Ramchhung/ Bakarwal te nen lamlian ah

Bawng humhalh duhte’n an bei ngawt na a, ran vulh hnam, tribal leh Muslim ni kawp Bakarwal te chuan hmasang atanga an tih thin dan thlah mai an tum lo

 

Kum 55 a upa Mian Mizam Din hi kilometre sang tel chu ke ngatin a lo kal tawh thin a. Kuminah erawh chuan a tunu kum 3 mi chuan a ai a awh ve ta thung a, Udhampur District-a Batti Bargarh leh Kishtwar district a Warwan khaw inkar kilometre 300 dawn lai chu ke lawng vek deuhthaw-in a kal thin.

Nizam Din chuan nui chungin,”Kan tih danin a ti ve mai ang chu. Lungpui chungah kan riah chuan a riak ve ang a, ram palaileng lei chhuat dai a kan riah pawhin a riak ve mai ang. Hei hi khanabadosh (awm hmun nghet neilo) ho nun chu a ni,” tiin a sawi.

Jammu and Kashmir state sorkar hi khaw awmdan a zirin Jammu khawpui leh Srinagar khawpui-ah an pem kum tin a, an pem senso hi cheng vaibelchhe 40 vel nia chhut a ni. Hetiang bawk hian khaw awm dan a zirin Nizam Din-a te ang Bakarwal ho hian kum tinin Jammu leh Kashmir hi an kar tawn thin a. Kum zabi tam an lo tih than tawh niin an sawi a, an hnam hi Georgia atanga helaia rawn pem lut ta niin an sawi a. Jammu phairuama cheng Bakarwal mi nuai 4 vel hi an thawmhnaw leh bungraw tlemte nen nipui-a tlangrama khawsa turin an pem kumtin a ni. Kuminah hian Bakarwal ho pem thu hian mi ngaihven a hlawh ta.

April ni 20 khan an bawng vulhte nena Reasi atanga Kishtwar pan tur chhungkaw pakhat chu bawng humhalh duhtute’n an lo bei a, mi panga-in hliam tuarin an zingah hian kum 8 mi a tel ve a. Kutthlak an tawh chungchangah hian Police hnenah FIR an thehlut a, chutih rual chuan Police lam hian ran chunga nunrawn chhuah khapna dan (Prevention of Cruelty to Animals) dan hmangin an lakah thubuai an lo ziak lut let ve a ni.

An ran vulhte nena hriat hran hleih theih loh tur khawpa ran vulha ei zawng rei tawh hnam chu bawng humhalh duh fir zualte kutthak an tawng ve ta a ni. J&K a hnam pem kual ching (nomads) Gujjars leh Bakarwal hote hi an state-a hnam hlawm lian ber pathumna an ni pha a. Tunhma chuan he state-a hnam lian pahnih te innghirnghona-in a nghawng ve phak loh ah hmun fal takah an khawsa a, tunah erawh chuan hlauhna-in a man ve ta.

Ningani zinglam dar 2 vel a ni a, Batti Barigarh khaw mi Khalid Hussain (27) chuan an chhungkaw ei tur, bungbel, thawmhnaw leh puan lum te chu sakawr te chi 24 chuang chungah a hlang mawlh mawlh a. A ip inhawng a suih pah chuan sakawr te chi ngawi renga ding chungah chuan a her rem zel a, Hussain-a hi chuan a tih than a ni bawk a, a awlsam ngang mai.

Pawn lamah chuan a unau pa Qudesh (32) chuan an chhungkaw beram leh kel rual chu a huang atangin a lo la chhuah mek bawk a. An khua a Bakarwal chhungkaw dangte ang bawkin an hna hi meichher eng hnuaiah an thawk a. An chheh vela ngaw dur khup karah chuan an in chhe te te chu arsi ang mai hian a eng thluah thluah a. Pawnah chuan thla eng hnuaiah an ran rual chu a phu sup sup bawk a.

Hussain-a chuan kum 2015 a Dooru ngaw hnuaia a nau Muneer-a keite-in a seh hlum chanchin a sawi a. An kalna tur Jabal Nullah khua an panna kawngah hian ngaw chhah tak tak an pal tlang dawn a, Kishtwar district-a Jabal Nullah khua hi tuipui atanga tehin feet 7,000 zeta sang a ni (tehkhin thu an, Aizawl hi tuipui atanga tehin feet 3,700 vela sang awrh chauh a ni).

Darkar hnih a liam meuh chuan he khuaa Bakarwals hnam 50 zinga 20 chu an kal liam tawh a, an rual hian beram leh kel 600 vel kalin an rante hi mahni ta hriat hran theihna’n rawng chi hrang hrang an hnawih a, an rualin sakawr te chi chuan puak an phur bawk.

An zingah hian Hussain, a nu Bibi, a pate-a Nizam Din leh a nupui Razia te chu an tel ve a, an chhungkhat laina hnai an awm nual bawk a. An zinga naupang ber chu Nizam Din-a tunu Ishat-i chu a ni. A hnukhawia awm tura hnut chhiah mi 20 zingah hian Hussain a pu Haji Hussain (90), naupang chumchiap nleh sikul kal lai bakah an nute an tel a. May thla tawp lamah, a kal hmasate tlangrama an inbenbel fel hunah, an zin chhuak ve tan chauhvang. Bakarwal hovin bawng leh lawi an vulhte hi a hnute sawr atana vulh a ni a, bawng leh lawite pawh hi a kal hmasa zingah an tel lova. Chhungkaw tinin bawng emaw lawi emaw pahnih-pathum vel an nei tlang pui a ni.

Hussain-a sawi dan chuan an ran vulh lian leh rit ho an pem pui tlaina chhan hi mihring tam tham pemna a ran tam lutuk hruai a remchang loh leh harsatna an tawh thin vang a ni a. Ran tam lutuk vawi khata zin pui chuan hnim peta an tlatna tur ram an inchan lo chawk bawk thin.

Batti Barigarh an chhuahsan lai hian meichher an chhi thluah thluah a, ramngaw dur khup hnuaiah an kal lai chuan kawng sirah keite, zawng emaw rul emaw a awm lohna’n an tawngtai mawlh mawlh a. Nizam Din chuan helai vela tunhnaia keite an hmuh chanchin chu a sawi chhuak a. Mihring mai tan a hlauhawm lova an ran hruaite tan pawh a hlauhawm thin a. Mahse, a hu hova an kal chuan mihring hi chu keite hian a bei ngam chiahlo niin Nizam Din chuan a sawi. Chuti chung pawh chuan fimkhur tluk a awm chuang lova, an kel han tla hrang deuhte a hmuh chuan Nizam Din chuan faifukin a ko let thin.

He kum 55 mi pa rothap tak hian an rante’n ramhnim chi khat “panchfuli” an ei palh lohna’n ven ngun a ngaih thu a sawi a. Hetiang hnim hi an ei chuan an pum a puar vak thin a, kuminah ngawt pawh kel pali/panga lai chu a hloh phah niin a sawi.

Zing dar 5.15 a lo rik chuan van lam thlirin khaw eng a lo lang tan a, hetih lai hian zinkawng zawh mekte chuan Udhampur-Dhar kawngpui thlengin a hma zan atanga lo awm tawh truck panga chuan a lo nghak a. Naupangho pawh chawl hauh lovin kilometre 5 ke lawngin an kal tawh a. Hussain-a unau la naupang leh chak deuh Nzakat, Waqar Ali, Rashid leh Ishfaq te chu an puakphur sakawr te chi te hruaiin truck khalhtute lo va kai tho turin an kal hmasa a. Truck hnungah hian an inchhung bungrua leh ran rual an dah a, midangte chu Khalid-a leh a unaute leh sakawr te chi te tih loh chu truck chungah an lawn a. Zing dar 6 velah chuan truck te chuan km 100 vela hla Sanasar chu an pan ta a. Tlangval chak pangate leh sakawr te chi puakphurte chu ke-in an kal ve thung a, ni thum chhung chuan chaw an fak zawk chhung leh ran chaw pek chhung tih loh chu chawl hauh lovin an kal ang.

Sakawr te chi te hi ranvulh dang zinga truck hnunga beram leh kel te anga an ekbeng ve mai chuan ran te zawkte’n hliam an tuar thei a. Chutih lai in Bakarwal ho hian truck tam zawk hmang turin sum an nei lo.

Sanasar khua an han thlen chuan a kal hmasa te chuan kal zel dan tur an lo ruahman a. Chumi rualin Sanasar khaw chheh vel tlang phul hmuna an ran tlat tirna tur an lo dap tel bawk a. Chutianga ruahmanna an siam fel hnu chuan an bungrua te dahin naupangte chuan eirawngbawlna tur thing an fawm ta thin a ni.

Ni hnih vel hnu-ah chuan Bakarwal mi tam zawk chuan helai hmun atang hian Jabbal Nullah an pan thin a, mahse Nazakat, Waqar Ali, Rashid leh Ishfaq te chu Batti Barigarh-ah an kir leh thin. Nazakat hi an khua a sorkar sikul-ah zirtirtu a ni a, Waqar hi nikum a a pass zawh tak loh B Sc kum khatna exam paper pakhat a exam leh a ngai a, Rashid leh Ishfaq te chu Udhampur khua-ah pawl 12 zirlai an ni. Anni pali hi chu nipui tak tak hun, May thla tawp lamah Batti Bargarh atanga kal hnuhnung berte rualin an pem ve chauh dawn a ni.

Sanasar khua atang hian Hussain, Nizam Din leh midangte chuan Ramban panin ram ngaw an pal tlang leh dawn a, an ran rual leh bungruate phurin km 60 vel zeta hla Venirag khua an pan ang a. Jawahar lei verh an kal tlanga Verinag an thlen hnu hian Jabbal Nullah panin ke lawng hlirin an kal tawh ang. An thlen meuh chuan Batti Barigarh an chhuahsan atangin kawngah hian ni 40 dawn lai an thang dawn a ni.

Reasi-a bawng humhalhtute beihna tawk Bakarwal ho laka thubuai an siam chhan hi ran phur kual tura District Magistrate phalna an phawrh theih loh vang niin Police chuan an sawi a. Bakarwal ho chuan tunhma kum hnih kum thum kalta atang chauh khan an duhthlan vang ni lovin lirthei an hmang tan niin an sawi a. A bik takin Ramban leh Banihal inkar kawng hi a zim hle a, helai kawnga ran ke-a kaltir hian lirthei kal tan harsatna a siam theih thin avangin truck an hmang niin an sawi a. Kashmir phairuam panna kawng awm chhun a nih avangin kawngpuia ran khalh hi thuneitute’n an remtih an ringlo niin Hussain chuan a sawi.

Hemi bakah hian kawng sira thing dingte kih a nihlohna atan Forest department chuan kawng tawn tawn hi an hung ta a. Tunhma a chawlh paha ran an tlat tirna thinah khan a theih tawh lohva, chuvangin ran riltam lohna atana a chak thei ang bera kal a lo tul ta a ni.

Rajouri Bawrhsap Shahid Iqbal Choudhary chuan Gujjar leh Bakarwal ho tana ran khalh khapna hranpa sorkarin a siamlo niin a sawi a. Mahse, district pakhat atanga district danga phalna nei lova bawng leh lawi kal tlangpui khapna dan hmanga khap sak an nih thu a sawi.

Nizam Din chuan truck hmang tur hian an pachhe hle tih sawiin truck pakhat hman man hi `15,000 atanga `20,000 inkar vel niin a sawi a. “Truck neitu ho hian pawl an din a, kal man an bithliah si loh avangin an duh zat zat, to tak takin min chawitir mai a ni,” a ti.

Bakarwal leh Gujjar ho zin veivahna Jammu kaltlanga tlangsang lam panna hi kawng hman tlanglawn deuh 11 a awm a, chu’ngte chu Forest department hian a chhinchhiah a. Kum zabi tam an lokal tawh thin a. Bawhchhia an awm chuan thisen chhuahna a thleng fo mai a. Mahse, tlangsang lamah chuan ramri kham awm lovin an rante an tlat tir thin niin Bawrhsap chuan a sawi.

Bakarwal ho hian Forest ho check-post ah duty te’n an ranin ramngaw a tihchhiat chhuanlamin pawisa an lo thing thin niin an sawi a, `200 atanga `500 te an chawitir thin niin an sawi. Hetianga Forest checkpost a an lehkhate an entir lai khan a nia bawng humhalhtute’n kut an rawn thlak tak ni.

Thlasik laia Hussain-a leh a chhungte chenna khua Batti Barigarh khua-ah hian chhungkaw 200 vel an khawsa a, a tam zawk chu Hindu sakhaw zuitu an ni. Bakarwal ho hi Muslim an ni a, chuti chung chuan sakhaw hrang zuitu pahnihte inkarah hian harsatna a thleng ngai meuh lo.

He khua ah hian electric eng pawh luh a ni chungin tui herh chhuah tur a awm lova. Kum 6 kal ta a tuilakna tur cheng vaibelchhe 6 vel an seng chungin an tuidawt te hi a la ro vek a. He khua-ah hian Primary leh High School a awm chungin pawl 12 thleng zauh zir Nazakat bak chu zirtirtu an awm lova, zirlai 15 chu amah vekin a zirtir a ni. He sikul hi a tirah chuan sikul veivak anga din a ni a tunah chuan Batti-ah hian dah ngheh a ni ta a. Sikul veivakah chuan zirtirtute hian khaw hrang hrangah an zirtir kual thin a. Hetianga sikul veivak hi Jammu bialah hian 217 awmin zirlai 8,587 an awm niin Jammu Education Director chuan a sawi.

An khaw pa rawn ve pakhat, Vety department hnathawk chawl tawh Rameshwar Nath chuan Bakarwal ho hi kum 1975 atanga Batti Barigarh khua a inkulh tan an nih thu a sawi a. Khatihlaia chief minister Sheikh Abdullah khan awm hmun nghet neilo hnam vakvaite hi ramngaw hnuaia awm a, ramngaw thar chhuah ei a phalsak a. Hemi hnu hian ramngaw bula ram thenkhat chu Bakarwal ho hian an lei tan ta a. An awm nghet titih chho ta a ni.

Hetia ni 90 bawr vel tlangrama khawlum an tlansan hlan hian an thenawm Hindu mite chuan an in leh lo an lo enkawl sak thin a. Nazakat chuan, “Saw’ng Rajput chhungkua te saw en teh. Anni ho sawn kan awmloh hlanin kan in leh lo min lo mitmei sak thin a ni,” a ti.

He khua a in dangte ang bawkin Bakarwal ho chenna in hi a bang leirawhchan leh a chung rangva a ni a, an inchhungah direct-to-home TV an hung a, refrigerator leh inchhung tihvawhna an nei a. An kalbo hlan hian an thil neih hlu deuh zualte chu an thenawmte an kawl tir thin niin Nazakat chuan a sawi.

Tlangsang lama an awm hun chhung hi chuan chutiang nawmsip bawlna lam chu engmah a awmlo thung a, mahse an in lum an ngai lemlo niin Nizam Din chuan a sawi a. “Keini ho leh kan rante kan ni mai a, kan hlim em em tho,” a ti.

Hussain-a chuan thil danglam chu a awm niin an sawi a, “Kan thalaite hian Hindi film leh hla te an phone-ah thunin an phone chu nizung hmangin an charge thin,” a ti. Thil danglam dang pawh a awm.

Gujjar leh Bakarwal te hi mihring nuai 20 vel an ni a, chu chu J&K a tlangmi zinga za zela 80 lai an ni a. Chu’ng zinga nuai 4 (Bakarwal hnam bik nuai 3) chauh chu kum tina pem ching an ni tawh a, a dang zawng chu Jammu lamah an inbengbel tawh.

Sorkarin Jammu lama inbengbel tura a duh avangin sorkar hna hmuhte a awl a, ramngaw-a awm a phalsak avangin inbengbel hi an tam phah a ni.

Kum 1991 khan sorkar laipui chuan Gujjar leh Bakarwal hnamte hi tlangmi (Scheduled Tribe)-ah pawmin hna leh kaisanna kawngah state sorkar hnuaiah za zela 10 hauh sak an ni a, sorkar laipui-ah za zela 7 hauhsak an ni thung. Tun sorkar dinglai (PDP-BJP) ah hian Minister pahnih chu Gujjar hnam an ni a. Gujjar leh Bakarwal hnam zinga 100 vel chu Kahmir Administrative Service ah an awm a, 250 vel chu Kashmir Police Service-ah an awm bawk a, mahse a tam ber chu Gujjar hnam an ni.

Hussain-a unau pa Waqar hian sipai a tan a duh a, Ishfaq chuan High School a zawh veleh college luh a tum thung. Zirna leh sorkar hna lam a awlsam vang bakah kum 1989 vel atanga helna a lo hluar hnu khan Bakarwal tam tak chu Jammu lamah hian an inbengbel ta hrim hrim a. Kum 1947, 1965 leh 1971 chhova Pakistan nena indo laia an chet dan avang khan hel ho chuan India tantu-ah an ngai a. An zinga pakhat Moulvi Ghulam Din chu kum 1965 in do laia Pakistan rawlrala che ho an khawmite’n an lo thlawp lohna atana nasa taka a beih avangin Ashok Chakra chawimawina hlan a ni. Kum 1971 indo lai pawh khan nu pakhat Mali Bi chu Poonch biala Pakistan rawlral ho lo lut sipaite a hrilh avangin chawimawina hlan a ni a. Kum 1989 atang khan helho hian he an thiltih hi an lawm teh chiam lo a ni.

Udhampur a Bakarwal pa rawn Chowdhary Anwar Phambra chuan lehlam pawl pawhin rinhlelh mitin an melh tho niin a sawi a. “Hel hovin Kashmir phairuam an panna kawngah hian Bakarwal ho chenna an paltlang a ngai a. An kal pah hian eitur, in tur leh riahna an phut thin a. Hei hi sipaite’n an hriat chuan Bakarwal ho hi an khawm chiam thin,” a ti.

Beram vulhtu pawl hotupa Chowdhary Iqbal Phambra chuan,”Kum 1993-94 a Union Minister Rajesh Pilot-a hma a Kashmir hel mi 450 dawn an inpek khan a huaihawttu chu Bakarwal hnam a ni,” a ti a. Kum 1999 Kargil indo laia Pakistan mi lo lut rute sipai lo hriattir tu chu Bakarwal ho tho an ni. Reasi khua a kut inthlakna hian an hlauhna a tuai thar leh a. PDP-BJP sorkar intawmin bawng hralh a khap tak avangin harsatna an tawk a ni.

Jammu leh Kashmir inchem harna boruak karah hian Gujjar leh Bakawar hnamte hi an tla zep bawk niin Tribal Research and Cultural Foundation pawl hotupa Javed Rahi chuan a sawi a. “Kashmir lamah chuan India lam tang angin an lo en a, Jammu lamah erawh chuan Muslim sakhua an betu an nih avangin inlakhran duhah an puh thung” tiin a sawi.

Hussain chuan an pem kual chhan hi an ranvulhte vang liau liau a nih tawh thu nui chungin a sawi a. Nipui laiin Jammu-ah hnim peh tur a awm miahlo tluk a ni a, thlasikah lah chuan tlangsangah hnim zawng zawng vurin a khuh bo leh bawk si niin a sawi. Nizam Din pawhin hetiang hian kumtin an pem reng thei angem tih an ngaihtuah fo thin niin a sawi a. “Mahse, enge kan tih chuan ang. Tihdan tur kawng dang kan hre miau lova,” a ti a ni.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s