Ramchhung/ Lallukhum khum lo tu Lal chu

Punjab lalram a lalthuthleng chelhtu hnuhnung ber chu kum za chuang ngaihven hlawh lovin awm mahsela, tunhnai hia film chhuk mai tur leh a chanchin khawn khawm tu tlemte vangin a lar thar hle

 

Kum 1853 khan Punjab lalthuthleng luahtu tur diktak, rawlthar kum 15 mi chuan British India-a lal ber, Viceroy hnen atangin thilpek a dawng a, chu thilpek chu Bible a ni.
Chu rawlthar Maharaja Duleep Singh chuan kum nga mi lek anih laiin a pa Ranjit Singh-a’n a boral san avangin lal nihna a chang a, heti chung hian a lalram chu British-in an hlauh leh an tlawn a ni tho tho.
Heng thil thleng te avang hian Europe-a khawsa Sikh mi tamtak tan chuan thawnthu runthlak em em, an lal thih hnu kum 124 pawh a la in lumlet reng a lo piang ta a ni.
Eng vangin nge Duleep Singh-a chanchin hi mi nawlpui ngaihven ni thar leh turin kum zabi chuang zet a in herliam a ngaih tih chu thilmak a ni a, mahse, film director Kavi Raz, a film siam The Black Prince kumin July thlaa chhuak tura ruahman tan chuan Sikh inthlahchhawn dan leh he hnam hun tawn te’n ngaihven a hlawh tan mek vang niin a lang.
“Khalistan movement khan inlak hran duhna rilru a phawrh chhuah rualin Punjab lalram, Khalsa Raj tia hriatlar chu mipui rilru ah a chawk nung thar leh a. Hei hi thil awm reng a ni. Kha lalram kha British lalram zau em em leh Sikh ho daidang tu awmchhun a ni a, mahse, Sikh ho hnen atang khan then darhna politics hmangin ruk bo a ni,” tiin Raz-a chuan a sawi.
Viceroy Lord Dalhousie-an sipai doctor John Spencer Logan hnena Bible a pek, a naupang enkawl Duleep Singh hnena hlan chhawng tura a tih khan Punjab lalram mai bakah India ram hun tawn chu nasa takin a thlak a. Anglo-Sikh War hmasa berah hnehna an chan hnu khan British sorkar chuan lalnu Maharani Jind Kaur chu lung inah a khung a, mahse, a fapa naupang te Duleep Singh erawh chu roreltu angin a dah chhunzawm a. He lal naupang tak hi a nu hnen leh an lalram khawpui ber Lahore atangin hla takah awm tir a ni a, tunhnu a Uttar Pradesh ni ta a khawpui pakhat Fatehgarh-ah sipai doctor Logan-a enkawlna hnuaiah hian aa seilian a ni.
Kristianna zawmin April, 1853 khan Duleep Singh chu United Kingdom panin lawngah a chuang a. UK-ah hian zirna sang zirin leh Kumpinu hnuaia lal taka awm turin British sorkar hian thu an tiam a. Heng hamthatna te dawng tur hian a ni chuan a rohlu tam tak a pe thung a, chung zingah chuan lunghlu lar tak Kohinoor diamond pawh a tel.
Duleep Singh hi a pianna ramah vawikhat mah a kir leh taawh lo a, Dalhousie chuan he lal naupang te in Kristianna a chelh tak thu ah hian a thiantha tak hnenah, “a thuneihna chatuanin tihchhiat a ni ta,” tiin lehkhathawnah a ziak nghe nghe.
Britain khawmualpui leh Queen Victoria rorelna thuthmun a thlen hnu chuan Maharaja rawlthar hian ngaihsak a hlawh em em a. Mipa naupang rohlu leh tlereuh nasa taka inbel, a kawng a chem pai, a lu a pagdi khum hi Britain ah tuman an la hmu ngai reng reng lova, Duleep Singh hi London-a Sikh kal hmasa ber a ni.
A pianna ram atanga lak sawn anih hma daih tawh atang khan Duleep Singh hi English mi te zingah a lo lar tawh a. Mahse, Britain a han thlen meuh chuan mipuiin hmuh an chak em em a, kum 1854 khan Queen Victoria chuan he nau lem ziak tur hian lemziakthiam a ruai a, heta tang hi chuan Maharaja hi ennawm ah changin, a tan tlakchhiatna a lo in tan ta.
Mi tamtakin an ngaihsak em em a ni tih a hriatthiam lai vel atang hian Duleep Singh hian duat em em a enkawl nih chu a ning tan a. India-ah British awpna duhlo tute’n buaina an siam fo tih a hriat phei chuan haw a chak ngawih ngawih a. Mahse, British sorkar chuan he lal naupang tak hi a haw vaih anih chuan indona a chhuak ngei dawn a ni tih hrechiang in a haw a phal hauh lo a, ani pawh hian a nun a nawmsak take em avangin haw luih chu a tum ta bik chuang lo a ni.
Heti chung hian kum 13 teh meuh ram danga a chen hnu ah a nu a hmuh leh chuan a rilru a inthlak danglam tir ta dawrh mai a ni.
Maharaja Duleep Singh-a chanchin hi India hun tawn ah pawimawh hle mahsela hretu an tlem hle. A boral hnu kum za chuang chhangin a chanchin ngaihven hi an awm mang lova, mahse, kum 1993 khan UK-a Sikh awm thenkhat chuan Maharaja Duleep Singh Centenary Trust an din a, he trust hian a hmalakna hmasa ber atan Maharaja lem ziak turin lemziakthiam an ruai a ni.
Trust chairman Harbinder Singh Rana chuan Maharaja lemziak hi an hmalakna hmasa anih chhan chu British hnen atanga amah hi an lak let duh vang niin a sawi a. He trust hian kum 1997 khan Maharaja lim a tung bawk a. Rana sawi dan chuan trust hmalakna te hian Britain leh British chauh nilovin Sikh hnam leh India ram tan Duleep Singh-a hian pawimawhna a nei tih an puan duh vang a ni.
Rana ang tho hian thil hlui zir mi leh ziakmi Peter Bance chuan Maharaja chanchin hi kum 17 emaw lai a lo chhuichiang tawh a. Bance hian Maharaja hi Maharaja mai nilovin, Kumpinu in no mawi ang mai a mipui hmuh tura a tar chhuah, duat em em a enkawl a ni tih hi theihnghilh chi a ni lova, a lalram leh a rohlu te nei tawh lo mahsela miin an ngaihven em avang hian a ngaihtuahna te pawh a danglam viau ang tih chu ngaihtuah thiam a ngai a ti.
Peter Bance hi Sikh hnam niin an chhungkua hi kum 1936 atang khan UK-ah an khawsa tawh a. Ani hian Duleep Singh-a chanchin hi lehkhabu meuhin chhuah tawh mahsela, a hriatna chu la rei lo tak a ni. A sawi dan chuan a thiante nen UK-a khaw pakhatah an zin a, chutah chuan tu emaw titi atangin Maharaja chanchin hi a hre ta a. A chenna in te leh a lemziak te a hmuh hnu chuan a hnam pui ngei chanchin a la hre miah lo chu mak a ti em em a, chung lai hmun a Sikh hnam a hriat hriatte hnenah chuan lehkha thawn kualin, an chhana te atang leh aman a zawn kual ve zel vangin a hriatloh hlanin Bance-a chu Maharaja chanchin hre ber pawl a ni ta mai a ni.
Kum 1961 khan Duleep Singh, kum 22 mi lo ni ta chu Calcutta a zin phalsak a ni a. He khawpuiah hian a nu, Kathmandu-a British hovin an tan tir nen chuan an in hmu a. Bance-a ngaihdan chuan hetianga nufa an inhmuh leh hian Maharaja thinlung chu a khawih em em a, kumkhua in a ngaihdan a danglam ta a ni.
“Jind Kaur-i hi a thlahtute chhuang em em leh British haw em em tu a ni a. A fapa British ang maia a nung ta a hmuh hian a ngaihdan a nih loh zia a tilang ngeiin a rinawm. Kum 13 hnua mahni fapa hmuh a I hrin ngei kha a ni tih hai thei khawpa a lo danglam tak chuan khawi hmeichhia pawh a thawng nasa hle ang chu. Calcutta-a Sikh sipai awm te’n Duleep Singh-a hi an khua ah a lo zin tih an hriatin a thlenna hmun an pan khawm a, amah an ngaihsan zia lantir nan an au rual nghe nghe a ni. Reilote mah ni sela, Duleep Singh hian a awmna hmun tur takah a awm niin a ngai ang. A nun hi a danglam phah hle,” tiin Bance chuan a sawi.
Maharani hian a fapa chu UK-ah a zui ve ta a, mahse kum hnih-khat hnu lekah a boral a. British sorkar chuan Kristian dan in vui duh mahsela, Britain-a Sikh khawsa ve te leh a fapa ngei pawh chuan an phal lova, Sikh invui danin Bombay ah an halral ta zawk a ni.
Maharani hian a fapa rilru a khawih rualin Duleep Singh hian nghet takin hma a la lem lo a, a nu vui tura India a pan pawh hian Cairo ah a chawl a, missionary school te tlawhin a ngaihzawng leh a hnua a nupui ni ta Bamba Muller, German sumdawng fanu chu a tawng a. An inneih hnu in an nupa hian England ah an khawsa a, mahse, Singh-a hi a rilru a nghet thei ngang lo; nuamsa taka England-a awm chung si chuan a nu in India-a haw a a lalram uap leh tura a duhna chu a nghilh thei chuang lo.
Kum 1970 a lo inher meuh chuan Maharaja chu a naupang ta hauh lo mai a, a chal a kawlh tan a, British khawtlangah chuan a hma angin huhang a nei ta lova. A tawp a tawpah chuan pa a nihna aiin fapa anihna chuan a pawt na zawk a, a lalrama haw leh chu a tum a. Mahse, Yemen chauh a thlenh hman tihin a chungthu rel tute chuan Britain lamah bawk an kir tir leh a. England thleng ta lo chuan France ah a thihni thlengin a khawsa zui ta a ni.
Mahse, Paris a pan hma hian Singh-a hi Sikhism-ah a inlet let leh tih chu tuinhnaia mi tamtak ngaihdan a ni a, hei vang hian an vuina hmun Suffolk atanga a ruang phawrha a lalram ni thin khawi lai ah emaw halral ni rawh se tih ngaihdan nei pawl an awm.
Amaherawhchu, tunhnaia a chanchin film a siam tu Raz-a chuan hei hi thil awlai ani lo tih a sawi. A ruang chu phawrhin a lalram hlui ah hawn tehreng pawh nise chu lalram chu India leh Pakistan-in an insem daih tawh a, khawi hmunah nge amah hriat rengna chu an sak tak ang tih ringawt pawh ngaihtuah tham tak a tling a ti.
A chanchin zirchiang a ziaktu Bance-a pawhin Duleep Singh-a ruang phawrh hi dik a ti lova, a ni ngaihdan chuan a nupui leh fate bula an phumna hmun atanga lak sawn hi thlan tih bawrhbanna tluka ni a, hetianga ti duh tute hian politics lama hamthatna an um ah a ngai.
Bance-a hmuh dan chuan Duleep Singh hian Europe-a hun rei tak cheng tawh Sikh te zingah ngaihven a hlawh ber a, a chhan chu anni ho hi an ram ti a an koh theih loh hmunah kyum tam an awm tawh a, an Maharaja, hmun hla taka khawsa rilru an hrethiam bera an inngaih vang niin a hria a. India rama Sikh te chuan an lal hian phatsan in ram dangah a pem san ni ah an ngai mahna a ti daih thung.
Mahse, Maharaja Duleep Singh Centenary Trust a hruaitute tan chuan Duleep Singh hi a la thi tak tak lova, an hotupa Rana chuan, “A thih hma in Sikh ah a inlet leh ani tih hi kan chiang a. Chuvang chuan vui anih tur angin tun thleng hian vui a la nilo. Chawimawina ropui tak nen India-ah vui a hmabak a, heti anih ngei nan hian kan theihtawp kan chhuah ang, hun rei tak beih pawh kan in huam a ni,” a ti.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s