AYUSH kalpuina ah dan dinglai zawmlohna a nasa

Damdawi supply theilo damdawi supply tir te, tender lova thil man tam lei te, pawisa dinhmun ziah dikloh te, OPD sak danah thil felhlel te vangin MLA rual an lungawi lo

Kum 2013 April thla khan Mizoram Health and Family Welfare Department (H&FW) hnuaia AYUSH society chuan Rebecca Drug Centre, Zarkawt hnênah homoeopathic damdawi chi hrang hrang supply na order a pe a, damdawi te hi supply an nih hnu ah AYUSH hotute chuan khami kum vek September thla khan cheng nuai 31.78 tling thelh chu an sanction ta a.

Mahse, Rebecca Drug Centre-in damdawi an supply dan ah hian thil felhlel tak tak chi hnih lai a lo awm reng mai.

Pakhatna ah chuan, Rebecca Drug Centre-in a damdawi supply chi hrang hrang zinga chi ruk te chu AYUSH lam hian Rs. 320 theuha chah chhuak turin supply order a tihchhuah laiin, a tawpah erawh chuan damdawi chi khatah Rs. 560 theuh a pe ta zawk a.

Hetianga damdawi man a in thlauh tak em em nachhan nia H&FW hotute’n an sawifiah dan chuan AYUSH lam hian thil chhut sual an neih vang a lo ni: Rebecca Drug Centre hian heng damdawi chi ruk te supply tur hian Rs. 560 theuhin a chhang na in, dept lamin an lo chhut sual a, Rs. 320 theuhin supply order a chhuah ta a. Mahse, Rebecca Drug Centre chuan a chhan dan ang, Rs. 560 theuh chuan a supply ta tho a, a tawpah chuan AYUSH lam pawhin anmahni tihsual a ni tih pawmin supply order-a a in ziah dan aia to in sanction order an pe chhuak ta nge nge a ni.

Thil felhlel pahnihna chu hei hi a ni: Rebecca Drug Centre, Zarkawt hian homeopathic damdawi supply turin homeopathic damdawi hralh theihna license a lo nei reng reng lo. He damdawi dawr hian tarlan tak, cheng nuai 31.78 tling thleh bakah hian a hranpa in cheng nuai 6.49 chuang hret man damdawi a supply bawk a. He thil diklo haichhuaktu, Congress MLA R Vanlalvena chairman na hnuaia hnathawk Subject Committee – III in Mizoram Assembly hma a session liam ta a (March thla ami) report a pharha a inziah dan tak phei chuan Rebecca Drug Centre hian Central Sales Tax dan hnuaia registration chauh a nei niin a lang a. Hetiang anih vang hian committee chu a lungawi lo hle a, cheng nuai 31.78 tling thelh supply order chhuah tu official chu zawng chhuak a, a tul anga hrem turin dept thurawn a pe hial.

Engemaw zawng tak chuan he damdawi dawr in felhlel taka damdawi a supply dan leh AYUSH hnuaia thil felhlel tamtak Subject Committee – III in a hmuhchhuah te hi a in ang tlang hle a. Dept hnathawh dan chi hrang hrang ah chhut sual leh dan dinglai phal piah lama hmalakna hrang hrang a tam hle.

Tender tel lovin damdawi tam tham tak chah

Rebecca Drug Centre hnena supply order pek anih chungchangah hian AYUSH hotute chuan quotation an ko ngei a, mahse, hmun dang atanga damdawi lei anih erawh chuan tender chhuah a awm lo thung.  AYUSH hian Kolkata company Shrivin Pharma Pvt Ltd leh Oushadi, Kerala ami te hnen atangin cheng nuai 9.42 chuang hret man homoeopathic damdawi a lei bawk a, mahse heng damdawi lei nan hian tender chhuah hmasak engmah a awm lo.

Committee-in heng damdawi lei dan te hi a zawh chian chuan AYUSH hotute’n National AYUSH Mission (NAM) guidelines ang thlapin an lei a ni ti mahsela, committee chuan guidelines ah hian chutiang thil reng reng chu an hmuzo lova. Tin, committee-in engvangin nge sorkar dan dinglai-ah Rs. 15,000 aia tam thil lei dawn reng reng chuan tender chhuah zel tur a ni a tih laia heng damdawi lei naah hian tender chhuah a nih loh an tihin AYUSH hotute chuan an chhang mumal thei lo.

Stationery lei dan ah thil felhlel awm

Rs.15,000 aia man tam lei dawn apianga tender chhuah tur ani tih dan dinglai hi damdawi lei ah chauh hian bawhchhiat a ni lova. Kum 2013 khan Director (AYUSH) thuneihna in RT Enterprises, Treasury Square atangin Rs.33,310 man leh Chhunbura, Bara Bazar, Aizawl atangin Rs.65,950 man stationery lei a ni a.

Hetianga damdawi leh stationery te tender chhuah lova cheng nuai 9.5 man dawn lai lei anih danah hian committee chu a lungawi lova, NAM guidleines ah te hetiang lei theih dan a hmuh chuan si loh avangin H&FW chu eng dan hnuaiah nge hetianga thil a lei tak mai tih hrilhhre turin thu a pe a ni.

Damdawi leh stationery atana sen let li thelh senna AYUSH OPD pali sakna tender chhuah lo bawkin

Damdawi leh stationery lei na’n hian AYUSH hian dan in a phut anga tender chhuah lovin cheng nuai 9.5 dawn seng mahsela, heng a sum senna let li dawn lai ah hian tender chhuah lovin sum senna a nei bawk a: chu chu hmun li a AYUSH OPD sakna’n a ni.

AYUSH hian Tlabung leh Hnahthial Community Health Centre (CHC) leh Thingsulthliah leh Haulawng Primary Health Centre (PHC) ah te AYUSH OPD a sa a, heng in sak hna te hi contractor hnenah hlan lovin departmental in a thawk nghal a, mahse, tender chhuah hauh lovin Director (AYUSH) chuan supervisor te chu heng OPD te sak nan a bungraw mamawh te supply order a pe nghal bawk a. A vai hian hemi kawngah hian cheng nuai 36.14 sen a ni.

Chu mai bakah chuan H&FW hian heng OPD te sak nan hian Mizoram PWD hnuaia Schedule of Rates 2013 a behchhan a, mahse he SOR hnuaia contractor te hlep tur za-a 10 chu a dahhrang lo lawi a, H&FW chuan hetianga za-a sawm dah hran anih loh nachhan chu sum tlem vangin dept hlep tur chu awm lo mai se a tih vang niin hotute’n an sawi a, mahse, hei hi a tirah an sawifiah thei mai lova, committee-in vawi hnih insawifiah tura a tih hnu a an sawi chauh a ni.

Subject Committee – III chuan hetianga SOR a then lai hmanga a then lai hman ani leh si lo hi a ngaithiam lo hle a, contractor hlep tur dah hran anih loh vang hian sorkar sum chu a hek nasat bakah supervisor te hnenah OPD sakna tura bungraw mamawh tender chhuah hauh lova supply order pek te hi ngai thutakin engtin nge hei hian sorkar dan dinglai General Financial Rules a bawhchhiat loh dan sawifiah turin H&FW chu a hriattir a ni.

Sum dinhmun ah ziah sual neuh neuh tam

Heng bakah hian AYUISH hnathawhna hrang hrang leh a sum kawl ziah leh chhinchhiah danah tihsual neuh neuh a tam hle a. Entirnan, kum 2012-a sanction order pakhatah chuan a sign tu official chuan sorkar chawlh, Chawlhni-ah a sign hnan mauh a mai a. Tin, sanction order dang hrang hranga AYUSH Director-in a signature bula ni leh thla a ziahlan leh sanction order tihchhuaha ni leh thla te inmil lo a tam hle bawk a, free clinic huaihawt nan a damdawi lei te pawh hmanhmawh thilthu ah Rs.81,095 lai sanction thut a nih bakah Tlabung, Sangau, South Lungpher, Bualpui leh Lawngtlaia free clinic huaihawt man te leh Cherhlun, Thingsai leh Tuipuibaria PHC building endikna (inspection) a sum sen te chu sanction order-a a inziah aiin Rs.54,722 laiin a tam ta zawk bawk a, sum awm zat chhinchhiahna te pawh Rs. 9,000-in ziah sual a ni.

Tin, dept hian AYUSH kaihhnawih thil chi hrang hrang ah sorkar laipui leh state sorkarin an sum pek tur an pe kim lo nasa hle tih Subject Committee – III hian a hmuchhuak bawk a. Entirnan, kum 2011-12 khan CSS hnuaia AYUSH hospital leh dispensary sakna tur te, hemi kum vek a Program Management Unit din na tur sum te chu a kim in sorkar laipuiin sum a pe chhuak lova, heng atan a state sorkar in a tum ve tur pawh a pe chhuak chuang lova, kum 2014-15-a AYUSH Services atana a pek ve tur pawh a pechhuak chuang lo a ni.

Hetianga sum hmuh tur tlem azawng chauh hmuh a nih a a bang zawk hmuh a ni lo fo mai hi Subject Committee – III chuan pawi tiin, dept hian installment khat a dawn apiangin a lungawi a, second installment hmu turin hma a la lo zel a, hei vang hian ram in a neih tur tam tak a neih theih loh phah nia a ngaih thu a sawi hial.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s