Khawvel/ Muslim firfiak aia thihna thlen tam tu, US khua leh tui ni si, US sorkar do si te an pung zel

May ni 20, 2010 khan police officer Bill Evans chuan lirthei pakhat, West Memphis a kawngpui, Arkansas bul lawkah ding turin thu a pe a. Evans-a hriat lohvin he lirthei a chuang mi pahnih, Jerry Kane Jr. leh a fapa rawlthar Joseph Kane te chu ‘sovereign citizens’ an tih, eng sorkarna mah pawmlo a do tlat mi an lo ni a. Kane-a hi chhiah pelo tura mipui fuih a zin kual reng, a remchan changa pastor anga insawi thin, miin an lo bih hlauh takin ti a a lirthei khalh chhunga Pathian Thu lam hawi tarmawi chi hrang hrang tar mi a ni a. Officer Evans-a’n Kane te pafa lirthei chuanna number plate a chhui chian chuan Ohio kohhran pakhat lirthei angin a lo in chhinchhiah ngei bawk a, an lirthei chhungah hian hmuh phak siloh in ralthuam chi hrang hrang an pafa hian an lo thukru bawk.

Kan hi police te nen vawi tamtak an lo in hau tawh thin a, Officer Evans-a’n a tihdin hma lawk, thla pawh a la liam lo tih ah khan a rilru siam felin police in an tihbuai leh vaih chuan an tihbuai tawpna a ni taw hang a lo ti tawh a ni.

A bul hnai a patrolling officer awm ve tho, Sgt Brandon Paudert chuan Evans an traffic thil a lirthei a tiding chu a rei ta lua e tiin a en thlithlai a. A hmun a han thlen ve chuan Evans leh Kane-a chu kawngpui sirah an inbia a va hmu a. A va thlen hnaih chuan Evans hian lehkha chi hrang hrang Kane-a hnen atanga a lak chu Paudert-a hnenah hian a hlan chhawng a, Evans chuan ralthuam a ken leh ken loh hrechiang tura Kane-a a dap dawn lai mekin Kane-a chuan a buan thlu ta thut mai a. A fapa Joseph-a chu passenger thutna lam atanga lo chhukin AK-47-in police officer te chu a rawn kahchilh ta mai a. Evans-a, police chetdana tawnhriat ngah tawh tak leh SWAT team ah te pawh hun rei lo awm tawh thian chu a silai phawrh hma in hliam na tak nen a tlu ta der mai a ni. Paudert pawh chuan a silai pai phawrh mahsela, Joseph-a chuan a kap ve nghal a, hliamin a tlu ve leh nghal a. Police officer te pahnih te thisen kawngpui sira a luan zawih zawih lai chuan Kane-a te pafa chu an lirtheiiin an tlanchhia a, mahse, a piah deuh a bungraw sem truck khalhtu, engkim lo hmu chuan police dang a phone nghal vat a, pawikhawihtute chu police in an veh ta nghal a ni.

Kane-a te pafa ngaihdan hi Anti-Defamation League (ADL) chuan American khua leh tui sing chuang zetin an tawnpui niin an ngai a, hetianga ngaihdan nei te hi Patriot Movement an tih mai, pawl chi hrang hrang, US sorkar chu hrawn tlak loh khawpa sorkar thunei ni ta a ngai in telkhawmna a a zar pakhat ah chhiar tel an ni.

US President Donald Trump-a hnuaiah hian America ram venghimtu Department of Homeland Security chu Muslim firfiakte lakah inralring reng turin hriattir an ni na in, Muslim firfiak ai chuan heng “sovereign citizens” in ti te hian ramchhung ah thisen chhuahna leh thihna an thlen tam tawh zawk daih a, anni zingah hian silai lek pawl te, mingo nilo tawh phawt haw em em tu “skinheads” leh Nazi zirtirna chawi nung tumtu te an tel a ni.

Arkansas bul kawngpuia Kane-a te pafa in police pahnih an thah chungchang pawh hi “sovereign citizens” te’n thisen an chhuah zingah chhiar tel a ni a. Hemi tum hian Sergeant Paudert-a chu a hmun ah a boral nghal a. Vawi 14 lai kah ni in, Evans erawh chu hospital ah a boral a, a taksa ah hian silaimu 11 lai a lut.

Inkahna thlen hnu minute 90 velah Kane-a te pafa lirthei chuanna chu hmuh a ni a, police pung khawmin an din hual nghal a, an in kap ta chiam mai a, Kane-a te pafa kahhlum an nih hma hian officer dang pahnihin hliam na tak an tuar hman nghe nghe.

Kum 2009 khan Daryl Johnson, US sorkar laipui hnuaia intelligence analyst chuan Kane-a te anga ngaihdan nei te chungchang report a ziak a, Johnson hian hetiang thil hi US-ah a hluar tulh tulh dawn nia a ngaih thu a thai lang a. Mahse, US-a political party lian pahnih zingah pakhat zawk, Republicans te chuan Johnson-a report ziah hi pawm lovin, tul lova mi tih phawklekna mai mai ah an puh a. Johnson-a hi chhungkaw kulmuk em em a seilian anih vangin ani chuan hetianga puhna a tawng hi awm ang lo a ti a, mahse, Republican te’n thawm an neih len em vangin khatih laia Secretary of Homeland Security, Janet Napolitano chuan report chu a pawmsak duhlo ta nge nge a, Johnson p[awh chu a hna atangin a ban phah ta a ni. Kum riat lek a liam a, Johnson-a report hrilhlawkna chu a lo thleng dik ta chat reng thung. Johnson-a’n sorkar hna a bansan kum, kum 2010 khan Austin-a sorkar building lian tak chuan beih a tawk a, kum 2012 khan Wisconsin-ah silai nen mingo firfiakte’n Sikh Temple an bei leh a, kum 2015 khan Charleston khua-ah mihang te inkhawmna hmun Biak In chu silai nen run ani leh ta a ni.

Anti-Defamation League-in an chhinchhiah dan chuan police officer 45 zet chuan kum 2001 atang khan mi firfiak te lakah nun an chan tawh a, an zinga 34 lai chu Kane-a te pafa ngaihdan ang pu te thah an ni an ni a, Muslim firfiak thah chu pakhat chauh a ni thung.

Johnson-a leh firfiakna zirchiang mite hlauh ber chu US khua leh tui tam zawkin 9/11-a EWorld Trade Centre Bin Laden-a pawl te’n an beih hnu leh khami hmalam khan US-a firfiak chetna chu ramchhunga piang a seilian te hmalakna vek a ni tih hi a ni.

US sorkar laipui hnuaia Government Accountability Office in kum 2016-a report a tihchhuah ah chuan “September 12, 2001 hnu lama firfiakte vanga thihna thleng vawi 85 zingah 62 (73%) chu far-rightwing violent extremist groups te vanga thleng a ni a, hetih lai hian a bak 23 (27%) chu radical Islamist violent extremists te vanga thleng a ni” tiin a inziak.

Johnson-a chuan US khua leh tui tam zawk chuan kum 1995-a Oklahoma City-a thil thleng kha an hre mumal tawh lo a ti a, khami tuma mi 168 thihna bomb ti puaktu kha Muslim firfiak ni a ngai ta te p=awh an tam hle. Mahse, chu chu thudiklo a ni. Kha bomb tipuaktu kha American sipai lo ni tawh thin, Timothy McVeigh, a sipai nih thin laia a thil thiam hmanga fertilizer hmanga truck bomb siamtu a ni a. McVeigh leh a thurualpui pa Terry Nichols te hi “sovereign citizen” inti an ni a, an bomb tih puah hi US sorkar laka indona an puan tilang tu hmasa ber a ni.

Hetianga US khua leh tui ni ngei si in US sorkar an do duh tak tlat mai nachhan hi mi tam ber ngaihdan chuan kum 1980-a intan, loneitute zinga harsatna nasa tak a thlen vang kha a ni a. America loneimi te’;n ba an ngah phah hle a, kum 1990 bawr chho khan US sorkar haw tu an zingah an tam phah hle a ni.

Gary Noesner, FBI agent pension tawh sawi dan chuan, “Patriot Movement pawm tute tam zawk chu ka kum rual pui, pavalai mi ngo an ni a. Midangte hlawhtlinna leh hausakna va itsik a nei pha ve loa in ngai te, mi zawng zawng an hlim lai leh mi tu pawh mi ngo an nih vek hun lai leh mahni a dingchhuak an nih hunlai a kir leh duh te an ni tlangpui,” a ti.

Tunhnaiah erawh chuan a danglam deuh ta. McVeigh-a hunlai chuan firfiak te hi mi harsa zawk te zinga mi an ni tlangpui a, tunah erawh chuan mithiam leh hna tha tak tak thawk te pawh an tel ta. Tin, firfiak te hi mingo an ni vek kher lo bawk a. Sorkar hrawn duhlo hrim hrim te zingah hian mihang te pawh an tel ve tho a ni.

“Sovereign citizen te zinga mi 12 zela mi pahnih ang hi mihang an ni a, an khawvel thlir dan a kulmuk em em a, , an rilru put hmangah chuan an in unau vek tho,” tiin J J McNab, rmachhung firfiakte chanchin lehkhabu hial a lo chhuah tawh chuan a sawi.

Bob Paudert, West Memphis police chief lo ni thin in a sawi dan chuan, an thiltum awmchhun chu sorkar beih a ni tawp mai a ni.

Macnab chuan: “Kum 2000 bawr vela US ram sum dinhmun a tlakchhiat khan sovereign citizens te hi an pung nasa hle a. A chhan pakhat chu an in leh lo neihchhun te lakbo sak an hlauh vang a ni,” a ti a, “Pawisa mamawh vanga buaina tam lo chhuak hi sovereign citizens ah hian hmuh tur a tam a, ba rulh in thin nan a midang vau buai hrat te pawh an tam,” a ti.

Sovereign citizens te an pung zel nia a ngaih theih lai hian FBI ah chuan anmahni chhuitu an tlem hret hret zel a, engzah chiah nge awm a enge an hmalakna tih chu FBI hian a hre mang hauh lova sawi pawl an awm nuk mai.

MacNab-a’n a chhut dan chuan sorkar do pawl thenkhat zingah hian Trump-a President hnu a nuam ti an tam em em a, mahse, hei hian a daih rei kher lovang. Trump hi an rin ang ani loh tih an hriat hnu ah, chuan ani hian hmanrua ah a hmang niin an inngai anga, amah hio an huat phah zawk ang tiin a sawi a.Hetianga firfiakna lo piang hian kalphung deuh a nei a. Chhiah chawi duhloh atanga intanin sorkar aia thunei zawk ni a inhriatna ah a lut a, silai lek pawl an lo chhuak zel a, a tawpah chuan Oklahoma City-a bomb tih puah ang kha a lo thleng ta thin niin McNab chuan a ngai a. Tunhnaia silai lek pawl an tam tak em avangin he kalphung hian a vawrtawp a thleng leh tep tawh niin a ngai bawk.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s