Rambuai/ India Sorkar chetdan diklo zia

D/86-20

India Sorkar chetdan diklo zia

  1. Kan hriat ang in India sorkar hotute hnenah chuan kan dikna leh kan chanve tur reng a Pathian ruat mahni kuta ding a sorkar nghial nghet kan neih a tul zia leh chu Independent nih theih na chu keimahni duhthu a nih zia te India pawh in kan duh lo chung mipui te chungah rorel theihna a neilo tih an mahni ngei pawh in hrereng chung si a hetiang khawp a an in hampuar mai hi ngaihtuah thiam a harsa a, khawvel pawh in an thiam bik lovang. Vawi tam tak lehkha te leh mahni ngeia Prime Minister hial pawh kan biak hnu ah kan duh leh ngen te chu hrelo ang hlauhva, sipai chakna nen hmehmih tum a sipai an han thawn belh thu te kan hriat theuh anih kha. An mahni chanchinbu ah pawh heng an sipai te hi keini independent duhtu te tih boral nan a an tirh ngei an puan bawk kha. Chutiang thil awmdan anih avangin keini chuan kan theih ang ang a kan chet ve loh theih loh a ni ta a ni. Khatia an rin aimah a kan lo tihthat theih tak ah khan Pathian tanpuina in, India sorkar chuan dan pawh zah lovin leh nunau te te pawh lainatna nei hauh lovin, pawisawi hauhlo civil chung ah kut te an han thlak ta nghek nghek mai a. Mi ram sorkar atanga a lak thlawhna chakmi jet fighter tam tak rual in rocket leh machine gun te hmang in kan sipai awm na pawh tum chuang lovin Civil Hospital te, Biak In te, nunau tlankhawmna bomb-a a han bei vak vak mai kha khawvel pawh in min lainat ngei ang. Kan khawpui mawi tak, alh vek mai te hi khawvel dan zawng zawng bawhchhia in an milem biakna rilru chapo leh mihring mihrinna zah nachang hre phallo khawp a rilru tlawm leh te an nihna a lang chiang ta a ni.
  2. Pathian khawngaihna leh kaihhruaina kan chung ah a lang em em. Khati khawp a India sorkar in mi a sahrang beih vak mai kha keini lam sipai te chuan huai taka bei in, phen tur leh silai tha pawh nei si lovin a hmatawng tawng ah an kal chhuah pawh khan mi sawi tham loh in nunna an chan a, thi teuh awm tak Pathian hruai kan nih a lang. Thi a te chhungte tan erawh chuan leh, kan ram tan chuan mipakhat nunna pawh chu a va hlu in a va uihawm em. Heng kan thian kan unau te India sorkar sipai te kapa an nun an channa te, kan thian leh unau in venna pawh neilo leh tlanchhe chung an han kaphlum takte pawh hi a thlawnin an boral lovang. Kan khawpui mawi tak leh mi thenkhat In lo kang ral te pawh hi India sorkar sual zia leh nunrawn zia hriat chhuah nan a hmang in nasa leh zual a kan tanrual na tur Pathian remruat a nih a rinawm a ni. Kan thatna tur zawk a nih beisei in tuna kan … hi kan ngai hram hram tur a ni.
  3. India sorkar hi ralthuam chakna chuan hneh kan tum ngailo. Indo leh silai hlauhawm pui pui hman pawh ngaiin kan hrelo. Mahsela, a hman luih tlat si chuan engtin nge kan tih tak ang; Rilru lama theitu Pathian in an thinglung min chhut nem sak tur in kan ngen anga, chumi bak ah kan theih ang ang leh a remchang ang angin kan bei ve zel ang. Independent kan hmuh hma chu ngawi thei kan ni lo.
  4. Kan ram hmun tinah leilamah ngat chuan India sorkar sipai ten min ti theilo Lunglei te, Champhai te, Kolasib te, Chhimluang te leh Outpost tankak, BRTF ho hmun thenkhat a mi te nen … thenkhat ami te nen kan hneh vek hnu ah India mangang in Jet Fighter-te, Roket-te leh Machine gun-te hmanga chunglam atang a min beih vak vak mai na hi tuar ringawttu, mipui invenna leh hriam neilo tan a harsat tak avangin kan sipai te pawh an tawlh hret hret a tul ta a. Chuvang chuan Aizawl chu thil tha zawk te anih beiseina avangin laka, awp tum chu kan tum ta hrilh lo a ni.
  5. Khawtin ah nu leh pa an fate volunteer tanga, in lum chhuahsan te chu khawtlang in englai mahin nitin khawsakna ah harsatna an neih in, lo lam harsat na ah te pawh ngaihtuah tur a ni lo. Tanpui theih ang ang in tanpui tawn tur in Mizo sorkar chuan a sawmin a ngen a ni. Tin, Mizo sorkar pawh in thei ang tawk a in lam harsatna te tanpui dan a ngaihtuah ang. Rilru leh thinlung ah Pathian a in nghat theuhva, pum khat a Mizoram hi a luan za dial dial kan tum tur a ni. India sorkar thil tihdan leh ngamthlemna te chu do zel thei tur in mipuite chu Mizo sorkar in a ngen in a hriattir a ni.

Rambuai tirh atangin kum zabi chanve lai a lo liam ta. Khatih hunlai a thil thleng thenkhat te lehkhathawn chi hrang hrang hmangin kan han thlirlet e.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s