Supplier-te pheichham NLUP

NLUP thiltum bulpui ber te chu hlawhchham mahsela, he policy hnuaia hmalakna chi hrang hrangah supplier te an hlawk hle niin a lang a, an bungrua supply te chu sorkar hmalakna danga an hralhna let li lai a to te’n NIB-in a leisak tih CAG-in a hmuchhuak

Pheichham

Kar hmasa lama lo tarlan tawh angin, New Land Use Policy (NLUP) hnuaia tanpuina dawngtute vawkte vulh tur supply turin Animal Husbandry and Veterinary Department (AH&Vety) chuan Champhai Zotlang-a Congress hruaitu C Vanlalhmuaka hnenah cheng vbc 13.51 a pe a.

C Vanlalhmuaka vawkte supply te hi an thi nasa em em a, Comptroller and Auditor General of India (CAG) in NLUP kalpui a nih dan a zirchian khan district palia heng vawkte dawngtu mi 468 a kawm a, anni chuan an vawkte dawn zawng zawng 1,872 zinga 689 (36.81%) chu an thih thu an lo hrilh a, heng NLUP vawkte thi zawng zawng hi cheng nuai 34.45 man hu lai an ni nghe nghe. Mahse, heti khawpa NLUP vawkte an thi hnem tih hi NLUP Implementing Board (NIB) chuan a lo hre miah lo niin CAG a hrilh.

For page

CAG-in NLUP a zirchianna ah hian hetiang deuha NLUP hnuaia tanpuina sem chi hrang hrang supply tute engemawzat hnenah sum tam tak pek a nih thu leh an thil supply dan ah sawi tur a tam thu hmuh tur a awm nual a. A thenah chuan supplier te hnen atang hian bungrua chu to uchuak tak taka lei a ni hlawm a, a thenah chuan mamawh bak aia tam tak supply tir an ni a, chung bungraw lei chuan tam tak te chu engtia tihral nge an nih pawh a chhan sawi tur a awm lo bawk.

Supplier chauh pawh ni lovin, NLUP sum hi a tira hman dan tur duan sa piah lamah hman a awm nual bawk a, pakhatah chuan ramdanga zirlai tirhna turin pawh pen a ni a, The Frontier Depatch (TFD) in a lo tarlan tawh angin hemi thilah hian nasa takin zirlaite zirna tur a sum sen ngai leh sum hman zat a inthlau a. Tin, NLUP sum hi mi engemawzat hnenah pung awm lova puk tir a ni bawk a, anni hian an la rul fumfe lova, an rulh loh chuan an Land Settlement Certificate (LSC) te pawh lak sak theih an ni ang tih ni mahse, chutianga hmalakna pawh chu a awm chuang lo.

 

Dil daidanna lei to uchuak: Fisheries Dept-in NLUP hnuaiah sangha dil daidanna Horti Dept aiin a let li velin ngam huai, cheng nuai 160 dawn seng thlawn

Fisheries Department hnuaiah NLUP sum hman dik loh hi a nasa hle a, CAG report-a a lan dan chuan hetianga sum hman dik lohna lian tak pakhat chu sangha dil daidanna atan hman chi, geomembrane tia sawi lei chungchangah a ni.

Kum 2013 leh 2015 inkar khan NIB Secretary chuan Fisheries Department hnenah geomembrane lei nan hian cheng nuai 209.68 a pe a. Fisheries Director chuan hemi chhung vek hian supplier pakhat,  Wetcomb Shalimar International, New Delhi ami hnenah cheng nuai 208.74 pe in Geomembrane chi khat chu square metre khat zelah cheng 725-in a lei sak ta a, Wetcomb hian he supply hna hi tualchhunga a dealer te pahnih, Mapuia Enterprise leh Laltanpuii te kaltlangin a supply a. Mahse, hetianga company pakhat hnena suppy order a pek hian Fisheries hian tender a chhuah lo hrim hrim a ni. Tarlan tawh thin angin, department te reng reng hian cheng 15,000 aia man tam thil an lei dawn chuan tender an chhuah ngei ngei tur a ni a, Fisheries hian tender chhuah lova sum hman phal let 1400 dawn a to thil a lei dawnin tender a chhuah chuang lo tihna a nih chu.

Mahse, CAG-in hetianga geomembrane supply anih dan a zirchian lai hian thil danglam tak a la hmu cheu: Wetcomb Shalimar International hnuaia authorized dealer dang pakhat, Cee Vee Enterprise chuan Horticulture Dept hnenah hetiang ang chi geomembrane hi engemawzat a lo suppy ve tho a, Horticulture hian Fisheries ai hian heng geomembrane te hi a let li emaw laiin a lei tlawm a. Horticulture-in a leina rate leh Fisheries-in a leina rate a khaikhin hnu in CAG chuan Geomembrane leinaah hian Fisheries hian cheng nuai 159.73 lai a seng thlawn tih a hmuchhuak ta a ni.

Mahse, chu chauh pawh chu a la ni lo. Fisheries-in Geomembrane an vuahna sangha dil te hi a hmunah CAG hian a tlawh a, geomembrane hi engzah nge an dawn chhinchhiahna engmah hmuh tur a awm lova. Tin, sangha dil 48 ah vuah tur anga ruahman ni mahsela, geomembrane hi sangha dil 39 ah chauh vuah a lo ni bawk tih a hmuchhuak tel a ni.

 Rs 725

Fisheries Dept-in sangha dil daidanna (geomembrane) an lei na zat (sq.m 1 zelah)

Rs 180

Horticulture Dept-in geomembrane an lei na zat tlangpui (sq.m 1 zelah)

9

Daidanna vuah nia sawi si, vuahna hnuhma hmuh tur awm siloh na sangha dil awm zat

Rs 160 lakhs

Fisheries-in geomembrane an lei to uchuak vanga a tul lova sum hman zat

 

Sangha lei to uchuak: RKVY-in sangha pakhat cheng 1 aia to hreta a lei laiin NIB-in pakhat cheng 4.4 in a lei, cheng nuai 119 chuang seng thlawn

 

Front Story

Kum 2014 October thla khan NLUP Input Purchase Board chuan Champhai leh Serchhip-a buh china leileta sangha khawi chu enchhin (pilot project) a kalpui nise tiin thutlukna a siam a. Heng leiletah te hian sangha khawi tur te chu common carp, kutzungchal tiat (fingerlings) ni se tiin board hian thu a rel bawk.

Heng sangha supply anih dan tur hian tender chhuah a lo ni tawh a, chutah chuan board-in chhangtute zinga mi pahnih – “Zoram Fish Seed Production Centre, Chemphai, Bilkhawthlir (Proprietor: Lalsanglura, College Veng, Aizawl) leh Mizofa Fish-seed Farm, Chemphai, Bilkhawthlir (Proprietor: Lalthuamluaia Sailo, ZB III/I, Zotlang, Aizawl) te’n tender an chhanna chu a man man ber tiin a thlang a, heng supplier te hian common carp kutzingchal tiat sangha hi cheng 4.40 theuha supply turin leh a vaiin cheng nuai 35.20 man hu supply turin a ti ta a. Sum sen hi NIB tum tura tih a ni nghal bawk. A vaiin heng common carp sangha naute te hi nuai 9.40 supply tura ruahman a ni bawk.

A kum leh, kum 2015 May thla khan NIB Secretary chuan heng common carp sangha note te hi district zawng zawnga supply an nih theih nan cheng nuai 121.5 a sanction a, hemi hmang hian Fisheries Director chuan khami thla vek khan common carp sangha note nuai 27.61 supply turin sanction a siam ve leh ta bawk a ni.

Mahse, CAG-in hemi chungchang a zirchianna ah hian thil danglam tak a hmu a. Common Carp kutzungchal tiat tho hi State Purchase Advisory Board kaltlangin Rashtriya Krishi Vikas Yojana (RKVY) hnuaiah March 2015 khan lei an ni a. RKVY hnuaiah thung chuan heng sanga note te hi cheng 4.40 ni lovin, cheng 1 leh cheng 1.70 inkara lei vek an ni zawk a. NIB leina leh SPAB-in RKVY hnuaia sangah thuhmun a leina hi a vai chuan cheng nuai 119 laiin a inthlau a, NIB hian cheng vaiblechhe chuang zet sangha leina tur hian a seng thlawn tihna a ni tiin CAG chuan a sawi.

Rs 4.40

NIB-in common carp sangha note 1 an leina man

Rs 1.70

RKVY hnuaia common carp sangha note 1 leina man to ber

Rs 119 lakhs

NIB-in common carpo a lei to em vanga sum a sen thlawn zat

64.62 lakhs

Mizoram pum a NLUP leh RKVY hnuaia common carp fingerlings (80-100mm) sem zat

 

Sangha lei to vangin NLUP hotu lian pahnihin eiruk thubuai an awrh, ACB-n finfiahna hmulo ti

_3.8.2016_04
ACB hotute chuan NIB Secretary James Lalrinchhana (MCS) leh NIB Vice-Chairman P L Thanga (IAS retd) te eiruk thubuaiah finfiahna an hmulo niin an sawi a, Chargesheet nilovin Final Report Special PC Act Court ah an thehlut niin an sawi bawk

 

TFD chhiartute chuan an la hre awm e: kum 2016 October ni 10 khan Anti-Corruption Bureau (ACB) chuan NIB Vice-Chairman PL Thanga (IAS retd) leh NIB Secretary James Lalrinchhana (MCS) lakah common carp sangha naute supply chungchangah eiruk thubuai a ziak lut a nih kha.

Kha thubuai kha common carp sangha supply a nih chungchangah ni mahsela, CAG-in supply order to uchuak a hailan vang hi ni chiah lovin, rate hman dana thil dik lo awm nia puhna chungchangah zawk a ni.

ACB hnuaia eiruk thubuai ziahluh tak tobul chu NIB khan Champhai leh Serchhip-a pilot project atana common carp sangha supply-na tur rate a bithliah tawh kha tender chhuah hranpa lova rate ngai hmanga Mizoram district zawng zawnga supply nan a hmang chhunzawm ta mai tih puhna kha a ni a.

Khami chungchangah khan sangha dil enkawltu thenkhatin complaint an thehluh hma in Right to Information (RTI) dan hnuaiah zawhna an siam a, chumi chhana ah chuan NIB Secretary-in hetianga rate ngai hman a nih chhan hi Fisheries Minister in a rawt vang leh, chu rate chu NIB Chairman JH Rothuama’n a pawm vang niin a sawi a. Mahse,TFD-in hemi chungchang Fisheries Minister BD Chakma a zawh chian chuan, Minister hian chutianga rate a rawt lo mai ni lovin, supply rate te chu Supply Board ruahman tur a nih thu a sawi thung.

Eng a pawh chu ni se, complaint a luh hnu ah ACB chuan NIB hotute pahnih lakah hian eiruk thubuai chu a ziaklut ta a, a chhui fe hnu ah kumin March ni 23 khan Final Report peih fel a nih tak thu leh Special Prevention of Corruption Act Court ah thehluh a nih thu ACB hotute pathumin TFD an hrilh a, an sawi dan chuan eirua puh te hian an hmalakna hi dan hnuaiah a ni ngei tih finfiahna lehkha phawrh tur an neih avangin an lakah chargesheet thehluh a ni ta lo a ni.

Chargesheet leh Final Report hi a inang lova. Chargesheet chu hnuchhuitute’n thubuai awrhtute chu thil an ti dik lo ngei a ni tih an hmuhchhuah hnua court-a an thehluh thin a ni a, Final Report erawh chu thubuai awrh te’n an ti dik lo ngei a ni tih finfiah theih a ni lo tihna tluk a ni a. Chargesheet a awm chuan court-in thubuai hi a ngaithla chhunzawm tlangpui a, Final report-ah erawh chuan court-in a tul a tih chuan thubuai a ti tawp thei a, chhui nawn leh turin hnuchhuitu thu a pe thei bawk.

Mahse, NIB hotute thubuaia ACB-in Final Report a thehluh chungchangah hian Special Prevention of Corruption Act Court-in thutlukna a siam tawh em tih TFD-in a bihchian chuan Special PC Act Court lam chuan Final Report hi an la dawng lo niin an sawi a, kum 2011 atanga tun thlenga he court-in a ngaihtuah mek te leh thutawp a siam tawhna case 33 zingah NIB hotute chungchang hi a tel lo niin an sawi bawk.

Special PC Act Court awmna Aizawl District Court registry ah pawh he Final Report chungchang hi hmuh tur a awm chuang lova, Court hrang hrangin an ngaihtuah tura case chi hrang hrang chhawpchhuaktu Chief Judcial Magistrate court ah pawh he Final Report hnuhma hi hmuh tur a awm chuang lo.

 

Supply rate chhui ni mahsela, sangha supply a nih loh dan leh sem a nih dana thil rinhlelhawm chhui a ni lo

TFD-in a lo tarlan tawh thin angin, ACB-in NIB hotute laka thubuai a siam hi common carp sangha supply rate chungchang a ni a, mahse, he sangha note tualchung hmun hrang hranga supply a nih danah hian thil felhlel nasa tak a awm a, chung te chu July ni 15, 2016 khan TFD-in chipchiar takin a lo ziak tawh a, hemi chungchang erawh hi chu chhuizui a nih hriat a ni lo.

He thuziaha tarlan a nih tawh angin, common carp sanga note hi NIB hmalakna in pakhat cheng 4.40-a lei a ni a, Mizoram district hrang hrangah supply a ni a. Tin, RKVY hnuaiah a man man zawk, pakhat cheng 1 leh cheng 1.70 inkara lei niin district hrang hrangah supply a ni bawk a. A vai chuan heng sorkar hmalakna hnuaiah hian Mizoram distict tinah common carp kutzungchal tiat sangha note hi nuai 64.62 lai lei a sem a ni. Mahse, TFD-in sorkar lehkha pawimawh chi hrang hrang te, Fisheries-in hetiang sangha hi an sem tia an chhinchhiahna te leh khaw hrang hranga sangha dil neitute lehkha a endik ah te chuan sangha sem a nih danah hian rinhlelh theih tam tak a awm thung.

Entirnan, Kolasib District-a Fisheries Development Officer leh a hnuaia thawk buatsaih “List of beneficiaries who received fish seeds/advanced fingerling/fingerling of common carp during 2015-16” (Kolasib District chhunga common carp sangha chi leh kutzungchal tiat kum 2015-16 chhunga dawngtute) tih lehkha ah chuan Vairengte khaw chhunga sangha dil nei mi 111 te hming a chuang a, an hming zawn chiahah hian an signature niawm tak chu a intlar thla dul bawk a.

He benficiary list ah hian Lalnunkima Ngente chuan a hming chu “Kima” tiin a sign a, B Lalrindika chuan “Dika” tiin a sign bawk a, Lalthalmuana chuan “Muana “ tiin a sign bawk a, Lalnumawii’n “Mawii” tiin a sign a, Hmingthansiami chuan “Siami” tiin a sign bawk. Tin, heng signature intlar dul te hi an awn zawng a inkar thlak vek bawk a, a hmasa bera sign tu hawrawp chu a ngil a, a dawt chiah ami chu a dinglamah a awn a, a dawt leh ami chu a veil amah a awn thung a, hetiang hian signature te hi an in awn chhawk zak zak a ni ber. Hetiang deuh tho hian Kolasib District hmun hrang hranga sangha chi leh note dawng te list hi a awm hlawm a, Saihapuia sangha dawngtute ngat phei chu an vaiin an signature hi hawrawp in ang thap a ni, Fisheries Dept lehkha a a lan dan chuan.

Vairengtea sangha note dawng te zinga pahnihna hi Lalnunkima Ngente a ni a, ani hi khatih laia Vairengte Fisheries Association Secretary a ni nghe nghe a. TFD-in a biak chuan a hming chu “Kima” tia a sign ngai reng reng loh thu sawiin, a hming leh a hnam hming a ziak tel ngei ngei tih a sawi thung.

Tin, Fisheries Dept chhinchhiahna ah an dawng nia a lan laiin khaw pariata Village Council hruaitute leh sangha dil neitute intelkhawm hotute chuan common carp hi an dawng lo a ni tih ziakin an chhinchhiah vek nghe nghe a.

Hetianga common carp sem a nih dan hi TFD chuan nikum July thla khan ziak mahsela, Fisheries Dept hmalaknaa eirukna thil awm nia hriat chhuichian a nihnaah hian dawngtute list phuahchawp ngei nia lang hi chhui tel a ni lo.

For blog
Fisheries Department beneficiary list a sangha note dawngtu signature leh ama signature dik tak chu a inang lo hle
s-2
Saihapui khua a NLUP dawngtute signature hawrawp a inang hlawm hle, Fisheries lehkhaa a lan dan chuan

 

NLUP mau chi lei naah Forest-in cheng nuai 48 seng thlawn

wp-1490429354236.jpg

NLUP first phase atanga fourth phase thleng khan Forest Department hnuaia mau ching tura thlan mi 3,193 an awm a. Anni tan hian Forest chuan mau chi (tissue culture seedling) 100 theuh lei sakin an hnenah a hlan a. Heng mau chi te supply tur hian Chief Conservator of Forests chuan seedling pakhat cheng 28-in Tamil Nadu state-a Hosur khua ami Growmore Biotech Ltd hnenah supply order a pe a, order ah hi chuan seedling pakhat hi cheng 22.50 a lei tur niin a lang thung.

Mau chi mamawh zat hi nuai 3.19 ni mahsela, Forest hian nuai 1.36 lai a lei chuang a, a lei chuan vang hian cheng nuai 31 a tul lovah a hmang ta a, heng a chi lei chuan te hi enga tana hman nge an nih tak pawh sawifiahna a awm chuang lo niin CAG chuan NLUP chungchang a zirchian naah a ziak.

Tin, nursery atanga a phun na tur hmuna sawn kualna tur sum dah hran a awm reng chungin Forest chuan heng mau chi te sawn kual nan hian cheng nuai 17 lai a seng bawk a, hetianga sum senna hi a tul lova, mau chi mamawh aia tam lei leh phun sawn nan hian a tul lovah department hian cheng nuai 48 lai a seng niin CAG chuan a sawi bawk.

3,193

NLUP hnuaia mau chi dawngtu awm zat

100

NLUP mau dangtute mau chi dawn zat theuh

1,36,000

Forest-in mau chi a lei chuan zat, hman an nih na a chhinchhiah loh

Rs 31 lakhs

Forest-in mau chi a lei chuan vanga sum a sen thlawn zat

 

Japan-a zirlai tirhna’n NLUP sum cheng vbc 1.65 hman a ni a, zirlai te fee erawh heti zat a ni lo

JapanTunhnai khan TFD chuan Japan-a Mizo zirlai 15 te tirh an nih chungchangah tirh an nih na tura hmalatu consultant te sawi dan leh an tirhna college website bakah fee receipt hrang hranga a lan dan a in persan hle tih a tarlang tawh a.

Heng zirlaite tirh an nih chungchanga hmala tu leh an college fee atana sorkar sum hman lailawk anih na tura hmalatu ber nia lang North East Educational Consultants chuan zirlai pakhat senso tur hi cheng nuai 11 zel a ni a tih laiin, an zirna Kokoro College website ah thung chuan an course fee hi cheng nuai 7.65 emaw bawr vel a ni zawk tih a in tarlang a. Hemi chungchangah hian MNF thalai te pawhin ram dang atanga he college-a lehkha zir te fee receipt a tlangzarh nghe nghe a, fee hi cheng nuai 11 nilovin nuai 6 leh nuai 7 bawr vel ani tih an sawi a ni.

Hetianga NLUP sum hmanga Mizo zirlaite Japan-a thawn an nih dan hi CAG pawhin a chhuichiang a. CAG chuan NLUP hmalakna sum chu sorkar laipui tum anih thu leh sorkar laipui danah chuan sum reng reng chu sanction anih na atan lo chuan hman tur a ni lo tih anih laiin Mizoram sorkar hian NLUP hnuaia hmalakna nilo, Japan-a zirlai tirh nan cheng vbc 1.65 lai a pawt peng a ni a ti a.

He sum hi Labour Department-in NIB hnen atangin a puk a, Finance Department-in a remtih huna a hnawhkhah velah sum hi NIB hnenah rulh leh tur ani tiin Labour hi a in tiam nghe nghe a. Mahse, he sum puk rulhna tur hi December 2016 thleng kha chuan Finance hian Labour hnenah a la pechhuak lo niin CAG chuan a ziak. TFD-in June ni 7 khan Finance Department hotute hemi chungchang hi a zawt a, Labour hian dilna mumal tak an hnenah a la thlen loh avangin hnawhkhah na tur pawh chu engmah an la sanction lo niin an sawi.

Rs 11 lakhs

NEEC hmalakna a NLUP sum puk anih a Japan-a Mizo zirlai pakhat zel senso

Rs 7.65 lakhs

Japan-a Mizo zirlai te thawn an nihna course fee (zirlai pakhatah)

Rs 50.25 lakhs

Zirlaite Japan-a thawn an nihna NLUP sum hman zat leh college fee inthlauhna

 

Pung awmlo a NLUP sum puk tute’n za-a 18 chauh rul, sorkarin an sum puk hman dan vil lo hrim hrim

NLUP sum puk tir hi Japan-a zirlai thawn chungchangah chauh hian a ni lova, NIB hian a pung awm lovin mi 5 hnenah cheng vbc 3.77 lai kum 2012 leh 2014 inkar khan a puk tir a. Tin, Horticulture leh Vety Department te pawhin NLUP sum cheng vbc 2.68 lai chu mi 25 hnenah an puk tir bawk a, a vaiin NLUP sum pung awmlo a puk tir hi cheng vbc 6.64 a tling a, a puk hnem ber chu Hnamchhantu Pawl a ni a, he pawl hian cheng vbc 2.3 a puk a ni.

Heng pung awm lova sum puk tu te hian kumin September thla ral hma hian an rul vek tur a nih laiin March 2016 thleng kha chuan a vaiin cheng nuai 94 (18%) chauh an la rul a, vbc 5.02 lai rulh an la hmabak.

CAG chuan hemi chungchang hi NLUP a chhuichianna ah a ziak lang a, sum puk tu te hi kum tin thin tur nimahsela, kum hnih lai chu thin an ni lo a ti a. Tin, NLUP sum puk tu te zinga tam tak hian an sumdawnna te a hlawhtlin loh thu te an sawi bawk a, an rulh theih a rinawm loh thu a CAG chuan a sawi bakah, NLUP sum puk tu te hian an sum puk hi a hmanna turah an hmang reng em tih pawh sorkarin a vil lo hrim hrim a ti bawk.

25

NLUP sum pung awm lova puk tute

Rs 6.64 crore (vbc)

Pung awm lova NLUP sum puk tir zat

Rs 94 lakhs

NLUP sum puk tute’n an rulh zat

Rs 5.02 crore (vbc)

NLUP sum puk tute’n an la rulh hmabak


One thought on “Supplier-te pheichham NLUP

  1. Nlup leh pawisa sem policy reng reng haw fai deuh vektu mihring hi aizawlah kan awm nual. Sum tu thawhchhuah mah ni lo a thlawna sem hian ram chhungah pawisa hlutna a ti tla hniam a, chhiah te a ti sang a sawrkarin rate a control leh bawk si lo. Nlup sum sem hi a dawngtu leh dawng ve lo te pawhin kan vai tawrh ta tlawk tlawk mai a nih hi.

    Like

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s