Lawrkhawm/ June 1 – 7, 2017

Serchhip atangin Lunglei ah, Kolasib atangin Serchhip ah: Surgeon siksawi kualin Mizoram kawngpui pawimawh ber a dang chat

Doctor siksawina in district leh district in epna a chawk chhuak a, tualchhung a nghawng thui hle

Lunglei Civil Hospital surgeon Dr T Lalrochhunga a thih avangin sorkar in Serchhip District Hospital surgeon Dr Lalrinmuani chu Lunglei Civil Hospital ah a sawn a, Serchhip Hospital-a surgeon awm ta lo hnawhkhah nan Kolasib District Hospital surgeon Dr Zothansanga Zadeng chu Serchhip ah a sawn bawk a, hemi duh lo hian Kolasib Joint Action Committee chuan Dr Zothansanga Zadeng chu Kolasib chhuahsan phal lo in transfer order sut phutin June 6 atang khan National Highway 54 a dang ta a ni a. Awmzia a neia an hriat loh avangin June 8 atang khan Serkhan-Bagha road pawh dang leh turin thutlukna an siam ta a ni.

Surgeon nei ta lo Serchhip lam thuchhuak

Kolasib JAC-te’n Dr Zothansanga Zadeng Serchhipa sawn an phal loh chungchangah Serchhip JAC chuan an lungawi loh thuchhuah hmangin an puang a, “Zo pa rilru tluang, ‘Sem sem dam dam’ tih rilru pu chunga Surgeon pakhat diat diata heng District Hospital pathum- Serchhip, Lunglei leh Kolasib ah hian awm mai thei a nih laia Kolasib-ah MZP ten pahnih neih duh a, phungbawma NGO dang te sawma JAC dina hetia na taka kal an tum leh zel hi pawi kan tiin, kan dem takmeuh a. He thil hi Lunglei leh Serchhip District mipui tan pawh thih leh dam kar thil khawih phak a ni tih hre tel ve se kan duh a ni,” a ti a.

Kolasib JAC chet dan chu “awmze nei lova Mizoram mipuite tihbuai tumna ni hialin kan hria” tiin, Serchhip JAC chuan Dr Zothansanga Zadeng chu a Serchhipa hna a zawm thuai an beisei thu an sawi bawk a ni

“Surgeon pahnih nei” Kolasib lam thu chhuak

Kolasib JAC hruaitute chuan Kolasib District Hospital ah kum 2008 atang khan doctor mi zai thiam (surgeon) an nei mumal tawh lo niin an sawi a. An sawi dan chuan an surgeon neih te chu a rualin kum 2008 ah sawn chhuah an ni a, July 2013 khan surgeon dang Dr John Lalliandinga dah a ni a, ani hi August 12, 2013 khan super specialist zirin hmun dangah a awm a, nikum August thla khan zir zo in Kolasib ah awm chhunzawm lovin Aizawl Civil Hospital ah dah a ni.

Tuna sorkar in Serchhip-a sawn a tum Dr Zothansanga Zadeng hi March 5, 2015 ah Kolasib ah a awm tan a, National Health Mission (NHM) hnuaiah kumin February atang khan surgeon dang Dr Zochampuia a awm bawk a. Dr Zochampuia hi Elderly Scheme-a thawk tura lak a nih avangin damdawi ina duty tur a ni lo a, zai ngai pawh awm se, zai tura thutlukna siam thei a ni lo niin an sawi.

Kolasib JAC hruaitute chuan Kolasib ah surgeon pahnih – Dr Zothansanga Zadeng leh Dr Zochampuia – an awm anga sorkar in a ngai a nih chuan NHM hnuaia thawk zawk Dr Zochampuia chu sawn chhuak zawk se an duh niin an sawi a, Dr Zochampuia chu zirna sang zawk zir tur kalbo mai tur niin an sawi bawk a.

Social Media ah mi thenkhatin Kolasib mipuite chuan Serchhip mipuite tan harsatna an siam tiin sawi mahse, chu chu thu dik lo a ni an ti a, “Thu bul bal hre loa hetianga thu thehdarh hi kan do tlat a ni,” an ti bawk.

Kolasib JAC hruaitute chuan sorkar chu Kolasib District Hospital ngaihthah ah an puh a, “Kum 10 kalta khan khum 100 awm theihna turin ruahmanna siam a ni tawh a, tun thlengin bawhzui a la ni lo,” an ti a, sorkar laipuia programme awm atangin eng eng emaw sak belha thuam that ni thin mahse, Mizoram sorkar atanga hmalakna a awm lo nia an hriat thu an sawi.

 

Mizoramin project implementation lamah tan lakna tur a la nei tam

1_1496756352

Mizorama development project, scheme leh program hrang hrang cheng vbc 50 chunglam chin senso-na te a hun taka zawh a nih theihna tura endika viltu tur CM kaihhruaina hnuaia din, High Level Monitoring and Surveillance Committee I (HLMSC I) chu June 6 khan CMO Conference Room-ah a thukhawm a.

He meeting chungchanga sorkar thuchhuah chuan, “Meeting-a thuhma a sawiah Chief Minister Lal Thanhawla chuan NEC Plenary meeting hmani lawka New Delhi a neih a, Mizoram chu thil dangah ti tha mahse project implementation lamah tan lakna tur a la nei tam tih sawilan a nih thu a sawi a. NEC leh NLCPR hnuaia project te nakin zelah Mizoram tan phurrit liabilities a nih loh nan, a hun taka zawh anih thei nan theihtawpa tan lak a pawimawh tih a sawi,” a ti.

HLMSC I meeting-ah hian Forest, P&E, PHE, Rural Development, School Education, Tourism department te leh RUSA, Mizoram Scholarship Board leh SIPMIU hnuaia hmalakna te sawiho a ni a, March 2017 quarter ah an thlen chin tarlan niin an hmabak leh harsatna an neih te chu a changtu dept hotulu ten an sawi zau a.

HLMSC I hi Mizoram sorkar ina Approach to Development Comprehensive Growth Strategies a lo pawm tawh hmalakna pakhat a ni a. A hnuaiah hian HLMSC II awm bawkin hei hi Chief Secretary-in a kaihhruai a, cheng vbc 50 hnuai lam project te he committee hian a huam thung.

 

Party tana thawk hah te contract hna ah duhsak hmasak an ni ang: Zoramthanga

MNF party President Zoramthanga’n an sorkar chuan contract hna ah an party tana thawk hah te duhsak an nih tur thu a sawi. June 2-a Champhai South MNF Block Conference a hmanpuinaah Zoramthanga chuan an sorkar chuan mipui eizawnna atana ram ruak hmang tangkai turin link road-a tlawh pawh tir vek an tum niin a sawi a, chung hna ah te chuan an party tana thawk hah te duhsak hmasak an nih tur thu a sawi. MNF President chuan an sorkar huna SEDP an kalpui hunah huan/ram nei lo tam tak tan thil buaithlak awm thei tur angin mi thenklhatin an ngai a, Mizoramin a chhunga cheng let mihring in sem theih tur eng emawzata tam ram ruak a la nei a, chung ram ruak te tlawhpawh turin kawng an sial dawn a, ram nei lo te pawhin insem tur an nei dawn niin a sawi a. “Link road siama hmalak hi kan ngaipawimawh hle dawn a, tuna kan party-a thawk hah te link road hna thawh a, contract hna tam tak lo chhuah huna thawk turin duhsak hmasak bik an ni ang,” a ti.

 

Champhai supply kudam atanga buhfai bo rulh danah sorkarin thuchhuah siam

rice-in-FCI3

Food Civil Supplies & Consumer Affairs (FCS&CA) department chuan June 6 khan supply kudam ah chhan hrang hrang avangin buhfai bo a awm thin ni a sawiin, hetianga buhfai a bo hian department chuan rang taka chhui zui nghalin hnathawkte insawifiah turin a ti thin niin an sawi a, an insawifiah dan a zirin hremna an pekkawh thin niin an sawi bawk.

FCS&CA chuan hetiang a thlen chang hian a chhui turin MCS officer emaw, MSS officer emaw an ruat thin niin an sawi a, an thil chhui dan a zirin hremna an lekkawh thin – hlawh pung tur hren sak, kaisang thei loa siam leh thil dang – bakah buhfai riral zat hlutna chu sum faiin an rulh tir thin niin an sawi.

Department chuan Champhai DCSO hnuaia official pariat te chungah hremna lekkawhin an zingah hian Khuangleng ami in a rulh tur arul zo tawh niin an sawi a, heng an rulh tirna atang hian sum eng emawzat chu sorkar in a hmuh kir bakah rul zo hman lo-a thi ta te pawh an pension atanga rul tura tih te pawh an nei niin an sawi a, sorkar chuan fimhur takin thil a kalpui niin an sawi.

 

Sum enkawl dan hriat loh avangin harsatna kan tawk thin – CS

5f0f102364b5c940a5c2629700e44243ChiefSecretaryLalmalsawma

Chief Secretary Lalmalsawma’n Mizo mipuite’n sum enkawl dan an hriat tawk loh avangin harsatna an tawh thin thu a sawi. Reserve Bank of India (RBI) buatsaihin June 5 khan Hotel Regency Conference Hall ah sum leh pai enkawl chungchang inzirtirna hapta (Financial Literacy Week) hman tan a ni a, hapta hawngtu Chief Secretary chuan Mizoram chu lehkha thiam tamna ni mahse, sum leh pai enkawl chungchang ah ram chhunga state te zingah chuan a hniam ber dawt a ni a ti a, “Sum leh pai enkawl dan dik kan hriat tawk loh avangin leh hemi kawnga kan hriatna a la hniam avangin chiahpuam avangin mipui zingah sum hloh eng emawzat an awm tawh,” a ti a, sum leh pai ah hriatna a zauh poh leh mipui an him niin a sawi. Mipuiin sum leh pai enkawl dan dik an hriatthiam a, an tana tha tur leh tha lo tur te an thliar thiam theih nan RBI chuan nikum khan Financial Literacy Week hi ram pumah kumtin neih thin turin a ruahman a. Sum leh pai enkawl chungchang inzirtirna in thil tum pali – sum khawl leh puk chungchang inzirtir, sum leh pai hman dan tur ruahmanna fel tak siam, mipui te dikna humhim leh, khawvel hmasawnna in a ken tel ‘going digital’ te a ni.

 

Kum 18-21 inkar E-Roll a la chuang lo te thunna tur beihpui thlak

Aizawl Bawrhsap Kannan Gopinathan chuan Aizawl District-a kum tling vote la nei lo te Electoral Roll-a an awm theihna tura beihpui thlak, Special Drive on Electoral Roll chu May 5 khan a hawng.

Hemi chungchanga thuthar la khawmtute a kawmna ah Bawrhsap chuan July thla chhunga Special Drive neih tur chu kum 18 leh 21 inkar Electoral Roll-a la chuang lo te tan bika ruahman a nih thu a sawi a, E-Roll-a chuang thi tawh te hming paih an tum niin a sawi a, hming leh thil dang ziah dik loh siam that te, awmna bial (constituency) insawn te, awmna bial ngaia Polling Station insawn siam that te pawh an ti dawn niin a sawi.

Bawrhsap sawi dan chuan Special Drive chhung hian BLO chuan a bial chhunga vote nei thei te thun thar tur te zawng chhuak turin lehkha pawimawh te kengin a tlawh kual dawn a, hei bakah hian Polling Station tinah July 8 atanga 22 inkarah Special Camp huaihawt a ni ang a, Polling Station tinah hian BLO te Form lo dawng turin leh dilna thelut duh te lo pui turin an thu dawn a, BLO hnen atang hian Electoral Roll-a awm leh awm loh en theih nghal a ni ang.

 

Serchhip Bawrhsap in sports complex sak mek tlawh

img_4912_1496654102

Serchhip Bawrhsap Sangchin Chinzah chuan June 5 khan Serchhip Hmar Venga Mini Sports Complex, UD&PA Department hnuaia NBCC in an thawh mek chu a tlawh a, an hmalakna hrang hrangte enpuiin an hnathawh dan leh an hmathar lakna te a hnena hrilh hre zel turin contractor te a hrilh.

He Mini Sport Complex, cheng vbc 12 senna tur hi Serchhip Sub Headquarters YMA ten Bawrhsap an ngenna angin Bawrhsap hian Civil Engineer hruaiin a tlawh a, a sak phunga YMA lamin ngaimawh an neih ang ang te uluk takin an enfiah a ni. Sangchin Chinzah chuan contractor te chu a nih dan tur ruahman ang thlapa sa turin a hrilh a, Serchhip in infiamna hmun ro tling an neih theihna tura hnathawk turin a hrilh.

Hnathawktute chuan YMA in an ngaihmawh an sawi te chu tih that vek an tum thu Bawrhsap hi an lo hrilh a, an bungrua bo awm thin thu an lo hrilh te pawh Bawrhsap chuan SP lo hrilh a tum thu leh chutiang an tawk a nih chuan rang taka police te hrilh thin turin a chah a ni.

Serchhip Mini Sport Complex hi kum 2011 atanga bul tan niin tunah hian hna tam zawk chu thawh zawh tawh a ni a, hnathawktute hi NBCC hnuaia Agni Shanti Buildtech Ltd. niin tunah hian phullem phahna tur field chhuat an khawih mek a ni.

 

Doctor-te’n lugawi lohna lantirin darkar hnih hna thawk lo

Indian Medical Association (IMA) chuan June 6 khan ram pum huapin lungawi lohna an lantir a, he lungawi lohna lantir hi IMA Mizoram State Branch pawhin zawmin chawhma dar 9 atanga 11 inkar hna an thawk lo a, hemi chhung hian mipuite tan harsatna a thlen thu sawi a awm lem lo.

Lungawi lohna an lantir chungchang sawifiah hian IMA Mizoram State Branch hruaitute chuan June 5 khan Aizawl Press Club-ah thuthar la khawmtute an kawm a, an President Dr Vanlalruata chuan ram chhungah kawng hrang hrangin doctor-te’n nekchep an tawk a, damlo chhungte zingah doctor kutthlak ching an awm leh thin a, hetiang hi a awm tawh loh nan sorkar laipuiah ngenna siam thin ni mahse, a sawt loh avangin ram pum huapin lungawi lohna an lantir ta niin a sawi.

IMA Mizoram State Branch hruaitute chuan rampuma doctor te chu Delhi-ah kal khawm a, a huho-a lungawi lohna lantir tura ruahman a ni a, Delhi-a kal thei lo te pawh mahni awmna theuhah lungawi lohna hi lantir tur a ni a, state dangah chuan ni lengin damlo en loh te an tum a, Mizoramah erawh chuan lungawi lohna hi darkar hnih chhung lantir ni se, hemi chhung hian damlo en loh ni se an ti a, mahse, hmanhmawh thlaka zai ngai an awm erawh chuan zai tho ni se an ti niin a sawi.

Dr Vanlalruata chuan IMA in lungawi lohna a lantir chhan tur te chu damlo chhungte’n doctor kut an thlak thin venhimna dan khauh tak siam sak te, sorkar laipuiin National Medical Commission (NMC) din a tum an duh loh thu leh Indian Medical Council Act siam that an phut te, MBBS zo tawh te tan practise turin National Exit Exam (NEXT) kher an duh loh te, thil an tihsual change an laka hremna dan siam an duh loh thu te, sorkar laipuiin MBBS leh BDS ni lo AYUSH leh a dnag te tana damdawi chawh phalna pek a tum an duh loh thu te, sorkar laipuiin doctor te chu damdawi an chawhnaa damdawi hming an ziah dana kaihhruaina siam a tum an duh loh te leh Amendment in Clinical Establishment (Registration & Regulation) Act, 2010 hnuaiah doctor mal leh clinical establishment tenau (private clinic/nursing home etc) te thlenga huam tir chu siam that an duh thu te a ni.

 

Mizoram police leh GNRC-in inremna thuthlung ziak

Mizoram Police Football Club player te an inhliam palha enkawl turin Mizoram Police leh Guwahati Neurological Research Centre (GNRC)-te’n June 6 khan inremna thuthlung ‘Memorandum of Understanding’ an ziak. MoU hi DGP Thianghlima Pachuau pisa ah ziah a ni a, Mizoram Police aiawhin AIG I LR Dingliana Sailo in hming a ziak a, GNRC aiawhin Marketing & Bussiness Development Senior Manager Arvind Bhatta-a’n a ziak a, Mizoram police a?angin DIG (Hqrs) C Laldina leh 3rd MAP Commandant Laldawngliana te leh GNRC a?angin Senior Bussiness Development Joydeep Das leh Sanu Kumar Chettry-te’n hriatpuina hming an ziak bawk.

 

ZNP President-i’n Larsap ruihhlo sawi pui

ZNP President Lalduhoma chu June 6 khan Raj Bhavan ah lengin Larsap Lt. Gen. Nibhay Sharma nen an inkawm a, Mizoram hmasawnna tur nia an ngaih thil pawimawh te an sawi dun. ZNP thu chhuah tarlan danin an President hian ruihhlo do a ngaihpawimawh thu Larsap hi a hrilh a, tlawmngai pawlte’n dan ang thlapa ruihhlo zuartute leh kawltute an dap ve theihna turin Excise Act siam that tul a tih thu a hrilh a, ruihhlo thubuai sawi nan bik Special Court din ngaia a hriat thu te, chu chuan nasa taka sorkar in ruihhlo a kawng kawngah a tha a tihchak a beisei thu a hrilh a ni.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s