NIB-in CAG report ah thu belhchian dawl lo a tam niin a sawi

CAG-in NLUP a zirchianna report-a a hmuhchhuah nia a sawi te leh NIB-in a dikloh dan a sawite khaikhinna

June ni 2 khan NLUP Implementing Board chuan tunhnaia Comptroller and Auditor General of India (CAG) in NLUP kalpui dan a zirchianna report chu a ngaihtuah (review) a, thuchhuah siamin NIB chuan CAG report ah “Thu dik tluan tling tawk lo sawifiah ngai tam tak a awm” niin a sawi a, thuchhuah ah chuan NIB hian CAG report-a thil felhlel lang chi hrang hrang a thlur bing a, a mal te te in sawifiahna a siam a. He meeting kohna ah hian NIB Chairman J H Rothuama hnuaia review tur tih nimahsela, a ni hi a tel ta lova, Vice-Chairman P L Thanga’n a kaihhruai ta zawk.

 

NLUP dawng tlak te zirchian hmasak na (baseline survey) leh thlan an nih chungchang

CAG chuan YMA-in khaw 813 lai a zirchian hnu ah NLUP dawng tlak chhungkaw nuai 1.59 chuang an awm tih a hmuchhuak a. Mahse, NLUP Manual chuan NLUP dawng tlak zinga dawng turte chu khaw tin a awm Village Level NLUP Committee (VLNC) te tih tur ti mahsela, Chief Minister chairman-na hnuaia thawk NLUP Apex Board-in April 2010 khan NLUP dawng tur chhungkaw nuai 1.2 lai chu a thlang chhuak ta nawlh mai niin CAG chuan a sawi a, VNLC te hian YMA-in a zirchianna hi an hmu ve hrim hrim tih record-na engmah a awm lo mai nilovin, NLUP Apex Board hian heng chhungkua te hi eng tehna hmangin nge a thlan tih chu record ah a lang chuang bawk lo niin a sawi tel bawk.

NIB thuchhuah chuan heti hian a sawi: “Baseline Survey chungchangah YMA hmangin khawtinah neih a ni a ni a, Heng list te hi khaw hrang hrang YMA ten an District enkawltu Deputy Commissioner hnenah an submit a. NIB office in DC office atangin an dawng ve chauh zawk… NIB atangin DC zawng zawng hnenah heng list te hi a tul dan anga lo pe tura instruction pek an ni bawk…”

Hetih rual hian NIB chuan baseline survey nen a inkaihhnawih, NLUP dawng turte thlan an nih dan chungchangah heti hian a sawi bawk: “Beneficairy zawng zawng hi [VNLC] in thlangin DC ah submit a ni a. DC atangin NIB ah a lut a. NIB in a lo endik hnuin NLUP Apex Board hian formal approval a pe mai a ni zawk,” tiin.

 

Hmun inhnaih te te (compact area) a trade inang kalpui loh chungchang

CAG chuan khawtina ram awm te hman dan tur (land use plan) chu buatsaih ani lova, hei vang hian VLNC te’n compact area hi an chhinchhiah thei lova, chhinchhiah a ni lo chung hian line department te’n NLUP dawngtute hnenah sum an sem ta tho a, ram nghenga eizawnna (trade) chi hrang hrang te chu inhnaih te te ah nilovin ram zau takah a darh ta hlawm a, khaw khatah ringawt pawh eizawnna chi hrang hrang kalpui a ni a ti a.

NIB chuan hei hi sawifiah in, “Khaw tinah beneficiary thahnem tak thlan vek an nih avangin Mizoram hi cluster area / compact area 40 ah then a ni. Central Sorkar scheme dang a compact area nen danglamna  a awm chuang lo,” a ti.

 

NLUP dawng tlak lo, dawng si te chungchang

CAG chuan district pali ah NLUP dawngtu 7942 a kawm niin a insawi a, an zingah hian 1,400 chu NLUP dawng tlak lo, dawng tho si niin a sawi a. Tin, NLUP dawngtu thlan chungchangah hian sawiselna (complaint) 1,389 a lut niin a sawi bawk a. CAG report-a a lan dan chuan NIB hian a theih chin chinah heng complaint te hi bawhzui an ni a, a tul anga hmalak zel anih tur thu a sawi bawk.

NIB thuchhuah chuan hemi chungchangah hian heti hian a sawifiah: “DC zawng zawg te hnenah Village Level Committee thlante uluk taka endik tura hriattir an ni a. Mi 1178 chuang cancel an ni tawh.  Hmutlak lo anga ngaih report NIB in a dawn hi ngaihthah pakhat mah a awm lo. Audit Party hnenah pawh hian dik lo anga lang an hriatte sawi turin Audit lai atanga ngen an ni a. Tun thleng hian hming pakhatmah Department emaw, NLUP Board ah emaw Accountant General Office atang hian dawn a la awm loh avangin an thu ziak hi finfiah theih a ni lo.”

 

NLUP thiltum nia sawi ah te hlawhtlinna awm loh chungchang

CAG chuan NLUP thil tum ni a sawi ah te hlawhtlinna pakhatmah hmuh tur a awm lo niin a sawi a, heng thil tum te hi trade mal in a teh lova, a report-a NLUP thil tum tia tarlan te chuan tlangram lo neih (jhum cultivation) tihtawp te, kham khawp buh tharchhuah (self-sufficiency in rice) te, Mizoram hmun 80% ram ngawa chan tir (afforestation) a, ngawpui pawh nasa taka tih zau te leh Mizorama ram zawng zawng hman dan tur duan fel (Land Use Plan and Land Reforms) te a huam zawk a. Heng thil tum thenkhat tihhlawhtlinna kawngah hian hmasawnna chu awm ve bawk mahsela, CAG chuan heng hmasawnna te hi tih tham a ni lo (marginal) niin a sawi.

NIB thuchhuah ve thung chuan: “NLUP in a thil tum hlawhtling lo anga puhna chungchangah thu dik tawk lo a awm niin a lang.  Input supply target ah Department zawng zawng tihtheih deuhthaw a intodelh tawh a, tharchhuah tihpun chungchangah hmunphiah economy ringawt pawh hi kum 2009-ah Rs. nuai 37 atangin kum 2016 khan Rs. nuai 5704 akai chho.  Hmunphiah rate Kg 1 Rs 20/- vel atangin chawhrualin Rs. 80/- ah a kai a, a that zual kumin Kg ah Rs. 115/- hial a kai chho a ni.  Hei hian hmunphiah chingtute tan a hlawkna a let  4 aia tamin a pung tih a tichiang a ni. Department hrang hrangah hetiang hlawhtlinna chhuanawm tak a awm lai hian NLUP Monitoring Agency atana ruat Mizoram University te, NABCONS (NABARD Agency) te leh a dang dangte report ah hlawhtlinna hrang hrang hi tarlan a ni. Auto-rickshaw trade thlang tute hlawhtlinna pawh hi sawi tham tak a awm.  Carpentry leh tailoring trade thlang tute hlawhtlinna vanga an sum lak lak luh nasa taka lo pung bakah mi 1000 chuang zet employment an siam sak a, heilo pawh hi Line Department hrang hrang hnuaia trade hrang hrangah hlawhtlinna hmuh tur tam tak a awm a ni,” tiin a sawi.


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s