Lawrkhawm/ May 25 – 31, 2017

MHMSA thil phut sorkar in remti lo, an hna zawm turin hriattir

Mizoram Health Multipurpose Services Association (MHMSA) member-te’n sorkar laka lungawi lohna lantir nana nawrh an huaihawt mek chungchangah sorkar chuan an thil phut a remtih sak loh bakah an hna zawm turin a hriattir.May 29-a thu chhuah a siamah sorkar chuan, “Health Worker atanga Health Supervisor-a kai san danah 75% chu Seniority-a kai san ni se, a bak 25% chu Limited Departmental Exam (LDE)-a a titha apiangte kai ni se tih 2011 Recruitment Rules-a awmsa chu a tha tawkin sorkar chuan a hria,” a ti a, hei hi a thawksa te zingah inelna thianghlim a awm theihna tura duan a ni a ti bawk. Sorkar chuan MHMSA duh dana LDE zaa 25% a nih chuan mi thiam leh thluak tha, taima bawi si tan phurna a tlahniam ang tih a hlauhawm niin a sawi a, Health Supervisor atanga Community Health Officer (CHO)-a kaisan chungchang pawh MHMSA te chuan 100% seniority-a kaisan ni se a duh a. Tuna Recruitment Rules, 2011 hman mekah chuan 25% seniority promotion, 50% LDE leh 25% direct recruitment te a ni a. 50% LDE-a promotion chu 25%-a tih hniam a, 25% seniority-a kaisanna hi 50%-a tihsan ve thung turin department in rawtna a siam a. He rawtna hi DP&AR (GSW) pawhin tha tawka hriain Law & Judicial Department in a tul anga hma an lo lak tura thawn mek a ni a. Hei hi a hlawhtlin chuan seniority-a kaisanna 25% chu 50% ah a kai chho dawn tihna a ni a, tun dinhmunah a tha tawk rihin department chuan a ngai niin sorkar thu chhuah chuan a sawi.Sorkar chuan hengte vang hian Mizoram Health Multipurpose Services Association member-te pawh an nawrh te titawp a, an hna zawm thuai turin a duh niin a sawi.Mizoram Health Multipurpose Services Association te hian an RR siam that phutin sorkar chu badge dum bel te, pen down strike (hnathawk lo) te in an lo nawr tawh a, an thil phut a hlawhtlin loh avang hian Thawhtanni (May 29) atang khan tun kar chhung a huho in chawlh (mass casual leave) an la a, hei hi a la hlawhtling lo cheu a nih chuan June 5 atangin tiamchin awm loa chawlh lak an tum a ni.

An RR chungchanga an lungawi lohna lantir mek ah hian thu chhuah siamin MHMSA chuan an beisei loh leh an duh loh an RR tura an dil/ngen thin chu Health Secretariat in an duh dana kalpui tlatah an puh a, Health Minister hnenah pawh an thlen thin thu sawiin an thusawi leh ngenna te chu Minister pawhin awm a tihpui in Secretary hnenah pawh lehkha a ziak niin an sawi.MHMSA chuan tuna Health Dept-a an Technical pui zawng zawngte pawhin an RR hman lai ang chu an dil ve niin an sawi a, chumi ah chuan sorkar tan insenso belhna tur engmah a awm lo niin an sawi a, May 29-a sorkar thu chhuah, ‘kum 2011- ami LDE telh hi inelna thianghlim a awm theih nana buatsaih niin hei hi la tha tawkah kan ngai,’ tiin thu chhuah an siam hi thawktute tan lungchhiatna leh lungawi lo chunga hnathawka min siamna leh hnathawkte inrahbehna nia an ngaih thu an sawi a, tuna sorkar in RR a pek tum chu an pawm theih loh thu leh an duh loh thu an sawi.

 

CM in Union HM hmu, Bru, border leh police sawi dun

CM & Union HM

Chief Minister Lal Thanhawla’n May 30 khan Union Home Minister Rajnath Singh chu New Delhi-a a pisa-ah hmu in Mizoram mamawh a thlen a, hruaitu pahnih inkawm hian Tripura Relief Camp-a Bru awm te, police tihchangtlunna te, Bangladesh leh Myanmar ramri depa Border Police Out-Post chungchang te sawiin June 12 leh 13-a hmarchhak state Chief Minister Aizawla an inhmuhkhawm tur chungchang te an sawidun a ni.

Lal Thanhawla chuan kum 1997-a buaina a chhuah khan khatih laia Bru te chu Mizoram chhuahsan lo turin a hrilh thu Rajnath Singh chu a hrilh a, vawi tam tak Mizorama kir tura an ngen thu te, mahse, sorkar ruahmanna pawm lovin thil thar an phut zel nia sawiin tun hnaiah intihhmingchhiatna leh puhna te an siam thu a hrilh a, Mizoram sorkar chuan Mizoram mi dik tak te chu rawn kir leh se ti thin mahse, camp-a mi thenkhat kawhmawhbawlte’n lo kir duh te an vau thin tih a hrilh a, tun hnaia thil thar an ngiat pawh Mizoram sorkar in a ngaihtuah thei lo tih sawiin an thil phut te chu sorkar laipuiin a pe dawn a nih chuan lo kir tawh chhungkua te pawh pe ve turin a ti a ni.

Police tihchangtlunna (Modernization of Police Forces) chungchang an sawinaah police te chenna in tam tak chu a that tawh loh avangin Special Police Housing chu ngaihpawimawh sak turin Chief Minister chuan Union HM hi a ngen a. Mizoram chu ram pahnih in a karcheh avangin venhimna hi ngaituah bik a tul tih sawiin, ramri depah Assam Rifles leh Border Security Force te nen Mizoram police chuan thawhhona tha tak neiin hna an thawk a, mahse, Mizoram police lamin Border Police Outpost mamawh zat ang an neih loh avangin harsatna an tawk fo avangin Border Police Outpost siambelh pawh ngaihpawimawh sak turin Home Minister hi a ngen a,  ramri chungchang leh Act East Policy chungchangte chu ngaihpawimawh a nih tur thu Home Minister hian Chief Minister hi a hrilh a ni.

Thawhtannia NEC meeting-a Union Home MoS Kiren Rijiju-a’n hmarchhak tan IR Battalion thar 10 din a sawi chungchang pawh sawiin CM chuan IR Battalion pakhat tal chu Mizorama dah turin Union HM hi a ngen bawk.

 

Guwahati-a zirlai pahnih tualthi vui, NGO-te’n post-mortem nawn phut

Guwahati-a Assam Downtown University-a zirlai pahnih – C Lalhmangaihsanga (26) s/o C Chawnghranga leh R Lalmalsawma (26) s/o Chhawnsanga (L), Lunglei Electric Veng ve ve – te chu May 28 khan Panikhaiti Railgate-a rail kawng bulah thi a chhar an ni a, an ruang hi Aizawl ah hmuah a nih hnu in May 30 khan Lungleiah vui liam an ni.

An tualthihna chungchangah hian tlawmngai pawl hrang hrang leh zirlai pawl te awmkhawmna NGO Co-ordination Committee chuan May 31 khan thuchhuah siamin an ruang hi Guwahati ah post-mortem ni tawh mahsela, Assam-a thuthar thehdarhtu pakhatin thah ni lovin rel in a su hlum zawk a ni a tih chu “thil ni thei lovah kan ngai a, a tul anga Mizorama Post Mortem hi tih that leh ngei a nih theih nan hmalak ni se,” tiin a sawi.

Tin, an tualthihna chungchangah hian Assam sorkar thuneitute dawr turin in tirh nise tih chu pawm anih thu committee hian a puang zar bawk.

Tlangval pahnih ruang hi Guwahati Medical College-a endik a nih hnu in Guwahati-a Mizote’n Mizoram House ah an thlah a, lirthei a phurh haw niin Mizoram chhung khaw hrang hrangah zirlai leh mipuite’n an lo hmuak a, Mizo Zirlai Pawl ruahmanna in May 29 khan Vanapa Hall kawtah hmuah a ni bawk a, hetianga hmuah an nih tur thu a puan na ah hian MZP chuan Mizorama hnamdang awm te chu an sa him na’n tiin pawnah chhuak vak lo turin a chah a, khami ni khan namdang  chhuakvak hmuh tur pawh Aizawl khawpui chhungah an tlem hle a, MZP thuchhuah hian social media ah sawi zui a hlawh hle nghe nghe.

Vanapa Hall kawta thlahna hun hman anih hnu hian mitthi te hi Lunglei panpui niin mipui tam takin an hmuak a, May 30 khan an chenna ve ve ah Kohhran in an vui hnu ah Lunglei Sub-Hqrs. YMA-te’n Lunglei Electric veng YMA Hall ah a thlahna hun an hmang leh a, anmahni ui tu mi thahnem tak an tel.

Zirlai pawh leh Lunglei Electric Veng YMA te chuan zilai thi te hi thah an nih an rin thu leh pawi khawihtute chu Assam sorkar in zawng chhuak in an phu tawk hremna pe se, thi chhungte pawh Assam sorkar in zangnadawmna pe turin an phut a.

An tualthih chungchangah hian May 30 khan Guwahati-a North East Health Minister te intawhkhawmna ah Mizoram Health Minister Lal Thanzara’n Assam Health Minister Himanta Biswa Sarma, Finance Minister ni bawk chu zirlai pahnih thih chungchangah hian a hmu a, a rang thei ang bera tualthattute man chhuak a, an phu tawk hremna pe ngei turin a ngen a.  Sarma pawhin kha thihna ah khan Enquiry Commission din a nih thu leh amah pawhin theihtawp chhuah a tum thu leh Mizo mipuite duh dan tihpuitlin ngei a duh thu a hrilh niin Mizoram sorkar thuchhuahin a sawi.

 

Cyclone Mora-in Mizoramah In 137 tichhia

May 29 leh 30-a Mizoram hmun hrang hranga cyclone Mora tleh khan in tihchhiat a nei nual a, Disaster Management & Rehabilitation (DM&R) Department chhinchhiah danin he thlipui hian in a tihchhiat vek (fully damaged) 5 – Aizawl District, Lunglei District leh Serchhip District ah 1 theuh, Champhai District ah 2 – a nei a, nasa taka a tih chhiat mahse a vaia chhe lo (severely damaged) 8 – Lunglei District ah 6, Siaha District ah 2 – a awm bawk a, chhe nasa lo, bang thenkhat leh inchung rangva thenkhat a hawk (partially damaged) 124 – Aizawl District ah 3, Lunglei District ah 9, Siaha District ah 11, Champhai District ah 60, Serchhip ah 8, Lawngtlai District ah 33 – a awm bawk.

Heng bakah hian cyclone in a kentel ruahsur nasa avangin Aizawl District ah leimin in In pakhat a tichhia a, Lunglei District ah school building pathum te chu nasa takin a tichhe bawk a. Thlipui hian Siaha District Hospital building thenkhat lenchhia in damdawi in quarter pathum a len chhe nual bawk a, Champhai District ah Biak In pahnih leh Kohhran building pahnih a len chhe nual bawk a, Kolasib, Serchhip, Mamit leh Lawngtlaiah erawh thil tihchhiat dang a nei lo a, mahse, thlipui hian current hrui tam tak a lenchhiat avangin eng inpekna a khaihlak nasa hle a, ruah nasa taka surin hmun tam takah lei a ti min bawk.

 

IAS officer turin mi pali chhawpchhuak

Mizoram Civil Service ni lo, service dangin Indian Administrative Service-a luh theihna tura hmun ruak pakhat an neih hnawhkhat turin May ni 31 khan mi pali chhawpchhuah an ni. DP&AR in IAS officer ni tura dil thei chin – Gazetted Officer chin, tluang taka kum 8 thawk tling tawh, kum 54 la tling lo – a tih mi 31-in dilna an thehlut a, heng mite hi vawiin khan Chief Secretary kaihhruai Screening Committee hma ah interview hmachhawnin mi pali – Benjamin L Tlumte, Mizoram Engineering Service; Dr. Lalhriatzuali Ralte, Mizoram Health Service; Laldinpuia, Mizoram Finance & Accounts Service, RK Nithanga, Mizoram Agriculture Service – te chu Union Public Service Commission Chairman kaihhruaina hnuaia IAS lak tura chhawpchhuah an ni.

 

Online chiahpuam laka fimkhur turin mipui chah

Mizoram Police chuan May 31 khan thu chhah siamin mipuite “Online Chiahpuam” laka fimkhur turin a hriattir. Police chuan online chiahpuam a tih mai hi heti hian a sawifiah: “Tunlai hian Social Media-ah internet kaltlanga sumdawnna lam hawi emaw hamthatna tawktarh a mi bum tum an hluar chho hle a hriat a ni a. Heng online ponzi scheme-ah te hian sum engemaw zah deposit-in member a nih theih a. Member-te hi online task hrang hrang tih tur an lo pe thin. Entirnan: website tlawh te, movie download te, Youtube, Games leh Applications download te, Facebook leh Twitter thenkhat lo ‘like’ te. Heng hna an thawh atang hian member-te hian hlawh an hmu thin. Tin, hei bakah hian member pakhatin member thar (downline) an hmuh in hlawh (commission) an nei ve bawk thin. Internet kaltlang a social media a sum hmuhna tura in zuar tam tak te hi Online ponzi scheme (internet kaltlanga chiahpuam) an ni ngeia hriat a ni a. Tin, Online ponzi scheme te hi Chiahpuam business model nen inang khat reng ni a hriat a ni. Member lo ni tawh ten an income a pun theih nan an downline tur member thar an zawng a. Sum siamna dang mumal tak tarlan tur an nei lova, member thar te deposit hi an chunga awmte sum hmuhna hnar ber nia hriat a ni,” tiin.

 

 

Mi pahnih tui tla, ruang hmu

May 28 tlai dar 3:30 vela Reiek kai Tlawng luia chesual Lalawmpuia (19), Leitan veng ruang chu May 31 khan Sairang balu lakna bulah hmuh a ni. Sairang YMA hruaitute hnen atanga thu dawn danin Lalawmpuia ruang hi rawn lang chhuak tawhin tui in a rawn len thla chu balu late’n an lo hmu a, tui atangin an la chhuak a, police-te’n a ruang hi hlawmin Police Station ah an la a, an endik hnu ah a chhungte hnenah an hlan a, an hmuh ni hian vui liam nghal a ni.

Tin, May 27 tlai dar 6 vel khan Lalawmpuia (19) s/o C Lalnghakliana Serchhip Vengchung chu Mat luia Chawmkai ah a tla hlum. Lalawmpuia hi a thiante nen Mat luiah hian inti hlim turin an kal a, tuia an cheng chu Lalawmpuia hi an hmu ta lo a, zawn vak ngaihna an hriat loh avangin ram kal haw te punin anni hian an tui chenna li chu dapin a ruang hi an hmu ta a ni.

 

Khehpuam thahnem tak man

Central YMA hnuaia ruihhlo do pawl SRS, CID Crime leh Kolasib Sub-Hqrs. Kumpuan Committee tangho te chuan May 26 zan dar 11 vel khan Vairengte ah khehpuam – pseudoephedrine – mum 5,28,000, kg 55-a rit an man a, he damdawi h Rs. 84,48,000 man hu niin bawhzui ngai te an bawhzui zel a ni. SRS-ina damdawi an man tawh chinah chuan hemi tuma an man hi a la tam tham ber niin an sawi.

 

NEDP hnuaia entrepreneurship prog hawng

New Economic Development Plan (NEDP) hnuaia peng pakhat Enterpreneurship Development  Scheme (EDS) hmalaknaa E-Summit leh Business Plan Competition vawi khatna chu May 30 khan Chief Secretary Lalmalsawma’n Chief Secretary Conference Hall ah a hawng a, he intihsiakna turah hian Mizoram  State Entrepreneurship Development Monitoring Committee (MEDMOC) leh IIM Kolkata  Innovation Park te an thawk dun dawn a ni. NEDP hnuaia Entrepreneurship Development Scheme hian a tum ber chu mahni kutkawih leh ngaihtuahna hmanga thalaite sumdawnna leh eizawnna ngelnghet dinpui a ni a. Hemi atana Entrepreneurship Summit leh Business Plan Competition buatsaih  turah hian Indian Institute of Management (IIM) Kolkata Innovation Park chu “knowledge partner” an ni dawn a, he thawhhona hnuaiah hian E-Summit neih bakah Mizorama Entrepreneurs te zirtirna leh sumdawnna thar tan duh te tan intihsiakna hmanga tanpuina  leh hamthatna  dawn theihna tur a awm dawn a ni.

 

Thutharthehdarhtute’n NEDP zir

Mizoram Journalist Association (MJA) member-te tana New Economic Development Policy (NEDP) zirhona chu May 31 khan I&PR Auditorium ah neih a ni a, Finance Minister Lalsawta leh State Planning Board Vice Chariman te’n an hmanpui.

 

Rampuma lungawi lohna zawmin Mizorama damdawi zuarte’n dawr khar

Mizorama damdawi zuar intelkhawm Mizoram Chemists & Druggist Association (MCDA) chuan rampuma damdawi zuar intelkhawm lungawi lohna thlawpin May 30 khan nilengin dawr an khar.

MCDA sawi danin sorkar laipuiin online hmanga damdawi chah theih tura ruahmanna a siam chu rampuma damdawi zuarte’n tha lo tiin hei hian ruihhlo a tih hluar phah an hlauh avangin an do niin an sawi a.

Damdawi chah theihna tura E-Portal a siam chu an duh lo a, Central Drug Act chu an harsatna te hriatthiam sak a, siam that sak turin an ngen niin an sawi bawk.

 

India aiawhtu Mizoram Taekwondo Team Champion, medal 27 hawn

Bhutan Open International Taekwondo Championship vawi thumna leh International Poomsae Championship vawi hnihna, May 26 atanga 28 inkara Bhutan khawpui Thimpu-a neihah India aiawha tel Mizoram Taekwondo Team chuan gold medal 13, silver medal pariat leh bronze medal paruk la in Team champion nihna an hauh.

He Championship ah hian ram hrang hrang 30 atangin Teaekwondo khel thiamte an tel a, Bangladesh chu pahnihna niin Bhutan chu pathumna an ni.

 


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s