“NLUP thil tum nia sawi te zingah pakhatmah tihhlawhtlin a la awm lo”: CAG

NLUP Logo

Comptroller and Auditor General of India (CAG) chuan sorkar flagship program New Land Use Policy (NLUP) a zirchianna chu vawiin (May 25) khan State Assembly ah pharh a ni a, he zirchianna report tlangkawmnaah hian CAG chuan “NLUP thil tum nia sawi te zingah hian pakhatmah tihhlawhtlin a la awm lo” tiin a thil hmuhchhuah a tarlang.

He report-a NLUP thil tum tia tarlan te hian tlangram lo neih (jhum cultivation) tihtawp te, kham khawp buh tharchhuah (self-sufficiency in rice) te, Mizoram hmun 80% ram ngawa chan tir (afforestation) te leh Mizorama ram zawng zawng hman dan tur duan fel (Land Use Plan and Land Reforms) te a huam a. Heng thil tum thenkhat tihhlawhtlinna kawngah hian hmasawnna chu awm ve bawk mahsela, CAG chuan heng hmasawnna te hi tih tham a ni lo (marginal) niin a sawi.

Tlangram lo neih tihtawp tumna a hlawhchham dan

NLUP thil tum bulpui ber pakhat nia sawi chu tlangram lo neih tihtawp a ni a. CAG report-a a lan dan chuan NLUP kalpui tan kum 2010-11 khan tlangram lo in hectare 28,562 a bawh a, tlangram lo nei mi chu an vaiin mi 68,433 an ni a. Kum 2014-15 ah chuan hei hi a tlahniam tawh a, tlangram lo in hectare 20,064 bawhin tlangram lo nei mi chu 60,338 an la awm a ni. Tlangram lo in a bawh chin hi hemi kum nga chhung hian 30% tling lo hret in a tlahniam tihna a ni.

Amaherawh chu, CAG-in NLUP hnuaia hmalakna te a zirchian hian NLUP dawngtute zingah tlangram lo nei mi te hi duhsak an ni tih lanna engmah a hmu lo a. Hetiang chhinchhiahna a awm tak si lovah chuan CAG auditor te chuan district hrang hrang palia khawsa NLUP hnuaia tanpuina dawngtu mi 7,954 a kawm a, heng zingah hian mi 3,041 chu NLUP kalpui a nih hmaa tlangram lo nei mi an ni a. Heng tlangram lo neia eizawng thin mi 3,000 chuang hret zingah hian an zavaia hmun thuma thena hmun khat (one-third) chauhin kum 5 chhungin tlang ram lo neih an bansan a ni.

Tin, CAG-in NLUP dawngtu sang riat tling thelh a kawm zingah hian 9% chauhin an tanpuina dawn (trade) chu an dinchhuahpui niin an sawi bawk.

CAG thil hmuhchhuah te a chhanna ah NLUP Implementing Board (NIB) chuan November 2014 khan Radiant Integrity Techno Solutions Pvt Ltd a rawih thu leh he firm tanpuina hian NLUP dawngtute zawng zawng chhinchhiahna bakah NLUP in a nghawng dan chhinchhiah a ni dawn tiin a sawi.

Mizoram kham khawp buh tharchhuah tumna a hlawhchham dan

NLUP thil tum zinga pakhat chu leilet (wet-rice cultivation) hmanga Mizoram khamkhawp buh thar chhuah a ni a. NLUP kalpui tan tirh kum 2010-11 leh 2015-16 inkar khan leileta buh tharchhuah hi 43% in a pung niin CAG chuan a sawi a (2010-11 ah 26,250 MT; 2015-16 ah 37,634 MT). Leilet buh hian kum 2010-11 ah Mizoram buh thar chhuah zawng zawng (WRC leh jhum) 50% a huam laiin kum 5 hnu ah chuan 60% a huam pha tawh bawk a ni.

Amaherawhchu, Mizoram mipui buh ei tur state dang atanga phurh luh zat hi a tlahniam mawh hle a, NLUP kalpui a nih chhung hian Mizoram mipui buh ei zawng zawng 70% emaw vel chu state dang atanga phurh luh a ni reng tho a, tualchhung mipuite mamawh zat hi tualchhunga buh thar chhuah zatin a phak lohna awmze neiin a la danglam miah lo tihna a ni.

Ramngaw zauh tumna a hlawhchham dan

NLUP thiltum zinga pakhat chu Mizoram chhunga ramngaw zauh a ni a. NLUP kalpui tantirh khan ramngaw (forest reserve area) chu rampum huapa 38% a ni a, NLUP hnuaiah hei hi rampum huapa 80% a zauh tum a ni. Tin, Mizorama ngawpui (very dense forest area) chu NLUP kalpui tirh kum khan 133 sq km a zau a ni a, NLUP hnuaiah hei hi 14,761 sq km huam tura zauh tum a ni bawk.

Mahse, ramngaw leh ngawpui zauh tumna ah hian hmalak lawk a ni lova, hemi kawnga hmala tu tur NLUP Committee on Afforestation chu kum 2015 May thla khan din a ni chauh a, ramngaw zauhna tur hian sorkarin sum engmah a la dah hrang lo thung.

NIB hotute’n NLUP Committee on Afforestation chuan kum 2015 August thla khan action plan a thehluh tawh thu CAG a hrilh a, mahse, CAG chuan sum dah hran a nih loh avang leh action plan hi thehluh a nih atanga kum khatah pawh pawm a la nih loh avangin ramngaw zauh tumna hi tihhlawhtlin a la ni lo a ti.

Mizorama ram zawng zawng hman dan tur duan fel tumna a hlawhchham dan

NLUP thiltum pakhat chu Mizoram puma ram awm zawng zawng hman dan tur duan fel a ni a, hemi tihlawhtling tur hian Land Use Plan siam tur niin, khawlai nge ramngaw tih te, khawi lai nge khawtlang ram tih te, NLUP hnuaiah khawi lai ah nge thlai chin a nih tih te, khawi lai nge mihring chenna hmun tih te leh industry dinna lai hmun te chhinchhiah fel thlap tur a ni a. Mahse, khaw tina NLUP kalpui tura ruat Village Level NLUP Committee (VLNC) te chuan an khua theuhah ram hman dan an chhinchhiah miah lova, khaw tinah chhinchhiahna kalpui a nih loh avangin state pum huapa chhinchhiahna chu a awm thei ta lo niin CAG chuan a tarlang a.

Tin, NLUP hnuaiah hian ram neih dan te siamrem tum a ni bawk a. Ram neih dan siamrem a nih theih nan hian state pumpui chu survey-a land record felfai tak siam tur a nih bakah ram hman dan te leh neitu nih dan te thliar fel a ram neitu thliar dan tur dan thar duan tur a ni a.

Mahse CAG-in record a chingleh hnu ah Land Use Plan siam leh ram neih dan siamrem a nih theih nan a hmalakna a hmu lo.

 

*He thuziah hmasa zawkah khan tlangram lo neih tlakhniam dan % tih dikloh a awm avangin tuna i chhiar zawh takah khan siamthat a awm. 11.35% in a tlahniam tih kha kum 2013-14 leh 2014-15 inkara a tlakhniam dan a ni a, kum nga chhung chuan 29.76% a ni zawk. Chhiartute hriatthiamna kan dil e – Ed.


11 thoughts on ““NLUP thil tum nia sawi te zingah pakhatmah tihhlawhtlin a la awm lo”: CAG

  1. Min va ti beng var em, group lamah te post nise, langtlang sorkar nih kha kan duh leh thupui a ni lawm ni kha. Kan nih ang hian lang ngam i la, kan lo tifuh lo a nih pawhin insiam that nan hmang ila, ram leh mipuiin hma kan sawnngei ang

    Like

  2. Bengvarthlak hle mai. Mipui mimir te hi politik in kan nun engemaw kawng zawng taka a nghawng avangin, inthlan lo awm tura chuh tum mimal leh party ten policy an rawn zawrh atangin mipui hawi zawng (public interest) leh kan ramin a mamawh hmasa ber (priority) an siam dan te thlirin, lo chhawn thiam kan mamawh ta hle mai.

    Media kan pawimawh lehzualin ka hria. Media mite hi politician ang tho annih dan a awm. Mipui zinga chanchin sem darhtu an nih avangin, rinawm tak leh dik tak, thudik zawng chhuaka mipui min hrilhhriattu an nih fo loh chuan, morality lam en chuan mipui kaihruai sual theitu an nih dan a awm ve tho avangin, ram hmasawnna atana mipuite hmakhua ngaihtuahna kawngah politiciante te aia an danglamna em em a awm lo thei.

    Kan tan tlan a ngai a ni.

    Like

  3. A bengvar thlak hle mai…congress party sawi dan nen chuan a va in mil love…Kan sorkar hian Ram tana thatna tur leh an flagship progr. ngei pawh an lo ti tak tak lo tihna a ni ang maw…mipuite a phaw vuakah min lo bum leh ta chu a ni phawt mai…tuinnge thil tak tak hi thawk ang le….

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s