Ramchhung/ Modi leh a kaihhruai Hindu sakhaw zuitute an len zel ang bawkin yoga zirtirtu pakhat a hlawk zual zel

FILE PHOTO: Modi and Ramdev raise their hands as they chant patriotic slogans during a Yoga Mahotsav in New Delhi

Narendra Modi chuan a bula thu, engmah bun loa a mal chung a ke lehlam hlang, kawr rawng sendang (saffron) haa hmuihmul leh khabe hmul sei tak nei chu a beng bulah a hriat phawk tawk lekin a bia a, hei hi March 23, 2014 tlai lam a ni a, India Parliament inthlanpui hma lawk niin vantlang inkhawm neihna hi New Delhi a ni.

Minute rei lo te hnu ah chuan yoga lalpa leh hausa tawntaw Baba Ramdev chu thusawi turin a rawn ding chhuak a, tawng rinna hma ah chuan dingin Modi tan chuan a rawn campaign ta a, “Mi dangte in hrilhhria ang tiraw? Inah in thu mai mai loving tiraw?” a ti a, mipuite chuan phur zetin, “Aih,” tiin an chhang a.

A thusawi ah chuan Modi a then a, Baba Ramdev erawh a nui thung a.

He politician leh mi hausa tawntaw an tih pa hian khawvela sakhaw behchhana political party lian ber sorkar tir tumin hma an la dun a, hmun hrang hranga campaign-a an zin kual atanga thla hnih hnu ah chuan Modi-a kaihhruai Bharatiya Janata Party (BJP) chuan khawvela inthlanna lian berah Congress party chu paihthla in thuneihna a chang ta a.

Modi hian hnehna a chan chhan chu India ram sum leh pai dinhmun tihthat a, sumdawng te hamthatna tur a tiam vang a ni a. Mahse, hemi piah lamah hian a tlin chhan lian tak pakhat chu India India hi Hindu te’n Hindu te tan a ro an relna hmun a ni tur ani tih ngaihdan a pawm a, a au pui vang a ni.

Modi leh Ramdev te hi he inthlanpuiah hian BJP chakna hnar an ni a, yoga hotupa hi India ram, Hindu sakhaw zuitute tamna ramah na na na chuan mi hriat hlawh leh mipui rin a ni a, ei leh in lam chi a company phei chu he ramah hian company lar leh thang duang ber a ni.

Hetia BJP in hnehna an chan tak avang hian BJP pawhin Ramdev-a duh dan thenkhat leh hmathlir te pawh tihhlawhlin tumin hma an la tan ta a.

BJP in India rama thuneihna an chan atang hian state hrang hrang, BJP lalna hmunah  chuan Ramdev-a company hian ram lak nan dollar maktaduai 46 aia tam mah sorkar atangin tlawmna (discount) a hmu a, hei hi Reuters in heng state-a lehkha pawimawh tak tak a zirchian leh official thahnem tak a kawmna atangin hriat theih. A tobul ah chuan, Ramdev-a company Patanjali hian BJP sorkar phalna thiltithei em em mai a dawng a ni.

India ram, pawisa in thil a tihtheihna ramah hian eirukna nuaibo tum Modi-te’n hneh takin thuneihna chang mahse, Ramdev-a company in duhsak a hlawh dan hmuh hian thil dik lo tam tak a awm niin a rin theih.

Inthlan hma lawka Modi leh Ramdev-a te’n Delhi-a vantlang inkhawm an neih atang kar thumna ah Ramdev-a pawl pakhat chuan YouTube kal tlangin video pakhat an ti chhuak a, chu video ah chuan BJP-a hruaitu lawk tak takin intiamkamna an nei a.

Reuters in lehkha pawimawh tak tak a neih atanga a lan dan chuan heng BJP hruaitu lawk tak tak te hian thil pakua ah intiamkamna hi an nei a, chung zingah chuan Hindu sakhaw be tu te tana ran thianghlim, bawng talh khapna te pawh a tel a. YouTube video ah hian hming ziaktu nia lang te chu Home Minister Rajnath Singh, Finance Minister Arun Jaitley, Foreign Minister Sushma Swaraj leh Transport Minister Nitin Gadkari te an ni a.

“India ram mipui maktaduai tam takte rinna ka siam sak avangin heng hruaitute hian an hming an ziah hnan a, mipuite’n he sorkar ah hian thil inthlakthlengna (change) an hmu duh,” tiin video ah chuan Baba Ramdev chuan a sawi a, “Heng intiamkamna point pakua te hi kan siam a ni,” tiin a sawi belh bawk.

Video-a intiamkamna ziaktu ve tho, BJP hranghlui LK Advani chuan an intiamkamna chuan Ramdev nen inzawmna a nei lo tiin pha mahse, a Personal Secretary Deepak Chopra chuan, “Party thil tih niin party hruaitu lawkte chuan an hming an ziak vek,” tiin a sawifiah thung.

BJP in India rama thuneihna an chan chiah atang khan Baba Ramdev-a company hi masa takin a thang a, kum 2013 March thla tawpa an kum khat sum che dollar maktaduai 156 chu kum 2015 March thla tawp ah chuan dollar maktaduai 322 a ni tawh a, kumin May thla tir khan Ramdev-a ngei in a company sum hmuh chuan dollar tluklehdingawn 1.6 a pha tawh tiin a sawi bawk.

Ramdev-a company hian hanawhna hlo atangin thingtlang kilkawr ber ami pawh ni se chhungkaw tin mamawh an siam a, ei leh in lam ni se buh atanga chhang, chhungkaw tinin an mamawh chu an siam chhuakin an zuar a, sipai canteen tinah an pe bawk a, Parliament canteen-ah pawh a company thil siam hi ei tura siam nasat ber pawl a tling.

Fakna lamah pawh Patanjali hian ayurveda damdawi (ayurveda), hmanlai India rama an lo tih than tawh siamtu an nih thu an tlangaupui nasa a, an fakna ah hian Modi-a’n ram dang siam aia India ram siam ngei hman a that zia pawh nasa takin an tlangaupui thin.

 

Modi nen thian tha tak an ni

Baba Ramdev hian Modi nen thian tha tak an nih thu a sawi tawh a, nikuma Reuters in Himalaya tlang bula Haridwar-a a kawmna ah Modi nen an inkawmngeih thu hi a sawi zauh tawh a. Hemi tum hian Ramdev-a hi amah vengtu engemawzat, kawr dum vek a inthuam a silai keng te’n an hual.

India Parliament inthlanpuia BJP in nasa taka hnehna an chan chungchang ah erawh a infak vak duh lo a, “Mahni an infak vak ngai lo, hnehna an chan theih nan a tirah hma ka la a, a bak ah ka inrawlh tawh lo,” tiin a sawi.Modi-a’n Prime Minister Office (PMO) a luah atang khan Patanjali company hian ram acre 2,000 chuang chu man tlawm zawkin a lo nei tawh a, man man zawka ram a neihna te hi BJP sorkarna state an ni tlangpui. Congress party-in lalna an chan chhung erawh kha chuan Ramdev-a company Patanjali hian a ram neih sa tam tak a hralh zawk thin kha a ni.

Hetianga ram a lei thar leh chur chur hnu ah hian Patanjali hian BJP lalna state-ah te chuan ram a leinaah hian za-a 77 thlengin discount a hmu thin tih Reuters chuan sorkar lehkha a en atang te, official a biak na atang te leh lei leh ram hralh lama eizawng te a kawmna atangin a hmuchhuak.

Hetih lai hian Ramdev-a company hian an ram lei ah te chuan thilsiam chhuahna hmunpui din an in tiam a, an ram leina hmun mipuite tan hna an siam niin an sawi bawk a, India anga hnathawhtur neilo tamna ramah chuan fak a hlawh phah hle.

Nikum September thla khan Nagpur khawpuiah Patanjali company hian ei leh in sawngbawlna thar an dinna chu Transportation Minister Nitin Gadkari-a’n a hmanpui a, hetah hian company hotu zinga pakhat chuan a mobile phone-a video la chungin Minister hnenah hian kawng sial sak turin a ngen a, Gadkari chuan a thutna atangin nui chungin, “Kawng in mamawhna ah hian National Highway sial kan tum a, hna han thawk phawt ula, tender kan chhuah dawn nia,” a ti a, Gadkari leh Maharashtra Chief Minister Devendra Fadnavis inkara thu Baba Ramdev chuan nui chungin kut a lo beng.

Hemi hmuna Patanjali ram lei hi 234-acre a zau niin, he company hian cheng maktaduai 590 velin a lei a. Mahse, CM Fadnavis ngeiin Maharashtra Assembly a hrilh dan chuan helai ram hi sumdawnna hmunpui bul anih vangin cheng tluklehdingawn 2.6 man hu lai a ni thung. Hemi tum hian Fadnavis chuan Patanjali hi tlawm taka ram lei tir anih chhan chu helai hmun hnai ah hian kawng a awm that loh vang niin a sawi a. Mahse, Reuters-in a hmunah ngei a tlawh chuan helai hmun bulah hian police station a awm a, fire station a awm bawk a, a kawng an chiah ah chuan sumdawnna hmunpui (corporate park) a awm bawk tih a hmuchhuak thung. Helai hmuna ram lei leh hralh kawnga sorkar peng pakhat aiawh official Deepak Joshi chuan Patanjali hian an thilsiamna ah te a bul hnai ami hmanrua an hman tur thu leh loneimi 2,000 vel an sumdawn pui tur thu te leh a chhehvel thingtlang mi 5,000 emaw chu hna a siamsak dawn niin a insawi a ti a, “Patanjali te chu India company ania, state chi hrang hrangin a thlawnin ram an pe a lawm,” tiin a sawi bawk.

Joshi thusawi hian dikna lai a nei tho mai.Patanjli-in tunhnai a ram a neih thar lian ber chu Hindu hmunpui ni a ngaih lemloh, Assam chhunga Bodoland Territorial Council huam chhungah a ni a, helai a Patnjali ram neih hi acre 1,200 zet a zau a ni a, Assam sorkar lehkha pawihmawh chi hrang hranga a land an chuan he company hnenah hian sorkarin helai ram hi a thlawnin a pe.

BTC a lalna chang mek tu Bodoland Peoples’ Front hi kum 2014 khan Congress party nen an inthen a, BJP an thawhpui ta zawk a ni a. Patanjali company hian hemi kum October thla khan ram hi an chang ta a ni.

Nikum November thla khan Uttar Pradesh ah pawh Patanjali company hian ram, a hlutna tur aia zaa 25-a tlawmin a lei bawk a.

 

An thil siamte sorkar in a hlut

Modi a lal atanga kum khat leh a chanve chhung hian sorkar chuan ayurveda a hlut hle tih alang tawh a, yoga tilar tu company te leh ramhlul damdawi siam company te chu sorkar in a vur nasa a, hetianga sumdawng thin Hindu puithiam te chuan sorkar atangin hamthatna an dawn bakah chhiah awl an ni nasa hle bawk.

Hetiang company te in el pui, ram dang company te chuan hetianga sorkarin ramchhung company te a puih nasat bik thu hian harsatna a thlen an ti fo tawh reng a ni.

Modi-a a PM atanga kum chanve lekah a sorkar chuan ayurveda damdawi enkawltu sorkar peng pakhat, a hmaa hriat hlawh lo em em mai chu Ministry ah a hlangkai a, yoga tih lar leh ayurveda damdawi chu a hna bul ber a ni a, heng thil ah hian Patanjali sumdawnna hi a lian chungchuang hle a, tin, Patanjali hi hemi lamah a lian ber anih rual hian Ministry hian Patanjali thilsiam te chu a enkawl vek bawk tihna a ni.

Chu chauh pawh chu a la ni chuang lo: kum 2015 khan Finance Ministry chuan yoga chu mi te tanpuina thil ani tiin a puang a, hei hian yoga tilar tute chu chhiah nasa takin a awl bawk.

Tarlan tawh angin, Patanjali-in Youtube-a video a tihchhuah, intiamkamna a hming ziaktu pakhat chu Arun Jaitley, Finance Minister ni lai mek hi a ni nghe nghe.

 

Thil a ti mai mai lo

Modi leh Ramdev te hian inanna tak an nei a. Modi hi rel chawlhhmuna thingpui sem thin a ni a, Ramdev pawh hi lo neitu fapa niin kum 1960 laihawl vel khan thingtlang khuaa piang a ni.

Sumdawng mi pakhat Jeevraj Patel chuan Baba Ramdev a hmuh hmasak ber chu kum 1992 a nih thu sawiin Haridwar-a an khua ah yoga tihna hmun tereuhte neiin ayurveda a tuipui tawh a ni a ti a. Patanjali Managing Director Balkrishna chuan Baba Ramdev nen hian kum 1995 khan ayurveda siamna lamah an thawk dun niin a sawi bawk a, chutih lai chuan cheng 3,500 chauh an neih thu leh cheng 10,000 an puk thu a sawi a.

An thil siam reng rengte chu a phurh kual nan pawisa an neih loh avangin lirthei hmang lovin anmahni in an phur mai thin a, nasa taka hna a thawh bakah yoga lam a tih avangin TV channel pakhat Aastha in mite theihna haichhuah lam an tarlanna ah Ramdev-a chu an hmu chhuak niin a sawi a, yoga a tih vel chu mite’n an hlut a, a sawifiah thiam bakah a tih dan a thiam avangin rei lo te ah Ramdev chu a lar ta hle niin a sawi.

Tunah chuan Baba Ramdev ram puma hriat lar a nihna chu a company pawhin a hlawk phah hle niin a thianpa Balkrishna chuan a sawi a, an company in hmachhawp an neih thar apiang te chu Baba thluak vek nia sawiin thil thar ngaihtuah vak an tan a tul loh thu leh hotupa an neih thu chhuang takin a sawi a ni.

Company lian tak neiin mi hausa tawn taw angin lang mahse, mawl leh ho te in an inchei a, nikum khan Forbes magazine chuan Balkrishna hi India rama mi hausa ber 48-na a ni a ti chungin Baba Ramdev-a erawh a hausakna hriat a ni ve lo a. Nasa taka zir chian ni mahse, a hausakna tak hi hriat a ni lo na chungin sumdawng hausa tawntaw a ni tih erawh a hriat a ni.

Baba Ramdev hian kum 2011 khan politics khel tanin Congress sorkar-a eirukna nasa takin a do a, kum 2013 atang khan Modi-a thlawptu langsar tak a ni tan a, mahse thlawp piah lamah nasa takin BJP lal nan a bei bawk.

Thu thehdarhtu company pakhat – Social Revolution Media and Research Pvt Ltd –

tih chu director pahnih neiin Patanjali hnuaiah din a ni a, Kar tin mai BJP information technology division nen he company a hnathawkte hi an inhmu khawm a, an company CEO Shantanu Gupta sawi dan chuan Twitter leh social media hrang hrangah te hmalak dan tur an sawi ho thin.

Ramdev-a hnuaia thawk te chuan an thawhpui sing tel the meuh chu Modi tana vote zawngin an penchhuak thin niin an sawi a, Mumbai-a khawsa Narendra Shastri, Patanjali hnuaia yoga zirtirtu pakhat chuan zing khawvar tanga tlai khathim thlengin BJP fakna thu inziahna lehkha them a sem thin thu a sawi.

Kum 2014 inthlanpui result puan a nih hnu ni hnih lek khan BJP hruaitu lian tak tak pahnih chuan Ramdev-a pawlte’n inhmuhkhawm an buatsaihna ah lawmthu sawi turin an chhim a.

Kumin May thla khan Haridwar-a Patanjali research institute hawnna khawmpui ah Pm Modi chuan Ramdev-a a ngaihsan zia tihlan nan kut a beng lauh lauh a, Ramdev-a pawhin chibai buk letin a nuih sun sun a, Modi-a’n thusawina hun a neih velah mipui pungkhawm thahnem em em hnenah chuan, Baba Ramdev hian ayurveda hi khawvel pumpui hmaah a pho chhuak dawn,” tiin a sawi.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s