Mizoram Direct Marketing Limited chungchang notesheet te sorkarin a kawl lo niin a sawi

Sorkar laipui officer senior suspend anih phah na company, tun hnu a CBI-in a chhui tak chungchanga sorkar hotute ngaihdan ziahna notesheet chu Commerce and Industries Department-in a kawl lo niin RTI zawhna a chhang

MDML
Inbumna thil ani ti a ukil pakhatin a hek hnu in leh Delhi Police-in kum engemawzat an chhui theih loh vangin Delhi HC chuan MDML chu CBI chhui turin a ti a. MDML hi March 2013-a din niin Mizoram sorkar domain hnuaiah website a nei a, fakna ah te khatih laia Governor leh CM te thlalak hman a ni bawk. Mahse, sorkar chuan thla 5 lai a ral hnu ah a din ani lo niin a sawi a, officer senior a suspend zui

 

Mizoram sorkarin central service officer senior a suspend nachhan leh tun hnua Delhi High Court (HC) thupek anga Central Bureau of Investigation (CBI) in a chhui zui tak Mizoram Direct Marketing Limited (MDML) chungchang notesheet – sorkar hnathawk te’n hmalakna chi hrang hranga an ngaihdan an ziahna lehkha – chu Commerce and Industries Department-in a kawl lo niin Right to Information zawhna a chhang.

Kar hmasa June ni 2 khan ramchhung chanchinbu chhiar hlawh tak Hindustan Times chuan CBI-in khatih laia Mizoram Industries Principal Secretary leh mi dang eng emawzat lakah case a siam niin a ziak a, he chanchinbu hian Delhi HC-in thla hnih emaw kalta khan Delhi Police-in MDML laka complaint lut chu a bawhzui that loh avangin CBI hnenah a hlan niin a ziak bawk.

He company chungchanga sorkar hotute thurel lanna notesheet dilna RTI chu chhangin khatih laia Industries Department ni thin, tun hnua Commerce and Industries Department ni ta chuan notesheet hi a kawl lo niin a sawi.

Kum 2013 August thla khan Mizoram sorkar chuan khatih laia Industries Secretary PC Lallawmsanga, IPS officer chu ama thua MDML company din a, company Director nihna inpe a, Mizoram sorkar company anga sawi thang ah puhin a suspend a. MDML hi Mizoram sorkar ta a ni lo tiin Chief Minister Office website ah thu chhuah siam a ni nghe nghe.

MDML company hi hetianga officer senior laka action lak a nih hma daih, March 2013 khan sumdawnna hna (trading) thawk turin din a ni tawh a, state sorkar company angin Ministry of Corporate Affairs hnuaiah ziah luh a ni nghe nghe. MDML sumdawn dan tura ruahman chu tunlaia Aizawl-ah te pawh mi tam tak telna, company aiawha thil zuartu pakhatin an hnuaia hnathawk (downline) an hmuh ang zat zela hlep an neih, company thil siam te pawh dawr awm lem loa zawrh kuala hralh chhawn (direct marketing) ang chi hi a ni.

MDML din a nih lai vel hian hetianga sumdawnna kalpui company te chu an chet chhiat deuh lai a ni a, MDML din a nih hnu thla hnih lekah pawh khan Amway India chairman William S Pickney pawh Kerala police-te’n mi bum thubuai ah an man thu te pawh ramchhung chanchinbu leh news channel ah te pawh a lang a nih kha.

PC Lallawmsanga bakah hian khatih laia Industries Department-a officer senior dang pahnih te pawh MDML company-ah hian Director an ni ve bawk a. PC Lallawmsanga Mizoram Food and Allied Industries Corporation (MIFCO) ah Managing Director a ni a, ani lo hi MIFCO ah Director leh Nominee Director an awm ve bawk.

MDML company website ah pawh khatih laia Mizoram Governor V Purushothamam leh CM Lal Thanhawla te thlalak a chuang a, company website pawh hi Mizoram sorkar domain – mizoram.gov.in – hnuaiah mizodirect.mizoram.gov.in tiin a awm thin.

MDML kha amah maia hnathawk tura duan a ni lo a, India chhim lama state lian Tamil Nadu khawpui Chennai-a pisa nei RMP Infotec Pvt Ltd company nen thuthlung (Memorandum of Understanding) ziakin, thuthlung hnuaiah hian RMP Infotec khan a company duh ber MDML thawhpui turin a thlang thei a.

RMP Infotec hian thawhpui tur company chu a thlang ta ngei bawk a, a thlan tak chu MDML pisa awmna building thoa inbun, Mizo Lifestyle Marketing Pvt Ltd (MLMP) tih hming pu company a ni a. Ministry of Corporate Affairs hnuaia an inziah luh dan chuan MDML hi T-5, Tuikhuahtlang-ah a chhawng khatna ah a inbun a, MLMP hi a chhawng thumna ah a inbun thung.

MDML Director pathum zinga pakhat suspend anih a sorkarin he company hi a din a ni lo a tih hnu hian MDML pawh hi company a nihna thaibo ni tawh mahsela, MLMP hi chu a la nung reng a. MLMP hi a hming put chu eng pawh ni se, a company director pathum te chu hnamdang vek an ni thung.

IPS officer suspend tak hi a hnu deuh ah chuan Mizoram sorkarin a chhawr chhunzawm leh a, a pension tawh na in tunah hian “consultant” anga chhawr chhunzawm mek a ni a, ani lo pawh hi chutianga rawih chhunzawm chu an awm ve bawk.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s