IOC-in Aizawlah phone hmanga gas lak theih turin ruahmanna a siam, zawm duh lo distributor te hrem ah a vau

Ram puma kum 2014-a hman tawh tura tih IVRS chu IOC-in Aizawlah pawh hman ngei tur a ni tiin distributor te a hrilh

20160922_092341

Aizawl khawpuiah gas la tura intlar a ngai tawh lo, phone hmanga gas mamawh thu sawi mai a tawk tawh, distributor-te’n inah an lo dah mai ang.

Mizorama gas cylinder sem zawng zawngte neitu company pui Indian Oil Corporation (IOC) chuan kar hmasa khan Mizoram Indane Distributors’ Association (MIDA) hnenah lehkha thawnin Aizawl khawpui chhungah phone hmanga gas lak (refill) theihna company-in a duan sa chu hmang vek turin a hriattir a, a hmang duh lo distributor te lakah complaint a lut a nih chuan hrem an nih tur thu lehkha ah hian a inziak.

Interactive Voice Response System (IVRS) tia hming vuah, phone hmanga gas refill-na hi ramchhung khawpui hrang hrangah tun kum sawmbi tir lam atang khan hman tan a ni a, kum 2014 May thla atang khan ramchhung hmun tin ah hman theih turin IOC/Indane hian a zauh a. Mizoramah pawh hman tur ni mahse, distributor te hian an hmang kher ngai lem lo a ni.

May ni 26-a IOC Sales Manager Martin Gangte-a’n MIDA hnena lehkha a thawn ah hian anmahni dawr tute’n an hriat theih nan Aizawl khawpui chhunga Indane distributor te chu an dawrah te theuh IVRS hman dan tur hi tarchhuak turin thu a pe nghe nghe.

 

Engtin nge phone-in gas lak dan tur?

Phone hmanga gas lakna IVRS hnuaiah hian Hindi emaw, English in emaw gas a lak theih a. IVRS hmang tur hian cellphone atangin 9089024365-ah call tur a ni a, computer in he number-a call tute hi a lo chhang zel a, Hindi nge English-in an chhunzawm duh tih a lo zawh hunah tihdan tur a sawi angin number hmeh chhuah tur a ni a.

|awng hman duh thlan fel hnu hian mahni gas lakna thin distributor te phone number chhut luh leh tur a ni a. Distributor te phone number chhut luh dawn hian STD code (Aizawl ah chuan 0389) chhut luh hmasak tur a ni.

He phone number hmang hian distributor te hi IVRS chhangtu computer in a lo hmuh fel hunah mahni consumer number chhut luh leh tur a ni a, hei hi tihdan tur computer hian a sawifiah nghal ang.

Distributor leh consumer te a finfiah hnu hian computer chuan refill duh te tana number hmeh tur a sawi leh ang a, hetianga refill duh thu hriattir hnu hian computer chuan refill duh tih hriattirna number SMS hmangin a lo thawn tawh mai dawn a ni.

Hetianga gas refill lak duh thu hriattir a nih hnu hian distributor-te’n gas refill chu consumer te inah kalin an gas bur ruak an lak kir pawhin gas bur thar an dah tur a ni a. An dah lo a nih chuan a chunga tarlan tawh ang bawk khian tih leh tur a ni a, gas refill duh thu sawi aiah khan complaint thehluh duh thu sawi mai tawh tur a ni.

IOC/Indane company hian hei bakah hian complaint siam duh tan toll-free number a chhawpchhuak bawk a, chu chu 1800-2333-555 a ni. Heta complaint sawi te chu an complaint register-na number hrilh nghal zel an ni bawk a, an complaint te bawhzui a nih leh nih loh hre duh te chuan he toll free number ah tho hian a zawh leh theih bawk. Toll-free number bakah hian Indane website ah complaint a thehluh theih bawk a ni.

 

Eirawngbawlna gas-a inbumna lian tak

Eirawngbawlna gas chungchang hi The Frontier Despatch (TFD) chuan September 30, 2016 khan a lo ziak tawh a, khami tum khan Mizorama Gas Distributor-te’n mipui an bum dan chipchiar takin a ziak a, Mizorama Gas Distributor 50 te chuan IOC hnenah chhungkaw tinte chu an kawngkhar ah eirawngbawlna gas an pe vek niin an insawi bakah gas te chu SMS leh internet kal tlangin mipuite’n an chah a, hei hi ni hnih chhungin an pe deuh vekniin an insawi a, IOC pawhin Mizorama eirawngbawlna gas distributor te chu an ti tha tiin 5-star rating a pe vek a,  ramchhungah Mizorama gas distributor te chu titha ber nihna an chang phah hial a ni.

Gas Distributor-te’n chhungkaw tin te an kawngkhar thlenga gas an pêk thu IOC hnena an report chungchang hi thu dik lo a nih avangin Silchar-a IOC hotute hnenah hekna vawi engemaw zat a awm tawh nghe nghe a, hei vang hian Silchar-a IOC hotute chuan Distributor pahnihte chu showcause notice a pe nghe nghe.

 

Gas lak zat ah thilmak

Gas semtute’n veng tina gas an sem thinah hian chhungkaw tin lak zat an chhinchhiah a, hei hi IOC hnenah an report a, he an report hi TFD chuan a chhui chiang tawh bawk a, chhungkaw tam tak chu gas an lak zat aia tam la anga chhinchhiah an ni a, hei hian eirawngbawlna gas chu dan lo-a hralh a tam phah a ti rinhlelhawm hle bawk.

Veng hrang hranga chhungkaw hrang hrang in an gas lak dan an consumer card-a distributor te chhinchhiah dan leh IOC-a an report dan TFD in a enfiahna ah chuan chhungkaw tam takte chu a taka gas an lak zat aia tam la anga chhinchhiah an ni a, bur 8 la te chu bur 10 la anga chhinchhiah an ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s