NLUP kalpuinaa hmala tu ber tur a ruat, khawtina NLUP committee te chu engmah tih tir an ni lo

NLUP Manual-ah chuan he policy innghahna bulpui ber leh a hnungzangruh nia sawi theih hial chu a thuthmun ngeia awm, khaw tina NLUP committee – Village Level NLUP Committee (VLNC) – te an ni a. Mahse, an tihtur hi Aizawl atangin tih sak vek an ni

NLUP Logo

Kum 2008 tawp lama Congress party-in sorkarna a siam khan inthlan hmaa a lo tiam angin New Land Use Policy (NLUP) chu kalpui turin hmalak tan mup mup a ni a, kum pawh a vei hma in kum 2009 chhung ngeiin NLUP Manual chu peihfel niin, he manual hian sorkar hmalakna lian ber leh sorkar hotute’n “Pathian Program” ti hiala an koh chu kalpui a nih dan tur a duang a, a kawng duan pawh chu a tha ngang mai.

NLUP Manual-a a lan dan chuan he policy innghahna bulpui ber leh a hnungzangruh nia sawi theih hial chu a thuthmun ngeia awm, khaw tina NLUP committee – Village Level NLUP Committee (VLNC) – te an ni a. Heng VLNC theuh te Chairman leh Secretary te hi NLUP Implementing Board (NIB) thlan tur an ni a, member te erawh chu District tina Bawrhsap-te’n pa challang te zinga mi an ruat tur a ni thung.

VLNC te hian anmahni huam chhung khua theuhah hian ram hman dan tur te, khawi lai hmun nge mimal leh khawtlang ram, khawi lai nge ramngaw tih te duang fel vek tur an nih bakah khawi lai hmun ah nge thlai chin ni se tih leh NLUP dawng turte thlengin an thlan tur a ni a. Tin, NLUP dawng turte zingah ram nei lo an awm chuan ram theh kawngah pawh hma la tur an ni a, khaw chhunga NLUP hnuaia hmalak dan tur leh hmalak a nih huna a hnarkai tu ber tura ruahman an ni bawk.

CAG report chungchanga NLUP Implementing Board insawifiahna thuchhuah

Hetianga VLNC te hnena mawhphurhna pek a nih chhan pakhat chu khawkhatah thlai chi khat (One Village, One Crop) chin a nih theih nan a ni a, hmun khata thlai chi khat chin a nih chuan a leitu turte tan lei a awlsam ang a, hetianga hralh a awlsam phah a nih chuan a chingtute tan pawh a hlawk zawk tura ngaih a nih vang a ni.

NLUP Manual-in heti taka VLNC te mawhphurhna a pek san si lai hian a takah chuan VLNC-te’n an mawhphurhna an hlen theih nan hmalakpui an ni miah lo thung tih chu CAG-in a hmuchhuak a, an mawhphurhna te chu lehkha thema ziak chauh a ni ber.

Tarlan tawh angin, VLNC te theuh hian anmahni huam chhungah ram hman dan tur te, eng thlai nge chin tur tih te, khawi lai nge mimal leh khawtlang mimal ram ni a, khawi lai nge ramngaw tih te an chhinchhiah vek tur a nih laiin heti zawnga hmalak hi a awm miah lova, khawtina NLUP hnuaia hmalak dan tur te pawh VLNC-te duan tur a nih laiin, hetiang awm hauh lo hian line department te chuan NLUP sum an sem a, policy hmalak dan hi a buaichuar phah ta vek niin CAG hian a sawi a.

VLNC te ngaihchan hmasak an nih loh avang leh NLUP dawngtute trade thlan chu thlak kual reng a nih avangin “One Village, One Crop” pawh chu a hlawhtling ta lova, khaw khatah thlai chi hrang hrang a nih bakah trade chi khat te pawh hmun hrang hrangah kalpui an nih phah ta a ni.

Tin, VLNC-te’n khaw tina NLUP dawngtute an thlan hma hian ram pum huapa NLUP dawng tlak te chu chhinchhiah ni se tiin sorkar in Young Mizo Association (YMA) chu zirchiang hmasa (baseline survey) turin a ruat a.

YMA chuan khaw 813 lai a zirchian hnu ah NLUP dawng tlak chhungkaw nuai 1.59 chuang an awm tih a hmuchhuak a. NLUP Manual chuan NLUP dawng tlak zinga dawng turte chu VLNC te tih tur ti mahsela, Chief Minister chairman-na hnuaia thawk NLUP Apex Board chuan April 2010 khan NLUP dawng tur chhungkaw nuai 1.2 lai chu a thlang chhuak ta nawlh mai a.

VNLC te hian YMA-in a zirchianna hi an hmu ve hrim hrim tih record-na engmah a awm lo mai nilovin, NLUP Apex Board hian heng chhungkua te hi eng tehna hmangin nge a thlan tih chu record ah a lang chuang bawk lo niin CAG chuan a sawi.

NLUP

NLUP Apex Board hian NLUP dawng tur chhungkua te a thlan tak ngawt mai hnu hian thlan dan an nih dan ah sawiselna (complaint) 1,389 lai a awm ta ngei reng a. NIB chuan heng complaint te hi a bawhzui ti mahsela, an bawhzui dan te chu CAG hi a hriattir chuang lova.

Tin, hetianga NLUP Manual-in a ruahman dan lova NLUP dawngtute thlan an nih chungchang hi CAG chuan a chhuichiang a, NLUP dawngtu chhungkaw 7,942 lai a kawm hnu chuan an zingah NLUP dawng thei lo tura NLUP Manual-in a tih chhungkaw 1,400 aia tlem lo an awm tih a hmuchhuak nghe nghe.

1,59,528

YMA-in a zirchian hmasakna a NLUP dawng tlak chhungkua a hmuh zat

813

YMA in khua a zirchian zat

1,20,000

NLUP dawng tura NLUP Apex Board-in a thlan zat (heng chhungkua te thlan an nih dan tehfung hi CAG-in a hmuzo lo)

0

Mizoram pum a VLNC-te’n NLUP dawng tur chhungkua an thlan zat (VLNC te hi NLUP Manual-in NLUP dawngtu tur chhungkua te thlang tura thuneihna a pek an ni)


 


One thought on “NLUP kalpuinaa hmala tu ber tur a ruat, khawtina NLUP committee te chu engmah tih tir an ni lo

  1. Like e…

    2014 kum tawp lamah Village Councils Act chu amend a ni a. Chutah chuan Mizoram khaw tinah Gram Sabha (vantlang rorel inkhawm) an awm ṭhin tur thu leh, chu Gram Sabha chuan an khaw chhunga Development Scheme engah pawh individual beneficiary te a thlang ṭhin ang’ tiin dah a ni nghe nghe a. Hei hi, NLUP chauh lo thil dang reng rengah pawh kan hmang lo hle a. Tun issue-a NLUP trade thu-hla ah pawh, khawtual mite inrawn khawmna FORUM tur chu rural area-ah he Gram Sabha hi a ni a. Chu chuan decision making power sang tak nei tur a ni a. Mahse a taka kan thiltih danah mipui chu kan dah zero hle si. Hetianga primary stakeholder – program ṭangkaipuitu tur mipui te dah zero hi tun laia Sorkar ngaih pawimawh – “Sustainable Development” atan tih loh turte zinga mi a ni ṭhin.

    Urban (Municipal Area) ah pawh Ward Development committee te din ni mah se, LC level-ah mipui inrawn khawmna a awm ngei a ngai a. Chu aia te zawk e.g. YMA Section level ahte pawh hian awm zel se duhthusam a ni.

    Program implementation eng pawh a hlawhtlinna leh chhunzawm (sustain) a nih theihna’n a local level ah institution nghet tak an tel ve zel a ngai a ni.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s