasang atanga leilung hausakna ngah tawh thin khua, Khliehriat (Meghalaya) ami truck hmangin phurh luh a ni thin a. Chu lungalhthei chu Lungmual leh Lengpui-ah te hian siam danglamin he company hian a sumdawn pui ta thin a ni.

 

Truck tha mi!?!

TFD in Taxation Minister-in kumin March thlaa Assembly zawhna a chhan dan a zirchianna ah chuan Mizo Carbon Products tana bungrua phur lirthei fit tak tak sawm paruk (16) aia tlem lo a hmuchhuak a.

Heng zinga pakhat, vehicle registration number AS-11 AC 4903 phei chuan July 26, 2011 furpui lai khan lungalhthei atanga brick siam (Coal Bricks) 30,500 zet, cheng nuai 1.4 man chu phur in Taxation Check Gate ni khat chhungin vawi sarih lai a tlan tlang pui a nih chu!

Tin, Mizo Carbon Products bungraw phurtu truck dang thenkhat chuan Taxation check gate hi ni khatah vawi li te bungrua phurin an tlan tlang pui thei a, a then chu nikhatah vawi thum emaw vawi hnih an tlan tlang thei thung.

Hetianga thil felhlel tak a awm ngei nia a lan vang hian Mizoram sorkar pawhin Mizo Carbon Products sumdawn dan chhuichiang turin Anti Corruption Bureau (ACB) a hriattir a, ACB hian a chhui mek zel a. Tunhnai khan Vanramchhuangi,  Ruatfela Nu tia hriat lar chuan ACB hi sorkar thuhnuaia hnathawk a nih vangin Gauhati High Court ah PIL a thehlut ta bawk a.

 

Lungalhthei phurh tur awm loh laiin phur lut in ti lawi si

Ruatfela Nu aiawha ding Senior Advocate C Lalramzauva’n HC judge Justice N Sailo a hrilh dan chuan Margaret M Varte leh Mizo Carbon Products neitu dang te hian August 1, 2010 khan sumdawn dunna tur thuthlung an ziak fel a, he thuthlunga a lan dan chuan Margaret M Varte hian hlawkna awm zawng zawng zaa pakhat (1%) a chang ang a, a company neitu dang te hian hlawkna zaa sawmkua pakua (99%) an chang thung ang a. Hlohna a awm a nih chuan hetiang bawk hian an intum sem bawk ang a, mahse, hlawkna a awm lem lo a nih pawhin Margaret M Varte hian thlatin cheng singthum (` 30,000) a dawng ziah dawn hrim hrim bawk a ni.

C Lalramzauva hian HC hmaah Mizo Carbon Products neitute’n August 27, 2014-a District Industries Centre, Aizawla General Manager hnena an lehkha ziah a phawrh bawk a. Hetah hian Mizo Carbon Products neitute chuan [April 2014 atangin] National Green Tribunal-in Meghalaya ah lungalhthei laih chhuah a khap avangin an duhkhawp lungalhthei a awm lo niin an sawi a, hna an thawk theih loh phah niin an sawi bawk a. Amaherawhchu, kum 2016 khan Mizo Carbon Products hian CTS a dil leh a, a dilna ah hian kum 2014 July leh September inkar, Meghalaya-ah lungalhthei lei tur a awm lo a tih lai taka lungalhthei Meghalaya atanga Mizorama a phurh luh man chu a CTS dil nan hian a behchhan leh lawi si a. Heng vang hian Mizo Carbon Products sumdawnna hi thil lem leh lehkha chauha awm a ni tiin C Lalramzauva chuan a sawi.

Sorkar ukil, Addl Advocate General AK Rokhum thung chuan SLC-in a phalna thlapa CTS pekchhuah a nih vangin puanhnuai thil a awm tih chu a dik lo a ni a ti a, ACB in an chhui mek avangin hmun dang ami chhuitu tur koh a ngaih nachhan a awm lo ve a ti bawk.

Justice N Sailo chuan ukil te thu thlen a ngaihthlak hnu in thla khat hnu ah PIL-a hming lang hrang hrang te hi court hma a inlan leh turin a hriattir a, SLC-in a lo phal sak tawh, Mizo Carbon Products hnena cheng vbc 10.34 pek tur la awm pawh chu Court-in he thu a ngaihtuah leh hma chuan pek hrih loh ni se tiin thutlukna a siam bawk.


4 thoughts on “Mizo Carbon Products phen ah company lem nia ngaih theih sang chuang

  1. Mizo rilru hi a lo va chim nasa em em. Khawnge kan Kristianna chu a awm a. Khawiahnge kan sakhua chuan min hruai tak. Nun suar ang a chim. Tham leh bawlhhlawhna ten tual an leng tak zet ta mai em ni?

    Like

  2. Taxation lam hian eng vangin nge dawr awmna pawh hriat loh leh an mi hriat loh hnenah regiatration an pek theih… tin kan sorkar hian an man chhuak duh tak tak a nih chuan way bill entry tu taxtion officer signature a tang in hetiang em em a truck tha hi engtia tlan thei nge a nih a….engtiang dingmun atangin nge a entry theih tih zawh fiah hi thil harsa a nilo ang… an man chhuaklo a nih chuan acb hi an nep viau ka ti ang

    Like

  3. Hahahaha….Truck țha mi khi khawi ațanga an lei nge ni. Ka duh ve hle mai.
    Khitianga Company lem hnuaia khiti zat khi țanpuina Hnamdang hnenah mah Sorkar hian a pêk phal chuan Mizo te hi țangrual ila company lem registration ti sup sup ila Sorkar hnenah Subsidy dil chir chur ila a nimai a lawm. Hma kan sawn phah deuh mahna….

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s