NLUP vawkte sem zingah pathum zela pakhat aia tlem lo thi, NIB hotute’n an thi tih a hre lo hrim hrim

Mizote’n sa kan ei hnem ber leh tui kan tih ber nia sawi theih vawksa hmanga eizawnna hian tunhnaiah hriat a hlawh lehzual hle a, hetianga a lar tak em em chhan pakhat ni aa lang chu vawkvulhte’n vawk sang tel teh meuh, sing kai thelh kum li chhung leka damlohna laka an chan vang a ni.

 

 

IMG-20160504-WA0011
Kum 2016-a PRRS leng chuan Mizoram hmun hrang hrangah vawk a suat nasa hle

 

Porcine Reproductive and Respiratory Syndrome (PRRS) avanga heti taka Mizoram vawk suat an nih chungchang hi enga pawh chu ni se, Mizoram sorkar chuan vawkvulh hi eizawnna tlak a ni tih hria in New Land Use Policy (NLUP) hnuaiah pawh vawkvulh ti lar deuh deuh turin hma a la nasa hle a.

NLUP hnuaiah hian kum 2011 March thla khan Animal Husbandry and Veterinary Department (AH&Vety) Director-in thil chi hrang hrang atana hman turin cheng vbc 4.42 a sanction a, he sum sanction zatve chuang hret, cheng vbc 2.20 chu vawkvulh a changtlun zawk theih nana vawk vulhna hmunpui (Pig Farm) hmun thum ah leh vawk tihpunna hmun (Piglet Multiplication Centre) 16 lai sakna tur a tih a ni. Heng Pig Farm leh Piglet Multiplication Centre ami te hi NLUP hnuaia vawkvulhtute hnena pek chhawn leh tura ruahman a ni bawk.

May 2013 khan AH&Vety Director chuan Utilisation Certificate thehlutin cheng vbc 4.40 hi a hmanna turah hman vek niin a sawi a. Mahse, kum thum a liam hnu August 2016 khan Comptroller and Auditor General of India (CAG) chuan Piglet Multiplication Centre te hi a tlawh kual a, centre 16 zinga 11 ah chauh hnathawh a ni tih a hmu a, centre pali te chu hluihlawn tawh niin centre pakhat chu hman tan a lo la ni lo hrim hrim tih a hmu bawk. Hei vang hian ruahman angin heng centre te hi hman tangkai an ni lo tih a lang chiang tiin CAG chuan a ziak.

Tin, Thenzawla Pig Farm a hmuna a tlawh tum hian CAG chuan vawkpui 100 awm tur si vawkpui 19 chauh a awm tih a hmu bawk a, department hotute chuan PRRS len vangin NLUP vawkvulhtute hnenah duh ang tawk sem a ni thei lo niin an sawi.

PRRS hi Mizoramah tum hnih a leng tawh nia hriat a ni a. A vawikhatna chu kum 2013 khan a ni a, khami kum March thla khan leng tanin vawk 3,000 chuang daih an thih phah a. Tin, kum 2016 khan a leng leh bawk a, a len hmasak aia tam mah an thi leh a nih kha.

Hetianga natna a thlen hma sorkar kum 2012-13 khan Pig Farm leh Pig Multiplication Centre te hian vawkte 3,810 lai vulhin NLUP dawngtute hnenah a hralh chhuak a. Amaherawhchu, heng vawkte 4,000 tling lo hian NLUP hnuaia vawkvulhtute mamawh zat – vawkte 42,768 – chu a phuhruk lo nasa hle a, mamawh zawng zawng za-a pakua (9%) pawh a pha lo tihna a ni tiin CAG chuan a sawi a.

NLUP Implementing Board (NIB) hotute chuan kum 2013-a PRRS a len tak vang khan vawk vulhna hmun te chu tih ruah a, natna leng thei lo tura sawngbawl a ngai niin CAG an hrilh a. Hetiang a nih vang hian duh ang tawkin vawkte pawh hi vulh theih a ni ta lo an ti bawk.

CAG chuan kum 2013-a PRRS len avanga vawkte mamawh ang zat supply theih a nih loh thu chu pawmin, a bul berah chuan sorkarin hri leng lakah a inven zawh loh vang a ni a ti a.

Tarlan tawh thin angin, PRRS hi kum 2013 hmalam kha chuan India ramah a len hriat ngai a ni lova, khami kuma a lo len tan phat atang khan Myanmar-ah rinhlehna a fu ber a, a chhan chu Myanmar-ah hian he natna hi a lo leng fo tawh thin nia hriat vang a ni.

He rinhlehna ti belhchhah leh zual turin khami tum khan Myanmar hlat deuh, Mizoram thlang lama awm district pahnih tih lohah chuan PRRS kha a leng vek a ni.

Heti hi nimahsela, PRRS thawm a daih hnu khan NLUP hnuaiah AH&Vety chuan vawkte sem a ruahman leh ta a, second phase ah chuan chhungkaw 7,006 hnenah vawkte pariat theuh sem tur tiin vawte pakhatah hian cheng 3,000 theuh seng turah a in ngai a.

Mahse, April 20, 2015 khan AH&Vety hnuaia State Purchase Advisory Board chuan NLUP hnuaia vawkte sem tur te hi tih tlem a, vawkte te chu a man to zawka lei ni se tiin thutlukna a siam ta daih thung. Vawkte pakhat cheng 3,000 theuha lei a, vawkte pariat zel chhungtin te hnena sem tura ruahmanna chu thlakin vawkte pakhat chu cheng 5,000 in lei ni zawk sela, chhungkaw tin te hnenah vawkte pariat nilovin vawkte paruk zawk sem ni se tiin SPAB chuan ro a rel.

SPAB meeting minutes-a a lan dan chuan NLUP second phase dawng turte hnenah hian a vaiin vawkte 14,012 lai sem a nih tawh avangin [dawngtu pakhatin vawkte pahnih zel an dawng tawh angin a chhut theih awm e], a dawngtu tur te hnenah chuan sem hmabak vawkte pali zel sem ni sela, chung vawkte sem turte chu mimal pakhat, Champhai Zotlang ami C Vanlalhmuaka hnen atanga lei ni se tiin a inziak niin CAG report-ah a lang a.

CAG ziah zel dan chuan kum 2014 October thla leh kum 2015 November thla chhung khan AH&Vety hian C Vanlalhmuaka hnenah hian vawkte supply nan cheng vbc 13.51 a pe ta a ni.

Hetianga vawkte suppy a nih dan hi CAG chuan a bihchiang a, district palia C Vanlalhmuaka vawkte supply dawngtu 468 a kawm a. Anni hian C Vanlalhmuaka vawkte hi 1,872 lai an dawng tih an sawi a, mahse, an dawn zawng zawng zingah hian 689 (36.81%) lai chu an thi zui niin an sawi bawk.

Heng vawkte thi te hi suma chantir chuan cheng nuai 34.45 man zet a tling.

CAG chuan hemi chungchang hi NIB hnenah a thlen a, NIB hotute chuan December 2016 khan vawkte heti zat an thih chhan hi an hriat loh bakah, heti zat an thi tih pawh hi report an la dawng lo hrim hrim tiin an chhang a.

CAG chuan heti khawpa vawkte an thih nasat chhan hi hriatchian a nih a, an thih chiam mai chu tihtawp a nih loh chuan sorkar ruahmanna a hlawhtling thei lovang tih a hlawuhthawn awm niin a sawi a, district palia NLUP vawkte dawngtute 500 tling lo te’n an vawkte dawn zaa 37 dawn an thi an tih chuan district dangah pawh hetiang hi thil awmdan a ni lovang tih pawh a sawi theih loh niin a sawi nghe nghe.

 

42,768

NLUP hnuaia vawkte sem tum zat

 

3,810

Kum 2013 March thlaa PRRS Mizorama a len hmaa vawkte sem zat

 

7,006

Kum 2013 PRRS len hnu a NLUP vawkte dawng zat chhungkua

 

28,024

C Vanlalhmuaka’n  NLUP hnuaia vawkte a supply zat

 

vbc 13.51

NLUP vawkte supply tura C Vanlalhmuaka sum pek zat

 

36.61%

CAG-in a zirchian china C Vanlalhmuaka NLUP vawkte sem za zela thi zat


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s