Lawrkhawm/ May 18-24, 2017

Kuhva kau in disposable plate, cup leh bowl

IMG-20170518-WA0003

Bilkhawthlira nu ho awmna Self Help Group intelkhawm Village Organisation chuan Indian Council of Agricultural Research (ICAR) khawl pek hmangin kuhva kau in disposable plate, cup leh bowl te an siam chhuak a, lei duh an tam ang hu aiin heng thil siamna tur kuhva kau tha an duh khawp an hmu lo nghe nghe niin The Zozam Times chanchinbu chuan a ziak. He nitin chhuak chanchinbu ziah dan chuan Bilkhawthlir nu ho hian thla khat emaw heng thil siam chhuah hi an kalpui tawh a, dawr tu an hmu nual tawh na in hlawkna an la hmu lem lo. VO hian an plate siam te hi pakhat cheng nga in an hralh a, bowl leh cup te hi cheng hnih leh duli in an hralh bawk a, helai hmuna Mizoram State Rural Livelihoods Mission bialtu chuan an thilsiam te hi phai a thawn chhuah tham khawp a tling dawn hnai niin a sawi.

‘Sorkarin NECS vbc chuang chhiah awl’

Mizoram sorkar chuan Aizawl Football Club neitu North East Consultancy Services (NECS) cheng vaibelchhe chuang Value Added Tax (VAT) a awl niin The Aizawl Post-in May 22 khan a ziak a, hetianga chhiah awl tur hian NECS chairman, Aizawl FC President ni bawk Robert Romawia Royte bakah Central Young Mizo Association (CYMA) leh Mizoram Football Association (MFA) te’n an dil pui niin a ziak bawk.

The Aizawl Post ziah dan chuan NECS VAT vawikhat ngaihhnathiam a nih dan hi RTI chhanna-ah a inziak a, he company enkawl Aizawl FC hi “Mizoram leh Mizote khawvel hriata pholangtu” anih vangin kum 2016-17 chhung khan VAT awl anih thu a ziak bawk a, hemi kum hian a vaiin cheng vbc 1.26 awl a ni.

He nitin chhuak chanchinbu tarlan dan chuan hian NECS chairman hian December 28, 2016 khan VAT awl a dil a, dil tha leh tura tih a hnu in March 8, 2017 khan a dil nawn leh a, a dilna ah chuan NECS hi Aizawl FC enkawltu anih thu leh “hlawkna awm miahlovin” I-League club pali leh football academy paruk a enkawl thu te, I-League a khelh chinah 2016-17 season bikah cheng nuai 300 a sen thu te a tarlang a, he dilna ah hian MFA leh CYMA-in chhiah awl a dilna a thil tel bawk niin chanchinbu hian a tarlang bawk.

MFA leh CYMA dilpuina lehkha ah te hian “an thu a inang deuh diak diak” niin The Aizawl Post chuan a ziak a, paragraph thumna ah chuan an thu hi a inang chiah chiah niin a tarlang bawk a ni.

Siaha district ah Myanmar raltlan

IMG-20170523-WA0001

Tualchhung leh ramchhung chanchinbu hrang hrang te chuan Myanmar khua leh tui raltlan 300 dawn chu Siaha district chhimtawpah tunhnai khan an lut tih Thawhtanni (May 22) khan an ziak a, Hindustan Times ziah dan chuan heng raltlan te hi Mara hnam nena hnam peng thuhmun an ni a, Myanmar Chin State-a Ralie khua mi niin Arakan Army hel pawl te hlauvin an tlanchhia niin a tarlang a, a tam zawk chu nunau niin an khaw mipa te chu hel pawl hian an hreng niin a tarlang bawk. The New Indian Express pawhin hemi chungchang hi a ziak a, heng raltlan te hian Siaha district-a Lungpuk leh Khaikhy khua te chu Zirtawpni (May 19) khan an lut niin a tarlang. The Zozam Times leh Vanglaini pawhin hemi chungchang hi ziakin, The Zozam Times chuan heng raltlan te hian hel kut an tuar lem lova, mahse, hel pawl leh Burma sipai an inkah mai an hlauh vangin Mizoram an pan ta niin a ziak a, an zingah hian malaria vei leh naupai te an awm niin a tarlang bawk. Heng tualchhung chanchinbu pahnih te hian raltlan te hi VC bakah ramri venhimna hna thawk Assam Rifles te’n an buaipui hmasa ber a, District thuneitute pawhin an chungchang hi hria in Dy SP, Siaha pawh a hmunah a kal niin an ziak. AR lam hian Burma sipai te pawh raltlan te chngchang hi an hrilhhre tawh bawk. The Aizawl Post chuan Thawhlehni khan hemi chungchang hi ziakin raltlan te chu an pun belh thu leh 300 an chuan tawh thu a ziak a, Mizoram sorkarin an tanpui na in Home Minister R Lalzirliana’n Myanmar khua leh tui te chu India ramah km 15 an luh theih avangin raltlan lo lute chungchang hi sorkar laipui hriattir a nih lem loh thu a tarlang a. Nilaini (May 24) khan state sorkar chuan thuchhuah siamin, “May ni 19, 2017 a Myanmar atanga mi 300 chuang (a tam zawk hmeichhia leh naupang)-te Mizorama rawn raltlan te chu Assam Rifles, Siaha District Administration, Mizoram Police leh Mara Autonomous District Council thawhhona zarah vawiin May ni 24, 2017 khan boruak ralmuang tak karah International Boundary Pillar No. 15, Indo-Myanmar Border atangin an ramah an kir leh a, Myanmar atangin Ralie khawtlang hruaituten an lo hmuak a ni,” a ti.

Bairabi lei: 2010 a dawh zawh tur, 2017 March thla a zawh tiam leh si May thla ah la zo chuang lo

bairabi-road-11

MLA rual awmna Committee on Government Assurances hnenah kumin March thla chhung khan dawh zawh in tiam mahsela, Mizoram PWD chuan tunkar Thawhlehni (May 23) khan thuchhuah siamin Bairabi bula Tlawng chunga lei dawh chu zawhfel a la nih loh thu a sawi a. TFD-in a lo tarlan tawh angin, he lei hi kum 2007 khan dawh tan niin kum thum chhunga dawh zawh tura ruahman ni mahsela, tun thleng hian lirthei chi kim zawh theiha peih fel a la ni lo a ni. Executive Engineer, PWD, Kawrthah Division chuan tunkar khan thuchhuah siamin lei hi “a pumpuia zawhfel chiah la ni lo mahse mipuite mamawhna avangin Motor-te (LMV) chin hnuailam tan an kaltlang theihna tur hun bi … ruahman a ni,” a la ti chauh a, “hemi hun chhung nilo ah hi chuan eng motor mah kaltlang theih a ni loving,” a ti bawk.

CM-in engineer khawmpui hmanpui: “Thangthar ten … tha thei ang ber atan hmalakna chang an hria”

Mizoram Engineering Service Association inkhawmpui 37-  na kar hmasa Nilaithawhtan (May 18) a a hmanpui naah Chief Minister Lal Thanhawla chuan thu sawiin, “Tunlai Sawkar hnathawk zingah tih tak zeta ram leh hmasawnna atana thawh tum leh an hlawh phu bak a thawh tumna nei an awm” a ti a, “Heng mite hi an pu te leh senior ten an phurpui a pawimawh a, an thiamna te hi anih dan tur ang taka chhawr anih theih nan an innovative idea  leh an tumna te” tihlawhtlin sak an ngai niin a sawi a. Sorkar thuchhuak chuan CM hian “Thangthar ten an hna ah quality tha leh a tha thei ang ber atan hmalakna chang an hria chu lawmawm a tih thu a sawi bawk,” a ti niin a sawi. MESA ah hian Member 377 an awm a, PWD, PHED, P&E, Minor Irrigation leh department danga thawk Graduate Engineer te an ni.

Kolasib-ah cheng nuai 17 chuang man ruihhlo halral

Home Minister R Lalzirliana’n Nilaini (May 24) khan YMA Kolasib sub-headquarters kumpuan bawhzuia Police, Excise & Narcotics leh YMA te tangkawpin ruihhlo an man khawm cheng nuai 17.14 man hu chu Khuangpuilam, Kolasib-ah a halral. HM chuan ruihhlo tihrem kawngah Police leh Excise & Narcotics te hnathawh lo thlir liam mailova YMA ten thahnemngai taka hnathawktute an pui thin chu chhuanawm a tih thu a sawiin danlova ruihhlo zawrh man tur tam tak a awm chu pawi a tih thu leh Mizo thalai te leh nu leh pate kan tan a ngai a ni a ti a. Ruihhlo laka fihlim turin theihtawpa inzirtira hma kan lak zel a tul a ni tiin, insumthei mi ni turin tan lak a ngai a ni a ti .

HSS tan IES tlangzarh

Academic session liam ta a Mizoram High School te a hman tan Integrated Evaluation Scheme chu Higher Secondary chin a hman turin Thawhlehni (May 23) khan tlangzarh a ni a. Sorkar thuchhuah tarlan dan chuan IES hnuaiah hian exam, assignment leh test bakah attendance, General Studies, Work Experience leh Physical and Health Education ten mark an pu anga, theory section in mark 80 a pu anga, Internal Assessment in mark 20 a pu thung dawn a ni. Practical nei subject ah chuan Theory in mark 70 a pu anga, Practical in mark 10 leh Internal Assessment in mark 20 a pu thung ang.

HSS tana IES tlangzarhtu School Education Minister H Rohluna chuan High School level-a hman anih hnu in zirlaiten lehkha an zir tam phahin school attendance pawh a that phah hle niin a sawi a, kum tawpa vawi khat exam hmang chauha teh nilova tehfung hrang hrang hmanga kum tluana teh an nih dawn tak avangin zirlaite leh zirtirtute chu kumtluana inthlahdah lova an tan mar a ngai dawn a ni a ti bawk.

Internet hmangin tui bill a pek theih tawh dawn

Internet hmanga tui bill pek theihna chu PHE Minister Zodintluanga’n Thawhlehni (May 23) khan a tlangzarh a, “Tun atang chuan a duh tan tui bill counter-a kal ngai tawh lovin internet hmangin online bill payment a tih theih ta a, hei hian nasa takin mipui tan awlsamna a thlen ngei ka beisei”, a ti.

Online-a tui bill pe duhte chuan https://phebilling.mizoram.gov.in –ah lutin an consumer number ziak lutin an tui bill hi an pe thei tawh ang a. An tui bill pekna chhinchhiahna detail chu an email chhut luhah a lo thawn nghal tawh dawn a ni.

Hemi chungchanga sorkar thuchhuah chuan, “Tui bill pek a nih hian net banking hmangtute chuan tui bill `500 chin hnuailamah chuan transaction tinah ` 5/- service tax an chawi ang a, `500/- aia tamah erawh chuan `7/- service tax an chawi thung ang.

Credit card hmangtute chuan transaction khatah an bill pek zat 1% service tax an chawi ang. Debit Card hmangtute chuan tui bill `2000/- chin hnuailamah transaction tinah 0.75% service tax an chawi ang a, `2000/- aia sangah 1% service tax an chawi ang. Mobile wallet hmangtute chuan transaction tinah `5/- service tax an chawi bawk ang,” a ti.

Kum 2007 khan Mizoram P&E Dept chuan internet hmangin kawlphetha bill pek theih dan an lo hawng tawh bawk a ni.

BJP-in Chakma ADC-a Congress sorkar thiah phut

Chakma Autonomous District-a BJP hruaitute chuan Thawhlehni (May 23) khan Chawngte SDo(C) kaltlangin CADC sorkar thiat turin leh inthlan buatsaih turin Mizoram Governor an ngen a, BJP chuan kum li kal ta chhung khan CADC sorkar-a Executive Committee chu tum thum sîksawi a ni tawh , rorelna tha a awm thei lo nia sawiin, “Hetiang anga derthâwng CADC sorkar hi tun hmain a la piang ngai lo a ni,” an ti. CADC-a rorel lai Congress hian Council-a seat 20 awmah 17 an chelh.

Chite Lui zirchianna thawk tan

Save Chite Lui Movement kal zelah Chite Lui baseline survey chu kar hmasa Zirtawpni (May 19) khan tan a ni a, he survey hian Chite Lui hnar atanga Tuirial a finna thleng chipchiar taka zirchiang in Chite Lui chawmtu lui hrang hrang te leh luikam tawn tawna thil awmte chipchiar takin a chhinchhiah ang.

Survey tanna hi Chite Veng Mini-Sports Complex bula Chite Lui kamah Aizawl Bawrhsap Kannan Gopinathan-a hovin bul tan a ni a, he movement hi Zoram Research Foundation bultuma kalpui a, a huam zau zawk nan Save Chite Lui Coordination Committee pawh din a ni tawh a, committee-ah hian Larsap chu Patron a ni a, Chief Secretary Lalmalsawma chu Chairman a ni.

“Adopt a Home” kalpui dan tur rel

Tunkar Thawhtanni (May 22) khan Aizawl Bawrhsap Kannan Gopinathan-a hovin naupang chanhaite chenna in Childrens’ Home–te tanpuina tur scheme “Adopt a Home” program hnuaia hmalak dan tur rel a ni a. “Adopt a Home” hi Ministry of Women and Child Development hnuaiah kum 2016 atang khan kalpui tan a ni a, hmei hnuaiah hian Childrens’ Home-a naupang cheng te mimal, pawl leh company ten kawng hrang hrang a an tanpui theih dan tur duan a ni.

Savawm in seh hlum

Kawnpui khaw pa Hrangchhuana, kum 73 mi chu Inrinni (May 22) khan a feh laiin savawmin a seh a, a hliam tuar lovin a hmunah a thi. Hrangchhuana hi Kawnpui atanga km hnih vela hla a an lo ah chawhmeh la turin a kal a, hetih lai hian savawm hian a bei a, a hmai, a lu leh a taksa hmun dangah hliam a tuar ni a thudawn a ni.

Mizorama car parking lian ber

Lirthei 545 lenna tura ruahman New Secretariat Complex chhunga Multi-Level Car Parking sak tum chu UD&PA Minister Zodintluanga hovin Nilai Thawhtan (May 18) khan sawiho a ni a, sorkar thuchhuah tarlan danin cheng vbc 36 man, km 8 bial awh tur hi DoNER sum hmanga sak tur a ni a, Mizorama car parking lian ber tura ngaih a ni.

Intl Biological Diversity Day hmang

Tunkar Thawhtanni khan Aizawlah “International Biological Diversity Day” chu hman a ni a, he huna khuallian tura beisei, a dam sam loh vanga tel thei lo CM thuchah chu chhiar chhuah a ni a, CM thuchah ah hian “Mizoram chu zirmiten nungcha hausakna neihna hmun ‘biodiversity hotspots’ ah an ngaih thu te, heng rohlu, ramngaw mawi tak te, lui dung leh nungchate leh nunna nei dang chitin reng te duatin humhalh chuan ram thil neih (asset) hlu leh tlo berah a chhuah theih thu te leh ramngaw leh a chhunga cheng nungcha te hi khualzin hip theihna hmanraw tha tak a nih theih thu te” tarlan a ni a. Dy Speaker R Lalrinawma’n Mizoram University in nungcha hrang hrang chhinchhiahna bu an siam People’s Biodiversity Register a tlangzarh bawk a, Principal Secretary, Forests, Environment & Climate Change Lalram Thanga’n adventure tourism ah Mizoramin potential a neih that thu leh tuhnaia thalaiten hemi kawnga hma lakna an nei chu lawmawm a tih thu a sawi. Kumin hian he Ni thupui chu ‘Biodiversity and Sustainable Tourism’ tih a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s