Mi Zo Leh Vai/ Lallula thlan-rawn tha’ thu

M&V

Chung lai chuan Lallula hi Zova a awm a; Thanchhuma chu Thlan-rawn khua a a awm a, chung lai chuan Lallula hian Pawi ho hi a lo hnai ber a; Pawi ho hian englo thil-te tham hi an khawn fo va; chuti-chuan chhiah-khawn nan takin an lo hmang thin a; an lo hneh-chhiah-in, an lo ti-duh-dah thin a.

Tin, Thanchhuma khawn-bawl Phunthanga hian “Lallula khua a sai-ngho chhiah ila ang u” a ti a, tin, an kal ta a: chutichuan Phunthanga thu-in khawthlang lama chhiah-khawn mi 50 lai tur an lo kal a; tin, Lallula hovin an tuar thei lova, a rawt-turin thu an in rawn a, an khua a chuan an cham tir a. A tuka chuan Lallula chuan a fin’ in a nek a. “ Sai-ngho te chu ka pe ang che u, kan khawvel-in an chawi bawk ang; chutichuan kan za-in in hnena chhiah kan chawi bawk ang; kan khua a cham ulangin, khaw-dangin englo te an rawn keng ang,’ a ti a; chutichuan a upa te chu khaw dang lama a tir a, hetiang thu kengin: “Tuna hian ka khua a Thlan-rawn ho an lo kal e, chhiah khawn tur-in; heti chuan kan tuar dawn lo, i that ang u; ka khua a ka cham-tir e: thla-ar-kai-zan-in lo chhuak ula, mual a zu ka lo zuk ang a, ka ti-rui ang; chutichuan an za-in kan that thei ang,” a ti a; chutichuan thla ar-kai zan a an lo chhuak ta theuhva, an that ta chiam a. Thanchhuama chu an man a, a upa Phunthanga chu an that a; Thanchhuma chu an that lo: chutichuan an man mai; thi-hna te, englo dang nen-in an tlan-chhuak a.

Chutichuan Lallula’n a tuar ngam ta lova, thlang a tla a; ( chung lai chuan Pubuara Dung-tlang-a a awm) Hmuifang hmawra a awm a, Chamringa Shialsuk ram a ei a; tin, nakina chuan a ei zo va Sabual Laltuaka a awm; chu mi hnena chuan “I khua a kan lo lut ange, i ram kan ei za ang chu,” a ti a. Laltuaka chuan a phal lo va. Lallula chuan a fin’-in a nek leh a, a khua te hnen a chuan “In thul ruakin phur ula, Laltuaka kawm-thlang a kal ula,” a ti a. Tin, a ti angin an kal ta a: tin, Laltuaka chuan “Thian te-u, khawi a nge in kal dawn ?”a ti a. Anni chuan “Kan lal-in ‘Lal-tuaka’n ram min pe phal hek lo, Vai rama i lut ang,’a ti” an ti a. Tin, Laltuaka chuan “ Chugn em chu kan phal lovang; kal leh ta ula, in lal hnena ‘Kan awm ho thei ang chu, a ti leh e,’han ti rawh u,” a ti a. “Keima mai chuan Pawi biak ka thiam dawn lo, u leh nau chu kan awm ho thei ang,”a ti a. Tin, an awm ho ta a, an ram pawh chu an ei dun ta zel a. Nakina chuan Lallula chuan Darlung a zuan a, ramri te an shiam a; Lallula chuan hmar-lam a hnawt telh-telh a; Laltuaka chu ram a neilo avangin a tlawm ta mai a. Nakina chuan Lallula’n Hreichhuk ram a zuan a, a kai a, ama chu a thi ta. Chung lai chuan Vuttaia pawh a piang ta, a lo fa-hrah-a, nupui a nei hma a.

Chunglai chuan Sheipuia Chengtawnga te pafa Zabuat an awm a; (heng hi Hualngo lal anni.) Chengtawnga a fa ho chuan khaw-thlang run-turin an kal a, chhim Vanchheng khua a an cham a; chu khua a chuan chawng an chen a, chutachuan a fapa chuan nula Chawng-kawli a ngai ta a, an mi run-tur chu an thulh leh ta a, an hawng chho ta a. Sheipui khua an kal-kawng a chuan hmar ral-rawl-in an lo chang a, nupui zuk lei a te hian an hmu hmasha a, pakhat an that a, a dang chu an tlan-bo ta hlawm a; tin, an lalfa chuan savawm a kapa, hlim takin in an thleng ta a.

Nakina chuan Zaluata chu a nupui te awm-na lama chuan a chhuk ta a, khaw shiam a tum a, a han shiam a; Sialhauva a khua a chuan Sailo khua a mi anlo lut huai huai a. Tin, Sailo ho chuan “Min lal khalh dawn e,” an ti a, a run tur in an kal ta hlawm a; khaw lut lovin an in-kap ta chiam mai a, an lut thei lova.

Tin, Lalthangvuta, Vuttaia Pupuia ho chu Thentlang a chaw zawng-in an kal a, ( chu khua chu Zahau khua a ni)  Vuttaia chu an lo man ta a, (Zahau) ban sawt lovin. Tin, Zahau hovin an tawlh-chho pui ta zel a, kum 4 zet a tang a, she 10-hu-in an tlan ta-a.

Chawnga, Skul hotu,Bra-te.

He thu hi Mizo leh Vai Chanchin Lekhabu, Lekha VI, June 1904, phek 9-11 atanga lak chhawn a ni


Mizoram a chanchinbu chhuak hmasa ber pawl, Mi Zo Leh Vai Chanchin Lekhabu ami thu kan han chhuah chhawng e. He chanchinbu hi khatih lai a Lushai Hills Superintendent in thlatin a tihchhuah, Sylhet a chhut thin ani. He thu hi a ngai ngai a chhuah chhawn ani.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s