Sorkarin thu chhuah sual: arva nge vawk dinhmun derthawng ta zawk?

China rama arva-pul-hri (bird flu/avian influenza) a len avanga fimkhur tura sorkar thuchhuah-ah chuan Mizoram hmun hrang hrangah vawk natna hlauhawm ‘Porcine Reproductive and Respiratory Syndrome’ (PRRS) a leng niin an chhuah chiam mai a. Animal Husbandry and Veterinary department mite an inpuhmawh nasa-in Directorate lamin Secretariat tihsualah an puh a, Secretariat lamin Directorate an puh thung nia thudawn a ni.

Directorate of Information and Public Relations chuan Thawhlehni (May ni 16, 2017) khan Press Release chhuahin hetah hian Aizawl Bawrhsap-in Myanmar leh thenawm state dang atanga vawk leh vawkte lakluh a khap thu a tarlang a. Hetianga vawk leh vawkte lakluh khap a nih chhan hi thenawm Myanmar ram leh Mizoram hmun thenkhata PRRS a len vang niin an sawi.

Hemi chungchang hi chanchinbumi thenkhat chuan AH and Vety department hotute be nghalin PRRS len dan leh vawk thi emaw damlo awm zatte an zawt a. Mahse Vety hotute chuan PRRS a len an hriat loh thu leh China rama arva-pul-hri a len avanga sorkar laipui-in fimkhur tura a rawn tihna chu District tin Bawrhsapte’n khapna siam se tiin Secretariat lamah an thawn a. Arva-pul-hri hi vawk hian a pai-in a thehdarh thei niin an sawi bawk a. Chutianga an thu thawn chu Secretariat lam chuan an lo hresual palh emaw DC lamin an hre sual palh emaw nia an ngaih thu an sawi.

Chanchinbumite’n Secretariat a AH & Vety department hotute an zawhfiah erawh chuan Directorate lamin an rawn ziah ang ang DC te hnena an thawn mai thu an sawi thung a. PRRS len emaw len loh thu lam emaw anni chuan an hriat ve loh thu an sawi.

Hetiang a nih teh nuaih hnu hian Nilaini khan DIPR chuan thuchhuah hi siam tha lehin Bird Flu vang zawk a nih thu an rawn tarlang leh ta a ni.

Hetihlai hian April ni 24 khan Lawngtlai Bawrhsap chuan Lawngtlai District chhunga PRRS a len thu leh Myanmar atanga vawk leh vawkte lakluh khapna thupek a chhuah bawk a, mahse, AH & Vety-in PRRS a leng lo an ti bawk si a, thu a saisa ta hle a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s