Furpui a lo thleng dawn e!

Karleh mai hian furpui chuan India ram a lo chenchilh tan tura ngaih a ni a, kumin fur awmdan hi mithiamte chuan nikum atangin an lo zir tan tawh a, ruahtui a tlem lo turah ngaiin, India chhimtawp aiin Mizoram a lut hmasa ang

Khawvel chanchinbu hriat hlawh tak pakhat LA Times chuan kum 1987 daih tawh khan ziaktu lar Khushwant Singh-a’n furpui (monsoon) lo thleng tur a hriat lawk theih dan ni a a sawi a ziak a. Delhi Gymkhana-a a thiante nen khawlum tak hnuaia Tennis an khelh laiin Singh-a hian a beng a hup a, sava hram ri pakhat a hriat thu puangin, “Fur a lo kal mek e!” tiin a au e a ti.

He thuziak tu, LA Times palai Rone Tempest chuan heti hian a sawi chhunzawm, “India a cheng mi tupawh mai hian fur lo thleng tur hriat theih dan hi hria angin an in ngai: Lucknow-a theihai tui em em mai an nem tan thin ti te, fanghmir dum lian tak te hian hmanhmawh lehzualin chaw an zawng thin ti te, khau chi khat kawlphetha hmanga eng chhit apiang ah an fu thup thin ti te leh chawhnu ni hi balh hmel takin a eng thin ti te an kat nuk a. India khawmualpui a mihring tluklehdingawn sangkhat cheng te tan chuan fur aia hun pawimawh a awm lo. ‘Kan hla leh thuziak zawng zawng ah mai hian fur lo thleng tur chanchin hi a hmuh theih’, tiin Singh-a hian a sawi.”

Indian Meteorological Department (IMD) chuan kumin hian furpui hi a lo thlen hun tur diktak, June ni 1 aia hma hret ah India khawmualpui a lo thleng dawn niin a chhut a, fur lo thlen hi Kerala chhim tawpa ruah a sur tan hun ni nen an sawi kawp tlangpui. Keini ram Mizoram leh a chhehvel ah erawh chuan hemi hma hret ni engemaw zat ah furpui a lo thleng dawn niin an ngai.

Thla hmasa laihawl khan IMD hian kumin fur awmdan tur hrilhlawkna chu a tichhuak daih tawh a, April 18 khan IMD Director General K J Ramesh chuan chanchinbumite ko khawmin fur lo thlen hun tur leh fur in ruahtui a lo ken zat tur ni a an beisei chu a hrilh.  IMD hian nikum December leh kumin chhung zawng khan Atlantic leh Pacific tuifinriat hmar lama tui lum leh daih dan (Sea Surface Temperature, SST) te leh Europe khawmualpui chunga boruak lum leh vawh dan (temperature) endikin kumin fur lo thlen dan tur hi an zir lawk tawh a. Kumin February thla khan Indian Ocean chhim lam SST an endik leh a, hemi rual hian February leh March thla chhung khan Asia chhak lama tuipui chunga boruak rih dan leh Equator zawn Pacific Ocean-a tui lum awm dan an endik bawk a.

India ram leh a chhehvela fur lo thleng tur hi khawvel hmun hrang hranga boruak leh tuipui awmdan hmangin an lo chhut lawk tihna a ni a, thla li ngawt ram hla lam an thlir hnu hian April thla laihawl vel khan June thla a fur lo thlen dan tur leh September thla thlenga India ram a chenchilh dan tur ni a an rin chu an puangzar chauh a ni. IMD hmuhlawk dan chuan kumin fur hian dan pangaia ruahsur dan (Long Period Average) za-a 96 emaw chu pha tur a ni a, hetih rual hian za-a panga emaw velin a tlem in a tam maithei thung.

Hetiang anih vang hian ramchhung sumdawnna te pawh an phur phah hle niin chanchinbu hrang hrang te’n an ziak a, Livemint chuan May ni 10 khan India-a nepnawi ti a Mizote’n an koh mai – Fast Moving Consumer Goods (FMCG), eichawp dawr te’n an zawrh ang chi te phei chu fur pangai taka a lo thleng tur hian a ti lawm nasa hle: India anga loneitu za-a 54 zetin ruahtui chauh ringa lo an neihna ah chuan ruahsur tha hian mi tamtak sum neihdan a khawih a, mipuiin sum an mamawh ang an neih chuan FMCG te hi hralh a kal viau tura ngaih a nih vang a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s