India leh Bangladesh ramri hungna titawp lailawk

Mizoram khaw engemawzat ramri hungna pawn lama an awm tak vangin sorkar laipuiin Mizoram leh Bangladesh inrinna hung mek chu a titawp lailawk

BORDER-FENCE_0

Tunhnai khan Home Ministry chuan Mizoram khawthlang lama Indo-Bangladesh ramri hung (border fencing) hna kal lai chu a ti tawp lailawk a, tualchhunga hemi chungchanga sorkar hotute leh khawthlang lama he hnathawhna hmun bula cheng thenkhat te sawi dan chuan ram hung danah hian thil felhlel nasa tak a awm a, khaw thenkhat chu hung pawnah an awm tak daih bakah khaw thenkhat chu a lai takah hungna hian a then hrang a, tin, khaw thenkhatah ve thung chuan mihring chenna hmun chu hungna chhungah awm mahsela an huan lo ram leh sangha dil te chu hung pawnah an awm daih niin an sawi.

“India leh Pakistan inrina hung hna, phai ram rem em em a hungna hnathawh ang ngawt khan India leh Bangladesh inrina hi an ngai deuh niin a lang a, kan ramri te chu awlsam taka ngil puta hung theih chi a ni lo va. Hei hian ramri hung hnathawktute a ti buai ni berin a lang,” tiin Mizoram Home Department-a official senior pakhat chuan a sawi.

The Frontier Despatch (TFD) thu dawn dan chuan, India leh Bangladesh ramri hungna hna hi Union Home Secretary hovin Home Ministry thuthmun North Block-ah March thla tawp lam khan sawiho a ni a, hemi hnu April thla tir lam khan Home Ministry hnuaia Department of Border Management chuan thupek a tichhuak ta a.

Home Ministry thupek hian ramri hung hna, ramri hrula kawng sial leh eng chhit (floodlight) hna tunhnaia thawh te chu a chawlh lailawk tir vek a, ramri ven hna thawktute duty-na tur Border Out Posts (BOP) te erawh chu sak chhunzawm a phalsak.

Home Department atanga thu dawn dan chuan hetianga hnathawh a tih tawp lailawk nachhan chu ramri hung hna thawk mekte hnathawh danah sorkar laipui a lawm loh vang a ni a.

Thu dawnna chuan Bangladesh ramri hung mek chungchangah hian thil fel lo tam tak a awm avangin nikum November thla khan ramri hung endiktu Madhukar Committee te chu Mizoramah lo kalin Indo-Bangladesh border fencing hi an rawn endik tawh a, an thil hmuh te Home Ministry ah an thlen a.

Hemi bawhzui hian kumin January khan Border Management Secretary Sanjeevni Kutty-i hovin Delhi ah sorkar laipuia mi pawimawh te leh Mizoram sorkar aiawhte an thu khawm a, hemi hnu hian Secretary ho hian sorkar hotute engemawzat chu ramri hung hna kalpui mek chu a hmunah an en leh a, an ngaimawh zawng an sawi a hnathawktute insawifiahna chu pawm harsa an tih thu te an sawi bakah ramri hung chu a mumal lo an tih thu te, Mizoram khaw eng emawzat Bangladesh lama an hung chhuah avang te leh thuneitute duh dana hna an thawh loh avangin hnathawkte lakah hian an lungawi lo hle niin TFD chuan thu a dawng.

Helai ramri hung hna vang hian ramri hrula cheng khaw engemawzat pawh an lungawi lo hle a, court-a thubuai thehlut pawh engemaw zat an awm tawh nghe nghe niin helai hmun a cheng pakhatin a sawi.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s