Kum 2013 tualchhung inthlanpui hma lawk khan chhungkaw 41,605 hnenah NLUP sem a ni

Inthlan hma thla hnih-khat chauh awm a NLUP dawng te hian midang aiin tanpuina an dawng tlem a, sorkar bawm ah sum awm reng mahsela an dawn ban chu an dawng mai lova, hun a rial rei em vangin an ran in sak te a tlabal hman a, an lo vah te pawh a hnim leh hman vek tih CAG-in a hmuchhuak

NLUP Logo

NLUP kalpui dan tur hi kum 2010 leh 2011 khan sorkarin Calendar of Works hmangin a duang lawk vek an ni a.

He calendar hian engtik hunah nge NLUP hnuaia tanpuina hi sem a nih anga, engzat nge sem a nih ang tih te a duang fel lawk vek a ni.

Sorkar hmalakna lian ber leh pawimawh ber nia sawi NLUP hnuaiah hian trade tam ber dawngtu te chu 1st installment atan cheng 20,000 aia tlem lo pek theuh tur an ni a.

Industries Department hnuaia trade engemawzat ah erawh chuan tanpuina dawngtute’n cheng 7,400 atanga cheng 45,000 thlenga dawng tura bituk a ni thung.

Mahse, kum 2013 tualchhung inthlanpui hma lawk, September leh October thlaa line department hrang hrangte’n third leh fourth phase hnuaia 1st installment an han sem chiah chuan Calendar of Works duan dan hi bawhchhiat a ni nasa hle.

Untitled-1

NLUP dawngtute hnenah hian cheng 20,000 theuh ni lovin cheng 10,000 theuh chauh pek an ni hlawm tih Comptroller and Auditor General of India (CAG) chuan a hmuchhuak a.

Hemi tum hian a vaiin NLUP hnuaiah cheng vbc 41.57 chu chhungkaw 41,605 hnenah sem a ni a, a sum sem ngau ngau hi tam hle angin lang mahse, NLUP atana hman tur hi hetih lai hian cheng vbc 204.84 lai civil deposit (mipuiin K deposit tia kan hriat lar tak) ah a awm reng a.

Cheng vbc zahnih chuang civil deposit-a a awm reng chung hian line department te chuan 1st installment dawngtute hnenah a pe chhunzawm mai lova, kum khat emaw a liam hnu ah kum 2015-16 khan an sem leh ta chauh a ni.

CAG chuan hei hian NLUP dawngtute eizawnna nasa takin a nghawng tih a finfiah bawk.

1st installment ah sum sem a beitham bawk nen, 2nd installment sem a tlai bawk nen, NLUP vawk leh ar vulh tu te chuan an ran dawn tur awmna tura vawk in leh ar in an lo sak lawk te chu a tlabal nasa hman hle a.

Ran in tlabal hman chu thuhran, thlai leh thei ching turte’n ram an lo vah lawk te pawh kum a liam meuh chuan hnimin a lo bawh leh hman vek tawh a, tanpuina chu dawng chhunzawm mahsela, an dawn leh te chu a hman dan turin leh an lo thlir lawk angin an hmang thei ta lo, CAG chuan a ti.

Heti khawpa sum hman tur awm si hman tlem lutuk leh sum hman tur awm reng si pekchhuah a nih mai loh nachhan hi CAG chuan NLUP Implementing Board (NIB) hotute a zawt a.

Tum anga hmalak a nih theih loh chhanah hian NIB chuan hun bituk sa thlapa thil thleng thin – Parliament, Assembly leh Village Council inthlan te a chhuanlam.

 

Rs 20,000

NLUP 1st installment a sem tur zat

 

Rs 10,000

Kum 2013 inthlanpui hma thla hnih-khata chhungkaw tin te pek an nih zat

 

41,605

Kum 2013 inthlan hma thla hnih-khata NLUP dawng chhungkaw zat

 

vbc 41.57

NLUP 3rd leh 4th phase a sum sem

 

vbc 205.84

NLUP 3rd leh 4th phase a sum hman tur K-deposit-a awm zat

 

Kum 2

NLUP 3rd leh 4th phase dawngtute’n 2nd installment dawng tura an nghah rei dan


 

CAG report chungchanga NLUP Implementing Board insawifiahna thuchhuah


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s