Mimal ram, theikung, power station leh leiba

Sorkarin power station sak nan kum 1982 khan Vairengte ah mimal ram a luah sak a, mahse, a thuphunga an in remsiam anga a awm leh si loh avangin a ram neitu chuan court ah a khing ta a. Court hniamin ram neitu chu sorkarin a ram luah man a pe ngei tur a ni a tih hnu ah sorkar chu High Court ah a zualko a, HC chuan sorkar hian ram luah man a pe ngei tur ani a tih rualin tunhnaia Supreme Court thutlukna, Mizorama pawisa in thin chungchang nasa taka ti danglam tu behchhanin sorkar leiba hi a tlem thei niin thutlukna a siam 

jerc

Kum 1982 February thla khan Belfuha, Bela tia hriat bawk, Aizawl Chhinga Venga khawsa in Vairengtea ram a neih chhunga theikung engemawzat chu Mizoram sorkar in a kit a, power station a sak hnan a.

Hemi hnulam deuh hian Bela leh sorkar chu in remsiamin a ram luah man ah a fapa pahnih te chu sorkar hna pek a thuphugin an in tiam ta a. Mahse, sorkar chu a thutiamah ding lovin Bela fapa pakhat chauh hna a pe a, Bela chuan hei hi ngai thiamlo in a fapa pakhat zawk pawh hna pek ve nise, pek theih anih loh chuan a ram luah man sorkarin pe zawk mai se tiin ngenna a siam a.

A ngenna hi a hlawhtling lo zel a, kum engemawzat a liam hnu ah sorkar chuan Bela’n a ram chunga neitu nihna a channa Periodic Patta chu kum 2010 thleng a pawhsei sak a, mahse, sorkar chuan Power and Electricity Department (P&E) hnenah kum 2008 khan Bela ram chungah hian neitu nihna chan theihna tho, DLL a pek thuah ta a.

Hetianga a ngenna a hlawhtlin loh bakah a ram chu sorkar department hnena DLL hmanga pek thuah ani ta mai chu Bela hian a ngai thiam lo hle a, court ah kum 2008 khan a zualko ta a, Bela chuan court chu a ram atanga P&E hnawtchhuak tur leh a ram an lo luah tawhna man bakah a theikung te an kih man chawitir turin a ngen a.

Hetianga a ngenna hi a ngaihthlak hnu ah Senior Civil Juge, Aizawl chuan kum 2012 khan thutlukna a siam a. Sorkar in P&E hnena DLL a hlan chuan Bela ram a khuh avangin a dik lova, DLL hi a cancel tur a ni a ti a. Tin, Bela ram chu a phal lo chungin an luah luih vangin sorkarin luah man leh a theikung te an kih vang in pawisa a chawi tur a ti bawk a, sokar in pawisa a chawi tur hi ram a luah sak tan kum 1980 atanga chhut turin thutlukna a siam bawk a. Hetiang sum a chawi na tur hian assessment siam fel vek turin court chuan sorkar thu a pe bawk a ni.

Sorkar chuan assessment chu a siam ta ngei a, Bela ram a luah man leh theikung a kih sak man chu behkhawmin cheng nuai 10.56 niin a chhut a. Mahse, hetianga sum chawi ai hian sorkar chuan Senior Civil Judge, Aizawl thutlukna chu Gauhati High Court, Aizawl Bench ah a khing ta zawk a.

Court hniam zawk thutlukna a khinna ah chuan sorkar chuan hnialna hrang hrang a phawrh a. Pakhatna ah chuan, Bela’n Civil Suit hmanga sorkar a khinna hi kum 2008 ami anih vangin kum tam a liam tawh a, chuvang chuan “limitation” dan hmangin Bela’n sorkar a khinna civil case hi dan kalh ani hrim hrim sorkar chuan a ti a. Hei bakah hian Bela fapa pahnih te sorkar hna-a thun tura an intiamna hi a thuphung mai, ziak a engmah awmlo a nih vangin sorkar chuan a fapa pahnih te hna pek chu a ba lo niin a sawi bawk a. Eng a pawh chu nise, Bela fapa pahnih zinga pakhat zawk hna a lo pek tawh avangin sorkar hian Bela ram luah man hi a vai vai nilovin a zatve chauh a chawi tur ani tiin sorkar ukil Mary L Chhangte chuan HC a hrilh bawk a ni.

Hetih lai hian Bela ukil C Lalramzauva chuan limitation danin Civil Suit hi a khuahkhirh lo tih chu Senior Civil Judge thutlukna ah hian a chiang reng tawh a, sorkarin court hniam zawk thutlukna hnawl tura HC a ngenna chu pawm chi a ni lo tiin tan a khawh ve thung a.

High Court chuan lehlam lehlam ukil te thusawi a ngaihthlak hnu chuan heti hian a ngaihdan a siam ta. Sorkar hian Bela fapa pahnih te a ram luah man aiah hna a pe ang tih chu finfiahna hrang hrangah a lang reng a. Tin, Bela ram sorkarin a luah ngei ani tih pawh tuman an pha lo bawk a, chuvang chuan Bela tan hian a ram luah man leh a theikung an kih man ngiat chu a rem ngei a ni a ti a.

Mahse, Supreme Court-in J. Thansiama v. State of Mizoram (Civil Appeal No. 3536/2008) ah thutlukna siamin kum 2015 September thlaa a thutlukna ah Limitation dan hi Mizoram chhungah pawh kenkawh ngei tur a ni a lo tih tawh avangin Bela’n a ram luah man a phut hi chu kum 1980 atanga chhut chi ani lo thung tiin HC chuan a sawi a.

Kum 1982 atangin sorkar hian Bela ram hi lo luah tan mahse, Bela hi court hniam zawkah kum 2008 khan a zualko chauh a. Limitation dan in pawisa in thinna ang chi thubuai ah kum thum aia rei a huam loh avangin Bela hian court hniama case a thehluh hma kum thum bak ram luah man te a phut thiang lova. Chuvang chuan sorkarin ram luah man a chawi dawn anih pawhin a chawi tur chu kum 2005 atanga chhut chauh tur a ni tiin HC chuan thutlukna a siam ta a ni.

Hei bakah hian Bela’n a ram chunga neitu nihna a hauh theihna Periodic Patta chu kum 2010 thlenga nung anih vangin kum 2010 pel chin chu a ram luah man a phut thei lo bawk a. Mahse, a theikung kih man erawh chu a phut thiang ang HC chuan a ti bawk. Tin, Bela hnenah ram luah man leh a theikung kih sak man te chawi pumpelh nan sorkar hian a tira a thutiamah ding lehin a fapa pakhat zawk pawh sorkar hna a pe thei tho a, hetianga hna a pek zawk chuan a Bela laka a leiba hi rul anga ngaih theih ani ang tiin HC chuan tun thla laihawl khan thutlukna a siam ta bawk ani.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s