Asia/ Philipines khawpui pakhat Islamic State mi firfiakte’n an lak chu Asia chhim chhak ram te tan ral khelna dar a ni

Philippines chhim tawpa Marawi khawpui ah kar hnih zet sipai leh Islamic State (IS) thlunzawm mi firfiak te chu an indo tawh a, an indo tirh khan heng mi firfiakte hian vengtute tukdawlin lung in an luhchilh a.

“Kristian te rawn la rawh u,” tiin mi firfiak te hi lung in chhungah hian an au niin helai biala lung ina an hotu pakhat Faridad P Ali chuan a sawi a, “He lung in ah hian Kristian sakhaw be tu mi pakhat chauh a tang a, a sa him nan Muslim leh sakhaw dang betute nen an khungho vek a, mi firfiak te pawhin tu ber nge Kristian tih an hre thei lo,” tiin a sawi.

IS mi firfiak pawl nia inchhal Maute group te hian tang dang te an chhuah lai chuan Kristian zawng an hnena pe turin ti mahse, an pek loh avangin tang dang an chhuah zingah chuan Kristian pa chu a tel ve niin Faridad Ali chuan a sawi.

Lung ina tang te an chhuah hnu rei vak lo ah chuan IS mi firfiak te chuan khawpui tam zawk chu an thu hnuaiah an dah tawh a, police station te beiin ralthuam eng emaw zat an neih belh bawk a, kawngpui te dang chatin anmahni rawn bei thei sorkar mi te lo bei let turin tanhmun an siamrem a, in chhawng chung atang te in silai kap thiam bik (sniper) te inring reng turin an dah nghal a.

Heng mi firfiak te hian darkar rei lo te chhungin mi 180 chuang an that der tawh a, mi nuai hnih chuang te chuan an khua chu an chhuahsan bawk.

Marawi khawpui thenkhat IS firfiak pawlte’n an lak avang hian Asia chhim chhak ram te chuan ralkhel dar an vaw ve nghal a, Iraq leh Syria rama inphen nana in hman a rawva tak taka an chet ang thin kha Marawi khawpui ah hian a hnai tih a chiang reng.

Tuna khawpui an lak tak vang hian helai bial vela anmahni thlawptute an pung sawt ang tih a hlauhawm bakah Muslim sakhaw zuitu, indona thianghlim duhtute chu helai ah hian an pung ang tih a hlauhawm hle niin Reuters chuan a sawi.

Malaysia Defence Minister Hishammuddin Hussein chuan, “Engmah ti loa kan thlir liam mai a nih chuan keimahni in kan tuar let ngei ang le,” a ti.

Helai ram inkal pawh dan hi a khirh lutuk loh avangin mi firfiak te hian bu an khuar ang tih a hlauhawm hle a ni.

 

Sipai hotu lian ban thut a ni

Tuna IS mi firfiak thlawptu Maute ho helaia an chet hi nikum June thla-a Philippines President atana Rodrigo Duterte thlan a nih hnua thil thleng lian tham hmasa ber a ni a, Thawhtanni khan Brigadier-General Nixon Fortes, Marawi biala sipai hotupa ber chu ban thut a ni a, sipai thu puangtu chuan Nixon Fortes-a ban thut a nihna chhan hi mi firfiak te chet vang a ni lo ti mahse, mi firfiak te’n Marawi khawpui an beih tirh hian Nixon Fortes-a leh a hote chu Marawi khawpui ah hian an awm lo hrim hrim a, hei vanga ban thut a nih ring an tam hle.

IS thlunzawm mi firkfiakte’n Marawi an beih thut hma thla hnih emaw chhung khan sorkar sipai te chuan “Chem Hrintu” tia an sawi mai, Isnilon Hapilon-a tolangchhip tawmbuk an bei a. He pawl hi mi rukbo lama lar em em ani a, an hotupa ber hian kum 2014 daih tawh khan Islamic State a thlawp thu puang tawh in pawl dang hrang hrang pawh amah zui turin a lo hneh tawh a. Amah zawmtu pawl hrang hrang zingah hian Maute ho hi an pawimawh ber a, an ni pawl hi Marawi-a chhungkaw hung ber pawl a unau Omawr leh Abdullah Maute thuhnuai a awm a ni.

Nikum June thla khan Syria atangin video a lo chhuak nawlh a, tuipui ral lehlam ami IS hruaitu chuan Asia-a firfiak pawl zawm duh reng reng chuan Middle East an pan theih loh pawhin Hapilon hi zawm mai tur ani tiin a puang a, Hapilon hi Asia chhim chhaka IS hotupa berah puan a ni nghal bawk. Phillipines sipai hotute chuan Hapilon-a tlangchhip tawmbuk beih anih khan hliam ani nghei a, mahse tlanchhia in Maute pawl hi a zawm ve ta niin an ngai.

Social media vela Maute pawl thu thehdarh thenkhatah chuan mi firfiak te hian Marawi khawpuia Kristian sulhnu thenkhat te, Shiite Muslim te leh pathian pakhat aia tam bia te sulhnu te chu tihchhiat vek an duh a, helai vela intihhlimna hmun te pawh tihtawp vek an tum a ni.

 

Tlangah tawmbuk tha

Thuneitu thenkhat chuan hetianga mi firfiakte’n Marawi khawpui nan la thei hi venhimna hnathakwtute inthlahdah vang niin an sawi a.

“Tlanga an tawmbuk te tihchhiat kan tumna lutukah an rin loh khan atanga rawn lutin Marawi an rawn la,” tiin Philippines Defence Secretary Delfin Lorenzana chuan a sawi a.

Thla tam tak kalta atang khan heng mi firfiakte hian an pawla tel turin mi thahnem tak an la thar niin Phillipines leh Indonesia intelligence te chuan an sawi a, heng an pawla mi thar tam tak te hi Marawi ah hian sakhaw thila kalin hetiang hian an che ta tiin Phillipines sipai thupuangtu Lt. Col. Jo-Ar Herrera chuan a sawi bawk.

Mi firfiak te hian he khawpui ah hian an pawla tang thar mi tam tak an tirh luh hman avangin an chet tirh te atangin an tum an la nghal chat chat thei a.

Mi firfiak te hian Kristian (Protestant) enkawl Dansalan College te, Catholic Biak In te an luhchhuah hnu ah puithiam leh sakhaw hruaitu eng emawzat an man a, Shiite muslim mosque an tichhe bawk a.

IS mi firfiak te hi Marawi khawpui ah hian an inbun ngheh hman em avangin sipai tan pawh lak let a huphurhawm dawn hle nia sawi a ni a, thlawhna leh lei lam atangin nasa takin bei mahse, sipai te bakah pawisawi lo nu nau tam tak an thih phah dawn niin a lang a, an ram thenawm te pawhin Philippines sorkar chu uluk taka che tura an duh thu te sawiin tunah hian heng mi firfiak te hian mi 2,000 aia tam an la hren avangin sipai tan pawh tawngpawng che lo va uluk taka chet a ngaih tur thu an sawi.

Sipai thupuangtu pakhat chuan, “”Mipui nawlpui hi an tam ang a, an hliam anga, thi pawh an awm ang. Hetianga inbeihna ah hi chuan za-a za mipui nawlpui tuar lohna a thleng thei lo,” a ti.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s