Zu leh ruihhlo vangin police pali medical pension tir tawh

Mizoram Police hotute chuan kum 10 kalta chhung khan an nau te zinga mi 543 chu ruih vangin an hrem tawh a. Hetih lai hian kum 2010-17 chhungin police 720 zet chu chhan hrang hrang vangin an thi tawh a, MLPC hman tan kum 2014 atang khan kum khata police thi zat hian kum tin 100 a la pel ziah

 

September 9, 2014 khan Chief Minister Lal Thanhawla hovin CMO Cabinet Room ah Home Minister R Lalzirliana, police hotu lian leh Home Department hotute an thu khawm a, chutah chuan zu leh ruihhlo avanga police hnathawk tha thei lo te chu medical pension-a kal tir mai ni se tiin an rawt a.

Kha rawtna kha khauh taka bawhzui a nih leh nih loh The Frontier Despatch (TFD) in RTI dan hmanga Police Headquarters (PHQ) a zawh chuan khauh taka bawhzui a nih thu leh mi pali te chu zu leh ruihhlo vanga medical pension-a chhuah tir an nih tawh thu a chhan a ni.

Police pali zu leh ruihhloa fihlim lo medical pension-a chhuah tir te hming, an unit/battalion leh an post chelh hming zawhna erawh PHQ SPIO LR Dingliana chuan an mualpho theihna a nih avangin an hming, unit/battalion leh rank te chu, “Kan pe lo mai ang che,” tiin RTI ah hian a ziak bawk.

Medical pension-a kal tir bakah hian police chu an duty laia rui an in hrem zel thin bawk a, kum 2008 atanga vawiin thlengin zu leh ruihhloa fihlim lo 543 hrem (major punishment) an ni tawh a, heng mi te hming leh rank te hi SPIO hian tarlang lo mahsela, unit leh battalion tin a hrem tawk tawh zat chu a tarlang.

Police -2

MLPC Act hman tan hnu a Police Department in zu vanga damlo enkawlna’n sum engzat nge a sen tawh tih zawhna chu, “MLPC Act hman a nih atanga vawiin thlengin zu leh ruihhloa buai police te inenkawl nan sorkar ah MR engzat nge bill a nih tawh hi a hriat theih mai lova, a chhan chu MR bill kan dawna discharge certificate-a diagnosis ah hian zu vang tih ziak lovin an natna hming zel ziah lan thin a ni a, chuvangin zu vang a nih leh nih loh a hriat hran theih loh a ni,” tiin a chhang bawk.

 

Police
Chhan hrang hrang vang a Mizoram Police thi tawh zat

 

 

Zu vanga damlo an natna dik tak anga ziah tawh tur

Tarlan tawh angin, tunhnai kum hnih kum thum kalta khan Mizoramah zu ngawlvei leh zu in nasa damlo leh nunna chan hial an tam tih chu khawtlang titi a ni a, Police zinga kum khata za chuang an boral phei thin phei chu eptu pawlte’n sorkar lai beih nan an hmang hial a. TFD thu dawn dan chuan Mizorama damdawi in lun/lian ber, Aizawl Civil Hospital-ah pawh zu kaihhnawih damlohna chi hrang hrang vangin 2014 leh 2016 inkar khan kum tin chawhrualin mi 120 dawn an boral ziah a ni.

ACH ah pawh hian zu kaihhnawiha damlo engemaw zat chuan sorkar hnathawk lo te inenkawlna sorkarin a tum sak theihna Mizoram Health Care Scheme hnuaia bill thehluh an tum thin a. Tin, sorkar hnathawk te pawhin an inenkawlna senso chu sorkar tumsak an phut thin bawk a. Doctor te’n khawngaihin an damloh dan an ziahna ah scheme hnuaiah inenkawlna senso an bill ve theih nan an ziak ve thin bawk niin ACH hotute chuan TFD an hrilh a.

Mahse, MHCS hian zu vanga damlohna te chu a huam loh vangin MHCS thuneitute chuan hei hi ngaimawhin an vil ve reng a, hetianga ti lo turin doctor te pawh an lo chah tawh thin a, heti a nih avang hian nikum (2016) kum laihawl vel khan ACH Executive Committee meeting ah pawh hospital hotute’n zu vanga damlo chu scheme hnuaia an bill theih dan leh sorkar hnathawkte pawh MR an bill theih tura ziahsak tawh lo turin an hrilh nghe nghe a ni.

Amaherawhchu, tun hnai deuh khan MHCS hotute’n zu vanga damlote scheme hnuaia hmathatna hmuh tum an awm leh ta nia an hriat avangin ACH hotute hnenah thu an thlen leh a, tunlai hian hospital hnathawkte pawh an in hrilhhre thar leh mek niin TFD chuan thu a dawng.

 

Zu ngawlveina in ‘pumpelh theih loh’ natna a thlen thei: Assembly Committee

Hetianga hospital thuneitute’n hma an lak mek lai hian tunhnai khan Mizoram Assembly hnuaia Subject Committee – III chuan BPL chhungkua damlo te inenkawlna senso tumsak theihna RSBY leh sorkar hnathawk awm lohna chhungkuate inenkawlna senso an bill theihna MHCS hnuaiah zu avanga damlo te inenkawlna bill phalsak ni se tiin a theih dan kawng a awm nge awm lo zirchiang turin Health Department hotute a hrilh ve thung a. Hei hi Committee-in March thlaa Assembly hmaa report a pharh ah a chuang.

MLA rual te’n hetianga RSBY leh MHCS hnuaia zu vanga damlo te puih theih dan ngaihtuah tura department-ah rawtna an thlen chhan chu zu ngawlveina (“alcoholism”) hian “pumpelh theih loh” (“unavoidable”) natna a thlen thei ni a an ngaih vang a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s